SAWLTAHTE 9
9
Saul a Kikhelna
1Saul in tua hun sung tengin Topa’ nuazuite tha dingin galgihin husang na lai a, siempu lien pa kungah pei-in, 2tua Lampi a zui numei pasal a mu popo uh hensa-in Jerusalem a tut thei nadingun ama in Damascus khuo-a biehinn uhte kungah phalna lai ngen hi. 3Ama pei-in Damascus khuo a tun kuon ciengin vantung panin khuovah khat in a kimkot thakhatin a khawsuh hi. 4Leilahah ama puasuh a, “Saul, Saul aw, bangzieh a kei nei ci bawlsiet ahei?” ci-in awging khat a za hi. 5Ama in, “Topa aw, nang koi na hei?” ci-in dong hi. Ama in, “Nei bawlsiet Jesu ka hi hi. 6Hizongle tho inlen khuopi sungah lut lacin na bawl ding thu ang kigen ding hi,” a ci hi. 7A khuolzinpi mite in tua awging a zah vangun koima in mu lo ahi ziehin gen ding thei loin a dinggaw uhi. 8Leilah panin Saul thoto a, a mit a ha vangin khuo a mu thei sih hi; tuaci’n amate in a khut tawh ama tu-in Damascus khuo sungah a peipi uhi. 9Ama in ni thum sung khuo mu thei loin, an ne lo tui dawn loin a om hi.
10Khumin Damascus ah Ananias kici nuazui khat a om hi. Topa in a mangmuna sungah, “Ananias,” a ci hi. Ama in, “Tanah om ing, Topa aw, ” ci-in a dawng hi. 11Topa in ama kungah, “Tho inlen Lampi Zang a kici khatah pei-in, tuale Judas’ inn ah Tarsus khuomi Saul a kici pa va sui ta’n. Tu laitahin ama thungenin a om a, 12ama in khuo a mukia thei nadingin Annaias a kici mi khat pei-in ama’ lu tungah a khut a ngahna thu, a mangmuna sungah#9:12 Adang tang laibute ah “mangmuna sung ah” ci om lo hi. a mu hi,” ci-in a gen hi. 13Ahi vangin Ananias in, “Topa aw, tam pa in Jerusalem-a na misiengthote tungah bangza tahin sietna bawl ahei ci thu mi tampite tung panin ka za zo hi. 14Tam sunga om na min a lo mi zosie a hen thei nadingin ama in siempupite tung panin thu a nga zo hi,” ci-in a dawng hi. 15Hinanle Topa in ama kungah, “Va pei in, bangzieh ahei cile ama pen Gentile-te, kumpite, le Israel-te mai-ah ka min a puo dinga ka tuomtelsa ka vanzah khat ahi hi. 16Ama in keima’ min ziehin bangza-in gimna thuoh ding ahei, ci pen kei mama in ama ka lah ding hi,” a ci hi. 17Tuaci’n Ananias pei-in tua inn sungah a lut hi. Ama in Saul tungah a khut nga a, “Sanggam pa Saul aw, nangma in khuo mu theikia-in Hlagau Siengtho tawh na kidim thei nadingin tami mun na peina lampi-a ang kilah ahi Topa Jesu in kei ei sawl hi,” a ci hi. 18Tuale thakhatin Saul’ mit panin ngalip tawh a kibang na khat kiesuh a, ama zong tho-in ki-baptize pai a, 19an halkhat a neh zaw ciengin a tha a hatkia hi.
Saul in Damascus ah Thuhil
Damascus khuo-a om nuazuite tawh ama ni tampi a omton hi. 20Kikhopna inn sungah, “Ama Pasien’ Tapa ahi hi,” ci-in thakhatin Jesu’ thu tangko ding a kipan hi. 21A thugen a za zosie in lamdang sa-in, “ Tam mipa, Jerusalem-a Jesu’ min a lote a bawlsie pa hi lo amah? Siempupite mai-ah amate hensa-a puoh ding a ngimna tawh ama tana ang pei hi lo amah?” a ci uhi. 22Saul vang nei semsem a, Jesu in Messiah#9:22 Ahi sihle “Khris” ahi hi, ci-in a hilcien ziehin ama in Damascus-a teng Jew mite a amtumsah hi.
Jew Mite Kung pan Saul Suohta
23Ni tampi zaw ciengin Jew mite in ama a daptha sawm vua, 24hinanle amate in a tha sawm lamtah Saul in a thei hi. Ama a tha thei nadingun sun le zanin tunkot tengah a pang uhi. 25Ahi vangin zan lai-in a nuazuite in Saul peipi-in kulvang panin bawng tawh a khiesuh uhi.#2Cor 11:32-33
Jerusalem ah Saul
26Jerusalem ah ama a tun ciengin nuazuite tawh kipawl ding a hanciem hi; tuale amate in nuazui dingin ama um zo lo uh ahi ziehin amate zosie in ama a giing uhi. 27Hizongle Barnabas in Saul hlanin sawltahpite kungah peipi a, a lam pei laitaha ama a hopi Topa a mu dan, Damascus khuo-a Jesu min’ tawh hangtaha a thugen dan zosie teng amate a hilcien hi. 28Tuaci’n Jerusalem khuo sunga om amate lahah ama sungtum pusuohin a om hi. 29Ama pen Greek ham a zang Jew mite tawh zong thu a kisel hi; hinanle amate in ama tha a sawm uhi. 30Thu um mite#9:30 Gk “sanggamte” in tua thu a thei ciengun Caesarea khuo ah ama peipi suhin Tarsus khuo ah a hla uhi.
31Tua hun sung tengin Judea gam, Galilee gam le Samaria gam zosie-a om hlattuom pawlpite in lungmuonna le kilamna a nga uhi. Topa zatahna sung le Hlagau Siengtho henepna sungah a nuntah ziehun amate a pung semsem uhi.
Aeneas a Kidamsahna
32Tu-in thu um mite#9:32 Gk “amate zosie” lahah Peter zin kawikawi a, Lydda khuo-a om mi siengthote kungah zong a peisuh hi. 33Tua munah ama in a phalsi, kum giet sung lupmun tung ngah Aeneas kici mi khat a mu hi. 34Peter in tua pa kungah, “Aeneas aw, Jesu Khris in ang damsah zo ta hi; tho inlen na lupna ziel in!” a ci hi. Tuale thakhatin ama a tho pai hi. 35Lydda le Sharon khuo-a teng mi zosie in tua pa a mu uh ciengin Topa lamah a kihei uhi.
Peter, Lydda le Joppa Khuo ah
36Khumin Joppa khuo ah Tabitha a kici nuazui numei khat om a, a min pen Greek kamin Dorcas#9:36 Aramaic kamin Tabitha le Greek kamin Dorcas pen “sakhi” a ci nopna ahi hi. ahi hi. Ama pen sil hoite sem ding le mi khuotuona lam sem dinga kipumpieh ahi hi. 37Tua laitahin tua nu a ci na-in a si hi. Tua nu’ luong a buol zaw ciengun inndan tungnungah ama a siel uhi. 38Lydda khuo pen Joppa khuo tawh kinai hi a, tua khuo ah Peter a op lam nuazuite in a zah ciengun mi ni sawlin, “Kiheh loin ko kungah hing hawpah ta’n,” ci-in a thumsah uhi. 39Tuaci’n Peter zong dingin amate tawh a zawhton pai hi; ama a tun ciengin amate in inndan tungnungah ama a zawpi uhi. Peter gei-ah meigong zosie a ding vua, a kaa kawmun Dorcas tawh a opton lai vua a gat songkholte le puontuolte ama a ensah uhi. 40Peter in amate zosie pusuohsah a, tua ciengin ama khupdingin thu a ngen hi. Siluong lamah kihei-in, “Tibatha aw, tho in,” a ci hi. Tua ciengin tua nu a mit hah a, Peter a mu ciengin tho-in a to hi. 41Ama in tua nu a khut hlahin a dingsah hi. Tua ciengin misiengthote le meigongte hlan a, tua a hing numei nu a ensah hi. 42Joppa khuo muncin tengah tam thu kizel a, mi tampi in Topa a um uhi. 43Khum hun sung tengin Simon a kici savun bawlpa khat tawh Joppa khuo ah bakhat sung ama a taam hi.
Currently Selected:
SAWLTAHTE 9: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
