Maliko 9
9
1Yesu achili mukusosa nokuti, “Nachine nkomweba ati, epo bali bambi abemakanine mpano abatakafwepo, kuntu ababala ukubona Ubufumu bwaku Lesa bukoyisa nefiso.”
Ukusanguka kwaku Yesu palupili
(Mat. 17.1-13; Luk. 9.28-36)
2Ulo papitile inshiku shisano nabumo, Yesu abulile Petulo, Yemusi na Yohane, ayile nabo kulupili ulutali apabenka. Elo asangukile pamenso abo. 3Amalaya akwe alikubeka nokubutisha tuutu! Tapalipo panonshi kasamfya wansalu ungeshiba ukushitufya mfilya. 4Epo abakusambila babwene Eliya na Mosesi bakososhanya na Yesu. 5Elo Petulo aebele Yesu ati, “We musambishi, chingawama kuli fwebo ukwikala mpano. Katwimake imisasa itatu: umo ube obe, umbi ube wakwa Mosesi, umbi nawo ube wakwa Eliya.” 6Pantu Petulo tayishibilepo ichakwasuka pantu ye nabanakwe baliketwe umwenso.
7Elo kwayishile ikumbi nokubafimba, nakambi mwafumine neshiwi mukati kekumbi ilyasosele ati, “Ngu Mwana wanji uwatemwekwa, mumfweni!” 8Bwangu-bwangu pakucheba-cheba, tababwenepo umuntu naumbi, kuntu Yesu enka.
9Ulo balikutentemuka ulupili, Yesu alibakonkobeshe ati, “Tekwesha ukwebako umuntu nangu umo ifyo mwabona, sembi ulo Umwana wa Muntu akubuka kubafwa.”
10Abakusambila basungile nga mashiwi, nokusoshanya muli bo benka ukuti, “Chikoyalula ndo ukubuka nakambi kubafwa?” 11Abakusambila balimufumbile Yesu ati, “Nga nindo abasambishi ba Mafunde bakoebela ati, ‘Eliya ewakubalilapo ukwisa?’”
12Yesu alibasukile ati, “Nachine Eliya ewakubalilapo ukwisa mukuwamya ifintu fyonse. Nga nomba mulandu ndo chasoselwa mu Malembo ati, Umwana wa Muntu ali nokuchula ukwinekantu nokukakwa? 13Nomba nkomweba ati, Eliya alisa kale, nakambi nabantu balimuchitile umo bafwayile benka, ukubati nimfilya Amalembo asosa pali ye.”
Yesu aposha umulumbwana uwali nomupashi uubi
(Mat. 17.14-21; Luk. 9.37-43a)
14Ulo Yesu nabakusambila bakwe babwelele ukwashele abakusambila bambi, babwene ibumba lyabantu ilikulu lilibashingulukile, nabasambishi ba Mafunde bambi balikutalikana nabo. 15Ulo abantu babwene Yesu, balishimbilwe ukwinekantu. Babutukile uko ali nokumupela umutende. 16Yesu afumbile abakusambila bakwe ati, “Findo ifyo mukotalikana nabo?”
17Umuntu umo mwibumba alyasukile Yesu ati, “We musambishi, naletele kuli mwebo umwana wanji umwalalume. Aba nomupashi uubi uumukanya ukusosa. 18Ulo umwikata lonse, ulamupama panshi elo nokufumya ipofu kukanwa, ukukwesanya ameno nomubili wonse ulauminina ntii-nti. Nayisa kupapata kubakusambila bobe ukuti baufumyemo umupashi uubi, kuntu bayisa kufilwa.”
19Yesu alibasukile ati, “Mwe bantu batachetekela! Kanshi mukofwaya njikale nenu inshita yalepa shani? Nkoshipikisha nenu inshita yalepa shani? Temulandupo, muleteni umulumbwana kuli nebo!”
20Bamuletele kuli Yesu.
Ulo umupashi uubi wabwene Yesu, wamuwishishe panshi, nokumufulunganya, nokufumya ipofu kukanwa. 21Yesu afumbile wishi wamulumbwana ati, “Kanshi ubulwele bwamutatikile lwisa?”
Naye alyasukile ati, “Bwamutatikile ulo ali umwayiche. 22Libili-libili bwalikumuposa mumulilo namumenshi ukuti bumwipaye. Mutukwatilepo inkumbu nokutwafwilisha nga kuti mwachita mfi!”
23Yesu asosele ati, “Chikoyalula ndo icho mukososa ati, kati ukosumina? Ifintu fyonse filachitika kumuntu uwaba nechichetekelo!”
24Bwangu-bwangu bawishi wamwana balyawile nokusosa ati, “Nkochetekela, nomba nshafikapo. Mungafweko mfikepo!”
25Ulo Yesu abwene ibumba lyabantu, ilyabutukileko, akalipile umupashi uubi ati, “We mupashi uubi, we nkoma-matwi, we chibulu we, nkokweba ati, fuma muli ngu mulumbwana wikenjilamo nakambi!”
26Umupashi uubi walimufulungenye, elo walifuminemo nokwaula. Umulumbwana ashele alilele kubati alifwile, nabenji abalipo balangulukile ati, “Afwa!” 27Nomba Yesu alimwikete kuminwe nokumubusha, epo alimakene.
28Ulo Yesu ayinjile munanda, abakusambila bakwe balimufumbile kumbali ati, “Mulandu ndo fwebo chatukangila ukufumya umupashi uubi?”
29Yesu alibasukile ati, “Takupo inshila imbi iyakufumishamo umupashi uubi uwaba nga ngu, kuntu mukulomba mwenka.”
Yesu asosa nakambi ifyamfwa yakwe
(Mat. 17.22-23; Luk. 9.43b-45)
30Ulo bafumineko, Yesu nabakusambila bakwe bayile ku Galili. Tafwayilepo ukuti umuntu nangu umo eshibe uko ali. 31Pakuti alikusambisha abakusambila bakwe ati, “Umwana wa Muntu akoyembulwa kubantu. Elo bakumwipaya. Nomba mubushiku bwalenga shitatu, akwisa kubuka kubafwa.”
32Nomba bo tabayishibilepo umwalolele nchi chebo. Echo balitinine ukumufumba.
Ninani umukulu mu Bufumu bwaku mulu?
(Mat. 18.1-5; Luk. 9.46-48)
33Ulo bafikile kumushi wa Kapenaumu, nokwinjila munanda, Yesu alibafumbile ati, “Kanshi findo mwali kutalikishanya panshila?”
34Elo bayikele chelele, pakuti balikutalikishanya munshila ukwishiba umukulu pali bo. 35Yesu ayikele panshi, ayitile abakusambila ikumi na babili, asosele kuli bo ati, “Umuntu ukofwaya ukuba umukulu ayichefye nokubombela bonse.” 36Epo abulile akana kanini nokukemanika pantanshi yabo. Alikakumbatile nokubeba ati, 37“Umuntu onse uwakupokelela akana kanini akalinga nka mwishina lyanji, epela nine apokelela. Elo onse uwapokelela nebo, te nenkapo apokelela, kuntu nangulya uwantumine.”
Onse uutatulengulula muntu wesu
(Luk. 9.49-50)
38Yohane asosele kuli Yesu ati, “We musambishi, twabwene umuntu umo uwalikufumya mipashi iibi mwishina lyobe. Epo twalimukenye pakuti tali wamwibumba lyesu.”
39Yesu asosele kuli bo ati, “Mwimukanyapo, pakuti takwaba nangu umo uuchita ifyafiso ifikulu mwishina lyanji nakambi ese mukusosa ifyabipa pali nebo. 40Onse uutali mulwani wesu muntu wesu. 41Sambilileni nchi! Uyo onse uwakumupela inkombo yamenshi akunwa pakuti muli bena Klistu, nachine akoyisa kupoka ichilambu chakwe.”
Ifilenga ukubifya
(Mat. 18.6-9; Luk. 17.1-2)
42“Kati umuntu akulenga umo uwaku mba bana banini ukuposa ichichetekelo muli nebo, chamulinga ukumukakila ichilibwe chakupelako mumukoshi wakwe nokumuposa mwitenga lyamenshi. 43Kati ukuboko kobe kulakulenga ukubifya, ukuputuleko! Chawama ukwinjila mubumi butapwa nokuboko kumo ukuchila ukuya kuposwa namaboko abili mumulilo uutashimapo. [ 44Umo, ‘Imilomwa ibalya tayifwapo, nomulilo taushimapo.’] 45Nakambi ulukasa lobe nga lulakulenga ukubifya, luputuleko. Chawama ukwinjila mubumi ubutapwa nolukasa lumo ukuchila ukuposwa mumulilo utashimapo namakasa abili. [ 46Umo, ‘Imilomwa ibalya tayifwa, nomulilo taushimapo.’] 47Nakambi kati ilinso lyobe lilakulenga ukubifya, lilobolemo. Chawama ukwinjila mu Bufumu bwaku Lesa nelinso limo ukuchila ukuposwa mumulilo utashimapo namenso abili. 48Umo, ‘Imilomwa ibalya tayifwapo, nomulilo taushimapo.’
49“Ukubati nimfilya umuchele ulungwa mufyakulya, efyo namwebo bonse mukoya kuwamishiwa nomulilo wamachushi.
50“Umuchele waliwama, kati umuchele wakubuluka, mba ukoyisa kulowa nendo?
“Beni nawo umuchele uwakutemwana muli mwe, nakambi ikaleni umutende umo nomunakwe.”
Currently Selected:
Maliko 9: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
