Luk̆a 18

K̆at̆a Oras Oxvamu

1Yesok, mamguralepe muşis, k̆at̆a oras umeç̆irdu oxvamu na uk̆oreman ogurapuşeni ham memgapura up̆aramitu: 2“Ar noğas ar xakimi kort̆u; Ğormotişen şkurina var uğurt̆u, mititi var şinomt̆u. 3Hem noğas ar şira oxorcati kort̆u. Xakimişa mulurt̆u do ‘Xasimi çkimişen xak̆i çkimi kemiç̆opi’-ya uʒ̆umert̆u.

4Xakimik ar oraşeni hemus var mendaʒ̆k̆edu. Soğunis, ti muşi k̆ala, ‘Ma Ğormotişen var maşkurinen do mititi var pşinomnati, 5ham oxorca na mağencenşeni xak̆i muşi ebuç̆opare. Varna k̆at̆a ndğas moxtasen do momozurdinasen’-ya tku.”

6Mancek haşo naonu: “P̆at̆i xakimik mupe zop̆ons, ognit. 7Ğormotik seri-ndğaleri hemus na oxveʒ̆ams goşaonerepeşi xak̆i var ezdaseni? Hentepe dido oçvapaseni? 8Tkva giʒ̆umert, Ğormotik hentepeşi xak̆i manişa yuç̆opasen. Mara K̆oçişskiri moxtasşk̆ule dixas ocera z̆iraseni?”

Farisuri do Taxsildari

9Ti mutepeşi isa na daʒ̆onen do majurapes na gyoç̆onams mitxanepes Yesok ham memgapura dup̆aramitu: 10“Jur k̆oçi Ğormotis oxvamuşeni Oxvameşa kextes; ari Farisuri, majurani taxsildari rt̆u. 11Farisuri dodgitu do muşeburaşi haşo ixvamu: ‘E Ğormoti çkimi, ma çkvapes; mxiracepes, xak̆i na ipxonanpes, zina na ikomanpes do ham taxsildaris na var memigapinişeni gixvamam. 12Dolonis jur ndğa dobip̆içvam do mteli na mobogipeşi oşuri mepçam’-ya.

13Mara taxsildarik mendra kododgitu, tolepe ezdimuti var unt̆u, ‘Ğormoti çkimi, ma k̆rimoni bore, domixat̆iri’-ya do gurp̆ici ibaxamt̆u. 14Tkva giʒ̆umert, Farisuri var, ham k̆oçi ʒ̆imindaneri oxori muşişa goiktu. Hemuşeni ki, ti muşi na ididanams hea iç̆ut̆anasen, ti muşi na oç̆ut̆anamsti ididanasen.”

Yesok Berepe Oʒ̆k̆ondinams

15Teni k̆oçik xe mentxas-ya do ç̆ut̆a berepe mutepeşiti Yesos muonamt̆es. Mara haya na z̆ires mamguralepek hentepes duperxes. 16Yesok hentepes “Naşkvit, berepe çkimde komoxtan, hentepes mot goʒ̆udgiturt. Hemuşeni ki, Ğormotişi Mapoba hasterepeşi ren. 17Mtinala muşi giʒ̆umert, Ğormotişi Mapoba ar beresteri na var ik̆abulasen mitxanik ham mapobas varti amalen”-ya uʒ̆u.

Xampoba do Uçodinu Skidala

18Tişinerepeşen artik Yesos, “K̆ai mamgurapale çkimi, uçodinu skidala manç̆as-ma do mu p̆a minon?”-ya do k̆itxu.

19Yesok hemus “Ma muşeni k̆ai miʒ̆vi? Xvala ar mitxani k̆ai ren, heati Ğormoti ren. 20Hemuşi geçinadupe kogiçkin: ‘Zina mot ikom, miti mot ilom, mot ixiram, mʒudişi noz̆iremi mot iver; nana do baba skani şini’ ”-ya uʒ̆u.

21K̆oçik, “Ma mteli hantepe berobaşen doni bikom”-ya.

22Yesok haya ognuşi, “Xoloti ar mutxa gik̆orems. Mutxa na giğun mteli kogamaçi do para fuk̆arapes durti. Haşote ʒas ar xazina dogaven. Uk̆ule moxti do ma memaoni”-ya uʒ̆u. 23K̆oçik dido zengini na rt̆uşeni haya ognuşi guri daç̆u. 24Yesok heas guri na aç̆u koz̆iru do: “Dido mali na uğunanpeşeni Ğormotişi Mapobaşa amaxtimu nak̆o meç̆ireli dulya ren! 25E do, devek lemşişi k̆urʒ̆işen na meşaxtasen daa k̆olai ren, zenginişeni, Ğormotişi Mapobaşa amaxtimuşen”-ya.

26Haya na ognespek: “Heşo renna, mi maçitinen?”-ya uʒ̆ves.

27Yesok, “K̆oçis na var axenenpe Ğormotis axenen”-ya.

28P̆et̆rek, “Aha, çku mutu miğunan mebaşkvit do si ek̆egaonit”-ya.

29-30Yesok: “Mtinala muşi giʒ̆umert, Ğormotişi Mapobaşeni, oxori muşi, oxorca muşi, cumalepe muşi, nana do baba muşi, varna berepe muşi na ek̆it̆k̆oçespek, ham skidalas hantepeşen çkva dido ezdanen, hentepek majurani kianasti uçodinu skidala ezdanen”-ya uʒ̆u.

Yesok Masumani Fara na Edgitasenşi Ambai Meçams

31Yesok Vit̆ojurepes ducoxu do hentepes haşo uʒ̆u: “Haʒ̆i Yeruşalimişa mebulurt. Ambayocepek K̆oçişskirişeni na ç̆ares mteli ivasen. 32K̆oçişskiri, xark̆is niçinasen. Hemus gyaz̆iʒanoren, gyok̆itxanoren, nonç̆k̆valanoren. 33Hea vrat̆k̆anoren do oğurinanoren, mara masumani ndğas ğuraşen edgitasen.”

34Mamguralepek ham nenapeşen çkar mutu var oxoʒ̆ones. Ham nenape hentepeşeni mpuleri kodoskidu. Na tkupe var oxaʒ̆ones.

Yesok Utole K̆oçi Ok̆aams

35Yeso, Yerixo na coxons noğas nanç̆et̆uşk̆ule, ar utole gzas elaxert̆u do ik̆vandamt̆u. 36K̆oçik hekole dido mitxanepe na mek̆ilaman ognuşi “Mu iven?”-ya do k̆itxu.

37Hemus, “Nazareturi Yeso mek̆ilams”-ya uʒ̆ves.

38Utole k̆oçik, “Davidiskiri Yeso, guris memiç̆vi!”-ya do becğu. 39Na goʒ̆uncğonunanpek hemus “Dostibi”-ya do duperxesnati k̆oçik “Davidiskiri, guris memiç̆vi!”-ya do omğorinus munz̆inu.

40Yeso kododgitu do k̆oçi komoonapu. Utoles nanç̆uşi, 41“Skanişeni mu p̆a?”-ya do k̆itxu.

K̆oçik, “E mance, tolepek komaz̆irat̆uk̆o”-ya.

42Yesok, “Tolepe kogaz̆iras! Ocera skanik mogişletinu”-ya. 43K̆oçik hem oras oz̆iramus kogyoç̆k̆u do Ğormoti omʒku. Yesos ek̆aonu. Haya na z̆iru mteli xalk̆ik Ğormoti omʒkves.

Currently Selected:

Luk̆a 18: LZZ

Highlight

Copy