Maliko 12
12
Ichelusho chabalimi abamwibala
(Mat. 21.33-46; Luk. 20.9-19)
1Yesu atatikile ukulabila nabo mufyelusho. Asosele ati, “Kwalipo umuntu uwalimine ibala lya mpesha nokushitilako wombe. Ayimbilemo nechakukaminamo impesha, ayimekemo nechiteba. Ashile nebala kubalimi bambi, alimine nokuya kuchalo chimbi. 2Ulo inshita yakukobola ifitwalo yafikile, umwine webala atumine umusha wakwe kubalimi, ukuya kumuletelako ifitwalo fimbi ifyamwibala lyakwe ilya mpesha. 3Abalimi bayikete ngulya musha, balimupumine nokumutamfya, abwelelemo minwe-nkutwa. 4Elo umwine webala atumineko umusha naumbi. Naye abalimi balimutobele uluma mumutwi nokumusebanya. 5Atumineko naumbi, naye balimwipeye. Bachitile fyenkefyo nakuli bambi abakonkelepo, ukubapama, bambi nokubepaya. 6Nowashelepo ukutuma mwana wakwe umwalalume uyo atemenwe ukwinekantu. Pakulekelesha eye atumineko kuli bo nokusosa ati, ‘Nachine Umwana wanji bakoya kumuchinshika.’ 7Nomba mba balimi batatikile ukusoshanya abati, ‘Tenjilya impyani yakwe ikoyisa! Lekeni tuyipaye pakuti fwebo tukabule ibala!’ 8Elo bayikete umwana, bamwipaya, nokumuposela kunse yebala lya mpesha.”
9Elo Yesu afumbile ati, “Kanshi umwine webala akubachita shani? Akwisa kubepaya mba balimi nokupela ibala lyakwe kuli bambi. 10Napo tamwapendapo Mumalembo ukuti,
‘Ibwe ndilya abakwimaka basulile,
elyayishile kuba ilinenene ilyapachimfuntu.
11Kanshi efyo Imfumu yachita!
Yangwee! Mwandi fyatushimbwisha fwe bakobonako!’”
12Abakulu ba Bayuda balikufwaya ukwikata Yesu, pakuba balishibile ukuti ebo akoeba. Echo batinine amabumba abantu, balimushile, elo baya nokuya.
Umulandu wamusonko
(Mat. 22.15-22; Luk. 20.20-26)
13Batumine kuli Yesu Abafalisi bambi nebumba lyakwa Helodi bamo ukuti bakasange umwakumwikatila mumisosele yakwe. 14Ulo bafikile kuli Yesu, balikumusosha bati, “We musambishi, twalishiba ukuti uli wachine. Elo tautinapo umuntu nangu umo, pakuba tawakwatapo akapatulula kubantu. Nakambi ulasambisha fyachine ifyo Lesa afwaya. Nomba twebeko, napo fwebo tulingile ukusonka umusonko kuli Kayisale nangula iyowo? Napo tulokusonka nangula iyowo?”
15Elo Yesu alishibile ubuchenjeshi bwabo. Abebele ati, “Nindo mukonjesesha? Ndeteleni indalama mbone.”
16Nabo balimutambikile imo.
Elo abafumbile ati, “Kanshi ngu mutwi namfi ifyalembwapo fyaku nani?” Nabo bamwasukile ati, “Fyakwa Kayisale.”
17Elo Yesu asosele kuli bo ati, “Ina, kanshi peleni kuli Kayisale ifyakwa Kayisale, nakuli Lesa ifyaku Lesa.”
Mbalya bantu balishimbilwe ukwinekantu pakwasuka kwakwe.
Umulandu wakubuka kwabafwa
(Mat. 22.23-33; Luk. 20.27-40)
18Nomba Abasaduki bambi bayile kuli Yesu. Mba balikusambisha abantu ukwebati takupo ukubuka kubafwa. Balikufumba Yesu ati, 19“We musambishi, fwebo Mosesi alitukonkobeshe ukwebati, ‘Umuntu uwaupa nga afwa ukwambula ukufyalapo abana, wabo alinokupyana mukamfwilwa pakuti afyalileko wabo abana.’ 20Nomba kwalipo abalalume basano nababili. Umukulu-bantu aupile umwanakashi, afwa bwaka ukwambula ukufyalamo abana. 21Uwachibili amupyana, naye chimo chenka, afwa ukwambula ukufyalamo abana, nowa chitatu naye mumo mwenka. 22Basukile bonse basano na babili bashilile ukufwa ukwambula ukuti bafyalemo abana. Kumupwilo umwanakashi naye kafwa. 23Nomba abantu pakubuka kubafwa, ngu mwanakashi akuba nimukani pali mba bonse basano na babili abo aupilweko?”
24Elo Yesu alibasukile ati, “Mwaliluba! Nokuluba kwenu ninku, tamwayishibapo ifyalembwa mu Malembo aku Lesa nangula ifiso fyakwe. 25Pakuba ulo abantu bakubuka kubafwa, tabayise kupana iyowo, pantu bakuba kubati bangelo bamumulu. 26Nomba pamulandu wakubuka kubafwa, kanshi tamwapendapo mwibuku lyakwa Mosesi pamulandu wachimpukesa ichalikubilima umulilo? Ifyo Lesa asosele kuli Mosesi ati, ‘Nine Lesa wakwa Abulahamu, Lesa wakwa Isake, Lesa wakwa Yakobe?’ 27Ekwebati ni Lesa wababumi, te Lesapo wabafwa iyowo. Mwaliluba ukwinekantu!”
Ifunde ilyachilapo
(Mat. 22.34-40; Luk. 10.25-28)
28Umusambishi umo uwa Mafunde akwa Mosesi alisangilweko nokumfwako uko balikutalikana. Ulo aumfwile ukuti Yesu ayasukile Abasaduki bwino-bwino, naye afumbile Yesu ati, “Nga kanshi ifunde ilyachila pamafunde onse aku Lesa lifunde ndo?”
29Yesu amwasuka ati, “Ifunde ilyachilapo nindi ilikoti, ‘Umfweni mwe bena Isilaeli! Imfumu Lesa wesu e Mfumu imo yenka mpo. 30Namwe mulokutemwa Bashikulu Lesa wenu nomutima wenu onse, nobumi bwenu bonse, namano enu onse, nefiso fyenu fyonse.’ 31Ifunde ilyakonkapo nalyo, nindi ilikoti, ‘Ulokutemwa umunobe kubati nimfilya wayitemwa wemwine.’ Amafunde ambi aachilapo pali nga takupo.”
32Elo umusambishi wa Mafunde aebele Yesu ati, “We musambishi, ukuba wayasuka bwino-bwino! Ifyo wasosa, fyakwebesha, ukuti Lesa aba bwaka umo, takupo naumbi. 33Nakambi ukutemwa Lesa nomutima onse, namano onse, nefiso fyonse, nokutemwa umunobe kubati ifyo wayitemwa wemwine. Mfi fintu fyalichila pafipupo fyonse ifyo bapela Lesa nefyo bamochela.”
34Yesu pakumfwa ati ayasuka ifyamano, amwebele ati, “Webo uli bwaka apepi no Bufumu bwaku Lesa.”
Elo takwalipo nangu umo uwapamine ukufumbapo Yesu nafimbi.
Napo Uwasubwa Emwana wakwa Davide?
(Mat. 22.41-46; Luk. 20.41-44)
35Ulo Yesu alikusambisha munanda yaku Lesa, afumbile abantu ati, “Kanshi chindo icho abasambishi ba Mafunde akwa Mosesi basosela ati Klistu mwana wakwa Davide? 36Kambi umwine Davide ulo asanikilwe no Mupashi Wabuta alisosele mwibuku lya Malumbo ati,
‘Bashikulu baebele Bashikulu wanji ati,
ikala kukuboko kwanji ukwamulyo,
ukufikila mbike utupondo tobe
ukuti tube ichakunyantapo amakasa obe.’
37Davide umwine eta Klistu ati, ‘Bashikulu,’ mba angaba shani umwana wakwe?”
Yesu achenjesha abantu ifyabasambishi ba Mafunde
(Mat. 23.1-36; Luk. 20.45-47)
Ibumba lyabantu ilikulu lyalitemenwe ukwinekantu ukumfwa Yesu. 38Elo alikubasambisha ati, “Mulokuchenjela kubasambishi ba Mafunde akwa Mosesi abatemwa ukwendauka balifwite neminjila iitali bakofwaya ukuchinshikwa mumansa. 39Elo basala ukwikala pafipuna fyamuchinshi mumananda akulombelamo Lesa namufifulo ifyachindama mumalila. 40Mba bantu ebalila bamukamfwilwa amasuku pamitwi pakupokolola ifyuma fyabo uyo babepayika abantu pakulomba ukutali! Mwandi! Nachine Lesa akubapela umulandu uukulu.”
Ichipupo chakwa mukamfwilwa
(Luk. 21.1-4)
41Ulo Yesu ayikele apalungatene nechakubikamo ifyabupe munanda yaku Lesa, alikulolesha ifyo abantu balikuposa indalama shabo muchipawo. Abasambashi abenji balikuposamo indalama ishinji. 42Nomba ichokolo chimo ichichushi nacho chaliposelemo tumakobili tubili. 43Elo Yesu ayitile abakusambila bakwe nokubeba ati, “Nachine nkomweba ati, nchi chokolo ichichushi, echaposamo ukuchila bonse bwaka abaposelemo indalama shabo muchipupililo. 44Pakuba bambi abayisa mukuposamo, baposele indalama isho bafumishe pamwina wabusambashi bakwete, kuntu nchi ichachula, chiposelemo tonse uto chikwete, uto chali nokulilamo.”
Currently Selected:
Maliko 12: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
