လံာ်မၢ်ကူး 16
16
ခရံာ်ဂဲၤဆၢထၢၣ်က့ၤလၢတၢ်သံ
(မး. ၂၈:၁-၈; လူၤ. ၂၄:၁-၁၂; ယိၤ. ၂၀:၁-၁၀)
1တုၤပှၤယူဒၤဖိအမုၢ်အိၣ်ဘှံးနံၤပူၤကွံာ်ဒီး, ပှၤမၤကဒါလၣ်မုၣ်နီၢ်မၤရံ, စီၤယၤကိာ်အမိၢ်နီၢ်မၤရံ, ဒီးနီၢ်စၤလိၣ်တဖၣ်ပှ့ၤန့ၢ်သိနၢမူလၢအကလဲၤဖှူဝဲယ့ၣ်ၡူး အဂီၢ်န့ၣ်လီၤ. 2လၢမုၢ်ခီၣ်ထံးနံၤဂီၤဂီၤကလဲာ်ဖဲမုၢ်ဟဲထီၣ်အကတီၢ်န့ၣ်, အဝဲသ့ၣ်တဖၣ်လဲၤဝဲဆူတၢ်သွၣ်ခိၣ်အပူၤအိၣ်ဝဲအလီၢ်န့ၣ်လီၤ. 3ဖဲအလဲၤတၢ်လၢကျဲအဖၢမုၢ်အဝဲသ့ၣ်စံးလိာ်အသးတဂၤဒီးတဂၤ, “မ့ၢ်မတၤကတလ့ၣ်ကွံာ်န့ၢ်ပှၤလၢၢ်တဖျၢၣ်လၢအအိၣ်လၢတၢ်သွၣ် ခိၣ်ပူၤအခိၣ်ထိးန့ၣ်လဲၣ်.” (လၢၢ်တဖျၢၣ်န့ၣ်မ့ၢ်အဒိၣ်နီၢ်မးလီၤ.) 4ဘၣ်ဆၣ်ဒီးတုၤအဝဲသ့ၣ်ကွၢ်ထံကွၢ်ဆးဝဲဒီးထံၣ်ဝဲလၢလၢၢ် တဖျၢၣ်န့ၣ်ဘၣ်တၢ်တလ့ၣ်ကွံာ်တ့ၢ်လံအီၤန့ၣ်လီၤ. 5တုၤအဝဲသ့ၣ်လဲၤနုာ်ဝဲဆူတၢ်သွၣ်ခိၣ်အပူၤန့ၣ်ဒီး, ထံၣ်ဝဲပိာ်ခွါသးစၢ်တဂၤဆ့ၣ်နီၤလၢအဝဲသ့ၣ်အစုထွဲတကပၤ, သိးဒီးဆ့ကၤဝါဖးထီတဘ့ၣ်, ဒီးအဝဲသ့ၣ်ဖုးဘၣ်အသးဒီးအသးလီၤကတုၤဝဲဒၣ်လီၤ.
6ဒီးအဝဲဒၣ်စံးဘၣ်အဝဲသ့ၣ်, “ပျံၤတၢ်တဂ့ၤ. သုဃုထံၣ်ပှၤနစၤရ့းဖိယ့ၣ်ၡူး, ပှၤလၢအဘၣ်တၢ်ပျၤထီအီၤလၢထူၣ်စုညါအလိၤတဂၤန့ၣ်လီၤ. အဝဲဒၣ်ဂဲၤဆၢထၢၣ်က့ၤလံ. တအိၣ်ဖဲအံၤလၢၤဘၣ်. ကွၢ်တက့ၢ်. အအံၤမ့ၢ်တၢ်လီၢ်လၢတၢ်ပာ်လီၤအီၤန့ၣ်လီၤ. 7ခဲအံၤလဲၤဒီးစံးဘၣ်တဲဘၣ်အပျဲၢ်အဘီၣ်တဖၣ်ဃုာ်ဒီးစီၤပ့းတရူး လၢအဝဲဒၣ်ကလဲၤဆိပာ်ဆူကီၢ်ကၤလံၤလါလၢအဝဲသ့ၣ်အမဲာ်ညါ, ဒီးဖဲန့ၣ်န့ၣ်သုကထံၣ်ဘၣ်အီၤဒ်အစံးဘၣ်တ့ၢ်သုအသိးန့ၣ်လီၤ.”
8အန့ၣ်ဒီးအဝဲသ့ၣ်ဟးထီၣ်ဆူတၢ်ချၢဒီးဃ့ၢ်ထီၣ်ကွံာ်ဝဲလၢပှၤ သွၣ်ခိၣ်အပူၤန့ၣ်, မ့ၢ်လၢအဝဲသ့ၣ်ကနိးကစုာ်ထီၣ်ဒီးအသူၣ်လီၤ ကတုၤအသးလီၤကတုၤအဃိလီၤ. အဝဲသ့ၣ်တစံးကတိၤတၢ်ဒီး ပှၤနီတဂၤနီတဘီဘၣ်, မ့ၢ်လၢအဝဲသ့ၣ်ပျံၤတၢ်ဖုးတၢ်အဃိလီၤ.
တၢ်မၤကတၢၢ်က့ၤတၢ်သးခုကစီၣ်လၢပျၢၤတတီၤ ယ့ၣ်ၡူးလီၣ်ဖျါထီၣ်အသးလၢပှၤမၤကဒါလၣ်မုၣ်နီၢ်မၤရံ
(မး. ၂၈:၉-၁၀; ယိၤ. ၂၀:၁၁-၁၈)
[9ယ့ၣ်ၡူးဂဲၤဆၢထၢၣ်က့ၤလၢတၢ်သံလၢမုၢ်ခီၣ်ထံးနံၤလၢ ဂီၤဂီၤဝံၤအလီၢ်ခံ, အဝဲဒၣ်လီၣ်ဖျါထီၣ်အသးအဆိကတၢၢ်လၢပှၤမၤကဒါလၣ်မုၣ်နီၢ်မၤရံ, ပိာ်မုၣ်လၢအဝဲဟီထီၣ်ကွံာ်တၢ်နါနွံဒုလၢအလိၤန့ၣ်လီၤ. 10အဝဲဒၣ်လဲၤဒီးစံးဘၣ်တဲဘၣ်တၢ်လၢအမၤတ့ၢ်အသးအံၤလၢ ပှၤတဖၣ်လၢအလဲၤဃုာ်တၢ်ဒီးယ့ၣ်ၡူးန့ၣ်လီၤ. အကတီၢ်ဖဲန့ၣ်ဘၣ်ဖဲအဝဲသ့ၣ်အသူၣ်ကၢ်သးလီၤဒီးဟီၣ်တၢ်ယၢၤတၢ်, 11ဒီးတုၤအနၢ်ဟူအဝဲဒၣ်အတၢ်စံးဘၣ်အီၤလၢယ့ၣ်ၡူးမူဝဲဒီး ထံၣ်ဘၣ်အီၤလၢအကစၢ်ဒၣ်ဝဲန့ၣ်ဒီး, အဝဲသ့ၣ်တနာ်အီၤဘၣ်.
ယ့ၣ်ၡူးလီၣ်ဖျါထီၣ်အသး လၢအပျဲၢ်အဘီၣ်ခံဂၤ
(လူၤ. ၂၄:၁၃-၃၅)
12အန့ၣ်ဝံၤအလီၢ်ခံ, ယ့ၣ်ၡူးလီၣ်ဖျါထီၣ်အသးအိၣ်ဒီးအက့ၢ်အဂီၤလီၤဆီတကလုာ်ဒၣ်, လၢအပျဲၢ်အဘီၣ်ခံဂၤဖဲအဝဲသ့ၣ်လဲၤတၢ်ဆူခိအဖၢမုၢ်န့ၣ်လီၤ. 13ပှၤခံဂၤန့ၣ်က့ၤကဒါက့ၤဒီးစံးဘၣ်တဲဘၣ်ဝဲအပျဲၢ်အဘီၣ်အဂၤ တဖၣ်, ဘၣ်ဆၣ်ဒီးအဝဲသ့ၣ်တနာ်ပှၤခံဂၤန့ၣ်ဘၣ်.
ယ့ၣ်ၡူးလီၣ်ဖျါထီၣ်အသးလၢအပျဲၢ်အဘီၣ် တဆံတဂၤ
(မး. ၂၈:၁၆-၂၀; လူၤ. ၂၄:၃၆-၄၉; ယိၤ. ၂၀:၁၉-၂၃; မၤတၢ်. ၁:၆-၈)
14ယ့ၣ်ၡူးလီၣ်ဖျါထီၣ်အသးလၢခံကတၢၢ်တဘျီလၢအပျဲၢ်အဘီၣ်တဆံတဂၤ, ဖဲအဝဲသ့ၣ်အီၣ်တၢ်အီၣ်အဖၢမုၢ်လီၤ. အဝဲဒၣ်ဒူအဝဲသ့ၣ်အလိၤမ့ၢ်လၢအဝဲသ့ၣ်ပာ်ကိၤအသး ဒီးအတၢ်နာ်တအိၣ်ဘၣ်အဃိ, ဒီးမ့ၢ်လၢအဝဲသ့ၣ်တနာ်ဘၣ်ပှၤသ့ၣ်တဖၣ်လၢအထံၣ်ဘၣ်တ့ၢ်လံအီၤ လၢတၢ်ဒုးဂဲၤဆၢထၢၣ်က့ၤအီၤလၢတၢ်သံဝံၤအလီၢ်ခံန့ၣ်အဃိလီၤ. 15အဝဲဒၣ်စံးဘၣ်အဝဲသ့ၣ်, “လဲၤသုဝဲလၢဟီၣ်ခိၣ်ဒီဘ့ၣ်ညါဒီးစံၣ်တဲၤတဲလီၤတၢ်သးခု အကစီၣ်လၢပှၤကညီခဲလၢာ်န့ၣ်တက့ၢ်. 16ပှၤတဂၤလၢ်လၢ်လၢအနာ်တၢ်သးခုအကစီၣ်အံၤဒီးဒိးဘျၢ အသးလၢထံန့ၣ်, ကဘၣ်တၢ်အုၣ်က့ၤခီၣ်က့ၤအီၤ, မ့မ့ၢ်ပှၤတဂၤလၢ်လၢ်လၢအတနာ်ဝဲဘၣ်န့ၣ် ကဘၣ်တၢ်စံၣ်ညီၣ်ဃၣ်အီၤလီၤ. 17ပှၤလၢအနာ်တၢ်တဖၣ်ကဘၣ်တၢ်ဟ့ၣ်လီၤအီၤလၢတၢ်စိတၢ်ကမီၤလၢကမၤ တၢ်လီၤလးတဖၣ်အဂီၢ်လီၤ. အဝဲသ့ၣ်ကဟီထီၣ်ကွံာ်တၢ်နါလၢယမံၤ ဒီးကကတိၤတၢ်လၢကျိာ်လီၤဆီတဖၣ်လီၤ. 18အဝဲသ့ၣ်မ့ၢ်ဖီၣ်ထီၣ်ဂုၢ်, ဒီးမ့ၢ်အီဘၣ်တၢ်စုၣ်တၢ်ပျၢ်အထံနာ် သက့, တဘၣ်တၢ်နီတမံၤဘၣ်. အဝဲသ့ၣ်ကပာ်အစုလၢပှၤဆူးပှၤဆါတဖၣ်အလိၤ, ဒီးပှၤဆူးပှၤဆါတဖၣ်ကဘျါက့ၤဝဲလီၤ.
ယ့ၣ်ၡူးဘၣ်တၢ်ဟံးထီၣ်အီၤဆူမူခိၣ်
(လူၤ. ၂၄:၅၀-၅၃; မၤတၢ်. ၁:၉-၁၁)
19ကစၢ်ယ့ၣ်ၡူးစံးကတိၤတၢ်ဒီးအဝဲသ့ၣ်ဝံၤအလီၢ်ခံ, အဝဲဒၣ်ဘၣ်တၢ်ဟံးထီၣ်အီၤဆူမူခိၣ်, ဒီးဆ့ၣ်နီၤဝဲလၢကစၢ်ယွၤအစုထွဲတခီလီၤ. 20အပျဲၢ်အဘီၣ်တဖၣ်လဲၤဝဲဒီးစံၣ်တဲၤတဲလီၤတၢ်လၢတၢ်လီၢ်ကိး ပူၤဒဲးလီၤ. ကစၢ်ယ့ၣ်ၡူးမၤသကိးတၢ်ဒီးအဝဲသ့ၣ်, ဒီးခီဖျိတၢ်လီၤလးလၢအဘၣ်တၢ်မၤအီၤတဖၣ်န့ၣ်, ကစၢ်မၤဖျါထီၣ်လၢတၢ်ကစီၣ်လၢအဝဲသ့ၣ်စံၣ်တဲၤတဲလီၤဝဲန့ၣ် မ့ၢ်တၢ်အဘၣ်ဒီးတီဝဲလီၤ.]
တၢ်မၤကတၢၢ်လၢပျၢၤအဂၤတကလုာ်
[9ပိာ်မုၣ်တဖၣ်လဲၤဆူစီၤပ့းတရူးဒီးအတံၤသကိးတဖၣ်အအိၣ် ဒီးစံးဘၣ်တဲဘၣ်အဝဲသ့ၣ်လၢတၢ်လၢအဝဲသ့ၣ်ဘၣ်တၢ်စံးဘၣ်တဲဘၣ် တ့ၢ်အီၤခဲလၢာ်လၢအဖုၣ်လီၤ. 10တၢ်အံၤဝံၤအလီၢ်ခံယ့ၣ်ၡူးအနီၢ်ကစၢ်ဒၣ်ဝဲဆှၢလီၤတၢ်ကစီၣ်လၢ အစီဆှံဒီးမူဝဲထီဘိဘၣ်ဃးတၢ်အုၣ်က့ၤခီၣ်က့ၤအထူအယိာ်ခီ ဖျိအပျဲၢ်အဘီၣ်တဖၣ်စးထီၣ်လၢမုၢ်ထီၣ် ပၢၢ်တုၤလၢမုၢ်နုာ်န့ၣ်လီၤ.]
Currently Selected:
လံာ်မၢ်ကူး 16: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
