PEIKHIETNA 11
11
A Nukhia Pen Gimna Genkholna
(Pei 3:21-22; 12:35-36)
1 Topa in Moses kungah, “Pharaoh le Egypt tungah gimna khat ka tungsah lai ding hi; tua zaw ciengin tam mun panin ama in note ang peisah ding hi. Ama in note ang peisah ciengin ang notmang sieng ding uhi. 2Pasal poma in a vengte’ kung pan, numei poma in zong a vengte’ kung panin ngun le kham kizepnate a nget nadingun mite kungah gen in,” a ci hi. 3Egypt-te muna-ah Topa in mite maipha pie hi. Tua tham loin Moses mama zong Egypt leitang tung, Pharaoh’ uliente muna le mipite muna-ah mi thupi mama khat a suoh hi.
4Moses in, “Topa in tam bangin ci hi: Zankim pawlin Egypt gam muncin tengah ka pei ding hi. 5Egypt gama tacil zosie, a kumpi topha tunga to Pharaoh’ tacil pen a kipan, an gawina nua-a om nasem numei’ tacil zosie, le ganhing lah panin tacil zosie si ding hi. 6Tua ciengin Egypt gam buppi-ah bangma huna tua bang a om ngai lo, mai lamah zong a omkia ngai nawn lo ding kaana le mauna lienpi a om ding hi. 7Ahi vangin Topa in Egypt le Israel a tuom khen lenlon hi, ci na thei nadingun Israel-te, mihing hile ganhing hile, ui khat in zong kawh lo ding hi. 8Tua ciengin keima kungah na uliente uh hing peisuhin, ka mai-ah ang lukun ding vua, ‘Nang le nangma ang zui mi zosie peidawh ta un,’ ang ci ding uhi. Tua ciengin kei ka pei ding hi,” a ci hi. Pharaoh’ kung panin a lungsosa-in peikhie hi.
9 Topa in Moses kungah, “Egypt-ah nalamdang ka tam bawl thei nadingin Pharaoh in na thu ang ngai sih ding hi,” a ci hi. 10Pharaoh mai-ah Moses le Aaron in na lamdang tam teng a bawl uhi; ahi vangin Topa in Pharaoh’ lungtang khausah a, a leitang panin Israel-te peisah lo hi.
Currently Selected:
PEIKHIETNA 11: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
