PEIKHIETNA 33
33
Sinai Nuasie Ding Thupiehna
1 Topa in Moses kungah, “Nangma le Egypt gam pana na peitopi mite tawh pei-in tami mun nuasie unlen, Abraham, Isaac, le Jacob tungah, ‘Na suonlehlahte tungah ka pie ding hi,’ ci-a ka khapsa gamah pei un. 2Keima in na masang vuah vantungmi khat ka sawl ding a, Canaan-te, Amor-te, Hit-te, ka notmang ding hi. 3Bawngnawi le khuoizu luonna leitangah peito un; ahi vangin lamkalah hing thatgam kha ding ka hi ziehin na kung vuah kang peito sih ding hi. Azieh pen note mi ngawngkhauh na hi uhi,” a ci hi.
4Mite in tam bang kamkhauhte a zah ciengun kapin a mau vua, koima in kizepna puonte a sil sih uhi. 5Azieh pen Topa in, “Israel-te kungah, ‘Nohaw mi ngawngkhauhte na hi uhi; na lah vuah bano khat sung hing pei leng note kang thatgam ta ding uhi. Tuaci’n na kizepnate uh suodawh unlen, note bang hing law ding ka hei ci ka khensat ding hi,’ ci-in,” ci-a Moses kunga a gensa ahi hi. 6Tua ziehin Israel-te in Horeb Muol panin a kizepnate uh a suo sieng uhi.
Giephuol Pulam Puonbuh
7Moses in puonbuh la-in giephuol pulam a gamla munah a lam thei zel hi; ama in tua pen kikhopna puonbuh, ci hi. Topa a sui tapo in giephuol pulama om kikhopna puonbuh lamah a pei uhi. 8Puonbuh sungah Moses a pei sielin mi zosie a ding to vua, a milipin a puonbuh kotbieng ciet vuah dingin puonbuh sung a tum dongin Moses a kaihlit uhi. 9Puonbuh sungah Moses a lut ciengin meii khuompi tuol suhin puonbuh kotbiengah ding a, Topa tawh Moses a kiho hi. 10Puonbuh kotbiengah meii khuom a din lam a mu bepun a puonbuh kotbieng vuah mite dingto-in a unpi-un a kun uhi. 11Lawmta kiho bangin maitang kituo-in Topa in Moses a hopi zel hi. Tua ciengin giephuol lamah ama a kilekia hi; ahi vangin Nun’ tapa, a nasem tangval Joshua in puonbuh a nuasie sih hi.
Moses’ Thumpiehna
12Moses in Topa kungah, “En in, nangma in ka kungah, ‘Tam mite zawpito in,’ nei ci hi; ahi vangin kei tawh koi zawhton ding ahei, ci nei theisah sih hi. Hinanle nang in, ‘Na minin nang kang thei a, ka mai-ah maipha zong na mu zo hi,’ nei ci zo hi. 13Tu-in na muna-ah maipha nga zo ka hi leh, nangma kang thei nading le na muna-ah maipha ka nga thei nadingin na lampite ei lah in. Tam minam khu na mite a hina zong ngaisun bo in,” a ci hi. 14Ama in, “Nangma tawh ka ompina zawhton ding a, toidamna kang pie ding hi,” a ci hi. 15Tuale ama in a kungah, “Na ompina in ei zawpi sih ding leh tam panin kote ei puoh da mai in. 16Azieh pen nang in nei zawpi sih mawh leh, keima le ka mite in nangma’ muna-ah maipha ka nga lam uh bangci kithei ding ahei? Tua bang danin leisiet maitanga mi zosie sung panin keima le na mite a tuom vilvel ka hi ding uhi,” a ci hi.
17 Topa in Moses kungah, “Nang ngetsa ngeingei ma kang bawlpieh ding hi; bangzieh ahei cile ka muna-ah maipha na nga zo ta a, na min tawh nang kang thei hi,” a ci hi. 18Moses in, “Kang thum hi, na vanglietna ei lah in,” a ci hi. 19Ama in, “Na mai-ah ka hoina zosie ka peisah ding a, na mai-ah keima’ min,’ Topa’#33:19 Heb “YHWH”; 3:15 sunga a genna en in. ci-in ka phuongzah ding hi; tuale ka lungsiet nop mite ka lungsiet ding a, ka hepi nop mite ka hepi ding hi. 20Ahi vangin ama in, “Nangma in ka mai na mu thei sih ding hi; azieh pen kei ei mute koima a hing om lo hi,” a ci hi. 21Topa in a ban zom a, “En in, ka kunga na din nading suong tungah mun khat om hi; 22keima’ minthanna vang in ang nawh laitahin suongpi pawhkeh kikalah nang kang koi ding a, kang kalsan masangsie ka khutin nang kang lie ding hi; 23tua ciengin ka khut ka ladawh ding a, ka tawkhi na mu ding hi; ahi vangin ka mai kimu lo ding hi,” a ci hi.
Currently Selected:
PEIKHIETNA 33: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
