လံာ်လူၤကၣ် 3
3
ပှၤဘျၢတၢ်စီၤယိၤဟၣ်စံၣ်တဲၤတဲလီၤတၢ်
(မး. ၃:၁-၁၂; မၢ်. ၁:၁-၈; ယိၤ. ၁:၁၉-၂၈)
1အဆၢကတီၢ်မ့ၢ်ဝဲဖဲစီၤပၤဖးဒိၣ်တံၤဘ့းရံပၢတၢ်ပှဲၤထီၣ် တဆံယဲၢ်နံၣ်တနံၣ်, ဖဲစီၤပီၣ်တံၤပံၤလးမ့ၢ်ကီၢ်ယူဒၤအပဒိၣ်ဖးဒိၣ်, စီၤဟ့ၤရိာ်မ့ၢ်ကီၢ်ကၤလံၤလါအပဒိၣ်, ဒီးအဒီပုၢ်ဝဲၢ်စီၤဖံလံးပူးမ့ၢ်ကီၢ်ယတူၢ် ဒီးကီၢ်တြဃိၤန့တံၤအပဒိၣ်, စီၤလူၤစၤနံမ့ၢ်ကီၢ်အဘ့ၤလ့ၣ်အပဒိၣ်, 2ဒီးစီၤအၣ်နၣ်ဒီးစီၤကၤယါဖၤမ့ၢ်ပှၤလုၢ်တၢ်အခိၣ်အဒိၣ်ကတၢၢ်တဖၣ်လီၤ. ဖဲအဆၢကတီၢ်အဝဲန့ၣ်, ကစၢ်ယွၤအကလုၢ်တုၤအိၣ်စီၤစဃၤရံအဖိခွါ စီၤယိၤဟၣ်ဖဲပှၢ်မုၢ်ကနၢန့ၣ်လီၤ. 3လၢတၢ်န့ၣ်အဃိစီၤယိၤဟၣ်လဲၤဝဲသကုၤတၢ်လီၢ်တၢ်ကျဲဒီကဝီၤ လၢအအိၣ်ဝဲဒၣ်ဖဲထံကျိယၢ်ဒ့ၣ်အဃၢၤဒီးစံၣ်တဲၤတဲလီၤတၢ်ဒ် အံၤ, “ဃၣ်ကွံာ်သုသးလၢသုတၢ်ဒဲးဘးတဖၣ်ဒီးဒိးဘျၢသုသး တက့ၢ်. ဒီးကစၢ်ယွၤကပျၢ်ကွံာ်သုတၢ်ဒဲးဘးတဖၣ်န့ၣ်လီၤ.” 4ဒ်တၢ်ကွဲးပာ်အသးဖဲလံာ်ဝံယၡါယၤအပူၤအသိး,
“ပှၤတဂၤကိးသတြီလၢပှၢ်မုၢ်ကနၢအပူၤ,
‘အိၣ်ကတဲာ်ကတီၤပာ်ကျဲမုၢ်ဒိၣ်လၢကစၢ်အဂီၢ်,
မၤန့ၢ်ကျဲဖိအဘျၢတဘိလၢ
အဝဲဒၣ်ကလဲၤတၢ်အဂီၢ်တက့ၢ်.
5ကယဲၢ်ကစၢၢ်ကဆူးကဘၣ်တၢ်မၤပှဲၤထီၣ်အီၤ,
ကယဲၢ်တၢ်လူၢ်တၢ်တြီၤဒီးကစၢၢ်ခိၣ်ကလိခံတဖၣ်
ကဘၣ်တၢ်မၤပၢၤအီၤ,
ကယဲၢ်ကျဲအက့ၣ်အကူတဖၣ်ကဘၣ်တၢ်မၤဘျၢအီၤ,
ဒီးကျဲဖိလၢအထီၣ်ကူလီၤယၢၣ်တဖၣ်
ကဘၣ်တၢ်မၤဃူထီၣ်အီၤလီၤ.
6ပှၤဟီၣ်ခိၣ်ဖိကိးဂၤဒဲး ကထံၣ်ဘၣ်
ကစၢ်ယွၤအတၢ်အုၣ်က့ၤခီၣ်က့ၤလီၤ.’ ”
7ပှၤဂီၢ်မုၢ်ဂီၢ်ပၤဟဲဆူစီၤယိၤဟၣ်အအိၣ်, ဒ်သိးအကဘၣ်တၢ်ဘျၢအီၤလၢထံလီၤ. အဝဲဒၣ်စံးဘၣ်အဝဲသ့ၣ် “ဂုၢ်ဘီၣ်အီးသ့ၣ်ဧၢ, မ့ၢ်မတၤစံးဘၣ်တဲဘၣ်သုလၢသုပူၤဖျဲးဒီး တၢ်စံၣ်ညီၣ်လၢကစၢ်ယွၤသါကဆှၢလီၤဝဲန့ၣ်သ့ဝဲတဂၤလဲၣ်. 8မၤတၢ်သ့ၣ်တဖၣ်လၢအကဒုးနဲၣ်ဖျါထီၣ်လၢသုဃၣ်ကွံာ်လံ သုသးလၢတၢ်ဒဲးဘးတဖၣ်န့ၣ်တက့ၢ်. ဒီးတဘၣ်စံးလိာ်သုသး ကဒဲကဒဲလၢစီၤအၤဘြၤဟၣ်မ့ၢ်သုပၢ်ဖးဒိၣ်လၢသုဟဲလီၤစၢၤ လၢအီၤတဂၤန့ၣ်တဂ့ၤ. ယစံးဘၣ်သုလၢကစၢ်ယွၤဟံးန့ၢ်လၢၢ် တဖၣ်အံၤဒီးဒုးကဲထီၣ်ဝဲစၢၤသွဲၣ်တဖၣ်လၢစီၤအၤဘြၤဟၣ် အဂီၢ်န့ၣ်သ့ဝဲလီၤ. 9ကွါအိၣ်ကတဲာ်ကတီၤပာ်လံအသးလၢတၢ်ကကူာ်လီၤကွံာ်သ့ၣ် တဖၣ်တုၤလၢအဂံၢ်ခီၣ်ထံးလီၤ. သ့ၣ်တထူၣ်လၢ်လၢ်လၢအတသၣ်ထီၣ်တၤသၣ်အဂ့ၤန့ၣ်, ကဘၣ်တၢ်ကူာ်လီၤဒီးတ့ၢ်လီၤကွံာ်အီၤဆူမ့ၣ်အူအပူၤလီၤ.”
10ပှၤဂီၢ်မုၢ်တဖၣ်သံကွၢ်အီၤ, “မ့မ့ၢ်ဒ်န့ၣ်ဒီး, ပကဘၣ်မၤဒ်လဲၣ်.”
11အဝဲစံးဆၢဝဲ, “ပှၤတဂၤလၢ်လၢ်လၢအဆ့ကၤအိၣ်ခံဘ့ၣ်န့ၣ်, ကဘၣ်ဟ့ၣ်ဝဲတဘ့ၣ်ဆူပှၤလၢအတၢ်တအိၣ်နီတဘ့ၣ်, ဒီးပှၤတဂၤလၢ်လၢ်လၢအအိၣ်ဒီးတၢ်အီၣ်တၢ်အီန့ၣ်, ကဘၣ်နီၤလီၤဝဲလီၤ.”
12ပှၤဃ့သွဲတနီၤဟဲဝဲဒ်သိးအကဘၣ်တၢ်ဘျၢအီၤလၢထံ, ဒီးအဝဲသ့ၣ်သံကွၢ်အီၤ, “သရၣ်ဧၢ, ပကဘၣ်မၤဒ်လဲၣ်.”
13အဝဲဒၣ်စံးဘၣ်အဝဲသ့ၣ်, “တဘၣ်ထၢတၢ်အခိအသွဲအါန့ၢ် တၢ်သိၣ်တၢ်သီဟ့ၣ်စိဟ့ၣ်ကမီၤသုတဂ့ၤ.”
14ပှၤသုးဖိတနီၤသံကွၢ်စ့ၢ်ကီးအီၤ, “ပဝဲတခီလဲၣ် ပကဘၣ်မၤဒ်လဲၣ်.”
အဝဲဒၣ်စံးဘၣ်အဝဲသ့ၣ်, “တဘၣ်ဟံးန့ၢ်ဆူၣ်ကျိၣ်စ့လၢပှၤအိၣ်မ့ၢ်ဂ့ၤ, မ့တမ့ၢ်, ပာ်တၢ်ကမၣ်ကဘျံးကဘျၣ်လၢပှၤတဂၤဂၤအလိၤမ့ၢ်ဂ့ၤ, နီတဂၤတဂ့ၤ. သူၣ်မံသးမံဒီးသုဘူးသုလဲတက့ၢ်.”
15ပှၤဂီၢ်မုၢ်အတၢ်မုၢ်လၢ်အါထီၣ်, ဒီးဆိကမိၣ်ဝဲလၢဘၣ်တဘၣ်စီၤယိၤဟၣ်ကမ့ၢ်ခရံာ်သ့ၣ်သ့ၣ်လီၤ. 16လၢတၢ်န့ၣ်အဃိ, စီၤယိၤဟၣ်စံးဘၣ်အဝဲသ့ၣ်ကိးဂၤဒဲး, “ယဲဒၣ်အံၤ, ယဘျၢသုလၢထံလီၤ. မ့မ့ၢ်ပှၤဟဲဝဲတဂၤလၢအဒိၣ်န့ၢ်ဒံးယၤစၢၢ်တလၢၢ်လီၤ. ယတကြၢးတဘၣ်ဒၣ်လဲာ်လၢယကဃ့ၣ်လီၤန့ၢ်အဝဲဒၣ် အခီၣ်ဖံးပျံၤအဂီၢ်န့ၣ်ဘၣ်. အဝဲဒၣ်ကဘျၢသုလၢသးစီဆှံဒီးလၢမ့ၣ်အူန့ၣ်လီၤ. 17အဝဲဒၣ်လီၤဂာ်ဒီးပှၤတဂၤလၢအဟံးဃာ်အကီၢ်လဲၢ်လၢအစုပူၤ ဒ်သိးအကပညၢကဆှီထီၣ်အဘုတဖၣ်, ဒီးကဂၢ်ဖှိၣ်အဘုကၠူၣ်တဖၣ်ဆူအဘုဖီအပူၤ, မ့မ့ၢ်လီၢ်ဧိၤဒံးဧိၤဒီးဖ့တဖၣ် ကဆူးကဲၤထီၣ်ကွံာ်ဝဲလၢမ့ၣ်အူလၢအလီၤပံာ်တသ့အပူၤန့ၣ်လီၤ.”
18စီၤယိၤဟၣ်စံၣ်တဲၤတဲလီၤတၢ်သးခုကစီၣ်လၢကျဲအါဘိဒီး သဆၣ်ထီၣ်ပှၤဂီၢ်မုၢ်အခံလီၤ. 19ဘၣ်ဆၣ်အဝဲဒၣ်သိၣ်ဃီၣ်ဒီးပာ်တၢ်ကမၣ်လၢပဒိၣ်ဖးဒိၣ် စီၤဟ့ၤရိာ်အလိၤမ့ၢ်လၢအဝဲဒၣ်ဟံးန့ၢ်အဒီပုၢ်ဝဲၢ်အမါ, နီၢ်ဟ့ၤရိၤဒံ, ဒီးလၢတၢ်အၢတၢ်သီအဂၤအါမံၤအါကလုာ်လၢအမၤ တ့ၢ်ဝဲတဖၣ်အဃိလီၤ. 20အန့ၣ်ဝံၤအလီၢ်ခံ, စီၤဟ့ၤရိာ်မၤတၢ်တမံၤလၢအအၢအသီဒိၣ် ဒၣ်တၢ်တက့ၢ်ခီဖျိအဒၢနုာ်စီၤယိၤဟၣ်လၢဃိာ်အပူၤန့ၣ်လီၤ.
ယ့ၣ်ၡူးအတၢ်ဒိးဘျၢအသးလၢထံ
(မး. ၃:၁၃-၁၇; မၢ်. ၁:၉-၁၁)
21ပှၤဂီၢ်မုၢ်ခဲလၢာ်ဘၣ်တၢ်ဘျၢအီၤလၢထံဝံၤအလီၢ်ခံန့ၣ်, ယ့ၣ်ၡူးစ့ၢ်ကီးဘၣ်တၢ်ဘျၢအီၤလၢထံန့ၣ်လီၤ. ဖဲအဝဲဒၣ်ဃ့ဘါထုကဖၣ်တၢ်အဖၢမုၢ်န့ၣ်, မူခိၣ်အိးထီၣ်အသး, 22ဒီးသးစီဆှံဟဲလီၤလၢအလိၤအိၣ်ဒီးနီၢ်ခိအက့ၢ်အဂီၤဒ်ထိၣ်လွံၢ် တဘ့ၣ်အသိးန့ၣ်လီၤ. ဒီးတၢ်ကလုၢ်သီၣ်လီၤလၢမူခိၣ်ဒီးစံးဝဲ, “နဲဒၣ်အံၤနမ့ၢ်ယဖိခွါဒၣ်ယဲလၢယအဲၣ်အီၤတဂၤလီၤ. ယဘၣ်သူၣ်ဘၣ်သးနၤဒိၣ်မးလီၤ.”
ယ့ၣ်ၡူးအထူအထံး
(မး. ၁:၁-၁၇)
23ဖဲယ့ၣ်ၡူးစးထီၣ်အတၢ်ဖံးတၢ်မၤန့ၣ်, အဝဲအသးအိၣ်သၢဆံဃၣ်ဃၣ်လီၤ. ပှၤအတၢ်ဆိကမိၣ်အိၣ်ဝဲဒၣ်လၢအမ့ၢ် စီၤယိၤသးလၢအဘၣ်တၢ်ထီၣ်ဖိအီၤလၢစီၤဟ့ၤလံတဂၤန့ၣ်အဖိခွါလီၤ. 24စီၤဟ့ၤလံအပၢ်မ့ၢ်ဝဲစီၤမးသး, စီၤမးသးအပၢ်မ့ၢ်ဝဲစီၤလ့ၤဝံ, စီၤလ့ၤဝံအပၢ်မ့ၢ်ဝဲစီၤမ့းလဃံ, စီၤမ့းလဃံအပၢ်မ့ၢ်ဝဲစီၤယၣ်နါ, စီၤယၣ်နါအပၢ်မ့ၢ်ဝဲစီၤယိၤသး, 25စီၤယိၤသးအပၢ်မ့ၢ်ဝဲစီၤမးတၤသံ, စီၤမးတၤသံအပၢ်မ့ၢ်ဝဲစီၤအမိၣ်, စီၤအမိၣ်အပၢ်မ့ၢ်ဝဲစီၤနအူၣ်, စီၤနအူၣ်အပၢ်မ့ၢ်ဝဲစီၤအ့းစလံ, စီၤအ့းစလံအပၢ်မ့ၢ်ဝဲစီၤနၤကဲ, 26စီၤနၤကဲအပၢ်မ့ၢ်ဝဲစီၤမအါသး, စီၤမအါသးအပၢ်မ့ၢ်ဝဲစီၤမးတၤသံ, စီၤမးတၤသံအပၢ်မ့ၢ်ဝဲစီၤစ့းမ့းအံ, စီၤစ့းမ့းအံအပၢ်မ့ၢ်ဝဲစီၤယိၤသး, စီၤယိၤသးအပၢ်မ့ၢ်ဝဲစီၤယူဒၤ, 27စီၤယူဒၤအပၢ်မ့ၢ်ဝဲစီၤယိၤအၣ်နၣ်, စီၤယိၤအၣ်နၣ်အပၢ်မ့ၢ်ဝဲစီၤရ့ၤစါ, စီၤရ့ၤစါအပၢ်မ့ၢ်ဝဲစီၤစရူဘၤဘ့းလး, စီၤစရူဘၤဘ့းလးအပၢ်မ့ၢ်ဝဲစီၤၡၤလတံၤအ့လး, စီၤၡၤလတံၤအ့လးအပၢ်မ့ၢ်ဝဲစီၤန့ၤရံ, 28စီၤန့ၤရံအပၢ်မ့ၢ်ဝဲစီၤမ့းလဃံ, စီၤမ့းလဃံအပၢ်မ့ၢ်ဝဲစီၤအးဒံး, စီၤအးဒံးအပၢ်မ့ၢ်ဝဲစီၤကိၣ်စၣ်, စီၤကိၣ်စၣ်အပၢ်မ့ၢ်ဝဲစီၤအ့းလမိၤဒၣ်, စီၤအ့းလမိၤဒၣ်အပၢ်မ့ၢ်ဝဲစီၤအ့ၢ်, 29စီၤအ့ၢ်အပၢ်မ့ၢ်ဝဲစီၤယိၤၡူ, စီၤယိၤၡူအပၢ်မ့ၢ်ဝဲစီၤအလံၤဧ့စ့ၢ်, စီၤအလံၤဧ့စ့ၢ်အပၢ်မ့ၢ်ဝဲစီၤယိၤရံၣ်, စီၤယိၤရံၣ်အပၢ်မ့ၢ်ဝဲစီၤမးသး, စီၤမးသးအပၢ်မ့ၢ်ဝဲစီၤလ့ၤဝံ, 30စီၤလ့ၤဝံအပၢ်မ့ၢ်ဝဲစီၤစူၤမ့းအိၣ်, စီၤစူၤမ့းအိၣ်အပၢ်မ့ၢ်ဝဲစီၤယူဒၤ, စီၤယူဒၤအပၢ်မ့ၢ်ဝဲစီၤယိၤသး, စီၤယိၤသးအပၢ်မ့ၢ်ဝဲစီၤယိၤနာ်, စီၤယိၤနာ်အပၢ်မ့ၢ်ဝဲစီၤအ့းလယါကံၣ်, စီၤအ့းလယါကံၣ်အပၢ်မ့ၢ်ဝဲစီၤမ့းလ့း, 31စီၤမ့းလ့းအပၢ်မ့ၢ်ဝဲစီၤမအံနၣ်, စီၤမအံနၣ်အပၢ်မ့ၢ်ဝဲစီၤမးတၤသါ, စီၤမးတၤသါအပၢ်မ့ၢ်ဝဲစီၤနၤသၣ်, စီၤနၤသၣ်အပၢ်မ့ၢ်ဝဲစီၤဒၤဝံး, 32စီၤဒၤဝံးအပၢ်မ့ၢ်ဝဲစီၤယံးၡဲ, စီၤယံးၡဲအပၢ်မ့ၢ်ဝဲစီၤဧိၤဘ့း, စီၤဧိၤဘ့းအပၢ်မ့ၢ်ဝဲစီၤဘိၤဧး, စီၤဘိၤဧးအပၢ်မ့ၢ်ဝဲစီၤစၤလမိၣ်, စီၤစၤလမိၣ်အပၢ်မ့ၢ်ဝဲစီၤနးၡိၣ်, 33စီၤနးၡိၣ်အပၢ်မ့ၢ်ဝဲစီၤဧးမံၤနဒး, စီၤဧးမံၤနဒးအပၢ်မ့ၢ်ဝဲစီၤရၣ်, စီၤရၣ်အပၢ်မ့ၢ်ဝဲစီၤဃ့ၤစရိၣ်, စီၤဃ့ၤစရိၣ်အပၢ်မ့ၢ်ဝဲစီၤပ့းရ့း, စီၤပ့းရ့းအပၢ်မ့ၢ်ဝဲစီၤယူဒၤ, 34စီၤယူဒၤအပၢ်မ့ၢ်ဝဲစီၤယၤကိာ်, စီၤယၤကိာ်အပၢ်မ့ၢ်ဝဲစီၤအံၤစဲး, စီၤအံၤစဲးအပၢ်မ့ၢ်ဝဲစီၤအၤဘြၤဟၣ်, စီၤအၤဘြၤဟၣ်အပၢ်မ့ၢ်ဝဲစီၤတ့ရၤ, စီၤတ့ရၤအပၢ်မ့ၢ်ဝဲစီၤနၤဃိၢ်, 35စီၤနၤဃိၢ်အပၢ်မ့ၢ်ဝဲစီၤစၤရူာ်, စီၤစၤရူာ်အပၢ်မ့ၢ်ဝဲစီၤရူၤ, စီၤရူၤအပၢ်မ့ၢ်ဝဲစီၤပ့ၤလ့း, စီၤပ့ၤလ့းအပၢ်မ့ၢ်ဝဲစီၤဧၤဘ့ၢ်, စီၤဧၤဘ့ၢ်အပၢ်မ့ၢ်ဝဲစီၤစ့ၤလါ, 36စီၤစ့ၤလါအပၢ်မ့ၢ်ဝဲစီၤက့ၤနၣ်, စီၤက့ၤနၣ်အပၢ်မ့ၢ်ဝဲစီၤအၢ်ဖးၡး, စီၤအၢ်ဖးၡးအပၢ်မ့ၢ်ဝဲစီၤၡ့ၣ်, စီၤၡ့ၣ်အပၢ်မ့ၢ်ဝဲစီၤနိအၤ, စီၤနိအၤအပၢ်မ့ၢ်ဝဲစီၤလ့ၤမ့း, 37စီၤလ့ၤမ့းအပၢ်မ့ၢ်ဝဲစီၤမသူၤၡလၤ, စီၤမသူၤၡလၤအပၢ်မ့ၢ်ဝဲစီၤဃနိာ်, စီၤဃနိာ်အပၢ်မ့ၢ်ဝဲစီၤယၤရ့း, စီၤယၤရ့းအပၢ်မ့ၢ်ဝဲစီၤမဟၤလ့လး, စီၤမဟၤလ့လးအပၢ်မ့ၢ်ဝဲစီၤက့ၤနၣ်, 38စီၤက့ၤနၣ်အပၢ်မ့ၢ်ဝဲစီၤအနိၣ်, စီၤအနိၣ်အပၢ်မ့ၢ်ဝဲစီၤၡ့သး, စီၤၡ့သးအပၢ်မ့ၢ်ဝဲစီၤအၤဒၣ်လၢအမ့ၢ်ဝဲကစၢ်ယွၤအဖိခွါန့ၣ်လီၤ.
Currently Selected:
လံာ်လူၤကၣ် 3: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
