Mark 1

Baptispu John thurchi misîr

(Mat 3:1-12; Luk 3:1-18; Joh 1:19-28)

1Pathien Nâipasal#1:1: Miziek senkhatngei chu Pathien nâipasal ti hi don mak ngei. Jisua Khrista Thurchi Sa chungroi chu mahi ani. 2Dêipu Isaiah Lekhabua:

“Pathien'n, ‘Na lampui sinsiem rangin

ka thangtheipu no motona tîr ka ta.’#Mal 3:1

3Ramchâra mi inkhat tânghâi han,

‘Pumapa lamlien sin ungla;

a lôna rang lampui mintûn roi!’” tia ânziek anghan ânphut ani.#Isa 40:3 (LXX)

4Masikin John hah Baptis tho le thurchi misîrin ramchâra han a juong ani#1:4: John hah Baptis tho le thurchi misîrin ramchâra han a juong ani; Miziek senkhatngei an dôn chu Baptispu John hah ramchâra thurchi misîrin, ânlanga.. Mingei kôm han, “Nin sietnangei renga insîr ungla, baptisma chang roi,” hanchu, “Pathien'n nin sietnangei nangni ngâidam atih” tiin a misîr ngâia. 5Judea ram le Jerusalem khopui renga mi tam tak John thurchi misîr rangâi rangin an sea. An sietnangei an phuonga, male ama'n Jordan dunga a Baptis ngei zoi.

6John'n ûtmul puonngei ânsila, savun kongkhit a khita, a sâk chu khâimimsie, le rama khuoilutui ani.#2 Rêng 1:8 7Mingei kôm han, “Ku nûka juong rangpu hi chu keima nêka roiinpui uol ok ania, kei chu inkûna a kekokrûi sût rang luo inhoi mu-ung. 8Keima chu tui leh nangni ka Baptis ngâia, ama'n chu Ratha Inthiengin nangni Baptis atih,” a tia.

Jisua baptisma chang le methêmna tongna

(Mat 3:13—4:11; Luk 3:21,22—4:1-13)

9Galilee ramhuola Nazareth khuo renga Jisua hongna la sôt bâkloiin, Jordan dunga John'n Baptis a thoa. 10Jisua hah tui renga a hong jôk harenghan, invân ân-onga male Ratha Inthieng pharvali angati a chunga juong chum a mua. 11Male invân renga rôlin, “Nangma ka Nâipasal moroitak ni ni, nu chunga ka râiasântatak ani” ti chong ajuong tunga.#Aph 22:2; Lap 2:7; Isa 42:1; Mat 3:17; 12:18; Mk 9:7; Luk 3:22

12Voikhatrengin Ratha'n ramchâra a min se zoia, 13mahan Soitan methêmin sûn sômminli a oma. Mahan ram sângei khom an oma, aniatachu vântîrtonngei han an juong san ngâi.

Jisua'n ngasûrpungei minli a koina

(Mat 4:12-22; Luk 4:14,15; 5:1-11)

14John hah intâng ina an khum suole chu, Jisua hah Pathien renga Thurchi Sa misîr rangin Galilee rama a sea. 15“Azora diktak hah ahongtung zoi,” male, “Pathien Rêngram khom anâi zoi! Nin sietnangei renga insîr ungla male Thurchi Sa hi iem ta roi!” tiin a misîra.#Mat 3:2

16Jisua'n Galilee dîl panga a lôn lâiin ngasûrpu inik Simon le a nâipa Andrew lên lei vôr hah a mua. 17Jisua'n an kôm, “Ni jûi ungla, miriem sûr rangin nangni minchu ki tih” a tipe ngeia. 18Marenghan an lênngei an mâkraka male an jûi kelen zoi.

19A se nôk uol vietin chu lâibungsa dang Zebedee nâipasalngei, Jacob le a nâipa John a mu nôka. An lênngei sinsiemin rukuong chunga an lei oma. 20Jisua'n anni ngei hah a mu ngei lehan, a koi ngeia; an pa Zebedee hah inlo mingei kôm rukuonga an mâka, male Jisua leh an se kelen zoi.

Miriem inkhat ramkhori sûr

(Luk 4:31-37)

21Jisua le a ruoisingei hah Capernaum khopuia an honga, Sabbathni sûn anîn chu Jisua Synagog taka a lûta, male mi a minchu kelen zoia. 22A minchu lam ariet mingei han kamâm aom sabak an tia, Balam minchupungei angin niloiin; manêkin, rachamneitakin anni ngei ha a minchu sikin.

23Masuole han, ramkhori sûr mi inkhat synagog han a honga an iek raka, 24ha mi han, “Nazareth Jisua, keini renga imo na nuom aom? Mi minmang ranga hong mo ni ni? Nang ki riet Pathien thangtheipu inthieng ni ni!” a tia.

25Jisua'n ratha kôm han, “Dâirek inla, male ha miriem sûng renga hah hong jôk pai roh!” tiin chong a pêka.

26Ratha saloi han amapa hah anîkbit suole chu inringtakin ân ieka, male a sûng renga a hong jôk pai zoia. 27Mingei han kamâm aom sabak an tia, “Ma hih imo ani hi? Mahi minchuna thar mo ani? Ratha saloingei khom rachamneitakin chong a pêk ngeia, male a chong an jôm kelen hi?” Inkhat le inkhat anin rekel inlôma.

28Masikin Galilee ramhuol pumpuia Jisua thurchi ânthang zit zoi.

Jisua'n mi tamtak ngei a mindam

(Mat 8:14-17; Luk 4:38-41)

29Jisua le a ruoisingei, Jacob le John telsân Synagog renga an jôka, male Simon le Andrew ina rangin an thengpata. 30Simon tarpi hah ritun damloiin jâlmuna a lei oma; Jisua ava tungin chu harenghan, amanu damloi roi hah an lei rila. 31Amanu kôm han a sea, a kuta a mutua, sanin a kaithoia. Amanu mintun hah a dama, male amanu han an sin a tho pe ngei zoi.

32Masuole chu kholoi ahong nia male nisa ahong tâkin chu, mingeiin Jisua kôm damloi murdi le ramkhori sûr ngei an hong tuonga. 33Khopui sûnga mingei nâm inkot kôla an hong intûpa. 34Jisua'n ri jât tamtak ngei a mindama male ramkhori tamtak a rujûlpaia. Ramkhoringei han ama an riet sikin, ite an ti rangin phal ngei mak.

Jisua'n Galilee rama thurchi a misîr

(Luk 4:42-44)

35Anangtûk jînga chu avâr mân rengin Jisua ânthoia, in renga hah a jôka. Khopui renga mun inthimna a sea, mahan chubaithona ava manga. 36Hannirese Simon le a champuingei han ama an hong roka, 37male an va mu lehan, a kôm, “Mitinin nang an rok,” an tipea.

38Hannirese Jisua'n an kôm, “Hi revêla khuo dangngeia khom hin ei se ngêt rang ani. Hi ngei hin khom thurchi ki misîr rang anâng ani, maha ku juongna abi ani sikin,” tiin a thuona.

39Masikin synagogngeia thurchi misîrin le ramkhoringei rujûlpaiin Galilee ram pumpuia a chai zoia.#Mat 4:23; 9:35

Jisua'n mi a mindam

(Mat 8:1-4; Luk 5:12-16)

40Jisua kôm mi inkhat vun ri dôn a honga, khûkinbilin, male san rang a ngêna, “Nu nuomin chu mi ni minthieng thei,”#1:40: mi ni minthieng thei: Hi ri hih balamin mi inthiengloiin bê ani. a tia.

41Jisua'n inriengmunân#1:41: inriengmu; miziek senkhat ngei an dôn chu taksina. asipa, male a kut ahong sôna, male a tôna, “Ka nuom,” hong, “Inthieng ta roh!” tiin a thuona. 42Voikhatrengin a pangphâr hah ahong boi kelena, male ânthieng zoi. 43Jisua'n chongnazatin a tipea, a tîr kelena, 44a kôm a ti suole, “Rangâi roh, hi roi hih tute ril tet no roh duo. Hannirese ochai kôm thengpat inla va min mu roh; masuole chu mitinin nên thieng nôk zoi ti an riet minthârna rangin Moses chongpêka inbôlna pêk ranga ati hah pêk roh” a tipea.#Och 14:1-32

45Hannirese amapa hah a jôka, ma thurchi hah muntina a phuong minzara. Adikin, a ril minlum rai sikin Jisua chu ânlangin khopuia lût thei khâi maka, mun inthim ngeia a va oma, male muntin renga a kôm mingei an hong ngâi ani.

Currently Selected:

Mark 1: SAKNT

Highlight

Copy