Maliko 13
13
Yesu afisulula ukonayika kwananda yaku Lesa
(Mat. 24.1-2; Luk. 21.5-6)
1Ulo Yesu alikufuma munanda yaku Lesa, uwakusambila wakwe umo amwebele ati, “We Musambishi, boneni mfi ifyamabwe ubukulu, nefya mananda nafyo!”
2Yesu amwebele ati, “Napo ni mfi ifyamananda fikulu efyo ukotamba? Ala tapakashalepo ibwe nangu limo pamulu walinakwe, onse nga akubungumuka.”
Kwakwisa kuba ubwafya namachushi
(Mat. 24.3-14; Luk. 21.7-19)
3Ulo Yesu ayikele palupili lwa Maolife umulungatanya nenanda yaku Lesa, Petulo, Yemusi, Yohane na Andileya balikumufumba kumbali bati, “Twebeko, kanshi mfi fintu nilwisa fyakwisa kubako? 4Elo chindo icho twakwishibilako ukuti mfi fintu fyonse fyakuchitika?”
5Nomba Yesu abasukile ati, “Chenjeleni ukuti umuntu nangu umo ekamubepapo. 6Pakuba abenji bakwisa nokuyishimbula ati, ‘Nine Klistu,’ elo bakubepa balikubepa abantu abenji. 7Elo ulo mwalikumfwa inkondo nomukunkunto wankondo, mwilokusakamikwapo iyowo. Mfi fintu fili nokwisa kuchitika, kuntu ukushila kwachalo takulayisa. 8Pantu umutundu umo wakwimina umutundu unakwe, kabili nobumfumu bwakulwisha ubumfumu bunakwe. Kwakwisa kuba finkukuma konse-konse, kabili kwalikuba nensala. Mfi fyonse fyakuba ekutatika kwamachushi.
9“Echo mwebo muchenjele. Pakuba balikumutwala mufilye, nakambi balikumupamina ifikoti mukati kamananda akulombelamo Lesa. Balikumulubulwisha kuli bakateka nakuli bashamfumu pamulandu wanji, pakuti mwakuba bakamboni banji kuli bo. 10Ulo umupwilo taulayisa, Ubutumi Bwawama bwakubala bushimikilwe kumitundu yonse. 11Ulo balikumwikata nokumutwala mukumulubulwisha, mwilokusakamanapo ifyakuya mukusosa. Mwakuya mukusosa bwaka ifyo mwalangililwa panshita yenka njilya, pantu te mwebopo mwalikusosa iyowo, kuntu Mupashi Wabuta ewalikusosa. 12Wabo alikwipayisha wabo, wishi naye alikwipayisha umwana, nabana nabo balikwalukila abafyashi babo nokubepayisha. 13Ukuba abantu bonse bakumupata pamulandu wakuti muli bantu banji. Nomba uyo uwakushipikisha ukufikila kumupwilo, ewakupuluka.
Ichabunani nakambi ichabonaushi chikoyisa
(Mat. 24.15-28; Luk. 21.20-24)
14“Ulo mwakubona ichabunani nakambi ichabonaushi chilimakene apo chitalingile ukwimakana (uukopenda eluke umo chilolele). Nomba abamu Yudeya bakabutukile kumpili. 15Uuwali kuli pamutenje wananda yakwe, eyikapo ukuya kubula ifili munanda yakwe. 16Uuwakuba mwibala lyakwe, ekabwelapo kunanda mukubula ilaya lyakwe. 17We shamo we kubanakashi abali kwimitile nakubali konsha muli nshilya nshiku! 18Mulokulomba Lesa ukuti mfi fintu fiyisa kuchitika panshita yampepo! 19Pantu panshita njilya kwakuba amachushi aakulu ukwinekantu atabonekapo ukufuma apo Lesa atalile ichalo ukufika nanduno. Elo takwakabepo amachushi ayakuba nga aya. 20Epo nga chakuti Shikulu tayipifisheko inshiku nshilya, nga tapapulukilepo umuntu nangu umo iyowo. Nomba pamulandu wabantu bakwe abasalwa, alipifyako isho nshiku.
21“Munshiku nshilya umuntu kati akumweba ati, ‘Boneni, Klistu ngu!’ Nangula, ‘Ngulya,’ tekwesha ukusumina iyowo. 22Pantu ba Klistu nabasoseshi ababufi bakwima, balikuchita ifyafiso ifikulu nefyakushimbwisha, ichakweba ati babepayike nabasalwa kumo nga chingachitika. 23Nomba mwebo muchenjele. Namwebela kabela ulo ifuntu fyonse mfi afitalachitika.
Ukwisa kwa Mwana wa Muntu
(Mat. 24.29-31; Luk. 21.25-28)
24“Nomba muli nshilya nshiku ulo mbulya buchushi bwakupita, akasuba kakufita fititi, umwenshi nawo wakuleka ukusanika, 25nakambi intandala shakupona kumulu, nefiso fyamumulu fyakutenkana. 26Elo bakubona Umwana wa Muntu akoyisa mumakumbi ali nefiso, elo nobuleme ubukulu. 27Akutuma abangelo bakwe mukulonganya abasalwa bakwe, ukufuma konse kutupinda tune utwachalo, ukutatikila uko ichalo chapela, ukufikila nakumpelo kunakwe.
Isambililo lyachiti chamukunyu
(Mat. 24.32-35; Luk. 21.29-33)
28“Sambilileni kuchiti chamukunyu. Ulo mubona amabula atatika ukusoka ulutundwa muleshiba ukuti amayinsa apalama. 29Munshila imo yenka, ulo mwakubona mfi fintu fikochitika, mwakwishiba ukuti Klistu ali apepi, ali bwaka pamulyango. 30Nachine nkomweba ati, abantu banjino nkulo pakufwa sembi mfi fintu fyonse fikabale fikachitike. 31Umulu nechalo fyakupita, kuntu amashiwi anji akubelelela umuyayaya.
Ubushiku nenshita yakwisa kwaku Yesu tafyayishibikwapo
(Mat. 24.36-44)
32“Ulo nkalya kasuba kakufika, tapapo umuntu uwayishiba, nangu bangelo bakumulu nangu Mwana iyowo, sembi Bawishi benka. 33Mulokuchenjela, mulokwibukila nokulomba pantu tamwishibilepo apo njilya nshita ulo yakufikila. 34Chaba kubati umuntu ulo talayima nokusha inanda yakwe pakuya mufyalo, kubala asha alanga abapyungi bakwe umo-umo umulimo wakwe, nokweba malonda ukulinda. 35Kanshi, mulokulindila pantu tamwishibilepo ulo umwine wananda akubwela. Nalimo kuti abwela kuchungulo, nalimo pakati kabushiku, nalimo nipali tambala mutanshi, nalimo kumacha. 36Kamulindila ukwebati kati akwisa ichakumupuminkisha, ekamusanga muli mutulo. 37Icho nkososa kuli mwebo, nkoeba onse umuntu nati, lindilileni!”
Currently Selected:
Maliko 13: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
