Mateyo 15
15
Ukusambisha kwabakale
(Mk. 7.1-13; Luk. 11.37-41)
1Elo bambi Abafalisi nabasambishi ba Mafunde abafumine ku Yelusalemu balongene kuli Yesu nokuti, 2“Mulandu ndo abakusambila benu batakonkelapo utufuto twafikolwe fyesu? Pakuba tabasambapo kuminwe ulo tabalatatika ukulya?”
3Naye alibasukile ati, “Nga mwe, mulandu ndo musulila amafunde aku Lesa pamulandu wakulama utufuto twenu? 4Pakuti Lesa alimwebele ati, ‘Ulokuchinshika bawiso nabanoko,’ nokuti, ‘Uwatuka bawishi nangula banyina alingile ukumwipaya.’#Ukuf. 20.12; 21.17; Ab.Lef. 20.9; Deut. 5.16 5Nomba mwe mukoti nga umuntu aeba bawishi nangula banyina ati, ‘Ifyo nalikufwaya ukumwafwilishako napela kuli Lesa,’ 6talingilepo ukuchinshika bawishi iyowo. Echo pamulandu wakusambisha kwenu, mwasula amashiwi aku Lesa nokukonka ukusambisha kwenu. 7Mwe bakutumpayika mwe, umusoseshi Esaya alilungikile ulo asosele pali mwe ati,
8‘Mba bantu banchinshika bwaka nemilomo yabo,
kuntu imitima yabo ili ukutali nane.#Esa. 29.13
9Ukunambila kwabo kwabwaka,
pantu basambisha bwaka ifyabantu
ukubati mafunde yanji!’”
Ifintu ifikowesha muntu
(Mk. 7.14-23; Luk. 6.39)
10Nakambi Yesu ayitile ibumba lyabantu nokubeba ati, “Kutikeni, mumfwikishe! 11Takupo ichintu ichingila mumala amuntu nokumukowesha, kuntu nchilya ichifuma mukanwa kakwe echimukowesha.”
12Elo abakusambila bakwe balishile kuli Ye nokuti, “Napo ulishibile ukwebati Abafalisi balikalipile ulo basa kumfwa ifyo usosele?”
13Naye alibasukile ati, “Ichilimbwa chonse icho Bata abakumulu batalimbilepo bakuchishula. 14Balekeni bwaka, nimpofu ishitanjilila impofu shinabo. Kati impofu ikotanjilila impofu inakwe, shonse shibili shingawila muchilindi.”
15Nomba Petulo asosele kuli Yesu ati, “Twalwileni nchi ichelusho.”
16Naye asosele ati, “Kanshi namwebo tamwaumfwikishapo? 17Napo tamwishibilepo ukwebati chonse ichinjila mukanwa kamuntu chilaya mumala nokufumina kunse? 18Nomba ichifuma kukanwa echifuma kumutima, elo echimukowesha. 19Pantu mumutima emufuma amalangulushi aabi: ukwipaya, ubuchende, nokuchita ifintu ifyabipa, ukwiba, ubufi, nokwamba abanabo. 20Fyonse mfi efikowesha umuntu, kuntu ukulya neminwe iitasambilwe tafikoweshapo muntu iyowo.”
Ichichetekelo chamwanakashi
(Mk. 7.24-30)
21Ulo Yesu afumine nkulya atelele apepi nemipaka yaku Tule na Sidoni. 22Elo kwayishile umwanakashi umwina Kenani uwalikwikala nkulya. Alibilikishe ati, “Mwe Bashikulu mwana Davide, nkwatileni inkumbu. Umwana wanji umwanansungu ali nemipashi iibi iinji.”
23Nomba Yesu tamwasukilepo iyowo. Elo abakusambila bayile kuli Ye nokumupapatila bati, “Mwebeni ngu mwanakashi alokuya aletukomya amatwi kuchongo.”
24Elo Yesu asosele kumwanakashi ati, “Natumwa bwaka kubena Isilaeli abali kubati nimbelele ishaluba.”
25Ulo asosele mfi, umwanakashi alile nokumufukamina ati, “Bashikulu ngafweni.”
26Elo amwasukile ati, “Te chiwemepo ukubula ifilyo fyabana nokuposela imbwa.”
27Naye alyasukile ati, “Ina Bashikulu, nomba nembwa nasho shilalyako utusunaulwa utukoponayila munshi yetebulu lyakwa shikulu washiko.”
28Elo Yesu amwasukile ati, “We mwanakashi we, ichichetekelo chobe chikulu! Icho wafumba chichitikwe.” Penkapo umwana wakwe umwanansungu alipolele.
Yesu aposha abalwele abenji
29Ulo Yesu afumine nkulya, ayile kululamba lwaku bemba wa Galili. Aninine ulupili nokwikala panshi. 30Amabumba aakulu abantu ayile kuli Ye. Amutwalile abantu abalemene, impofu, bachibulu nabalwele bambi abenji, balikubabika apali Yesu. Naye alikubaposha. 31Nomba abantu bonse balishimbilwe ukwinekantu ulo babwene bachibulu bakososa, abalemene bakoyenda nempofu shikobona. Elo namabumba atatikile ukutondayisha Lesa waba Isilaeli.
Yesu alisha abantu amakana ane
(Mk. 8.1-10)
32Yesu alitile abakusambila bakwe nokusosa kuli bo ati, “Ndi nenkumbu pebumba ndi pakuti bayikala nandibo nomba inshiku shitatu. Epo tabakwetepo nefyakulya. Nga nati mbaleke babwelelemo nensala kwabo, kuti bafwa ulushile munshila pantu bambi bafumine ukutali.”
33Elo abakusambila bakwe balimufumbile ati, “Nga muno muchiswebebe umuntu kuti afumya kwisa ifilyo fyakuti mba bantu bonse bekute?”
34Yesu alibafumbile ati, “Mukwete imifuba inga?” Nabo bamwasukile ati, “Isano na ibili notuswi tunini bwaka.”
35Elo Yesu aebele ibumba lyabantu ukwikala panshi. 36Abulile imifuba isano na ibili notuswi nokutotela kuli Lesa. Elo asunawile imifuba nokupela abakusambila bakwe ukuti balumbe kubantu. Nabo efyo bachitile. 37Bonse abantu balilile nokwikuta. Abakusambila batolele utusunaulwa utwashelepo imiseke isano na ibili. 38Abalalume abalileko bali amakana ane, ukutapendelako abanakashi nabana.
39Ulo ashilile ukulayana nabantu, apateme mubwato nokuya kuchalo cha Magadani.
Currently Selected:
Mateyo 15: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
