Genesis 9
9
Hiyay Kahundoan nan Apo Namalyadi kanan Noe
1In-inged na yan Apo Namalyadi ye Noe boy hilay aanak na. Hinabi na, “Magpakalabong kawo boy patepean yoy babe-luta. 2Kalimowan la kawon kaganaan a aayop, hilay angkumodang, andumakap, anlumpad boy kaganaan a mamalanghit ha dagat. Ipabaala ko hilan kaganaan kanyo. 3Hilay kaganaan a angkabi-ay boy angkumodang, an-ibyay ko hila kanyo a kena yo. Hatew, in-ibyay ko kanyo ye malambot a tatanaman a kanen yo. Noba haanin, an-ibyay ko hilayna kanyo ye kaganaan a kena yo. 4Noba adi yo kena ye ayop a ahe napalwah ye daya na, ulita hiyay daya ye bi-ay. 5Ket hiyay tungkol ha daya nin tao, makibat ya kangko ye ayaman a tao a mamatey nin kapadiho nan tao. Wanabay met ha ayop a makapatey nin tao, makibat ya kangko ye agya hinyaman a mamatey nin tao.”
6“Ayaman a mamatey nin kapadiho nan tao, ket pateyen ya met nin kapadiho nan tao, ta pinalhowa nan Apo Namalyadi ye tao a katuwad na. 7Noba Noe, magpakalabong kawo boy patepean yoy babe-luta.”
8Hinabi nan Apo Namalyadi kanan Noe boy kanlan aanak na, 9“Yati ye kahundoan ko kanyo boy kanlan lalahi yo, 10boy kanlan kaganaan a angkabi-ay a ayop a kalamo yon nilumwah ha daong a hilay mamanokmanok boy aayop, maamo man o mahilib. 11Yati ye kahundoan ko kanyo. An-ipangako ko a adi koyna tanepen uman ye kaganaan a angkabi-ay ha babe-luta boy adi koyna tanepen ye babe-luta ta-omen damaen.”
12Hinabi na po Apo Namalyadi, “Yati ye pagkakitan nin homain anggaan a kahundoan ko kanyo boy ha kaganaan a angkabi-ay a aayop a kalamo yo. 13Mangipakit akon buwakaw ha owep. Ket yatin buwakaw ye pagkakitan nin kahundoan ko ha kaganaan a angkabi-ay ha babe-luta. 14Tepe diyagen ko yan maowep ye luwang boy makit ye buwakaw ha owep, 15maihipan koy kahundoan ko kanyo boy ha kaganaan a aayop a agkoynan tanepen uman ye babe-luta ta-omen damaen ye kaganaan a angkabi-ay. 16Tepe makit ye buwakaw ha owep, ket maihipan koy homain anggaan a kahundoan ko ha kaganaan a angkabi-ay ha babe-luta.”
17Kaya-bay hinabi nan Apo Namalyadi kanan Noe, “Hiyay buwakaw ye pagkakitan nin kahundoan ko ha kaganaan a angkabi-ay ha babe-luta.”
Hilay aanak nan Noe
18Hilayati ye aanak nan Noe a kalamo na ha daong, hiyay Shem, Ham boy Jafet. (Hiyay Ham ye bapa nan Canaan.) 19Hilayatin tatlon lalakin aanak nan Noe ye nangibatan nin kaganaan a tatao a nangaitayak ihti ha babe-luta.
20Hiyay Noe ket māgtalon ya boy hiyabay ye unan nananem nin obah. 21Ha maghay mangaamot, hiyay Noe ket ninom yan alak ubah ket nalahing ya. Nipakatuloy yan loh-ok ha loob nin hongab na. 22Haanin, hiyay Ham a bapa nan Canaan ket nilumoob ya ha hongab, ket nakit na yan loh-ok ye bapa na. Nilumwah ya ha hongab, ket hinabi na kanlan luway katongno na ye nakit na. 23Kaya-bay hiyay Shem boy Jafet, nangwa hilan oweh a ingkonin la ha bantaw la haka hila nayngidlan a lumoob a patalingkukol ha hongab. Inowehan la yay laman nan bapa la. Ahe la pinalingayan ta ahe la labay makit a loh-ok yay bapa la.
24Ha naimahmahan yaynay Noe boy ha natandaan na ye dinyag nan anak na a bonho, 25hinabi na,
“An-ihumpa kata Canaan.
Mag-ilyadi kan ipoh lan kakatongno mo.”
26Boy hinabi na po,
“Galangen yay Apo Dioh, a Namalyadi nan Shem.
Mag-ilyadi ya dayin ipoh nan Shem ye Canaan.
27Pawayen naya dayin Apo Namalyadi ye lugal nan Jafet
boy mag-ilyadi ya dayin manged ye paylamo nin lalahi na kanlan lalahi nan Shem.#9:27 Shem ha habin Hebreo ket hiyay Jafet ket kumonin ya dayi ha hongab nan Shem.
Boy mag-ilyadi ya met dayin ipoh nan Jafet ye Canaan.”
28Pangayadi nin tanep, nabi-ay ya po ye Noe nin 350 a taon. 29Inumabot ya ha 950 a taon bayo yan natey.
Currently Selected:
Genesis 9: AABPV+
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
