Mateyo 9
9
Yesu aposha umuntu uwauminina umubili
(Mk. 2.1-12; Luk. 5.17-26)
1Ulo Yesu ayinjile mubwato aabukile kwishilya lyaku bemba nokufika kumushi kwabo.#9.1 kumushi kwabo: nku niku Kapenaumu. (Pendeni mu Mat. 4.13). 2Nkulya abantu bambi bamutwalile ichilema ichatembelwe pamachila. Ulo Yesu abwene ichichetekelo chabo, asosele kuchilema ati, “Shipa we mwana wanji! Amabifyo obe anakililwa.”
3Pakumfwa mfi, bambi abasambishi bamafunde akwa Mosesi batatikile ukusoshanya bati, “Ngu muntu akopontela Lesa.”
4Bwangu-bwangu Yesu ayishibile ifyo balikulanguluka. Elo asosele kuli bo ati, “Nindo mukolangulukila ifibipile mumitima yenu? 5Nichisa ichayanguka ukusosa ati, ‘Amabifyo obe anakililwa,’ nangula ukwebati, ‘Ima wende?’ 6Pakuti mwishibe ati Umwana wa Muntu ali nensambu muchalo ishakunakilila amabifyo.” Elo aebele ichilema ati, “Ima bula amachila obe ulokuya kunanda yobe.”
7Bwangu-bwangu umwalalume ngulya alimine nokuya kunanda yakwe. 8Ulo abantu babwene mfi, balitinine. Elo bachinshikile Lesa uwapela abantu insambu ishili nga mfi.
Yesu ayita Mateyo
(Mk. 2.13-17; Luk. 5.27-32)
9Ulo Yesu afumine nkulya, abwene umwalalume uwalikwitwa Mateyo alikele pamulimo wakwe munanda yamusonko. Elo Yesu amwitile ati, “Nkonka.”
Mateyo alimine nokumukonka.
10Ulo Yesu alipakulya munanda mwa Mateyo, abakusonkesha abenji, nabatalikusunga Mafunde akwa Mosesi, balishile mukulya na Yesu nabakusambila bakwe. 11Ulo Abafalisi babwene mfilya, basosele kubakusambila bakwe ati, “Mba nindo umusambishi wenu akolila pamo nabakasonkesha nabatasunga Mafunde akwa Mosesi?”
12Ulo Yesu aumfwile mfilya, asosele kuli bo ati, “Abakosele tabafwayapo ing’anga iyowo, kuntu abalwele. 13Kamuya mukasambilile ifyo asosa Amalembo aku Lesa ati, ‘Nkofwaya ichisa, te chipupopo chanama iyowo.’ Tanshayisapo mukwita abaololoka imitima, sembi imbifi.”#Hos. 6.6
Ukuyikanya ukulya
(Mk. 2.18-22; Luk. 5.33-39)
14Ulo abakusambila bakwa Yohane bayile kuli Yesu, balimufumbile ati, “Mba nindo fwebo na Bafalisi tuyikanya ukulya libili-libili, nomba abakusambila benu tabayikanyapo ukulya?”
15Yesu abasukile ati, “Napo abayitwa kubwinga kuti bakolila ulo bali nanshibwinga? Nangu panini. Nomba akasuba kakwisa ulo nshibwinga akupintwa pali bo, elo bakuyikanya ukulya.”
16Elo Yesu apitilile mukusosa ati, “Takupo umuntu uubilila ichikamba chansalu yabwangu pelaya lyakale. Pantu ichikamba kuti chatunkana nokulepula ilaya, nechipunda kuti chakulilako. 17Elo tabetulwilapo waini wabwangu mumatumba ampapa shakale, pantu nga bachita mfi, impapa kuti shalepuka, elo waini kuti aswila panshi, namatumba nawo kuti aonayika. Echo waini wabwangu betila mumatumba abwangu, elo fyonse fibili fingasungwa bwino.”
Yesu abusha umwanansungu, aposha nomwanakashi
(Mk. 5.21-43; Luk. 8.40-56)
18Ulo Yesu alikusosa mfi, kwayishile umukulu wananda yakulombelamo Lesa, nokumufukamina nokuti, “Umwana wanji umwanansungu afwa lwenka nduno. Nomba katiyeni ukabike amaboko obe pali ye ukuti abe nobumi.”
19Penkapo, Yesu alimine, nabakusambila bakwe balimukonkele.
20Elo pali umwanakashi uwalikulwala umukunko pamyaka ikumi na ibili. Ngu alishile kunuma yaku Yesu nokukumyako kwilaya lyakwe. 21Mumutima wakwe alikuyisosha ati, “Nga nakumyako bwaka kuchakufwala chakwe, epela nkopola.”
22Penkapo Yesu alichebukile nokumubona. Elo asosele kuli ye ati, “We mwana wanji, shipa, ichichetekelo chobe chakuposha.” Elo umwanakashi alipolele penkapo.
23Ulo Yesu afikile kunanda yamukulu ngulya, abwene abalikulisha bamitolilo#9.23 abali kulisha bamitolilo: Kwali abantu abapelwe umulimo uwakulosha pamalilo. Bo abali kulisha bamitolilo, balikuya nambalya abakulosha (Pendeni muli Yelemiya 9.17; 2 Mil. 35.25). nebumba lyabantu balikulosha. 24Elo Yesu asosele ati, “Fumenimo! Ngu mwanansungu tafwilepo, alele bwaka utulo.” Abantu bonse balimusekulukile. 25Ulo ibumba lyafumine panse, Yesu ayinjile munanda nokwikata kukuboko kwaufwile. Naye alibukile. 26Ululumbi pafyo Yesu achitile lwalisalangene konse-konse.
Yesu aposha impofu shibili
27Ulo Yesu afumineko, abalumbwana babili abali impofu balimukonkele nokubilikisha ati, “Yesu, We mwana wakwa Davide, tukwatileni inkumbu.”
28Ulo ayinjile munanda imbi, impofu nshilya shalishile kuli Yesu. Elo ashifumbile ati, “Napo mukochetekela ukuti ndikwete ifiso fyakumuposha?” Nasho shalimwasukile ati, “Ina, Bashikulu!”
29Elo akumishe amenso abo nokusosa ati, “Chibe kuli mwebo ukulingana nokuchetekela kwenu.” 30Elo batatikile ukubona. Epo Yesu alibakonkobeshe ukwinekantu ati, “Tekweshapo ukubushako umuntu nangu umo.”
31Nomba bo, bayile ulo babilisha. Elo nolulumbi lwaku Yesu lwalisalangene muchalo chonse.
Yesu aposha chibulu
32Ulo abalalume bafumineko, abantu bambi baletele kuli Yesu chibulu, uwali nomupashi uubi. 33Yesu ati afumye umupashi uubi ngulya, uwali chibulu atatikile ukusosa. Elo nebumba lyabantu lyalishimbilwe nokuti, “Tatwabonapo ichamusango ngu ukuchitika ukufuma nakale muno Isilaeli.”
34Nomba Abafalisi basosele ati, “Akofumya imipashi nji mwishina lyamukulu wamipashi iibi.”
Yesu abelako abantu inkumbu
35Nomba Yesu aendele konse-konse mumisumba namumishi mukusambisha mumananda aakulombelamo Lesa. Alikubilisha Ubutumi Bwabufumu bwaku Lesa nokuposha amalwele aapusene-pusene. 36Ulo abwene amabumba abantu, aliyakwatile inkumbu pantu bali abanaka nokuchula kubati nimbelele ishitakwetepo chembela. 37Elo asosele kubakusambila bakwe ati, “Ubulobololo bukulu, kuntu abakulobolola bache. 38Echo lombeni kumwine wababulobololo ukuti atume abakulobolola.”
Currently Selected:
Mateyo 9: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
