Luk̆a 11

Xvama Muç̆o İven

1Yeso ar svas ixvamamt̆u. Oxvamu açoduşi ar mamgurale muşik “Mance çkuni, Yanik mamguralepe muşis na dogurusteri çkuti muç̆o bixvamat domogurit”-ya uʒ̆u.

2Yesok hentepes “İxvamamt̆atşk̆ule haşo tkvit”-ya uʒ̆u:

“Baba çkuni, ʒ̆k̆onda ivas coxo skani

Komoxtas mapoba skani

3K̆at̆a ndğas hem ndğaneri gyari çkuni momçit

4Mixat̆irit k̆rimape çkuni.

Hemuşeni ki, çku na suçi moğodanpes buxat̆iramt.

Moğerdinuşa mot mionamt.”

5Uk̆ule hentepes haşo uʒ̆u: “Tkvani ar k̆ata serigverdis moxtas do, ‘K̆ata çkimi, ma sum kovali komemoʒxi, 6ar k̆ata çkimi gzaşen moxtu, na goʒ̆obudvare mutu var miğun’ dogiʒ̆vanna, 7majurakti doloxendo ‘Ma mot maʒ̆uxer! Nek̆na genk̆oleri ren, berepe çkimiti ma elemicans. Yemadginen do si mutu var memaçen’ uʒ̆umersi p̆a? 8Haya giʒ̆umert, k̆ata muşi na renşeni var, uoncğore na renşeni eisels do mutxa na uk̆oremt̆u komeçams. 9Ma tkva giʒ̆umert: İk̆vandit, niçinasen; gorit, z̆iraten; nek̆nas nuk̆ank̆it, goinʒ̆k̆asen. 10Hemuşeni ki, na ik̆vandams eç̆opums, na gorums z̆iroms, nek̆na na nok̆ank̆ams goinʒ̆k̆en. 11Tkvani doloxe nam babak bere muşik çxomi ak̆vandaşi hemus ʒ̆iʒ̆ila meçams? 12Varna makvali ak̆vandaşi ak̆rep̆i meçams? 13Tkva p̆at̆i k̆oçepe retnati berepe tkvanis mskva baxşişepe meçamu kogiçkinan. Ʒaşi Babakti, hemus na ak̆vandasens Şuriʒ̆k̆onda meçasen da p̆a!”

Yeso do Veelzevuli

14Ar ndğas Yesok, ar k̆oçis ç̆ink̆a gamuonamt̆u. K̆oçis ç̆ink̆aş gurine var ap̆aramitert̆u. Ç̆ink̆a kagamaxtuşi k̆oçik op̆aramitus kogyoç̆k̆u. Xalk̆i goişaşu. 15Mara hentepeşi bazepek, “Ç̆ink̆apeşdudi Veelzevulişi mencelite ç̆ink̆ape gamionams”-ya tkves.

16Çkvapesti Yeso meʒades do ʒaşen ar simadi ak̆vandes. 17Yesos, hentepek mu na izmonan kaçkinu do haşo uʒ̆u: “Doloxe muşis na ok̆irtasen mapoba moikten, doloxe muşis na ok̆irtasen oxori ok̆ixven. 18Şeit̆aniti doloxe muşis kok̆irtuna, mapoba muşi muç̆o dodgitun? Tkva, ç̆ink̆ape Veelzevulişi mencelite gamionams-ya zop̆ont. 19Mara ma ç̆ink̆ape Veelzevulişi mencelite gamobionamna, tkvani k̆oçepek mişi mencelite gamionaman? Hemindoras tkva, k̆oçepe tkvanik xakimi gionurt̆an. 20Mara ma Ğormotişi k̆itite ç̆ink̆ape gamobionamna, p̆a Ğormotişi Mapoba tkva komoganç̆es.

21Tişen k̆uçxeşe silaxite goʒ̆opxeri, menceloni ar k̆oçik oxori muşi çumert̆aşk̆ule, malepe muşi misobas iven. 22Mara, hemuşen menceloni ar mitxani moxtas do hemus ocginaşi, medi na uğurt̆u silaxepe muşi goʒ̆uğams do malepe muşiti ok̆irtams.

23Çkimda k̆ele na va ren, ma golomidgin; çkimi k̆ala na var k̆orobums, gopaşums-ya işinen.”

Pinti Şurişi Goktala

24“Pinti şuri k̆oçişen gamaxtasşk̆ule, xomula svalepes gulun do misoba gorums. Var az̆iraşi, ‘Na gamapti oxorişa gobikta’-ya zop̆ons. 25Oxorişa goiktasşk̆ule, koseri do melageri koz̆iroms. 26Hem oras ulun do, muşişen p̆at̆i şkit çkva şuri elik̆atams do oxorişa kamulun, kodibargen. Hasteri ar k̆oçis soğunis, iptinerişenti p̆at̆i xali aven.”

27Yesok ham nenape zop̆ont̆uşi hek na ok̆obğunanpeşen ar oxorcak zori xomate haşo uʒ̆u: “Şana bedi muşis, si na gogionu korbas do si na gegibu buz̆epes.”

28Mara Yesok hemus “Şana bedi muşis, Ğormotişi nenas na uucams do na okaçams mitxanepes!”-ya uʒ̆u.

Yonaşi Simadi

29Xalk̆i Yesoşi gomtis ok̆ibğet̆esşi, Yesok op̆aramitus kogyoç̆k̆u: “Haʒ̆ineri nesli p̆at̆i nesli ren, simadi goruman, mara hentepes Yonaşi simadişen çkva simadi var niçasen. 30Muç̆o Yona Ninovaşi xalk̆is simadi avu, K̆oçişskiriti ham neslişeni simadi ivasen.

31Omjoratişi Mapa, k̆ai do p̆at̆işi ok̆oreʒxuşi ndğas ham neslişi k̆oçepe k̆ala ğuraşen edgitasen do hentepes xukmi nuçasen. Hemuşeni ki, hemu Solomonişi çkinoba ognapuşeni kianaşi mendrani ak̆rapeşen moxtudort̆un. Oʒ̆k̆edit, Solomonişen didi hak ren. 32Ninovurepe, ok̆oreʒxuşi ndğas ham nesli k̆ala edgitasen do ham neslis xukmi nuçasen. Hemuşeni ki, Ninovurepek, Yonaşi ovaizute Ğormotişa goiktes. Oʒ̆k̆edit, Yonaşen didi hak ren.”

Xuraşi Te

33“Mitik, ar k̆andelis nudvinams do hea mpuleri ar sotxa varna ar angişi tude var eʒ̆udums. Doloxe na amaxtas hemuk te z̆iras-ya do k̆andeli gale kododums. 34Xuraşi te toli ren. Toli k̆ap̆et̆i giğunna mteli xuras gitanun. Toli ok̆oxveri giğunna, xurati gimʒ̆k̆upun. 35Haʒ̆i ik̆atali, te mot gimʒ̆k̆upurt̆as. 36Mteli xura gotaneri do soti mʒ̆k̆upi var giğunna, heak muç̆o ok̆andelesteri te muşite gitanams, xurati gatanen.”

E Çxome Farisurepe!

37Yesok, op̆aramitu oçodinuşi ar Farisurik hemus gyarişa koducoxu; hemukti amaxtu do magidas kodoxedu. 38Farisurik, hemuk gyarişen ʒ̆oxle xe na var ibonuşeni goişaşu. 39Mancek hemus haşo uʒ̆u: “Haʒ̆i, tkva Farisurepek, şuşe do sağanişi galendo k̆ele koguçxamt, mara guri oxiru do p̆at̆obate opşa giğunan. 40Ç̆e uğnosepe, galendo muşi na uxenu do doloxe muşi na uxenu, ar va reni? 41P̆a tkva, na giğunan sedek̆e meçit do haşote iri-xolo paği dogavenan.

42Mara e çxome Farisurepe! Tkva minta, p̆iğani do mteli lilvepeşi oşuri komeçamt do xukmi do Ğormotişi oropas uci elaçamt, oşuris uci var elaçaşa, hantepeti oxenu gik̆oreman.

43E çxome Farisurepe! Sinagogepes goşaʒxuneri svalepes doxunu do meydanepes selami na mekçanen, mu k̆ai giʒ̆onunan. 44E çxome! Tkva na var iz̆iren mezarepes nugamt; jindo muşi k̆oçepe uçkinu na gulunan.”

45Ʒ̆k̆onda K̆anonepeşi mamgurapalepeşen artik Yesos, “Mamgurapale çkimi, hantepe tkvaşk̆ule çkuti gemok̆itxamt”-ya uʒ̆u.

46Yesok, “E çxome tkvati ç̆e Ʒ̆k̆onda K̆anonepeşi mamgurapalepe! K̆oçepes na var ağanen monk̆a oğmalupe komok̆idamt do tkva hem oğmalupe k̆ititi var nonʒ̆amt. 47E çxome, tkva ambayocepes mezare uxenamt, mara hentepe p̆ap̆ulepe tkvanik oğurines. 48P̆ap̆ulepe tkvanik ambayocepe doğurines, tkva hentepes mezare uxenamt. Haşote, p̆ap̆ulepe tkvani na ves dulyape noz̆iremi ivert do hentepe utestik̆amt. 49Hamuşeni Ğormotişi çkinobak haşo zop̆ons: ‘Ma hentepes ambayocepe do elçepe mebucğonare, bazepe ilanoren, bazepeti onʒ̆orinapanen.’

50-51E do, Avelişi diʒxirişen, otisyale do Oxvameşi oxoriş şkas na iles Zaxariaşi diʒxirişakis, kiana na didgu ndğaşen doni na dibu mteli ambayocepeşi diʒxiri ham neslişen igorinasen. Ho, tkva giʒ̆umert, ham neslişen igorinasen.

52E çxome Ʒ̆k̆onda K̆anonepeşi mamgurapalepe! Çkinaş nek̆naşi nk̆ola mendiğit, tkva ham nek̆naşen var amaxtit, amaxtimu na unt̆espeti kogoludgitit.”

53Yeso hekole gamaxtuşi, Maç̆aralepe do Farisurepek hemus kogabğes do çkva do çkva mutxanepeşeni gok̆itxus kogyoç̆k̆es. 54Nuk̆uşen na gamuxtas ar nenate mek̆idu unt̆es ki haşote hemus suçi eondvanert̆u.

Currently Selected:

Luk̆a 11: LZZ

Highlight

Copy