Mateyo 14
14
Imfwa yakwa Yohane Mubatishi
(Mk. 6.14-29; Luk. 9.7-9)
1Pali njilya nshita imfumu Helodi yalyumfwile umunkunta waku Yesu. 2Elo yasosele kuli bachilolo bayiko ati, “Ngu ni Yohane Mubatishi abukile kubafwa. Echo akwatile ifiso ifyakuchita ifintu ifikulu.”
3Pakuti Helodi ayikete Yohane nokumukaka, amubika namuchifungo pamulandu wakwa Helidiyasi muka Filipo, wabo wakwa Helodi. 4Pantu Yohane alikweba Helodi ati, “Chalibindwa ukupa mukawenu.” 5Epo Helodi alikufwayila ukwipaya Yohane, kuntu alikutina abantu pantu balikusosa ati, Yohane musoseshi.
6Elo pakasuba kakuchinshika ukufyalwa kwamfumu Helodi, umwanansungu mwana Helodiyasi alikushana pabantu. Na Helodi atemenwe ukwinekantu. 7Elo Helodi alapile nokusosa kumwanansungu ati, “Chonse icho ukolomba nkokupela.”
8Ulo banyina bamwebele ichakulomba ngu mwanansungu, aebele Helodi ati, “Nkofwaya nduno lwenka mumpele umutwi wakwa Yohane Mubatishi mumbale!”
9Elo Helodi ayiketwe nechikonko ukwinekantu, kuntu umulandu wakulapa pachintu-bwinji ichali nakwe pakulya, tafwayilepo ukuti amukanye. 10Elo atumine muchifungo uwakuya kuputula umutwi wakwa Yohane. 11Elo aletele umutwi mumbale nokupela umwanansungu. Naye atwalile banyina. 12Abakusambila bakwa Yohane balishile nokupinta ichitumbi chakwe nokuchishika. Elo bayile kuli Yesu nokumushimikila.
Yesu alisha abantu amakana asano
(Mk. 6.30-44; Luk. 9.10-17; Yoh. 6.1-14)
13Ulo Yesu aumfwile mfi, alifumineko nokwinjila mubwato nokuya kuchifulo chimbi ukushingilile, ukwakwebati ekale enka. Amabumba abantu pakumfwa ati Yesu aya, alifumine mumishi nokupita kumulundu nokumukonka. 14Ulo Yesu apatukile mubwato, abwene ibumba ilikulu ilyabantu. Elo alibabelele ichisa, epo atatikile ukuposha abalwele babo bonse.
15Ulo akasuba kawile, abakusambila bayile kuli Yesu nokusosa ati, “Boneni, akasuba kawa, namuno tuli nimumpanga. Bebeni abantu baye mumishi bakayishitile ifyakulya.”
16Nomba Yesu asosele ati, “Tabalingilepo kuya iyowo. Mwebo mwenka bapeleni ifyakulya!”
17Nabo baasukile ati, “Nga fwe kuti twachita shani? Tukwete imifuba isano bwaka nenswi shibili.”
18Elo Yesu asosele ati, “Mpeleni fyonse mfi.” 19Yesu aebele amabumba abantu ukwikala pesani. Elo abulile imifuba nenswi shibili, aliloleshe kumulu nokutotela kuli Lesa. Ulo ashilile ukutotela, alisunawile imifuba nji nokupela abakusambila bakwe ukuti balumbe abantu. 20Elo bonse balilile nokwikuta. Elo abakusambila batolele utwabufumfwa imiseke ikumi na ibili. 21Elo abalalume abalile bali ukubati amakana asano, ukutapendelako abanakashi nabana.
Yesu aenda pamenshi
(Mk. 6.45-52; Yoh. 6.15-21)
22Bwangu-bwangu Yesu alibakakatishe abakusambila bakwe ukupatama mubwato nokuya kwishilya limbi ilyaku bemba. Ye ashele akolaya ibumba lyabantu. 23Ulo abalayile, aninine ulupili enka muchungulo, mukulomba. 24Panshita njilya ubwato bwena bwali pakati kaku bemba, bukofwaya nokwibila kumatamba pantu kwali ichipupu.
25Elo kumacha, Yesu ayile uko bali akoyenda pamenshi. 26Ulo abakusambila bamubwene akoyenda, balitinine bati, “Chipuku!” Epo balyawile nokwebeka.
27Bwangu-bwangu Yesu asosele kuli bo ati, “Shipeni, nine, mwitina!”
28Elo Simoni Petulo asosele ati, “Bashikulu, kati nimwebo, njebeni ukuti nyende pali bemba.”
29Naye amwebele ati, “Isa.” Elo Simoni Petulo afumine mubwato nokwenda pamenshi ukuya kuli Yesu. 30Nomba ulo abwene ichipupu ichikulu alitinine nokutatika ukwibila. Elo alilile ati, “Bashikulu ngafweni.”
31Bwangu-bwangu Yesu alimwikete nokusosa kuli ye ati, “Webo we wachichetekelo chinini! Nindo wakayikila mumutima?”
32Ulo bayinjile mubwato, ichipupu nacho chalilekele. 33Epo balimulambile nokuti, “Chine-chine niwe Mwana waku Lesa.”
Yesu aposha abalwele muchalo cha Genesaleti
(Mk. 6.53-56)
34Ulo Yesu nabakusambila bakwe bayabukile kwishilya, bafikile muchalo cha Genesaleti, 35uko abantu bamwishibile ukuti ni Yesu. Elo batumine abantu mukuleta abalwele bonse mumishi iyashingulukile ichifulo nchilya, nokubaleta kuli Yesu. 36Abantu balimupapatile ukwebati, abaleke balokumukumyako bwaka kwilaya lyakwe. Elo bonse abalikukumyako balikupola.
Currently Selected:
Mateyo 14: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
