उत्पत्ति 5
5
आदमए बंशमैं
(१ इतिहास १:१-४)
1आदमए बंशमैं चुमैंन् ग।
परमेश्वरजी म्हि बनेमा खीजी ह्रोंस धोंबन् बनेइ। खीजी मुयुँ नेरो च्हमिरि बनेइ। 2खीजी चमैंलाइ बनेसि आशिक पिंसि “म्हि” बिबै मिं थेंइ। आदम बिबै ओंसोंबै म्हिए प्हसेमैंए ताँ चुर प्ह्रिथेंइमुँ।#उत १:२७-२८#मत्ती १९:४; मर्क १०:६
3आदम प्रसे सोंच्यु बर्ष तमा चइ च्ह घ्रि योंइ। चए मिं शेत थेंइ। 4शेत फिबै लिउँइँ आदम प्रेब्ब्रा बर्ष सोसि अरू च्ह-च्हमिमैं योंइ। 5आदम कुब्ब्रासे सोंच्यु बर्ष तसि सिइ।
6शेत प्रसे ङ्हदिं तमा एनोश बिबै च्ह योंइ। 7एनोश फिबै लिउँइँ शेत प्रेब्ब्रासे ङिदिं सोसि अरू च्ह-च्हमिमैं योंइ। 8शेत कुब्ब्रासे च्युसे ङ्हिंदिं तसि सिइ।
9एनोश कुच्यु बर्ष तमा केनान बिबै च्ह योंइ। 10केनान फिबै लिउँइँ एनोश प्रेब्ब्रासे च्युसे ङ्हदिं सोसि अरू च्ह-च्हमिमैं योंइ। 11एनोश कुब्ब्रासे ङ्हदिं तसि सिइ।
12केनान ङिच्यु बर्ष तमा चइ महलालेल बिबै च्ह योंइ। 13महलालेल फिबै लिउँइँ केनान प्रेब्ब्रासे प्लिच्यु बर्ष सोसि अरू च्ह-च्हमिमैं योंइ। 14केनान कुब्ब्रासे च्युदिं तसि सिइ।
15महलालेल टुच्युसे ङ्हदिं तमा येरेद बिबै च्ह योंइ। 16येरेद फिबै लिउँइँ महलालेल प्रेब्ब्रासे सोंच्यु बर्ष सोसि अरू च्ह-च्हमिमैं योंइ। 17महलालेल प्रेब्ब्रासे कुच्युसे ङ्हदिं तसि सिइ।
18येरेद प्रसे टुच्युसे ङ्हिंदिं तमा चइ हनोक बिबै च्ह योंइ। 19हनोक फिबै लिउँइँ येरेद प्रेब्ब्रा बर्ष सोसि अरू च्ह-च्हमिमैं योंइ। 20येरेद कुब्ब्रासे टुच्युसे ङ्हिंदिं तसि सिइ।
21हनोक टुच्युसे ङ्हदिं तमा चइ मतूशेलह बिबै च्ह योंइ। 22मतूशेलह फिबै लिउँइँ हनोक सोंब्ब्रा बर्ष समा परमेश्वरने बा-बालुन् प्ररिइ। धै अरू च्ह-च्हमिमैं योंइ। 23च त्हेर हनोक सोंब्ब्रासे टुच्युसे ङ्हदिंर्बै मुँल। 24हनोक परमेश्वरने बा-बालुन् प्रमल। छले प्रना-प्रन् चलाइ खाबज्यै आम्रों, तलेबिस्याँ परमेश्वरजी चलाइ क्वे बोवाल।#हिब्रू ११:५; यहू १४
25मतूशेलह प्रसे प्रेच्युसे ङिदिं तमा लेमेख बिबै च्ह योंइ। 26लेमेख फिबै लिउँइँ मतूशेलह ङिब्ब्रासे प्रेच्युसे ङ्हिंदि सोसि अरू च्ह-च्हमिमैं योंइ। 27मतूशेलह कुब्ब्रासे टुच्युसे कुदिं तसि सिइ।
28लेमेख प्रसे प्रेच्युसे ङ्हिंदिं तमा च्ह घ्रि योंइ। 29चइ ह्रोंसए च्हए मिं नोआ#5:29 नोआ हिब्रू क्युइरि चु मिं पोंमा “भों न्हब” थेम्। थेंसि बिइ, “याहवेहजी सलाइ सराप पिंल। दिलेया च सउँइँलेन् ङ्योइ लबै केउँइँले चु कोलोइ भों न्हल् पिंब्मुँ।” 30नोआ फिबै लिउँइँ लेमेख ङ्हब्ब्रासे कुच्युसे ङ्हदिं सोसि अरू च्ह-च्हमिमैं योंइ। 31लेमेख ङिब्ब्रासे ङिच्युसे ङ्हिंदिं तसि सिइ।
32नोआ ङ्हब्ब्रा बर्ष तमा शेम, हाम नेरो येपेत योंइ।
Currently Selected:
उत्पत्ति 5: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
