လံာ်လူၤကၣ် 23
23
ယ့ၣ်ၡူးလၢစီၤပံၤလးအမဲာ်ညါ
(မး. ၂၇:၁-၂,၁၁-၁၄; မၢ်. ၁၅:၁-၅; ယိၤ. ၁၈:၂၈-၃၈)
1ပှၤဒီဖုညါဂဲၤထၢၣ်, ဒီးဆှၢယ့ၣ်ၡူးဆူစီၤပံၤလးအမဲာ်ညါ
2ဖဲအဝဲသ့ၣ်ပာ်တၢ်ကမၣ်လၢအဝဲဒၣ်အလိၤဒီးစံး, “ပဖီၣ်န့ၢ်ပှၤတဂၤအံၤလၢအဆှၢကမၣ်ပပှၤကလုာ်, တြီအဝဲသ့ၣ်လၢအသုတဟ့ၣ်တၢ်ခိတၢ်သွဲဆူစီၤပၤဖးဒိၣ် အအိၣ်တဂ့ၤ, ဒီးစံးလီၤအသးလၢအနီၢ်ကစၢ်ဒၣ်ဝဲမ့ၢ်ခရံာ်, စီၤပၤတဂၤန့ၣ်လီၤ.”
3စီၤပံၤလးသံကွၢ်အီၤ, “နမ့ၢ်နဲပှၤယူဒၤဖိအစီၤပၤတဂၤန့ၣ်ဧါ.” ယ့ၣ်ၡူးစံးဆၢဝဲ, “နစံးတ့ၢ်လံနဲလံ.”
4တုၤနုၤတစု, စီၤပံၤလးစံးဘၣ်ပှၤလုၢ်တၢ်အခိၣ်အဒိၣ် တဖၣ်ဒီးပှၤဂီၢ်မုၢ်တဖၣ်, “ယတထံၣ်န့ၢ်တၢ်ဂ့ၢ်လၢ ယကစံၣ်ညီၣ်ပှၤတဂၤအံၤနီတမံၤဘၣ်.”
5ဘၣ်ဆၣ်ဒီး, အဝဲသ့ၣ်စံးကဒီးဝဲဆူၣ်န့ၢ်အလီၢ်, “အဝဲဒၣ်မၤတၢထီၣ်တၢလီၤတၢ်လၢပှၤဂီၢ်မုၢ်တဖၣ်အကျါ လၢကီၢ်ယူဒၤဒီကီၢ်ညါခီဖျိအတၢ်သိၣ်လီၤသီလီၤတဖၣ်လီၤ. အဝဲဒၣ်စးထီၣ်မၤဝဲလၢကီၢ်ကၤလံၤလါ, ဒီးခဲအံၤဟဲတုၤဝဲဖဲအံၤလံ.”
ယ့ၣ်ၡူးလၢစီၤဟ့ၤရိာ်အမဲာ်ညါ
6ဖဲစီၤပံၤလးနၢ်ဟူတၢ်အဝဲအံၤန့ၣ်အဝဲဒၣ်သံကွၢ်ဝဲ, “ပှၤတဂၤအံၤမ့ၢ်ပှၤကၤလံၤလါဖိတဂၤဧါ.” 7ဖဲအဝဲဒၣ်သ့ၣ်ညါဘၣ်လၢယ့ၣ်ၡူးဟဲလၢတၢ်လီၢ်လၢအဘၣ် တၢ်ပၢအီၤလၢစီၤဟ့ၤရိာ်န့ၣ်, ဆှၢဝဲဆူစီၤဟ့ၤရိာ်လၢအအိၣ်စ့ၢ်ကီးဝဲဖဲ ဝ့ၢ်ယရူၤၡလ့ၣ်ဖဲဆၢကတီၢ်အဝဲန့ၣ်, န့ၣ်လီၤ. 8စီၤဟ့ၤရိာ်အသးခုဒိၣ်မး ဖဲအထံၣ်ဘၣ်ယ့ၣ်ၡူးန့ၣ်လီၤ. အဂ့ၢ်ဒ်အံၤ အဝဲနၢ်ဟူဘၣ်တ့ၢ်ဝဲယ့ၣ်ၡူးအဂ့ၢ်ဒီးဆၢမုၢ်လၢ်ထံၣ်ဘၣ်တ့ၢ် အီၤအိၣ်လံဖးယံာ်လံန့ၣ်လီၤ. အဝဲဒၣ်မုၢ်လၢ်လၢအကထံၣ်ဘၣ်ယ့ၣ်ၡူးမၤတၢ်လီၤလး တမံၤမံၤလီၤ. 9လၢတၢ်န့ၣ်အဃိ, စီၤဟ့ၤရိာ်သံကွၢ်ယ့ၣ်ၡူးတၢ်သံကွၢ်အါထံၣ်, ဘၣ်ဆၣ်ယ့ၣ်ၡူးတစံးဆၢဝဲနီတဘီဘၣ်. 10ပှၤလုၢ်တၢ်အခိၣ်အဒိၣ်တဖၣ်ဒီးပှၤသ့တၢ်ဘူၣ်တၢ်ဘါအတၢ် သိၣ်တၢ်သီတဖၣ်ဟဲထီၣ်ဆူတၢ်မဲာ်ညါဒီးပာ်တၢ်ကမၣ်ထီဒါ ယ့ၣ်ၡူးဆူၣ်ဆူၣ်ကလဲာ်လီၤ. 11စီၤဟ့ၤရိာ်ဒီးအသုးဖိတဖၣ်နံၤဘၣ်ဖၣ်လဲယ့ၣ်ၡူး, ဒီးမၤအီၤတရီတပါလီၤ. အဝဲသ့ၣ်ဒုးကူဒုးသိးထီၣ်အီၤဆ့ကၤဖး ထီလၢအဂ့ၤ, ဒီးဆှၢက့ၤအီၤဆူစီၤပံၤလးအအိၣ်လီၤ. 12တနံၤဃီအဝဲန့ၣ်, စီၤဟ့ၤရိာ်ဒီးစီၤပံၤလးကဲထီၣ်ပှၤဒီတံၤဒီသကိး လီၤ. တချုးဒံးလၢဆၢကတီၢ်အဝဲအံၤန့ၣ်, အဝဲသ့ၣ်မ့ၢ်တ့ၢ်ပှၤဒီဒုၣ်ဒါ တဖၣ်လီၤ.
တၢ်စံၣ်ညီၣ်ယ့ၣ်ၡူးလၢအကဘၣ်သံ
(မး. ၂၇:၁၅-၂၆; မၢ်. ၁၅:၆-၁၅; ယိၤ. ၁၈:၃၉-၁၉:၁၆)
13စီၤပံၤလးကိးဖှိၣ်ပှၤလုၢ်တၢ်အခိၣ်အဒိၣ်တဖၣ်, ပှၤခိၣ်ပှၤနၢ်တဖၣ်, ဒီးပှၤဂီၢ်မုၢ်တဖၣ်, 14ဒီးစံးဘၣ်အဝဲသ့ၣ်, “သုဟဲဆှၢပှၤတဂၤအံၤဆူယအိၣ်, ဒီးစံးလၢအဝဲဒၣ်ဆှၢကမၣ်ပှၤဂီၢ်မုၢ်တဖၣ်လီၤ. ခဲကနံၣ်အံၤ, ယသမံသမိးလံအီၤဖဲအံၤလၢသုမဲာ်ညါ, ဒီးယတထံၣ်တ့ၢ်ယဲ တၢ်ကမၣ်လၢသုပာ်လၢအလိၤတဖၣ်နီတမံၤဘၣ်. 15စီၤဟ့ၤရိာ်စ့ၢ်ကီးတထံၣ်အတၢ်ကမၣ်ဘၣ်. အဂ့ၢ်ဒ်အံၤအဝဲဒၣ်ဆှၢလီၤက့ၤအီၤဆူပအိၣ်လီၤ. တၢ်လၢပှၤတဂၤအံၤမၤတ့ၢ်ဝဲလၢအကြၢးဒီးတၢ်သံန့ၣ်, တအိၣ်နီတမံၤဘၣ်. 16လၢတၢ်န့ၣ်အဃိ, ယကပျဲပှၤတီၢ်အီၤဖျ့အီၤ, ဝံၤဒီးပျဲလီၤကွံာ်အီၤလီၤ. 17(ဖဲဘူၣ်လဲၤကပာ်အဆၢကတီၢ်တဘျီဘၣ်တဘျီန့ၣ်, စီၤပံၤလးဘၣ်ပျၢ်ထူၣ်ဖျဲးကွံာ်ပှၤဃိာ်ဖိတဂၤလၢအဝဲသ့ၣ် အဂီၢ်လီၤ.)
18ပှၤဂီၢ်မုၢ်ဒီဖုညါကိးထီၣ်ဝဲ, “မၤသံအီၤတက့ၢ်. ပျၢ်ဖျဲးကွံာ်စီၤဘၤရးဘါလၢပဂီၢ်တက့ၢ်.” 19(စီၤဘၤရးဘါဘၣ်တၢ်ဒၢနုာ်တ့ၢ်အီၤလၢဃိာ်ပူၤ, မ့ၢ်လၢတၢ်တၢထီၣ်တၢလီၤတဘျီလၢအမၤတ့ၢ်အသးလၢဝ့ၢ်ပူၤ, ဒီးမ့ၢ်လၢအမၤသံတၢ်အဃိန့ၣ်လီၤ.)
20စီၤပံၤလးသးအိၣ်ပျၢ်ထူၣ်ဖျဲးကွံာ်ယ့ၣ်ၡူးလီၤ. လၢတၢ်န့ၣ်အဃိ, အဝဲဒၣ်ကိးကတိၤဃီၤကဒီးဆူပှၤဂီၢ်မုၢ်တဖၣ်အအိၣ်လီၤ. 21ဘၣ်ဆၣ်ဒီးအဝဲသ့ၣ်ကိးပသူဆၢက့ၤဝဲ, “ပျၤထီအီၤလၢထူၣ်စုညါအလိၤတက့ၢ်. ပျၤထီအီၤလၢထူၣ်စုညါအလိၤတက့ၢ်.”
22စီၤပံၤလးစံးဘၣ်ကဒီးအဝဲသ့ၣ်သၢဘျီတဘျီ, “မ့ၢ်အဝဲမၤကမၣ်ဘၣ်ထံကီၢ်အတၢ်သိၣ်တၢ်သီမနုၤတမံၤလဲၣ်. ယတထံၣ်န့ၢ်တၢ်ကမၣ်လၢအဝဲဒၣ်မၤတ့ၢ်ဝဲလၢအကြၢး ဒီးတၢ်သံန့ၣ်နီတမံၤဘၣ်. ယကမၢပှၤတီၢ်အီၤဖျ့အီၤ, ဝံၤဒီးပျဲလီၤကွံာ်အီၤလီၤ.”
23ဘၣ်ဆၣ်ဒီးအဝဲသ့ၣ်ကိးပသူထီၣ်ဒံးဝဲလၢအကလုၢ်အဒိၣ်ကတၢၢ်, လၢယ့ၣ်ၡူးကဘၣ်တၢ်ပျၤထီအီၤလၢထူၣ်စုညါအလိၤအဂီၢ်န့ၣ်လီၤ. ဒီးလၢခံကတၢၢ်န့ၣ်အဝဲသ့ၣ်အကလုၢ်မၤနၢၤတၢ်ခဲလၢာ်လီၤ. 24လၢတၢ်န့ၣ်အဃိ, စီၤပံၤလးစံၣ်ညီၣ်ယ့ၣ်ၡူးဒ်အဝဲသ့ၣ်ဃ့ဝဲအသိးန့ၣ်လီၤ. 25အဝဲဒၣ်ပျဲလီၤကွံာ်ပှၤတဂၤလၢအဝဲသ့ၣ်အဲၣ်ဒိးဝဲ, ပှၤတဂၤလၢအဘၣ်တၢ်ဒၢနုာ်တ့ၢ်အီၤလၢဃိာ်ပူၤလၢ အမၤတၢထီၣ်တၢလီၤတၢ်ဒီးမၤသံတၢ်အဃိ, ဒီးဟ့ၣ်လီၤယ့ၣ်ၡူးဆူအဝဲသ့ၣ်အစုပူၤ, ဒ်သိးအကမၤအီၤဖဲအသးဒၣ်ဝဲန့ၣ်လီၤ.
တၢ်ပျၤထီယ့ၣ်ၡူးလၢထူၣ်စုညါအလိၤ
(မး. ၂၇:၃၂-၄၄; မၢ်. ၁၅:၂၁-၃၂; ယိၤ. ၁၉:၁၇-၂၇)
26ဖဲအဝဲသ့ၣ်ဆှၢယ့ၣ်ၡူးဒီးလဲၤတၢ်အဖၢမုၢ်န့ၣ်, ဘၣ်သဂၢၢ်ဒီးပှၤတဂၤလၢအမံၤမ့ၢ်စီၤၡံမိၣ်ဘၣ်ဃးဒီးကီၢ်ကူၤရ့ၤန့, လၢအဟဲလၢခိဒီးဟဲနုာ်လီၤဆူဝ့ၢ်ပူၤန့ၣ်လီၤ. အဝဲသ့ၣ်ဖီၣ်အီၤ, ပာ်ထီၣ်ထူၣ်စုညါလၢအလိၤဒီးမၢအစိာ်ဝဲဒီးလဲၤတၢ်လၢ ယ့ၣ်ၡူးအလီၢ်ခံန့ၣ်လီၤ.
27ပှၤဂီၢ်မုၢ်ဖးဒိၣ်ပိာ်ထီၣ်အခံ, ဒီးလၢအကျါန့ၣ်အိၣ်ဒီးပိာ်မုၣ်တဖၣ်လၢ အဒဲလီၤအသးနါပှၢ်ဒီးဟီၣ်ဝဲယၢၤဝဲလၢအဝဲဒၣ်အဃိန့ၣ်လီၤ. 28ယ့ၣ်ၡူးဃၣ်ဃီၤအသးဆူအဝဲသ့ၣ်အအိၣ်ဒီးစံးဝဲ, “ယရူၤၡလ့ၣ်အဖိမုၣ်သ့ၣ်ဧၢ, ဟီၣ်လၢယဃိတဂ့ၤ. မ့မ့ၢ်ဟီၣ်လၢသုဃိဒၣ်သုဝဲဒီးလၢသုဖိသုလံၤတဖၣ် အဃိန့ၣ်တက့ၢ်. 29အဂ့ၢ်ဒ်အံၤ, မုၢ်နံၤမုၢ်သီတဖၣ်ကဟဲဝဲဖဲပှၤကစံး, ‘ပိာ်မုၣ်လၢအဖိတအိၣ်နီတစု, လၢအတဒၢထီၣ်နီတစု, ဒီးတဒုးအီၣ်နုၢ်ဘၣ်ဖိသၣ်နီတစုတဖၣ်န့ၣ်, ဘၣ်ဆိၣ်ဂ့ၤဆံးဒိၣ်လဲၣ်’ န့ၣ်လီၤ. 30အဝဲန့ၣ်ကမ့ၢ်ဆၢကတီၢ်ဖဲပှၤကစံးဘၣ်ကစၢၢ်ကလိတဖၣ်, ‘လီၤတဲာ်လၢပလိၤတက့ၢ်.’ ဒီးတၢ်လူၢ်တဖၣ်, ‘ပာ်ခူသူၣ်ပှၤတက့ၢ်’ န့ၣ်လီၤ. 31အဂ့ၢ်ဒ်အံၤ, တၢ်မ့ၢ်မၤအသးလၢသ့ၣ်သံကစဲာ်အခါဒ်အံၤဒီး ဖဲသ့ၣ်ဃ့ထီအခါတၢ်ကမၤသးဒ်လဲၣ်.”
32အဝဲသ့ၣ်မိၤဃုာ်ပှၤအဂၤခံဂၤလၢအမ့ၢ်ပှၤမၤကမၣ်ထံကီၢ် အတၢ်သိၣ်တၢ်သီခံဂၤလၢာ်, ဒ်သိးအကဘၣ်တၢ်မၤသံဃုာ်ဒီးယ့ၣ်ၡူးန့ၣ်လီၤ. 33ဖဲအဝဲသ့ၣ်တုၤတၢ်လီၢ်တတီၤလၢအဘၣ်တၢ်ကိးအီၤလၢ, “ကီၤလၤကီၤသါ” လၢအခီပညီမ့ၢ်, “တၢ်ခိၣ်ဃံ” န့ၣ်, အဝဲသ့ၣ်ပျၤထီ ယ့ၣ်ၡူးလၢထူၣ်စုညါအလိၤဖဲန့ၣ်, ဒီးပှၤအၢပှၤသီခံဂၤစ့ၢ်ကီး, တဂၤလၢအစုထွဲ, ဒီးတဂၤလၢအစုစ့ၣ်န့ၣ်လီၤ. 34ယ့ၣ်ၡူးစံးဝဲ, “ပၢ်ဧၢ, ပျၢ်အဝဲသ့ၣ်အတၢ်ကမၣ်တက့ၢ်. အဝဲသ့ၣ်မၤတၢ်မနုၤလဲၣ်န့ၣ်တသ့ၣ်ညါဝဲဘၣ်.”
အဝဲသ့ၣ်နီၤဖးလီၤအဝဲဒၣ်အကူအသိးလၢအသကိးဒၣ်ဝဲ အကျါခီဖျိအဖီၣ်တၢ်ဖးလီၤ. 35ပှၤဂီၢ်မုၢ်တဖၣ်အိၣ်ဆၢထၢၣ်ဝဲဖဲန့ၣ်ဒီးကွၢ်ကီတၢ်, ဖဲပှၤယူဒၤအခိၣ်အနၢ်တဖၣ်ကတိၤနံၤဘၣ်ဖၣ်လဲအီၤဒီးစံး, “အဝဲဒၣ်အုၣ်က့ၤခီၣ်က့ၤပှၤဂၤတဖၣ်လီၤ. အဝဲမ့မ့ၢ်ခရံာ်လၢကစၢ်ယွၤဃုထၢတ့ၢ်အီၤတဂၤဒီး, မ်အအုၣ်က့ၤခီၣ်က့ၤအသးဒၣ်ဝဲတက့ၢ်.”
36ပှၤသုးဖိတဖၣ်စ့ၢ်ကီးနံၤဘၣ်ဖၣ်လဲအီၤလီၤ. အဝဲသ့ၣ်လဲၤဃီၤဆူအအိၣ် ဒီးဒုးအီအီၤစပံးထံလၢအပှ့ၤဘၣ်တကလုာ် 37ဒီးစံးဝဲ, “နမ့မ့ၢ်ပှၤယူဒၤဖိတဖၣ်အစီၤပၤန့ၣ်, အုၣ်က့ၤခီၣ်က့ၤလီၤနသးဒၣ်နဲတက့ၢ်.”
38လၢအဝဲဒၣ်အခိၣ်ထးန့ၣ်, တၢ်ကတိၤ ‘အဝဲအံၤမ့ၢ်ပှၤယူဒၤဖိတဖၣ် အစီၤပၤ’ ဘၣ်တၢ်ကွဲးလီၤအီၤလီၤ.
39ပှၤအၢဖိလၢအဘၣ်တၢ်ပျၤထီအီၤဖဲအဝဲအကပၤအကျါ တဂၤကတိၤဒုၣ်ဒွဲၣ်အီၤဒီးစံး, “နတမ့ၢ်ခရံာ်ဘၣ်ဧါ. အုၣ်က့ၤခီၣ်က့ၤလီၤနသးဒၣ်နဲဒီးပှၤတက့ၢ်.”
40ဘၣ်ဆၣ်ဒီးပှၤအၢဖိအဂၤတဂၤဒူအလိၤဒီးစံးဝဲ, “နတပျံၤကစၢ်ယွၤဘၣ်ဧါ. နအိၣ်လၢတၢ်စံၣ်ညီၣ်တမံၤဃီအဖီလာ်လီၤ. 41ဘၣ်ဆၣ်ဒီး, ပဝဲပတၢ်တူၢ်ဘၣ်တၢ်န့ၣ်, မ့ၢ်ဒၣ်တၢ်လၢအကြၢးဝဲဘၣ်ဝဲဒီးပှၤလီၤ. အဂ့ၢ်ဒ်အံၤ, ပဒိးန့ၢ်ဘၣ်တၢ်စံၣ်ညီၣ်လၢတၢ်လၢပမၤတ့ၢ်ပဝဲတဖၣ် အဃိလီၤ. မ့မ့ၢ်အဝဲဒၣ်န့ၣ်တမၤကမၣ်တ့ၢ်တၢ်နီတမံၤဘၣ်.” 42ဒီးအဝဲဒၣ်စံးဘၣ်ယ့ၣ်ၡူး, “ယ့ၣ်ၡူးဧၢ, ဖဲနဟဲနဲဒ်စီၤပၤအသိးန့ၣ်သ့ၣ်နီၣ်ထီၣ်ယၤတက့ၢ်.”
43ယ့ၣ်ၡူးစံးဘၣ်အီၤ, “ယစံးဘၣ်တဲဘၣ်နၤတီတီလိၤလိၤလၢနၤမုၢ်မဆါတနံၤအံၤ, နကအိၣ်ဒီးယၤလၢပၤရဒံစူးအပူၤလီၤ.”
ယ့ၣ်ၡူးအတၢ်သံ
(မး. ၂၇:၄၅-၅၆; မၢ်. ၁၅:၃၃-၄၁; ယိၤ. ၁၉:၂၈-၃၀)
44ဖဲမုၢ်ဆါခီတဆံခံနၣ်ရံၣ်ဃၣ်ဃၣ်န့ၣ်, မုၢ်ဆိကတီၢ်ကွံာ်အတၢ်ကပီၤဒီး တၢ်ခံးမးလၢကီၢ်ဒီဘ့ၣ်ညါတုၤလၢဟါခီလီၤသၢနၣ်ရံၣ်, 45ဒီးတၢ်လုၢ်ဟံၣ်အယၣ်ဘျးတဒၢတဘ့ၣ်န့ၣ်, ယာ်ကွံာ်ဝဲဒၣ်ခံခီလီၤ. 46ယ့ၣ်ၡူးကိးထီၣ်လၢအကလုၢ်ဖးဒိၣ်, “ပၢ်ဧၢ, ယဟ့ၣ်လီၤယသးလၢနစုပူၤလီၤ.” အဝဲဒၣ်စံးတၢ်ဒ်န့ၣ်ဝံၤဒီးအသးဟးထီၣ်ကွံာ်လီၤ.
47ပှၤသုးဖိတကယၤအခိၣ်ထံၣ်တၢ်လၢအမၤတ့ၢ်အသးတဖၣ် စံးထီၣ်ပတြၢၤယွၤဒီးစံးဝဲ, “သပှၢ်ကတၢၢ် ပှၤတဂၤအံၤမ့ၢ်ပှၤဂ့ၤပှၤဝါလီၤ.”
48ဖဲပှၤဂီၢ်မုၢ်, လၢအပာ်ဖှိၣ်ထီၣ်အသးဖဲန့ၣ်ဒ်သိးအကကွၢ်တၢ်မၤအသး တဖၣ်, ထံၣ်ဘၣ်တၢ်လၢအမၤတ့ၢ်အသးန့ၣ်, အဝဲသ့ၣ်ကိးဂၤဒဲးဒဲလီၤအသးနါပှၢ်, လၢတၢ်သူၣ်အုးသးအုးအပူၤဒီးက့ၤက့ၤဝဲဆူဟံၣ်လီၤ. 49ပှၤကိးဂၤဒဲးလၢအသ့ၣ်ညါယ့ၣ်ၡူးဃုာ်ဒီးပိာ်မုၣ်တဖၣ်လၢ အဟဲပိာ်ယ့ၣ်ၡူးအခံလၢကီၢ်ကၤလံၤလါန့ၣ်, အိၣ်ဆၢထၢၣ်လၢအယံၤဒ်သိးအကထံၣ်ဘၣ်တၢ်မၤ အသးတဖၣ်အံၤန့ၣ်လီၤ.
တၢ်ခူၣ်လီၤယ့ၣ်ၡူး
(မး. ၂၇:၅၇-၆၁; မၢ်. ၁၅:၄၂-၄၇; ယိၤ. ၁၉:၃၈-၄၂)
50-51ပှၤအိၣ်ဝဲဒၣ်တဂၤလၢအမံၤမ့ၢ်စီၤယိၤသးလၢဝ့ၢ်အရံၤမၤသဲ ဘၣ်ဃးဒီးကီၢ်ယူဒၤန့ၣ်လီၤ. အဝဲဒၣ်မ့ၢ်ပှၤအဂ့ၤအဝါဒီးအတီ အလိၤတဂၤ, လၢအအိၣ်ခိးကွၢ်လၢ်ယွၤအဘီအမုၢ်အတၢ်ဟဲန့ၣ်လီၤ. အဝဲမ့ၢ်ကီၣ်ကးအကရၢဖိတဂၤသနာ်က့, တဘၣ်သူၣ်ဘၣ်သးလၢအဝဲသ့ၣ်အတၢ်အၢၣ်လီၤစံၣ်ညီၣ် ဒီးအတၢ်ဖံးတၢ်မၤတဖၣ်ဘၣ်လီၤ. 52အဝဲဒၣ်လဲၤဆူစီၤပံၤလးအအိၣ်, ဒီးဃ့အီၤလၢယ့ၣ်ၡူးအစိၣ်လီၤ. 53အန့ၣ်ဝံၤဒီး, အဝဲဒၣ်စိာ်လီၤယ့ၣ်ၡူးအစိၣ်, ဘိၣ်ဘံဃာ်အီၤလၢတၢ်ကံးယာ်အဝါတဘ့ၣ်, ဒီးပာ်လီၤအီၤလၢပှၤသွၣ်ခိၣ်အပူၤလၢအဘၣ်တၢ် ပျၤန့ၢ်အီၤလၢလၢၢ်လိၤဒီးတဘၣ်တၢ်သူဒံးအီၤနီတဘျီဘၣ်န့ၣ်လီၤ. 54မ့ၢ်ဝဲဒၣ်မုၢ်ယဲၢ်နံၤ, ဒီးမုၢ်အိၣ်ဘှံးနံၤကတုၤဃီၤဘူးထီၣ်ဝဲလံန့ၣ်လီၤ.
55ပိာ်မုၣ်လၢအဟဲပိာ်ယ့ၣ်ၡူးအခံလၢကီၢ်ကၤလံၤလါတဖၣ်လဲၤ ဃုာ်ဒီးစီၤယိၤသးဒီးထံၣ်ဘၣ်ပှၤသွၣ်ခိၣ်အပူၤ, ဒီးယ့ၣ်ၡူးအစိၣ်ဘၣ်တၢ်ပာ်လီၤအီၤလၢအပူၤဒ်လဲၣ်န့ၣ်လီၤ. 56အန့ၣ်ဝံၤအလီၢ်ခံ, အဝဲသ့ၣ်က့ၤက့ၤဆူဟံၣ်ဒီးအိၣ်ကတဲာ်ကတီၤပာ်တၢ်နၢမူဒီးမူရၣ် လၢအကဖှူအစိၣ်အဂီၢ်န့ၣ်လီၤ. ဖဲမုၢ်အိၣ်ဘှံးနံၤန့ၣ်, အဝဲသ့ၣ်အိၣ်ဘှံးဝဲဒ်တၢ်သိၣ်တၢ်သီအိၣ်ဝဲအသိးန့ၣ်လီၤ.
Currently Selected:
လံာ်လူၤကၣ် 23: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
