Mateo 20
20
Ema Jesús máimikuticha'i ema achane riku tiuri eta mawachachira ena tikaematanechana
1“Te jena sácheyare níjaraka'enapa eta íkuchiyare eti, takuti eta mawachachira'i ema achane tikaye'e eta ichape quinta úwakiji naye'e ena tikaemataneara'iana. Ema maka mayatiru'i tipaika matanuka ena achaneana tikaemataneanayare'i maye'e. Tírerekanayare'i eta uwa. 2Te títukawapa ena ajairana, mametakawakapa eta mawachachirayare'i te sache. Mawanekawakapa tiyanana taye'e eta náireresi'ayare'i. 3Tási'a, makamunuicha'awa ena apamuriana achane. Te las nueve sache, tiyanawarepa te plaza, máima'aineware ena apamuriana ajairana máematanereana'i. 4Máichawakapa: ‘Eyana eti apanaware ekaematane te nuye'e uwakiji, tiuriyare eta nuwachachira'eyare.’ Tási'a ena tiyananawarepa tírerekana'i. 5Te tupiriku'apa eta sache, tiyanawarepa matanuka ena apamuriana, títukawaware, máewatamuri'aware tírerekanayare, te las trespa sache, tiápechawaware tiyana títukawaware ena apamuriana, énerichuware tírerekanayare'i. 6Te las sínkupa sache, tiyanaware tiúchuka'i taye'e eta plaza, títukawaware ena apamuriana ajairana máematanereana'i, tási'a, máichawakapa: ‘¿Tája'a takayema tájina ématanena'ini puiti jena sache?’ 7Ena najikapapa: ‘Nájina náechejiaka'avi'ini.’ Tási'a, ema máichawakapa: ‘Eyana eti apanawa írereka ánaki te nuye'e quinta úwakiji.’
8“Taka'e, te yátipa, ema maeja'aru maichapa ema mamusura ema techa'i eta ematanekana: ‘Pichu'awaka ena kaemataneana'i, piwachachawakaya namutu tinapukanayasera piwachachawaka ena naekenereruana tisiapana, tekene'anapa piwachachawaka ena mainapureana'i tisiapana'i.’ 9Tási'a, ena nasiapakeneana'i te las sínkupa sache, mawachachawakapa ema achane eta étapewaka'i eta reale, takutirichu'i eta nawacha'i ena tikaemataneana'i tamutu sache. 10Taka'e, te tikawachanapa ena náinapureana'i tisiapana, náima'apa ena takutirichu'i eta nawachana'i ena náekenererukeneana'i. 11Tási'a, tisemanapa maye'e ema nákenu'i, techejijiakawanapa, 12ánipa naka'e: ‘Ena nani náekenereruana'i títekapana, vikutiwachawakaichu'i eta nawacha'i, etanaine'ineni ura eta nakaematanera'i. Takuti'ichu'isera eta viwacha'i viti vínapureana'i. Wá'ikene táurikaima'i eta juka, taicha ichapemuri'i eta vikamichira'i víti eta táijurewa murakakene eta sache. Táurika vikachurikawakayare'ini ena eta nawacha'i.’ 13Émasera ema nákenu majikapawakapa: ‘Wá'ira nukaetema'éma'i eti, énaipa ena náekenereruana'i, wá'iware nukaetemawakaima'i. Tínuna'i eta nuwachachira'e'i étapewaka'i eta reale níjaraka'e, wa'i ekusema. ¿Wá'isera pecha eta vitratune'i eta nuwachachiraviyare'i eta etana sache? 14Ésamirikawachucha eve'achucha eta juka ewacha'i eyanapa eti. Nuti nuwachachaya ena apamuriana takutiyarechu eta ewacha'i eti, 15núti néchinawa taicha nuye'eichu'i eta plata. Nuwara'a ákutikaka'ini eta ewachana emutu. ¿Eti ekapinarunupapuka eta núriwa'i naye'e ena nani?’
16“Ene naka'eyare te jena sácheyare, nákani náekenereruana'i té'ikanuana, ena nasapi'ayare tínapukana. Tási'a, nákani náinapureana'i, nasapi'ayare tékene'anayare.”
Ema Jesús mapa'epa máechejisi'a eta máepenirayare
(Mc 10.32-34; Lc 18.31-34)
17Ema Jesús makaiju'epa'i te achene te Jerusalén, maichu'awakapa ena dósekeneana máimitureana, tási'a máichawakapa:
18–Íma'a puiti eti, vikaiju'eyare te Jerusalén, ánaki nakaratakainapa ema Machicha ema Ajaira. Ena tikaratakanayare, énayare ena tachutiri'ana ena tiyujarakara'iana, tási'a énapa ena escriwánuana, énainapa tikapakanayare 19tási'a naíjararekayare naye'e ena suntaruana rumanuana, nakaeka'inapa ema, ena naéstakainapa, nae'ainapa, tási'a naemetatarekainapa te crusu, tási'asera te mapanakenenapa sache, téchepukainapa te maékari.
Ema Jesús majikapa esu naena ema Santiago émapa ema Juan
(Mc 10.35-45)
20Témeña'awapa esu naena ema Santiago émapa ema Juan, suámawakapaipa'i ena, tépuyukapa esu te mamira'u ema Jesús, suyaseakayare'i eta makatajika'ini. 21Ema Jesús mayaserekawakapa:
–¿Tája'asika ekamunu?
Esu suíchapa:
–Nuwara'a pákachaneni ena nuchichanaveana taye'e eta péjakapa te piáwakureyare akenukavirayare, náejaka'ini te pichakaya, eñi éñina te piwaure, eñi apana te sapa.
22Ema Jesús majikapawakapa:
–Eti, wa'i echa eta eyasearapiana'i. ¿Erata'a ijarakawa eta ekamichiraina, eta ekatajiwairayare, ekutinuyarepuka núti?.
Ena najikapapa:
–Virata'a vikamicha.
23Ema Jesús, máichapa:
–Eti yátupi ichape eta ekatajiwairaya, vikutikakaya eta nakapasira'aviyare. Étapasera eta éjasirayare eta te nuchakaya, waipa nútina necha nukaejaka'e'ini. Ema Tata nukaiyakene, éma'i tinerejikayare'i ena nujupa'anayare.
24Taka'e, eta nasamira'i ena diéskeneana maimitureana, tisemanapa naye'e ena apinana kaparapekakana. 25Émasera ema Jesús máichu'awakapa, tási'a máichawakapa:
–Échaichu'i eti, ena akenukana taye'e eta awasare, muraka eta nakawanairipira. Énaipa ena tachutiri'ana, tétavikawa'i tisuapakareana'i eta nakawakurera'i ena. 26Wá'isera ekuka'e eti, naye'e ena echamuriana. Mákani tímerekawa'i tikapika'upana, takamunu'i máitatiwakayare ena apamuriana, 27tási'a te etiari'iwarepuka eti ewara'a'i ínapuka, takamunu'i nawanara'eyare'i. 28Taicha éneichu'i maka'e'i ema Machicha ema Ajaira, wa'i étaina taímiteka'ini makaitatikasi'ini, émayare'i títati'e eti.
Ema Jesús makanarakawaka ena apinana púchukiana
(Mc 10.46-52; Lc 18.35-43)
29Te tiuchukanapa ena te Jericó, kamuriana'i ena achaneana te'ikanapa'i ema Jesús. 30Apinana ena púchukiana, téjakana'i te achenechakaya, te nasamapa ema Jesús eta mánukuirapa'i, tipiararekanapa:
–¡Tata, pikatajika'avipaini pájapanu'avi piti'ipa yátupikenevi'i Cristo!
31Ena achaneana nakawakapa ena natiari'ikeneana'i, apaesa námatina'ini, enasera tipiararekapananapa muraka:
–¡Tátachicha, pítikeneipa yátupikenevi'i Cristo, pikatajika'avipaini pájapanu'avi!
32Taka'e, ema Jesús eta masamirawaka'i, titupi'apa. Máichu'awakapa ena púchukiana. Mayaserekapa:
–¿Tája'a pikamunu nuye'e?
33Ena najikapapa:
–Tátachicha, nuwara'a pikaimairikanupaini.
34Ema Jesús majapanuwakaine'i, máemama'aukichawakapa, enewanerine'i tímairirikana. Tási'a, náe'ika'pa ema Jesús.
Currently Selected:
Mateo 20: IGB
Highlight
Share
Copy
Want to have your highlights saved across all your devices? Sign up or sign in
Nuevo Testamento Ignaciano © Sociedad Bíblica Boliviana, 2004.
