PEIKHIETNA 38
38
Meihal Biehna Ding Maitam Bawlna
(Pei 27:1-8)
1Ama in adung tong nga, avai tong nga a pha maitam khat gising tawh a bawl hi; tua pen a ning li kikim hi a, a sanna tong tong thum pha hi. 2Tua maitam’ ning lite tungah a kite bawl hi; a kite maitam tawh kicimat a, sumngo tawh tuate zut hi. 3Ama in vut khol nading beelte, kawbiate, kuongte, siakate, le vutluona pehte bawl a, maitam vanzahte zosie sumngo tawh bawl hi; 4Maitam adingin a zawl nei-ah maitam kimcieng a bansuh, len banga kiphan, sumngo sia-len khat a bawl hi. 5Ama in a zawlte tu dingin sumngo sialen ninglite tungah a kuol li a sung hi; 6ama in maitam adingin gising zawlte bawlin tuate sumngo tawh a zut hi. 7A puoh nadingin maitam pangte-a om a kuolte sungah a zawlte heng hi; ama in singpehte tawh maitam a lai hawmsah hi.
8Ama in kikhopna puonbuh tunkotah na sem numeite’ hlimlangte panin sumngo tawh kisilna kuong le a tunna a bawl hi.#Pei 30:18
Biehbuh Tuol Bawlna
(Pei 27:9-19)
9Ama in buhtuol a bawl a, leitaw lampang buhtuol puon kikhaite pen a kop-a kihiaton vau hoite tawh a kigan puon tawh kibawl a, tong zakhat a sau hi; 10a khuompi sawm ni le a tunna sawmni te pen sumngo tawh kibawl a, ahi vangin khuompi tunga vankhainate le a ganate pen ngun ahi hi. 11Leilu lampang a kikhaisuh dalna puon tong zakhat pha hi; a khuompi sawmni le a tunna sawmni te sumngo tawh kibawl ahi hi, ahi vangin khuompi tunga vankhainate le a ganate ngun ahi hi. 12Nitumna lampang a kikhaisuh dalna puon tong sawmnga hi a, khuompi sawm hi-in, a tunna sawm ma ahi hi; khuompi-a vankhainate le a ganate ngun ahi hi. 13A mailam, nisuona lam manaw zong tong sawmnga ma ahi hi. 14Kotpi pang khat a kikhaisuh dalna puon tong sawm le nga ahi a, khuompi thum le a tunna thumte tawh ahi hi. 15A pang langkhat ading zong tu bang ma ahi hi; buhtuol lutna kotkhah a pang langkhat cietah a kikhaisuh dalna puon pen tong sawm le nga hi a, khuompi thum le a tunna thum tawh ahi hi. 16Buhtuol kimvela puon kikhaisuhte zosie pen a kop-a kihiaton vau hoite tawh a kigan puonte ahi hi. 17Khuompi adingin a tunna sumngo hi a, ahi vangin a vankhainate le a ganate ngun ahi hi. Khuom luzum tuomnate’ kizutna khu ngun ahi a, buhtuol khuompi zosie ngun gaana tawh kigah hi. 18Buhtuol lutna puonkhai pen a dum, a dupsan, a ausan, a kop-a kihiaton vau hoite tawh a kigan puonte ahi a, hieu tawh kikhui-in kizem hi. Buhtuol-a kikhaisuhte tawh kizui-in tong sawmni sau-in, a vailam tong nga sau hi. 19Khuompi li le a tunna lite sumngo tawh kibawl a, a vankhainate ngun hi-in, khuom luzum tuomnate le a gaanate’ kizutna khu ngun ma ahi hi. 20Biehbuh le buhtuol kimvel adingin khetphim zosie sumngo tawh kibawl ahi hi.
Biehbuh Vanzahte
21Tam teng pen siempu Aaron’ tapa Ithamar makaina nei-ah Levi-te’ sep ding biehbuh ahi thuciemna biehbuh#38:21 Ahi sihle “thukimna”, ahi sihle “thuciemna”; Heb “eduth” ciemtena sazien ahi hi. 22Topa in Moses a thupieh zosie Judah minam Hur’ tapa, Uri’ tapa Bezalel in a sem hi. 23Ama tawh a semton pen Dan minam, Ahisamach’ tapa Oholiab kici pa ahi a, ama pen suongkhuoh a siem, a etlawm sil suhtuo siem, a dum, a dupsan, a ausan vaute le hoitaha kigan puon hoite a zep siem mi khat ahi hi.
24Nasep nadinga kizang kham zosie, biehbuh lamna-a kizang, le a kipie khamte, biehinn shekel-in talent sawmni le kuo le shekel za sagi sawmthum pha hi. 25Mi simna sunga kihal mihonte kung panin a kinga ngunte, biehna shekel-in talent zakhat le shekel tulkhat za sagi sawm sagi le nga a hi hi. 26Mi khat in beka khat ta (biehinn shekel-in shekel lang) pie a, a pie mi, kum sawmni panin a tungsie mi simna-a kisim poma tul zaguh le tulthum le zanga le sawmnga pha hi.#Pei 30:11-16#Mat 17:24 27Ngun talent zakhat pen biehbuh khuom tunnate le dalna puon khuom tunnate dinga kisung ding ahi hi. A tunna zakhat ading talent zakhat ahi a, a tunna khat ciengin talent khat ahi hi. 28Shekel tulkhat zasagi sawmsagi le nga lah panin khuompite tungah vankhaina-in bawl a, a khuom luzum tuomnate zutin tuate adingin a gaana a bawl hi. 29A kipie sumngo pen talent sawmsagi le shekel tulni le zali ahi hi; 30tua tawh ama in kikhopna puonbuh lutna tunkotte adingin khuom tunnate, sumngo maitam, sumngo sialen le maitam vanzah zosie, 31buhtuol kimvela khuom tunnate, buhtuol lutna tunkot’ khuom tunna te, biehbuh’ khetphim zosie le buhtuol kimvela khetphim zosie a bawl hi.
Currently Selected:
PEIKHIETNA 38: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
