PEIKHIETNA 28
28
Siempu Puonte
(Pei 39:1-7)
1Tua ciengin keima kunga siempu na a sem dingin Israel-te lah panin na sanggampa Aaron, a tapate- Nadab le Abihu, Eleazar le Ithamar-te tawh, nangma kungah peipi in. 2Ama in thupina a tan thei nadingin na sanggampa Aaron ading puonsil siengthote na bawlpieh ding hi. 3Ka siempu na sem dinga Aaron a kisiensuo thei nadingin pilna lungtang a nei, bawl thei siemna ka guotsa mi zosie kungah Aaron’ puonte a gatpieh nadingun na gen ding hi. 4A puon gat dingte uh tam teng ahi hi: Awmdal khat, siempu puon khat, puontuol khat, sih li a nei puonah tungsil pawl bilbiel khat, dielkhim khat le kawnggah khat ahi hi. Keima kunga siempu na a sem ding Aaron le a tapate adingin puonah siengthote a bawl ciengun 5amate in kham, a dum, a dupsan, a ausan khaute le hoitaha kigan puonte zang ding uhi.
Siempu Puon
6Amate in kham, a dum, a dupsan, a ausan vaute le a kop-a kihiaton vau hoite tawh khutsiem taha kigan siempu puon bawl ding uhi. 7Siempu puon pen a liengko-a khikip nadingin among nite-ah a kimat liengkaih puon ni nei ding hi. 8Tuami tunga a om a kizem kawnggah zong a bawl dan le a vanzahte tua bang ma hi ding a, kham, a dum, a dupsan, a ausan, a kop-a kihiaton vau hoite tawh a kigan puonte tawh kibawl hi ding hi. 9Onyx suong ni la-in tua gel tungah Israel tapate’ min na giel ding a, 10a suona utawh kizui-in suong khat tungah amau’ min guh teng gielin, a omlai guhte’ min pen suong dang khat tungah na giel ding hi. 11Suong manpha at pa in khutsip a khuoh bangin tua suong nite tungah Israel tapate’ min khenkuohin na giel ding hi; kham tawh kibawl a geiviel sungah tuate na koi ding hi. 12Israel tapate phawna suong dingin siempu puon’ liengkaih puon tungah tua suong tegel na bul ding hi; Aaron in a liengko tegel tungah phawzing nadingin Topa mai-ah amau’ min puo ding hi. 13Kham tawh kibawl a geiviel le 14khauhuol banga kihuol, kham citah khainieng kipheh ni na bawl ding hi; a bulnate tungah a kihuol khainiengte na bul ding hi.
Awmdal
(Pei 39:8-21)
15Siemnel tahin thukhenna awmdal khat na bawl ding ahi; siempu puonah a kibawl bangma-in na bawl ding hi; kham, a dum, a dupsan, a ausan, a kop-a kihiaton vau hoite tawh a kigan puonte tawh na bawl ding hi. 16Tua khu a kikim ning li nei-in thuop ni hi ding a, a dunglam khap khat, a vailam khap khat ma hi ding hi. 17Tua sungah suong guol li-in na cieng ding hi. A guol masa, carnelian,#28:17 Tami suong tuomtuomte’ a kibahpi pen kicien lo hi. chrysolite, le emerald suongte hi ding hi; 18a guol nina, turquoise, sapphire,#28:18 Ahi sihle “lapis lazuli” le suongkangte hi ding hi. 19A guol thumna, jacinth, agate, le amethyst suongte hi ding hi; 20a guol lina, beryl, onyx, le jasper suongte hi ding a, kham geiviel sungah kibul ding hi. 21Israel tapate’ min tawh kituohin a min uh a kigielna suong sawm le ni om ding hi; tuate pen minam sawm le nite adinga a min ciet uh a kigielna khutsipte tawh kibang ding hi. 22A awmdal dingin khauhuol bangin kham citah khainieng kipheh na bawl ding hi; 23a awmdal dingin kham kuol ni na bawl ding a, awmdal mongte-ah tuate na bul ding hi. 24Awmdal monga a kuol nite sungah kham khauhuol ni tegel na khum ding hi; 25khauhuol mong nite a bulna nite tawh na zom ding a, siempu puon’ liengkaih puon mai lamah tua bangin na zom ding hi. 26Kham kuol ni bawlin, tua a kuol tegel awmdal mong ni, a sunglam mong kawnggah banah na bul ding hi. 27Kham kuol ni na bawl ding a, siempu puon liengkaih ni tegel’ nei a mailam, hoitaha kigan siempu puonkhau a kizopna tung son ah na bul ding hi. 28Hoitaha kigan siempu puonkhau tungah a beh den thei nading le siempu puon tung panin awmdal a hlagin lo nadingin siempu puon kuolah khauhuol dum khat tawh kigahton ding hi. 29Tua ahi ciengin, Topa mai-ah phawzing nadingin a siengtho munah a pei ciengin, Aaron in a lungtang tunga om thukhenna awmdal sungah Israel tapate’ min puo ding hi. 30Thukhenna awmdal sungah Urim le Thummim na koi ding a, Topa mai-ah a pei ciengin Aaron’ lungtang tungah tuate om ding hi. Tua bangin Aaron in a lungtang tungah Israel-te’ thukhenna pen Topa mai-ah puo tawntung ding hi.#Gam 27:21; Thkna 33:8; Ezr 2:63; Neh 7:65
Siempu Puon Adangte
(Pei 39:22-31)
31Siempu puontuolpi pen puondum vive tawh na bawl ding hi. 32A laikimah lu khum nading a vang khat nei ding a, puon-ngawng banga a kike lo nadingin a ngawng vang#28:32 Heb ah a khietna kicien lo hi. kimvelah ki-aiha kai ding hi. 33Puontuolpi mong nei lam pen a dum, a dupsan, a ausan vaukhaute tawh a kizem mang kawlsing ga na bawl ding a, tuate kikalah kham sialawng na bawl ding hi. 34Puontuolpi mong kimvelah kham sialawng le mang kawlsing gate, a kikahhal dimdiemin a ban banin na khai ding hi. 35Aaron in siempu na a sep ciengin tua puon sil ding a, Topa mai a siengtho munah a tum cieng le a pusuo ciengin ama a si lo nadingin a ging kiza ding hi.
36Kham citah tawh a peh khat na bawl ding a, khutsip tunga lai kigielte bangin tua tungah, “Topa ading Siengtho,” ci-in na gielkuoh ding hi. 37Tua pen dielkhim tungah khauhuol dum khat tawh na khi ding hi; tua pen dielkhim mailamah om ding hi. 38Tua pen Aaron’ talpang ah om ding a, Israel-te in letsong siengthote a piehna uh ahi, a siengtho silpieh ah khielna khatpo a op leh Aaron in lukhuh ding hi; Topa mai-ah amate a kisan thei nadingin a talpang vuah tua a peh om zing ding hi.
39A puon tungsil ding pen khau hoi tawh sih li nei, a pawlin na gan ding a, khau hoi tawh dielkhip khat zong bawlin hieu tawh a kikhui a kizem kawngga khat na bawl ding hi.
40Aaron’ tapate adingin puon tungsilte, kawnggahte, le lukhute na bawlpieh ding hi; thupina tawh a kidim nadingin tuate na bawl ding hi. 41Amate in keima kungah siempu na a sep thei nadingun na sanggampa Aaron le a tapate na silsah ding a, amate sathau nu-in na sem dingin kipsahin na siensuo ding hi. 42A guoh vua a opna uh a khu dingin amate dingin puon hoi tawh bawngbi sungtente na bawlpieh ding hi; tuate in kawng panin phei cieng dong ban ding uhi; 43kikhopna puonbuh sungah a pei cieng uh ahi a, a siengtho munah na sem dingin maitam nai-ah a pei ciengun ahi zongin, Aaron le a tapate in tuate sil ding uhi. Tua hi sihle amate in amau’ tung ma-ah mawna kisuontawm suohin si ding uhi. Tami pen ama le a nuasie a suonlehlahte adingin a om zing ngaina kip khat hi ding hi.
Currently Selected:
PEIKHIETNA 28: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
