Luk̆a 22

Yudaşi Xainoba

1Fisixi na uʒ̆umert̆es up̆rozimeşi bayrami naxolert̆u. 2P̆ap̆aşumçanepe do Maç̆aralepek Yeso oğurinuşeni gza gorumt̆es; mara xalk̆işen aşkurinert̆es. 3Şeit̆ani Vit̆ojurepeşen ari na ren Yuda İsk̆ariot̆is komeşuxtu. 4Yuda idu do P̆ap̆aşumçanepe do Oxvameşi gemçinadupe k̆ala ‘Yeso hentepes muç̆oşi meçat̆u’ hea kok̆ip̆aramites. 5Hentepes axeles. Hemus para meçamuşeni kok̆indves 6Yudati razi divu. Miti va rt̆aşk̆ule hentepes Yeso meçamuşeni ora çumert̆u.

Fisixişi Gyaroba

7Up̆rozime kovalişi ndğa komoxtu. Hem ndğas Fisixişi tisya nok̆vatanert̆u. 8Yesok, “Mendaxtit, Fisixi domixazirit do kop̆ç̆k̆omat”-ya do P̆et̆re do Yani mendoşku.

9Hentepek Yesos, “So pxazirat ginon?”-ya do k̆itxes.

10Yesok hentepes, “Noğaşa amaxtatşk̆ule, k̆vanʒate ʒ̆k̆ari na zdims ar k̆oçi z̆iraten. Na amaxtasen oxorişakis hemus naonit. 11Do oxormances haşo uʒ̆vit: ‘Mamgurapalek, mamguralepe çkimi k̆ala Fisixişi gyari so p̆ç̆k̆omaten-ya do k̆k̆itxoms’-şo. 12Oxormancek jini k̆atis moʒ̆opxeri ar didi oda goʒ̆iranoren. Hek xazirit”-ya.

13Hentepeti mendaxtesşk̆ule Yesok na up̆aramitessteri koz̆ires. Fisixişi gyarişeni dixazires.

14-15Gyariş ora moxtuşk̆ule, Yeso elçepe k̆ala magidas kogoluxedu do hentepes haşo uʒ̆u: “Ma var mʒ̆oraşakis, tkvani k̆ala Fisixişi gyari oç̆k̆omu dido mint̆u. 16Tkva giʒ̆umert, Ğormotişi Mapobas einç̆inaşakis ma Fisixişi gyari çkva var maç̆k̆omasen.”

17Uk̆ule k̆aʒ̆i ezdu, ixvamu do, “Haya kemiç̆opit. Uk̆ule ok̆irtit”-ya uʒ̆u. 18“Tkva giʒ̆umert, Ğormotişi Mapoba moxtaşakis, binexis na niçanenşi çkva var pşvare”-ya.

19Uk̆ule xes kovali kodikaçu, ixvamu, kovali ok̆ortu do hentepes komeçu. “Haya tkvanişeni na mepçam xura çkimi ren. Çkimi goşinuşeni haşo vit”-ya.

20Gyarişk̆ule k̆aʒ̆i kodikaçu do: “Ham k̆aʒ̆i tkvanişeni na gemixtu diʒxirite xveneri ağani mendvala ren. 21Mara ma na ok̆omit̆alams mitxanişi xeti, xe çkimi k̆ala ham magidas ren. 22K̆oçişskiri Ğormotik k̆arari na nuçusteri nulun. Mara, e çxome, hemu na ok̆ut̆alu k̆oçis!”

23Elçepek artikartis, “Haya mis axenen?”-ya do ok̆ok̆itxus kogyoç̆k̆es.

Ucgişi Mi Ren?

24Ar k̆eleti, ‘Namu ucgişi bişinaten’-ya do ok̆obut̆es. 25Yesok hentepes, “Mapapek xalk̆epe muşis mapoba oğodaman, tişinerepekti timutepeşeni ‘K̆aoba na ikomanpe’-ya otkvapaman”-ya uʒ̆u. 26“Mara tkva haşo mot ivapurt. Mi irişen didi ren, irişen ç̆ut̆asteri vas; xukmi na uğun heati maxezmet̆esteri ivas. 27Namu didi ren? Magidas na golaxen mitxanii, varna hemus na uxezmet̆amsi? Magidas na golaxen da! Mara ma tkvani doloxe maxezmet̆esteri bivi. 28Ma biʒadapurt̆işk̆ule çkimi k̆ala na nuxondespeti tkva ret. 29Baba çkimik ma muç̆oti mapoba momçu, mati tkva mapoba mekçamt. 30Haşote, çkimi mapobas çkimi magidas ç̆k̆omaten do şvaten. E do tronis golaxedaten do İsrailişi vit̆ojur aşiretis mapoba oğodaten.”

Simon P̆et̆reşi Movaru

31“Simoni, Simoni, Şeit̆anik tkva muç̆o dik̆asteri onʒoruşeni izni ak̆vandu. 32Mara ma, ‘Ocera skani mot gogindunut̆as’-ma do bixvami. Goiktaşi cumalepe skanis menceli meçi.”

33Simonik Yesos, “Mance çkimi, ma skani k̆ala cixa do ğuraşa oxtimus xaziri bore”-ya.

34Yesok, “Si giʒ̆umer, P̆et̆re, hamseri mamuli icoxaşakis ma na miçinom sum fara moivarare”-ya.

35Uk̆açxe Yesok hentepes: “Ma tkva ukeseli, ut̆urveli do uçapule goşkvitşk̆ule mutu gegik̆ordesi?”-ya do k̆itxu.

Hentepek: “Mutu çkuni var gemik̆ordes”-ya uʒ̆ves.

36Yesokti hentepes: “Mara haʒ̆i kese na uğunti, t̆urva na uğunti hentepe kezdas. Xami na var uğun, libade muşi kogamaças do xami keç̆opas. 37Tkva giʒ̆umert, na ç̆arun ham nena skidala çkimis amaxtimuşi ren: ‘Hea, k̆rimonepe k̆ala ar işinu.’ Mtinala, çkimişeni na ç̆arunpe mulun”-ya uʒ̆u.

38“Mance çkuni, hak jur xami komiğunan”-ya uʒ̆ves.

Hemukti hentepes, “Ubağun”-ya uʒ̆u.

Zeytinişi Golas Xvama

39Yeso gale kogamaxtu. K̆at̆andğeristeri Zeytinişi Golaşa keşaxtu. Mamguralepe muşiti konaones. 40Hek mendaxtuşk̆ule, Yesok hentepes: “İxvamit ki var iʒadat”-ya uʒ̆u.

41Hentepeşen ar kvaşi ot̆k̆oçinuş k̆onari dimendranu. Burgulepe muşis gyatu do haşo ixvamu: 42“E Baba çkimi, si ginonna ham k̆aʒ̆i mendemiği. Xolo, ma na minon var, si na ginon ivas.” 43Ʒaşen ar melaike Yesos kaʒ̆iru, hemus menceli komeçu. 44Monk̆a derdi na nʒ̆orums Yesok, gurite ixvamu, upi muşi let̆as na daʒ̆ap̆en diʒxiristeri rt̆u.

45Yesok xvamaşen edgitu do mamguralepe muşi k̆ele mextuşi hentepe derdite nciris z̆iru. 46Hentepes, “Muşeni cant, edgitit do ixvamit ki var iʒadat”-ya uʒ̆u.

Yeso Niç̆open

47Yesok isinapamt̆uşi dido mitxanepe komextes. Yuda na coxons, Vit̆ojurepeşen ar k̆oçi hentepes goʒ̆uncğonurt̆u. Yuda Yesos mecundinuşeni nanç̆u. 48Mara Yesok, “Yuda, si K̆oçişskiri ar mecundinute ok̆ut̆alemi?”-ya.

49Yesos na gobğunanpek na ivasenpe oxoʒ̆onesşi, “Mance çkuni, xamite p̆ʒ̆amati?”-ya do k̆itxes. 50Hentepeşen arik P̆ap̆aşumçaneşi ç̆k̆oris geçu do marz̆gvani uci konuç̆k̆oru.

51Mara Yesok, “Naşkvit, dubağun!”-ya uʒ̆u. Uk̆açxe ç̆k̆oris xe mentxu do dok̆au.

52Yesok, muşi k̆ele na mulunan P̆ap̆aşumçanepe, Oxvameşi gemçinadupe do tişinerepes haşo uʒ̆u: “Muşeni çkimda, ma abrek̆i bort̆ik̆osteri xami do p̆alopete moxtit? 53K̆at̆a ndğas Oxvames tkvani k̆ala bort̆i, mutu var moğodit. Mara haʒ̆i ora tkvani ren, mʒ̆k̆upişi ora ren.”

P̆et̆rek Yeso Moivarams

54Yeso meç̆opes do P̆ap̆aşumçaneşi oxorişa mendiones. P̆et̆rek hentepes mendraşen uxosart̆u. 55Avlaşi şkas daçxuri dogzes do mteli ok̆oxedesşi, P̆et̆reti hentepes keluxedu. 56P̆et̆re daçxuri k̆ala doxeduşi ar xalağik goʒ̆k̆edu do “Ham k̆oçiti hemu k̆ala rt̆u!”-ya.

57Mara P̆et̆rek, “Be oxorca, ma hea var biçinom”-ya do moivaru.

58Ar ç̆ut̆a oraşk̆ule arçkva k̆oçik, “Siti hentepeşen re”-ya uʒ̆u.

P̆et̆rek, “Ebçi, var bore”-ya.

59Ar saati k̆onari oraşk̆ule xolo ar mitxanik, “Mtinale, ham k̆oçi hemu k̆ala rt̆u, hemuşeni ki Galiluri ren”-ya do gyobaz̆gu.

60P̆et̆rek, “Ç̆e k̆oçi, si mu zop̆on, ma var oxoboʒ̆onum”-ya. P̆et̆rek isinapamt̆uşi mamulik kodicoxu.

61Mancek goiktu do P̆et̆res mendaʒ̆k̆edu. Hem oras P̆et̆res, Mancek “Hamseri mamulik dicoxaşakis ma na miçinam sum fara moivarar” na uʒ̆u kogaşinu. 62Gale gamaxtu do şik̆ineri şik̆ineri ibgaru.

63Yeso na dokaçumt̆es k̆oçepek hemus noz̆iʒamt̆es do baxumt̆es. 64Tolis muk̆ores do, “Ambayocoba skani moʒ̆irit, si mik gekçams?”-ya do k̆itxes. 65Hemus gyok̆itxes do ogores.

Yeso Didi Ok̆oxunus Ren

66Tanuşi, xalk̆işi tişinerepe, P̆ap̆aşumçanepe do Maç̆aralepe kok̆ik̆orobes. Yeso hantepek na dodges Didi Ok̆oxunuşa kogamiones. 67Hemus, “Si Xrist̆e rena çku domiʒ̆vit”-ya uʒ̆ves.

Yesok hentepes haşo uʒ̆u: “Haya tkva dogiʒ̆vatnati var miceraten. 68Tkva mutu dok̆k̆itxitk̆oti mutu var miʒ̆umert. 69Mara haʒ̆işk̆ule K̆oçişskiri menceloni Ğormotiş marz̆gvani k̆ele gelaxedasen.”

70İrik, “Haʒ̆i, si Ğormotiş skiri rei?”-ya do k̆itxes.

Hemukti, “Na tkvitsteri ren, ma hea bore”-ya.

71Hentepek, “Çkva noz̆iremi var miç̆erebunan, muşi nuk̆uşen kobognit”-ya tkves.

Currently Selected:

Luk̆a 22: LZZ

Highlight

Copy