Matthew 27

Jisua Pilat makunga ânding

(Mk 15:1; Luk 23:1-2; Joh 18:28-32)

1Jîng ahongnin chu Ochaisingei murdi le Upangei han Jisua that rang lampui an sinna. 2Zingjirûiin an khita, an tuonga, Pilat, Rom râiôt kôm an pêka.

Judas thina roi

(Sin 1:18-19)

3A minsûrpu Judas han, Jisua theiloi an mintum ti a riet inchu ânsîra, a sumdâr sômthum hah Ochaisingei le Upangei kôm a hongchôi nôka.#Sin 1:18-19 4“Midik thi ranga ki minsûr ha chu ki minchâi sabak kêng ani zoi,” a tia. Anni han a kôm han,

“Mahah kan ta rangin imo asena. Maha chu nangma sintho kêng!” an tipea. 5Judas han ma sumdâr hah Biekin sunga a paia, a rota; hanchu, a sea, avan khâi that zoi. 6Ochaisingei han sum hah an rûta, “Mahih chu thisen man sum ani sikin Biekina sum darna munna dar rangin chu inthieng mak” an tia. 7Hanchu, an inruola, ramdangmingei phûmna mun rangin Bêlvuokpu mun an rochôka. 8Masikin ma mun hah atûn tena (Akeldama) “Thisen Mun” an ti tit zoi.

9Hanchu Dêipu Jeremiah'n, “sumdâr sômthum hah an lâka Israelngeiin ama man ranga adôr an masat hah,#Zak 11:12,13 10male Pumapa chongpêk anghan, bêlvuokpu mun man rangin sum hah an mang zoi,” ai ti hah ahong dik zoi ani.

Pilat'n Jisua chong a rekel

(Mk 15:2-5; Luk 23:3-5; Joh 18:33-38)

11Jisua hah Rom râiôt makunga ândinga, râiôt'n, “Judangei rêng nini mo?” tiin chong a rekela, Jisua'n, “Ni ni, ni ni ti zoi hate,” tiin a thuona. 12Hannirese, Ochaisingei le Upangeiin an nônna roia chu itên thuon mak. 13Masikin, Pilat'n a kôm, “Nang an nônna roi hih ni riet loi mini?” a tia. 14Nikhomrese, bâikhat luo khomin thuon maka, Râiôt chu asân a kamâma.

Jisua thi ranga a roi an jêk

(Mk 15:6-15; Luk 23:13-15; Joh 18:39; 19:16)

15Hanchu Rom râiôt han Kalkân Kût zora racham mi intâng inkhat lokongei an ti tak a mojôk pe ngei ngâia, 16Ha lâia han mi intâng, riming inthang tak Barabbas an ti hah a oma. 17Masikin lokongei an hong intûp inchu Pilat han an kôm, “Tu himo nangni mojôk pe inlang nin nuom? Barabbas himo, Jisua Messiah an tipu himo?” tiin a rekela. 18Juda rachamneipungei han Jisua hah an narsa sika a kutah an hong pêk ani ti ânthârtakin a rieta. 19Hanchu Pilat hah roijêkna munah ânsung lâitakin a lômnûn, “Ha midik chunga han ite tho no roh, jânin han ka ramangin ama sikin ku tuong ok kêng” tiin chong a hong bea. 20Ochaisingei le Upangeiin Barabbas mojôka Jisua that ranga Pilat kôma ngên rangin mipui ngei an methêma. 21Hannirese Pilat'n mipui ngei kôm han, “Hi mi inik ngei lâia hin tu himo nangni mojôk pe ronga nin nuom?” tiin a rekela. Anni han, “Barabbas” tiin an thuona. 22Pilat'n an kôm, “Hanchu, Jisua Messiah an ti hih, imo ko lo rang ani zoi?” tiin a rekel ngeia.

“Khrosa jêmdel roh” tiin an thuona 23Nikhomrese, Pilat'n an kôm, “Imo ai tho minchâi?” tiin a rekel ngeia.

“Khrosa jêmdel roh!” tiin an rât dodôrin an inieka. 24Pilat'n ite anêmna om no nia, injêlna vai kêng ai suok rang ti amun chu tui a lâka, lokongei makunga a kut a rusuka, an kôm, “Hi miriem thina hin ite theiloina dôn mu-ung! Mahih nin sintho kêng ani!”#Bal 21:6-9 a tia. 25Loko murdi'n, “Hi mi thina sika dûk chu keini le kin nâingei chungah chul rese!” an tia. 26Hanchu Pilat'n Barabbas hah a mojôk pe ngeia; male Jisua hah a jêm suolechu Khrosa jêmdel rangin an kutah a pêk ngei zoi.

Râlmingeiin Jisua an phengsan

(Mk 15:16-20; Joh 19:2-3)

27Hanchu, Pilat râlmingei'n Jisua hah râiôt inpuia an tuonga, an pâla mi murdi a kôla an intûpa. 28A puonngei an lîk pea, puon senduk an minsila. 29Male, riling tapor an phana, an min khuma, a kut chang tieng khiengrol an min chôia; a makungah khûkinbilin, “Juda ngei Rêng ring sôt roh!” tiin an phengsana. 30An michila, a khiengrol hah an suta, a luah an tôka. 31Hanchu, an phengsan suolechu puon senduk hah an lâk nôka, ama puon dên hah an minsil nôka. Hanchu, Khrosa jêmdel rangin an tuong zoi.

Jisua jêmdela a om

(Mk 15:21-32; Luk 23:26-43; Joh 19:17-27)

32Hanchu, an se lâiin Cyrene khuo mi inkhat a riming Simon an tonga, râlmingei'n Jisua Khros ruput rangin an dândea. 33Golgotha, “Luru Mun” an ti hah an hong tunga, 34Mahan Jisua hah uain, tuikha leh inpol an pêka, a tem zoiin chu nêk nuom maka.#Lap 69:21

35Hanchu, Khrosa an jêmdela, male, taruosânin a puonsilngei an insema.#Lap 22:18 36Masuole chu, mahan insungin, an enna. 37A lu chungah an nônna miziek, “Hi mi hih Jisua, Judangei Rêng ani,” tiin an târa. 38Hanchu, ama leh lômin inru inik a voitieng inkhat, a changtieng inkhat an jêmdel sa.

39Hanchu, ânlôi murdi'n an lu thukin Jisua an deia.#Lap 22:7; 109:25 40“Biekin set na ta, sûnthumin ni minding nôk rang na! Pathien Nâipasal ni nîn chu ne theiin insaninjôk roh! Khros lêr renga juong chum ta roh!”#Mat 26:61; Joh 2:19 an tia.

41Ma angdên han, Ochaisingei le Balam minchupungei le Upangei khomin ama an deia: 42“Mi dangngei laka a minjôk ngâia, ama chu injôk thei maka! Israelngei rêng ni mak mo? Atûn Khros lêr renga juong chum rese chu iem ei tih! 43Pathien a iema, Pathien Nâipasal'n ânbea. Tho lei en rei u, Pathien'n atûn a minjôk nuom mo!”#Lap 22:8 an tia.

44Inru, ama leh an jêmdel ngei khomin ha angdênin an dei sa.

Jisua thina

(Mk 15:33-41; Luk 23:44-49; Joh 19:28-30)

45Hanchu sûn dâr sômleinik renga kholoi dârthum tenah chu rammuol ajîng khapa. 46Dârthumin chu Jisua rôl inring takin ânieka, “Eloi, Eloi, lema Sabacthani?” a tia. Mahah aomtie chu, “Ka Pathien, Ka Pathien, ithomo nina mâksan?”#Lap 22:1 tina ani.

47Ha munah ânding senkhat ngeiin mahah an rieta, “Elizah ai koi kêng” an tia. 48Hanchu, an lâia mi inkhatin a tâna sponj a lâka, uain thûra a michia, tôkmol mongah a târa, hong min nêk rang a thoa.

49Hannirese, mi dang ngeiin, “La ngâk roh, a minjôk rangin Elizah mo a juong lei en bak hi rei” an tia. 50Jisua rôl inring takin âniek nôka, arang achat zoi. 51Hanchu, Biekina puonjâr hah alu renga among dênin akêr pata. Masuole chu pilchung ânnîka, lungpuingei an koia,#Jôk 26:31-33 52thânngei ahôn onga, Pathien mi tamtak alei thi ngei hah kaithoiin an oma. 53Thânngei hah an mâka, Jisua, thina renga ân thoinôk suoleh Khopuilien Inthiengah an lûta mahan mi tamtak kôm an inlâr zoi.

54Râlmi ulien le a kôla râlmi aom Jisua thîr ngei han, ningnu innîk le neinun om tie ngei hah an mûn chu an chia, “Hi mi hih Pathien Nâi ani khêt!” an tia.

55Ma munah han nupang tamtak, Galilee ram renga Jisua nûkjûia asan ngâi ngei han alazanna renga an thîra.#Luk 8:2-3 56Ha ngei hah Mary Magdalene ngei Jacob le Joseph nu Mary ngei le Jebedee lômnu ngei an ni.

Jisua an phûm

(Mk 15:42-47; Luk 23:50-56; Joh 19:38-42)

57Kholoi ahong nin chu mineipa Arimathea khuo mi a riming Joseph a hong tunga; ama khom Jisua ruoisi a lei nia. 58Pilat makunga ava sea Jisua ruok hah ava zonga, ruok hah Joseph kôm pêk rangin Pilat'n chong a pêka. 59Masikin Joseph han ruok hah a musuma puoninnêm athar leh a thoma, 60male thân lunga iver zoisuobila han a min jâla. Hanchu thân bâi hah lung alienpa leh a hîp zoiin chu a sea. 61Mary Magdalene le Mary dang hah thân tieng mâithakin an insunga.

Thân ngâkngei

62Anangtûkah Sabbathni sûnin chu Ochaisingei le Phariseengei hah Pilat kôm an honga, 63male a kôm, “O pu, ha milaka han aring lâiin, ‘Sûnthum suoleh chu inthoinôk ki tih’ a ti kin riet. #Mat 16:21; 17:23; 20:19; Mk 8:31; 9:31; 10:33,34; Luk 9:22; 18:31-33 64Masikin thân hah sûnthum sûng chu asadima ngâk rangin chong pêk roh, a ruoisingeiin an sea, an va muruka, mipui lâia, ‘Thina renga ânthoinôk zoi’ an ti thei loina rangin. Ma anghan aninônchu hi huongna nûktak hih motona nêkin siet uol nih,” an tia.

65Pilat'n an kôm, “Râlmi tuong ungla,” male “se ungla thân hah nin thei lam dôra asân min ngâk roi,” a tipe ngeia.

66Hanchu an sea, thân lung hah sîn thôn, a ngâk rang ngei hah an min ngâk ngei zoi.

Currently Selected:

Matthew 27: SAKNT

Highlight

Copy