Mateyo 10

Abakusambila ikumi na babili abaku Yesu

(Mk. 3.13-19; Luk. 6.12-16)

1Yesu ayitile abakusambila bakwe ikumi na babili. Elo abapele insambu shakufumya imipashi iibi,#10.1 imipashi iibi: imipashi nji yali yakweba ati nga yayinjila mumuntu, ilamulenga ukuba uyo mutangalomba nakwe, ekwebati uutasangululwapo. nokuposha amalwele aapusene-pusene. 2Nga emashina abatumwa ikumi na babili: (Simoni uwitwa Petulo) na Andileya wakwe, Yemusi nawakwe Yohane bamwana Sebedi. 3Filipo na Batolomeyo, Tomasi na Mateyo uwamusonko, Yemusi mwana Alifeyo na Tadiyasi, 4Simoni uwakwipakisha mufyachalo na Yuda Isikaliyoti uwayembwile Yesu.

Yesu atuma abatumwa ikumi na babili

(Mk. 6.7-13; Luk. 9.1-6)

5Mba ebakusambila ikumi na babili abo Yesu atumine nokubakonkobesha ati, “Mwiyako kubenafyalo, nangula ukwinjila mumushi wabena Samaliya. 6Nomba muye bwaka kubana Baisilaeli abo abali kubati nimbelele ishaluba. 7Kamuyeni mukubilisha ati, ‘Ubufumu bwakumulu bwapalamina.’ 8Muye mukuposha abalwele, ukubusha abafwa, ukuposha abafyona nokufumya imipashi iibi. Mwapokela bwaka, namwebo mukapele bwaka. 9Mwipintapo ndalama mumatumba enu nangu nigolide, nangu silubale nangu indalama. 10Mwipintapo itumba lyalwendo, nangu amalaya abili, nangu inkwabilo shibili nangu inkoli pakuti uwamilimo alila mumilimo yakwe.

11“Ulo mwayinjila mumusumba nangu mumushi, mufwayemo umuntu uungamupokelela bwino. Mwikale nakwe ukufikila ulo mwakufumamo. 12Ulo mwayinjila munanda mulokusosa ati, ‘Umutende ube namwebo.’ 13Abali munanda nga bamupokelela bwino, umutende wenu wikale nabo. Nga chakuti tabamupokelelepo, lekeni umutende wenu ubwelele kuli mwebene. 14Nga takwakabepo umuntu nangu umo uwakumupokelela nangu ukumfwa amashiwi enu, mukakunte ulukungu kumakasa enu pakufuma munanda iyo nangu mumushi uyo. 15Nachine nkomweba ati pali nkalya kasuba akabupingushi Lesa akubakwatila inkumbu abena Sodomu nabena Gomola ukuchila abantu bamuli ngulya musumba!#Ukut. 13.13; 19.24-28

Ifyamachushi aakoyisa

(Mk. 13.9-13; Luk. 21.12-17)

16“Umfweni! Nkomutuma ukubati nimbelele pakati kamimbulu. Echo chenjeleni kubati ninsoka nakambi mufuke imitima kubati ninkunda. 17Chenjeleni nabantu, pakuti bakamutwala mufilye nokumupuma mumananda aakulombelamo Lesa. 18Bakumutwala kubapingushi nakumfumu pamulandu waku nebo. Elo mwakunchitila bukamboni kuli bo nakubenafyalo. 19Nomba ulo balikumwikata, mwilokusakamanapo mwati, ‘Findo tukoya kusosa?’ Nangula mwati, ‘Tukoya kulondolola shani?’ Pantu Lesa akumweba ifyakusosa panshita yenka njilya. 20Pakuti temwepo mwalikusosa iyowo, kuntu Mupashi waku Bawishinwe#10.20 Mupashi waku Bashinwe: ekweba ati Umupashi Wabuta. bakumulu ewalikusosela muli mwe.

21“Munshita njo wabo akwipayisha wabo, wishi naye akwipayisha umwana. Elo abana nabo bakwimina abafyashi babo nokubepayisha. 22Abantu bonse bakumupata pamulandu waku nebo. Nomba uwakushipikisha ukufika nakumupwilo ewakupuluka. 23Nomba nga bamuchusha mumushi umo, butukileni kuli umbi. Nachine nkomweba ati, ulo mutalapwilisha imishi yonse iyamu Isilaeli, Umwana wa Muntu alikwishile kale.

24“Napo tamwayishibapo ukwebati uwakusambila tachilapo pamusambishi wakwe, nakambi umusha naye tachilapo pali shikulu wakwe? 25Chiweme ukwebati uwakusambila alingane nomusambishi wakwe, elo umusha naye alingane nabashikulu bakwe. Kati umukulu wananda bamwita ati ni Belesebule,#10.25 Belesebule: ekwebati Umukulu wa mipashi iibi. palibufi abamunanda yakwe?

Uulingile ukutina

(Luk. 12.2-7)

26“Kanshi mulokutinapo bantu. Pantu tapapo akantu akafimbwa akatakafisuluke, nangula ichamubumfisolo ichitakeshibikwe. 27Icho nkomweba mumfishi, mukachisosele pakasuba, nanchilya mukoumfwa mukantepe-ntepe fyakumfwikila pamulu wamutenje wamananda. 28Mwitinapo abo abepaya umubili, kuntu tabakwetepo ifiso ifyakwipaya umupashi. Echo tineni uyo uwipaya umubili pamo nomupashi mumulilo uutashimapo. 29Napo ututiti tubili tatushitwapo ikobili limo? Napali nto utunini takubapo nangu kamo akawila panshi ukwambula Bawishinwe ukwishiba. 30Nangu nimwebo imishishi yamumutwi wenu yalipendwa yonse. 31Kanshi mwitinapo iyowo, pakuba mwebo mwalichindama ukuchila patutiti utwinji.

Ukusumina nokukana Yesu

(Luk. 12.8-9)

32“Umuntu onse uwakunsumina pamenso abantu, eye nandibo nakwisa kumusumina pamenso aku Bata bakumulu. 33Nomba onse uwakunkana pamenso abantu, nandibo nakwisa kumukana pamenso aku Bata bakumulu.

Abantu bakupatana pamulandu waku Yesu

(Luk. 12.51-53; 14.26-27)

34“Mwilokulangulukapo ukwebati nalileta umutende pachalo. Temutendepo naleta iyowo, kuntu inkondo. 35Pantu nayisa mukupatanya umwana umwalalume kuli wishi, umwanansungu kuli banyina, nomulokashi kuli banyinafyala. 36Pakuba abalwani bamuntu bakuba benka abalupwa lwakwe.

37“Umuntu uwatemwesha bawishi nangula banyina ukuchila nebo talingilepo ukuba umuntu wanji. Elo na uyo onse uwatemwesha umwana wakwe umwalalume nangula umwanakashi ukuchila nebo, talingilepo ukuba umuntu wanji. 38Onse uyo uutapintapo umutashi wakwe nokunkonka, talingilepo ukuba uwakusambila wanji. 39Onse uufwaya ukupulusha ubumi bwakwe, ewakubuposa, nowakuposa ubumi bwakwe pamulandu wanji, ewakubupulusha.

Ukulambulwa

(Mk. 9.41)

40“Onse uwapokelela mwebo, nine apokelela. Elo onse uwampokelela ekwebati apokelela na Bata abantumine. 41Onse uwapokelela umusoseshi uwatumwa na Lesa akupokelela ichilambu ichakubati chamutumwa waku Lesa. Elo onse uwakupokelela uwalungamikwa pantu mulungami, akupokelela ichilambu chakwe. 42Na muntu uupela amenshi bwaka akunwa kuli uyo umunini pantu wabakusambila banji, nachine nkomweba ati, akapokelela ichilambu chakwe.”

Currently Selected:

Mateyo 10: LalaNT

Highlight

Copy