Yohane 15

Yesu empesha ine-ine

1“Nebo ndi mpesha ine-ine. Bata ebalimi. 2Umusambo onse uutakotwalapo ifitwalo bakoutema nokuufumyako, nangulya uukotwala bakouwamya ukwebati ukatwale ifitwalo ifinji. 3Mwebo muli abawamikwa kale muli nga mashiwi nsosele kuli mwe. 4Ikalilileni muli nebo, nandibo muli mwebo. Ukubati nimfilya umusambo tekuti utwalepo ifitwalo apawenka nga taulipo kuchiti ichikulu, namwebo tekuti mutwalepo ifitwalo nga tamukoyikalapo muli ne.

5“Nine mpesha, mwebo muli misambo. Uyo uukoyikala muli nebo, nandibo muli ye, eukotwala ifitwalo ifinji pakuti mwebo tamungachitapo akantu nangu kamo ukwambula ine. 6Kati umuntu takoyikalililapo muli nebo, akoposwa kunse kubati musambo uwaputulwa, elo akuuma. Imisambo iili mfilya abantu balayilonganya pamo nokuyiposa mumulilo elo ilapya. 7Nga mukoyikalilila muli nebo, namashiwi anji ayikala muli mwebo, fumbeni chonse incho mukofwaya, elo chikoyisa kupelwa kuli mwe. 8Bata bakochinshikwa muli nchi ichakuti mutwale ifitwalo ifinji, elo mukoyisa kuba abakusambila banji. 9Nalimutemwesha ukubati nimfilya Bata bantemwa. Ikalilileni mwebo mukutemwa kwanji. 10Nga mukolama amafunde anji, mwakwikala mukutemwa kwanji, kubati nimulya nalamine amafunde aku Bata nokwikala mukutemwa kwabo.

11“Mfi fintu nasosa namwe ukuti ukusekelela kwanji kube muli mwebo, nokuti ukusekelela kwenu kupitilile. 12Ifunde lyanji nindi ilyakwebati mutemwane ukubati nimulya namutemwa. 13Takupo muntu uukwete ukutemwa ukukulu ukuchila nku ukwakuti umuntu engafwila ifibusa fyakwe. 14Mwebo muli fibusa fyanji nga mukokonka amafunde anji. 15Lelo nshikomwita mwebo ababomfi, pakuti umubomfi teshibapo ifyo shikulu wakwe akochita. Nomba nkomwita mwebo ifibusa fyanji, pakuti fyonse ifyo naumfwa kuli Bata nalimubushishe. 16Mwebo tamwansalilepo iyowo, kuntu ninebo uwamusalile. Nalimusalile ukuti mutwale ifitwalo, ifitwalo ifikalilila. Elo chonse icho mwakulomba kuli Bata mwishina lyanji mwakupelwa. 17Ifunde lyanji lyakuti, mutemwane.

Abamuchalo bakumupata

18“Nga abamuchalo bamupata, mwibukishe ukuti babalile ukupata nebo ulo batalamupata. 19Nga mwali abamuchalo, ichalo nga chalimutemenwe ukubati abene. Nomba nebo nalimusalile ukufuma muchalo, tamuli nomba abamuli nchino chalo. Echo ichalo nomba chikomupatila. 20Ibukileni ifyo nasosele namwe ukuti, ‘Umusha tali umukulu ukuchila shikulu wakwe!’ Nga balinchushishe nebo, epo bakumuchusha namwe kumo. Nga basungile ukusambisha kwanji, elo bakusunga nokusambisha kwenu. 21Nomba mfi fyonse bakumuchitila mwebo pamulandu weshina lyanji, pakuti tabakomwishiba uyo uwantumine. 22Nga chakuti nshayishile nokusosa nabo nga tabali nako ukubifya. Nomba tabakwetepo ichakusosa pakubifya kwabo. 23Umuntu onse uwapata nebo, apata na Bata. 24Nga nshachitilepo milimo iyishachitwapo kale nomuntu, nga tabakwata ukubifya. Nangu baliibona imilimo yanji, kuntu balimpata nebo pamo na Bata. 25Mfi fikochitika ukubati nimulya amashiwi alembelwe mumafunde akoti, ‘Balimpatile ne uutakwetepo nomulandu!’#Amal. 69.4

26“Kafwa akwisa, e Mupashi Wabuta, uwo nakutuma kuli mwe ukufuma kuli Bata. Ewakuba mwanamboni wanji. 27Namwe mwakuba bakamboni banji pakuti mwaba nandibo ukufuma pakutatika.

Currently Selected:

Yohane 15: LalaNT

Highlight

Copy