Maliko 8
8
Yesu alisha abantu amakana ane
(Mat. 15.32-39)
1Muli nshilya nshiku, kwalongene nakambi ibumba ilikulu ilyabantu. Ulo ifyakulya fyabo fyashilile, Yesu ayitile abakusambila bakwe nokusosa kuli bo ati, 2“Ndi nenkumbu nebumba ndi pakuti bayikala nandibo nomba inshiku shitatu. Epo tabakwetepo nefyakulya. 3Nga nati mbaleke babwelelemo nensala kwabo, kuti bafwa ulushile munshila pantu bambi bafumine ukutali.”
4Elo abakusambila bakwe balimufumbile ati, “Nga muno muchiswebebe umuntu kuti afumya kwisa ifilyo fyakuti mba bantu bonse balye bekute?”
5Yesu alibafumbile ati, “Inga imifuba muli nayo?”
Nabo baasukile ati, “Isano na ibili.”
6Elo Yesu aebele ibumba ukwikala panshi. Abulile imifuba njilya isano na ibili, atotele kuli Lesa, elo ayisunawile nokupela abakusambila bakwe ukuti balumbe kubantu. Nabo efyo bachitile. 7Elo balikwetepo notuswi tunini, nato kumo Yesu alitotele kuli Lesa, asoseshe abakusambila bakwe ukupela abantu. 8Bonse abantu balilile nokwikuta. Elo batolele utusunaulwa utwashelepo imiseke isano na ibili. 9Abalile bali nangula amakana ane. Epo Yesu alibalekele ukuti baye. 10Bwangu-bwangu Yesu apateme mubwato pamo nabakusambila bakwe nokuya kuchalo cha Dalamanuta.
Abafalisi bafwaya ichafiso ifikulu
(Mat. 16.1-4)
11Abafalisi bambi bayile kuli Yesu nokutalikana nakwe. Balikufwaya ukumwesha. Bamufumbile ukuti achitepo ichafiso ifikulu chimo ichakulanga ukuti aba na Lesa. 12Epo Yesu alipemashikile nokuti, “Mulandu ndo abantu baku njino nkulo bakofwayila ichishibilo? Iyowo, nebo nkomweba ati, tachayise kupelwa kuli njino nkulo ichishibilo ichafiso ifikulu nangu chimo.”
13Elo Yesu abashile nokwinjila nakambi mubwato, elo ayabukile kwishilya lyaku bemba.
Imimena ya Bafalisi neyakwa Helodi
(Mat. 16.5-12)
14Abakusambila balilabukile ukupinta imifuba. Bapintile bwaka umufuba umo mubwato epela. 15Elo Yesu alibachenjeshe ati, “Umfweni, chenjeleni nemimena ya Bafalisi neyakwa Helodi.”
16Nabo balisoshenye bati, “Ifyo asosela mfi pantu tatukwetepo imifuba.”
17Yesu alishibile ifyo balikusoshanya. Elo abafumbile ati, “Findo ifyo mukososhanya ati tamukwetepo imifuba? Kanshi nanomba tamulayishiba nokumfwikisha? Kanshi nanomba tamulaumfwa? 18Mwalikwata menso, kanshi tamukobwenesha. Amatwi mwalikwata, kanshi tamukoumfwikisha? Kanshi tamukoyibukishapo 19imifuba njilya isano iyo nasunawilile nokulisha abantu amakana asano? Nge fyashelepo mwayiwishe imiseke inga?”
Nabo balimwasukile ati, “Ikumi na ibili.”
20Yesu asosele nakambi ati, “Ngolo nasunawilile abantu imifuba isano na ibili, nokulisha abantu amakana ane, kanshi ifyashelepo mwayiwishe imiseke inga?”
Nabo balimwasukile ati, “Isano na ibili.”
21Epo Yesu alibafumbile ati, “Kanshi nanomba tamwaumfwikishapo?”
Yesu aposha impofu ku Betesaida
22Ulo bafikile ku Betesaida, abantu bambi batwite kuli Yesu umuntu umwalalume uwali impofu, nokumufumba ukuti amukumye. 23Epo Yesu ayikete umuntu uwapofula pakuboko nokumutwala kunse yamushi. Epo atile ukumushipila amate pamenso, Yesu abikile amaboko akwe pali ye. Elo alimufumbile ati, “Napo ukobona akantu?”
24Umuntu ayinushe amenso akwe nokuti, “Nkobona abantu ukubati fiti fikoenda-enda.”
25Yesu abikile nakambi iminwe yakwe pali ye. Epo aliloleshe bwino-bwino, alipolele nokubona ifintu fyonse bwino-bwino. 26Yesu amutumine ukuya kwabo nokumweba ati, “Wiyinjilamo muli ngu mushi uye bwaka kwenu.”
Yesu Ewasubwa waku Lesa
(Mat. 16.13-20; Luk. 9.18-21)
27Epo Yesu nabakusambila bakwe bayile mumishi iyali apepi na Kayisaleya Filipi. Panshila alibafumbile ati, “Njebeniko, abantu beba ati nebo nine nani?”
28Nabo balimwasukile ati, “Bambi basosa ati niwe Yohane Mubatishi, bambi bati niwe Eliya, elo bambi nabo basosa ati uli umo uwabasoseshi baku Lesa.”
29Yesu alibafumbile ati, “Nga mwebo mukoti nine nani?”
Petulo alimwasukile ati, “Niwe Klistu.”
30Yesu alibakonkobeshe ati, “Tekwesha ukubushako umuntu nangu umo ukuti nine Uwasubwa waku Lesa.”
Yesu asosa pafyakuchula nemfwa yakwe
(Mat. 16.21-28; Luk. 9.22-27)
31Epo Yesu abalile ukusambisha abakusambila bakwe ati, “Umwana wa Muntu akumfwa amachushi, nokusulwa kubakulu Babayuda, kuntungulushi shabachipupila, nabasambishi ba Mafunde. Bakumwipaya, kuntu mukasuba kalenga shitatu akwisa kubuka kubafwa.” 32Ndi shiwi alisosele pamenso-kutuba. Ulo Petulo aumfwile mfi, abulile Yesu nokuya nakwe pambali. Elo atatikile ukumwebaula. 33Nomba Yesu alyalukile nokulolesha pabakusambila bakwe, nokwebaula Petulo ati, “Fuma mpa Satana! Pantu ifyo ukolanguluka tefyaku Lesa iyowo, kuntu fyabuntu!”
34Yesu ayitile ibumba lyabantu pamo nabakusambila bakwe. Asosele kuli bo ati, “Kati umuntu akofwaya ukunkonka, ayikanye umwine nokupinta umutashi wakwe, elo ankonke. 35Pakuti umuntu onse ukofwaya ukupulusha ubumi bwakwe, eukoyisa kubuposa. Nomba uyo onse uwakuposa ubumi bwakwe pamulandu waku nebo no Butumi Bwawama, ewakubupulusha. 36Ngo muntu chikomwafwa shani nga anonka ichalo chonse, elo aposa ubumi bwakwe? 37Nga chintu ndo ichingalinga ukukabushanya nobumi bwamuntu? 38Pakuti uyo onse uwakuba nensoni pamulandu waku nebo namashiwi anji, muli njino nkulo iibipile, Umwana wa Muntu naye akwisa kumukwatila insoni ulo akwisa mubuleme bwaku Bawishi pamo nabangelo bakwe ababuta.”
Currently Selected:
Maliko 8: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
