Maliko 10
10
Umulandu wakubengana mufyupo
(Mat. 19.1-12; Luk. 16.18)
1Ulo Yesu afuminepo, ayile muchalo chaku Yudeya, ayabukile Yodani. Nakambi amabumba abantu ayishile kuli Ye, alikubasambisha ukubati fintu alikuchita inshiku shonse.
2Bambi abamu Bafalisi bayile kuli Yesu nokumwesha bati, “Twebeniko, napo ifunde lyesu lilasuminisha umwalalume ukubenga umukashi wakwe?”
3Yesu alibasukile ati, “Lifunde ndo ilyo Mosesi amupele?”
4Bayasukile ati, “Mosesi alisuminishe umwalalume ukulemba kalata wakubenganinapo nokupela umukashi wakwe ukuti alokuya.”
5Yesu alibasukile ati, “Mosesi alimulembele ndi funde pakuba mwaba abakutomfwa. 6Nomba pakubala, ulo ichalo chatalilwe, chalisoswa ukuti, ‘Lesa abumbile umwanakashi nomwalalume. 7Pamulandu ngu, umwalalume akusha bawishi nabanyina nokuyilundanya kumukashi wakwe. 8Echo mba babili bakuba umubili umo.’ Nomba tabalipo babili iyowo, kuntu bali umo bwaka. 9Echo icho Lesa alunda, umuntu elundululapo.”
10Ulo babwelele munanda, abakusambila balifumbile Yesu pali ngu mulandu. 11Elo Ye asosele kuli bo ati, “Umuntu nga abenga umukashi wakwe nokupa umbi, epela achita ubuchende. 12Munshila imo yenka, umwanakashi naye nga abengwa kumwalalume wakwe nokupwa kuli umbi, naye wachita ubuchende.”
Yesu ashukisha abana banini
(Mat. 19.13-15; Luk. 18.15-17)
13Abantu bambi baletele abana banini kuli Yesu ukuti abike amaboko akwe pali bo nokubashukisha. Nomba abakusambila bakwe ulo bababwene, balibakalipile. 14Ulo Yesu abwene mfi, alikalipile nokuti kubakusambila bakwe, “Lekeni abana banini bese kuli nebo, mwibakanyapo, pakuti Ubufumu bwakumulu bwaku bo abali nga mba. 15Nachine nkomweba ati, uyo onse uutapokelapo Ubufumu bwaku Lesa ukubati akana, tayise kwinjilamo.” 16Elo Yesu abulile abana nokubafukata mumaboko akwe nokubashukisha.
Umuntu umusambashi
(Mat. 19.16-30; Luk. 18.18-30)
17Ulo Yesu alikuya, umwalalume umo alimubutukile, ayile kufukama pantanshi yakwe, nokumufumba ati, “We musambishi uuweme, chindo ningachitapo ukuti nkapoke ubumi butapwa?”
18Yesu alimwasukile ati, “Mba nindo wanjitila nebo uuweme? Takupo uuweme, sembi Lesa enka. 19Walishiba amafunde aku Lesa asosa ati, ‘Wilokwipaya, wilokuchitapo buchende, wilokwiba, wilokubepeshapo umunobe, wilokuchenjelekapo abantu, chinshika bawiso nabanoko.’”
20Walyasukile ati, “We musambishi, nga mafunde onse naliyalama ukufuma kubwayiche bwanji.”
21Yesu alimulolekeshe nokutemwa nokuti, “Ichikofwayikwa chimo. Koya ukashitishe ifintu fyonse ifyo wakwata. Indalama wakusangamo, ushipele kubachula, elo wakwisa kuba nobuboni kumulu, elo wise unkonke.” 22Ulo aumfwile nga mashiwi, ichinso chakwe chalifitilwe, epo ayile nechikonko pantu ali nobuboni ubwinji ukwinekantu.
23Yesu aloleshe pabakusambila bakwe nokuti kuli bo, “Mwandi chaliba ichakosa kubantu ababuboni ukwinjila mu Bufumu bwaku Lesa!”
24Abakusambila bakwe balishimbilwe pakumfwa nga mashiwi. Nomba Yesu alipitilile mukusosa ati, “Mwe bana banji, chaliba ichikosele pakwinjila mu Bufumu bwaku Lesa. 25Chaliba ichangukile ingamila ukupula mulinso lyakashinje ukuchila umusambashi ukwinjila mu Bufumu bwaku Lesa.”
26Abakusambila bakwe balishimbilwe pakumfwa nga mashiwi, elo balifumbene umo nomunakwe ati, “Nga muntu shani wakwisa kupuluka?”
27Yesu alibalolekeshe nokubasuka ati, “Nchi chaba ichafishe kubantu, kuntu tekuli Lesa iyowo. Kuli Ye takupo ichafishe.”
28Elo Petulo asosele ati, “Boneni, fwebo twalisha ifintu fyonse nokumukonka.”
29Yesu alibebele ati, “Nachine nkomweba ati, takupo nangu umo uwasha inanda yakwe, bawakwe, bankashi shakwe, banyina, bawishi, abana, namabala, pamulandu waku nebo napamulandu wa Butumi Ubwawama, 30uutayise kupokela ifinji muli njino nkulo. Akwisa kupokela mananda ukuchila imiku umwanda umo, bawabo, bankashi, banyinabo, abana, amabala, kuntu nefisunsho alikuli nafyo, epo munshita ikesako akwisa kupokelapo ubumi butapwa. 31Elo abenji abali pantanshi ebakuba panuma, nabo abapanuma abenji ebakuba pantanshi.”
Yesu asosa inshita yachitatu ifyamfwa yakwe
(Mat. 20.17-19; Luk. 18.31-34)
32Ulo Yesu nabakusambila bakwe balikuya ku Yelusalemu, Yesu ewali pantanshi. Abakusambila bali panuma. Bo batatikile ukushimbwa, nambalya abamukonkele bali nomwenso. Elo ayitile abakusambila bakwe ikumi na babili pambali nokubeba ifintu ifyakwisa kumuchitikila. 33Asosele ati, “Boneni! Tukoya ku Yelusalemu uko Mwana wa Muntu bakoya kumutwala kuntungulushi shabachipupila nakubasambishi ba Mafunde. Bakoya kumupingula ukumwipaya nokumupela muminwe yabenafyalo. 34Bakoya kumusekuluka, ukumushipila amate, ukumupuma ifikoti nokumwipaya. Nomba mubushiku bwalenga shitatu akwisa kubuka kubafwa.”
Yakobe na Yohane balomba ubukulu
(Mat. 20.20-28)
35Elo Yemusi na Yohane, bamwana Sebedi, bayile kuli Yesu nokusosa ati, “We musambishi, eko chili ichintu icho tukofwaya ukuti utuchitile.”
36Naye Yesu abafumba ati, “Chindo icho mukofwaya ukuti muchitile?”
37Bamwasukile bati, “Fwebo tukomulomba ukuti tukekale umo kukuboko kwenu ukwamulyo naumbi ukwakuchipiko ulo mwakwisa kwikala pamupando wenu uwabuchindami.”
38Yesu asosele ati, “Mwebo tamuchishibilepo icho mukofumba. Napo namwe mwakwisa kunwa kulukombo lwamachushi ulo nebo ningile ukunwenako? Nangula mungeshiba ukubatishiwa munshila iyo nebo nakubatishiwamo?”
39Nabo balimwasukile ati, “Ina, kuti twachita.”
Yesu abasukile ati, “Nachine mwakwisa kunwako kulukombo nebo nakunwenako, nakambi mwakwisa kubatishiwa munshila iyo nebo nakubatishiwamo. 40Nomba tanshikwetepo insambu ishakusala abakwisa kwikala kukuboko kwanji ukwamulyo nokwakuchipiko. Ni Lesa umwine ewakupela ififulo kuli abo, abo apekanishishe.”
41Ulo abakusambila banabo ikumi baumfwile mfi, balikalipile Yemusi na Yohane. 42Elo Yesu abetile bonse nokuti, “Mwebo mwalishiba ukuti abantu abasontwa ukuba abapingushi, balikwata ubuleme bwakweba abantu ifyo bakowamina ukuchita. 43Nomba tachili mfyilya kuli mwe. Uyo onse uwakuba umukulu mukati kenu, abe umupyungi wenu. Na uyo onse uwakuba wantanshi mukati kenu, abe umusha wabonse. 44Kati umo uwakumwebo akofwaya ukuba uwapantanshi, abe umusha wakubonse. 45Pakuti nangu Mwana wa Muntu umwine tayishilepo ukuti bakamupyungile iyowo, kuntu wena ayisa mukupyunga nokupela ubumi bwakwe ukuti abantu abenji bakalubulwe.”
Yesu aposha Batimeyasi impofu
(Mat. 20.29-34; Luk. 18.35-43)
46Elo Yesu nabakusambila bakwe bafikile mumusumba wa Yeliko. Ulo Yesu nabakusambila bakwe nebumba ilikulu ilyabantu balikufuma mumusumba, mwalalume umo impofu uwali kwitwa Batimeyasi, umwana wakwa Timeyasi, alikwikala mumbali yanshila nokupula-pula utuntu kubapita-nshila. 47Ulo aumfwile ukuti ni Yesu waku Nasaleti uwalikupita, atatikile ukubilikisha ati, “Yesu! We Mwana Davide! Nkwatileni ichisa.”
48Nomba abantu balimukalipile nokumweba ukuti atalale. Elo ye alibilikishe ukuchilamo ati, “We Mwana Davide, nkwatileni ichisa.”
49Yesu alimakene ati, “Mwiteni.”
Epo bayitile impofu njilya nokueba ati, “Sanguluka! Ima, akokwita.”
50Elo aposele ifyakufwala fyakwe nokuchiluka ukuya kuli Yesu.
51Epo Yesu alimufumbile ati, “Findo ukofwaya ukuti nkuchitile?”
Impofu yalimwasukile ati, “We musambishi, nkofwaya ukubona.”
52Yesu amwebele ati, “Koya, ichichetekelo chobe chakuposha.”
Bwangu-bwangu atatikile ukubona, elo akonkele Yesu.
Currently Selected:
Maliko 10: LalaNT
Highlight
Share
Copy
Want to have your highlights saved across all your devices? Sign up or sign in
Chilala New Testament © Bible Society of Zambia, 1998.
