Mateyo 16
16
Abafalisi bafwaya ichakubwenako
(Mat. 12.38-39; Mk. 8.11-13; Luk. 11.16; 12.54-56)
1Abafalisi na Basaduki bambi bayile kuli Yesu mukumwesha. Balimufumbile ukuti achitepo ichafiso ifikulu chimo ichakulanga ukuti atumwa na Lesa. 2Elo abasukile ati, “Kunshita yachungulo mulati, ‘Bwakucha bwino pantu kumulu kwaba chee.’ 3Namuluchelo mweba ati, ‘Lelo kukoba imfula iinekantu pantu kumulu kwaba amakumbi aaswetele nafitile fititi.’ Mwalishiba ukwilula ifiboneka iwulu, kuntu chilamukanga ukwilula ifyakubwenako ifyanduno. 4Ilabipa njino nkulo iitachetekelapo muli Lesa, iikofwaya ichafiso ifikulu! Nomba tayakachibonepo, sembi ichachitikile kuli Yona#16.4 Ichachitikile kuli Yona: Boneni muli Mat. 12.39-40. umusoseshi.”
Elo kafumapo nokuya kaya.
Imimena ya Bafalisi na Basaduki
(Mk. 8.14-21)
5Ulo abakusambila baabukile kwishilya, balilabukile ukupinta imifuba. 6Elo Yesu asosele kuli bo ati, “Chenjeleni nemimena ya Bafalisi na Basaduki.”
7Nabo balisoshenye bati, “Ifyo asosele mfi pantu tatuletelepo imifuba.”
8Nomba Yesu alishibile ifyo balikusoshanya. Elo abafumbile ati, “Mwe bantu bachichetekelo chinini! Findo ifyo mukososhanya mwati, tatukwetepo imifuba? 9Napo nanomba tamulaumfwikishapo? Kanshi tamukoyibukishapo imifuba njilya isano iyo nasunawile nokulisha abantu amakana asano? Nga fyashelepo, mwayiwishe imiseke inga?#Mat. 14.17-21 10Ngolo nasunawilile abantu imifuba isano na ibili nokulisha abantu amakana ane, kanshi ifyashelepo mwayiwishe imiseke inga?#Mat. 15.34-38 11Nga mulandu ndo muteshibilepo ukwebati tanshikososapo pamulandu wamifuba? Echo chenjeleni nemimena ya Bafalisi neya Basaduki.”
12Nomba baumfwikishe ukwebati temimenapo iyakututumwinako imifuba Yesu alikubachenjeshako, kuntu kusambisha kwa Bafalisi na Basaduki.
Yesu e Wasubwa waku Lesa
(Mk. 8.27-30; Luk. 9.18-21)
13Ulo Yesu afikile muchalo cha Kayisaleya Filipi, afumbile abakusambila bakwe ati, “Nga bantu basosa ati Umwana wa Muntu ninani?”
14Nabo balimwasukile ati, “Bambi basosa ati niwe Yohane Mubatishi, bambi bati niwe Eliya, elo bambi nabo basosa ati niwe Yelemiya nangula umo uwabasoseshi.”
15Elo Yesu abafumbile ati, “Nga mwe mwebati nine nani?”
16Simoni Petulo alyasukile ati, “Niwe Uwasubwa waku Lesa ngulya uwalayilwe, Mwana Lesa wabumi.”
17Pakwasuka Yesu amwebele ati, “Walishuka Simoni mwana Yona, pantu temuntupo uwakufisulwila nchi iyowo, kuntu ni Bata bakumulu. 18Nomba nkokweba ati, niwe Petulo,#16.18 Petulo: Ishina ndi lya Chigiliki ilyalula ati ibwe. Muchiyuda beta ati Kefasi. elo pachibwe nchi, nkemakapo ulukuta lwanji. Elo nefiso fyamfwa tafyakaluchimfyepo iyowo. 19Nakukupa imfungulo shabufumu bwakumulu. Chonse icho wakaka panonshi nakumulu chakakwa, necho wakakula panonshi, nakumulu chakakulwa.”
20Elo Yesu abakonkobeshe abakusambila bakwe ati, tekwesha ukubushako umuntu nangu umo ukwebati nine Uwasubwa waku Lesa.
Yesu asosa pafyakuchula nemfwa yakwe
(Mk. 8.31—9.1; Luk. 9.22-27; Yoh. 12.25)
21Ukufuma panshita njilya Yesu atatikile ukulondolwela abakusambila bakwe ati, “Ningile ukuya ku Yelusalemu uko abakulu Babayuda, intungulushi shabachipupila, nabasambishi ba Mafunde bakuya kunchusha ukwinekantu nokunjipaya. Nomba mukasuba kalenga shitatu nakwisa kubuka kubafwa.”
22Ulo Petulo aumfwile mfi, abulile Yesu nokuya nakwe pambali, atatikile ukumwebaula ati, “Iyowo Bashikulu! Nchi tachamuchitikilepo!”
23Nomba Yesu alyalukile nokwebaula Simoni Petulo ati, “Fuma mpa Satana! Pantu ifyo ukolanguluka tefyaku Lesa iyowo, kuntu fyabuntu.”
24Elo Yesu asosele kubakusambila bakwe ati, “Umuntu kati akofwaya ukunkonka ayikanye umwine nokupinta umutashi wakwe, elo ankonke. 25Pakuti umuntu onse uukofwaya ukupulusha ubumi bwakwe akwisa kubuposa. Nomba uyo onse uwakuposa ubumi bwakwe pamulandu waku nebo, ewakubupulusha. 26Mba bune ndo chingamuletelapo umuntu nga anonke ichalo chonse nomba alufya ubumi bwakwe? Nga chintu ndo umuntu angakabushanyapo nobumi bwakwe? 27Pantu Umwana wa Muntu akwisa nabangelo bakwe mubuleme bwaku Wishi. Elo akwisa kupela umuntu umo-umo ukulingana nemilimo yakwe iyo achita. 28Nachine nkomweba ati, epo bali bambi abemakene mpano abatakafwepo, kuntu bakabale ukubona Umwana wa Muntu akoyisa mubufumu bwakwe.”
Currently Selected:
Mateyo 16: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
