PEIKHIETNA 36
36
1Bezalel le Oholiab le mun siengtho nasep khat popo a sem thei dinga Topa in siemna le theitelna a guot mi poma in Topa’ thupiehsa zosie tawh a kituohin sem ding uhi.
2Tua ciengin Moses in Bezalel le Oholiab le Topa in nasep siemna a guot mi, na sep nopna lungtang a nei mi vannuoi hlan hi; 3amate in Moses tung panin mun siengtho nasep nadinga Israel-te in nop thu-a a pieh uh biehnate a sang uhi. Zingmawng sielin ama kungah nop thu-a kipie biehnate a puoh den lai vua, 4tuaci’n a nasepna ciet panun mun siengtho nasep namkim a sem thei khutsiem zosie pei-in, 5Moses kungah, “Topa in i sep ding vua ei sawl na i sep nadingin mipite in a kisam za sanga a tamzaw ei puoh uhi,” a ci uhi. 6Tuaci’n Moses in thupie-in giephuol mun zosie ah, “Pasal ahi a, numei ahi zongin, mun siengtho adingin piehkhietna adang hing pieh da ta un,” ci-in tang kitawhsah hi. Tuaci’n a pieh ding uh mipite kihlo hi; 7azieh pen nasep nadingin a pieh uh nate valkhe ta hi.
Biehbuh Lamna
(Pei 26:1-37)
8Nasem mite lah panin siemna a nei mi zosie in puondal sawm tawh biehbuh bawl uhi; tuate pen a kop-a kihiaton vau hoite tawh a kigan puon le a dum, a dupsan, a ausan khaute tawh kibawl a, khutsiem taha kibawl cherub-te tawh a zem uhi. 9Dalna puonte tong sawmni le tong giet ciet sau a, tong li ciet gol hi; dalna puon zosie a golna kikim ciet hi.
10Ama in dalna puon ngate khatlekhat khuituo a, adang dalna puon ngate zong khatlekhat ma a khuituo hi. 11A kikhuituo a masa dalna puon geita pen’ among gei guolah vaudum mel bilvangte bawl hi; tua ma bangin ama in a kikhuituo a nina dalna puon a geita pen’ among gei guolah zong tuate ma a bawl hi; 12ama in dalna puon khat tungah bilvang sawmnga bawl hi; a kikhuituo a nina dalna puon mongah zong bilvang sawmnga ma bawlin a bilvangte khatlekhat kimaingat hi. 13Kham kuol sawmnga bawlin, ama in a kuolte tawh dalna puonte khatlekhat kimatsah hi; tuaci’n biehbuh buppi khat a suoh hi.
14Ama in biehbuh tung puonbuh khu nadingin keelmul tawh kibawl dalna puonte zong bawl hi; ama in dalna puon sawm le khat bawl hi. 15Khumi dalna puonte pen adung tong sawm thum ciet, avai tong li ciet pha hi; tua dalna puon sawm le khatte’ gol dan kikim ciet hi. 16Ama in dalna puon ngate khatlekhat khuituo-in adang guhte zong khatlekhat ma a khuituo hi. 17A kikhuituo a masa dalna puon geita pen’ among gei guolah a bilvang sawmnga bawl a, ama in a kizoppi ding dalna puon gei-ah a bilvang sawmnga ma a bawl hi. 18Puonbuh buppi khat a suo thei nadingin ama in tua puonbuh a kimatsah dingin sumngo kilna sawmnga a bawl hi. 19Puonbuh adingin ama in a sana kibum tuutang vun le savun hoi#36:19 Heb ah a khietna kicien lo hi. tawh a pulam khuna khat a bawl hi.
20Tua ciengin biehbuh adingin ama in a kitungto ding gising khuompehte a bawl hi. 21Khuompeh khat adung tong sawm, avai tong khat le khap ciet ahi hi. 22A bul nadingin khuompeh khat in a zang ni ta nei hi; ama in biehbuh khuompeh zosie adingin tami a bawl hi. 23Biehbuh’ khuompehte ama in tam bangin a bawl hi: Leitaw lampang adingin khuompeh sawmni; 24le khuompeh sawmnite zungah a tunna sawm li ngun tawh, a zang nite adingin khuompeh a masa zungah a tunna ni, khuompeh adang khat’ zungah adang nite adingin a tunna ni ma a bawl hi. 25Ama in biehbuh a pang nina lam, leilu lampanga khuompeh sawmnite le 26ngun tawh a kibawl a tunna sawmli adingin khuompeh khatah a tunna ni, adang khuompeh khat zungah a tunna ni ma a bawl hi. 27Nitumna lam, biehbuh nualam adingin ama in khuompeh guh a bawl hi. 28Biehbuh nualam a ningte adingin ama in khuompeh ni zong a bawl hi. 29Tuate a nei lamah kikah a, ahi vangin a kuol masa-ah a dawn kimat hi; ama in a ning nite adingin tua bangin ni a bawl hi. 30Ngun tawh kibawl a tunnate tawh khuompeh giet a om hi: A tunna sawm le guh omin khuompeh khat zungah a tunna ni ta a om hi.
31Ama in gising zawlte, biehbuh pang khatah khuompehte adingin zawl nga, 32biehbuh a pang lang khatah khuompehte adingin zawl nga, nitumna lam biehbuh sialam pangah khuompehte adingin zawl nga ma a bawl hi. 33A zawl a laita pen, khuompeh laikim dong a ban pen khu mong khat panin mong khat dong a pei suohsah hi. 34Ama in khuompehte kham tawh zutin zawlte a tu dingin kham tawh a kuolte bawl a, a zawlte kham tawh a zut hi.
35Ama in a engdum, a dupsan, a ausan, a kop-a kihiaton vau hoite tawh a kigan dalna puon khat bawl a, ama in a kihoi bawl cherub-te tawh gattha-in zem hi. 36Tua puon adingin gising tawh a kibawl khuompi li bawl a, ama in tuate kham tawh a zut hi; a vankhainate uh kham ahi a, ama in tua khuomte adingin ngun tawh kibawl a tunna li a sung hi. 37Ama in puonbuh tunkot adingin a dum, a dupsan, a ausan vaute le hieu tawh kikhui-in a kizem, a kop-a kihiaton vau hoite tawh a kigan puon tawh kotkhah puonkhai khat le; 38a khuompi ngate a vankhainate tawh a bawl hi. Ama in kham tawh tuate’ luzepna zutin a gaanate kham ahi a, ahi vangin a tunna ngate sumngo ahi hi.
Currently Selected:
PEIKHIETNA 36: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
