PEIKHIETNA 9
9
Gimna Ngana: Ganhing Natna
1Tua ciengin Topa in Moses kungah, “Pharaoh kungah pei-in ama kungah, ‘Hebrew-te’ Pasien Topa in tam bangci hi: Amate in keima ei bieh thei nadingun ka mite peisah in. 2Bangzieh ahei cile amate peisah nuom loin na tuhkon den leh, 3Topa’ banhat in na lozau-a a om ganhingte ahi, sakolte, laate, kalaohte, bawnghonte, le tuuhonte tungah pul natna tawh ang vatmai ding hi. 4Hizongle Israel-a’ zosie khat beh a si lo nadingin Israel-te’ ganhingte le Egypt-te’ ganhingte kikalah Topa in kilamdanna khat a bawl ding hi,” ci hi, va ci ta’n,” a ci hi. 5Topa in hun khat se a, “Zing ciengin Topa in gam sungah tami ang sem ding hi,” a ci hi. 6A zing ciengin Topa in tua bangin sem hi; Egypt-te’ ganhing zosie si sieng a, ahi vangin Israel-te’ ganhing khat zong si lo hi. 7Pharaoh in thukante sawlin Israel-te’ ganhing khat zong a si lo lam thei hi. Ahi vangin Pharaoh’ lungtang khauh lai a, ama in mite peisah lo hi.
Gimna Guhna: Uilut
(Thkna 28:27)
8Tua ciengin Topa in Moses le Aaron kungah, “Meikhuh sunga vut na khut dimin ham unlen, Pharaoh muna-ah Moses in vantung lamah tua vut theto heh. 9Tua khu Egypt gam buppi-ah leivui nel suoh ding a, Egypt gam buppi-ah mihing le ganhingte tungah uilut hima a suoh ding hi,” a ci hi. 10Tuaci’n meikhuh panin ama gel in vut la-in Pharaoh’ mai-ah a ding vua, Moses in vantung lamah tua vut a theto leh tuate in mihingte le ganhingte tungah uilut hima naikul a piengsah hi.#Kln 16:2 11Uilut hima ziehin Moses mai-ah mitphiel siemte a ding zo nawn sih uhi. Bang ding ahei cile mitphiel siemte le Egypt-te zosie in zong uilut a vei uhi. 12Ahi vangin Topa in Pharaoh’ lungtang khausah a, Moses kungah Topa in a gensa ma bangin ama in a thu uh ngai lo hi.
Gimna Sagina: Vanto le Gielpi
13Tua ciengin Topa in Moses kungah, “Zing ciengin thobai-inlen, Pharaoh mai-ah kipulahin ama kungah, ‘Hebrew-te’ Pasien, Topa in tam bangci hi: Amate in keima ei bieh thei nadingun ka mite peisah in. 14Bangzieh ahei cile leitung buppi-ah keima tawh a kibang koima khat beh om lo hi, ci na thei nadingin keima in tami hunin nang, na uliente, le na mite tungah ka pul natna zosie kang tungsah ding hi. 15Azieh pen tu-in ka khut zahin pul natna tawh nang le na mite kang vatmai thei a, leitung panin zong kang sumai thei hi. 16Hinanle nangma kang hinkhawina pen tam zieh ahi hi: Na tungah ka vanglietna kang lah nading le leitung buppi-ah ka min a kiphuongzah thei nading ahi hi.#Rom 9:17 17Nang le nang na kiliensah lai vaset a, ka mite langbawlin a pei ding uh na phal sih hi. 18Zing cieng tu bang hunin Egypt gam kisat huna kipan tuhun donga a kimu ngai nai lo, a nasie penpen gielpi ka kiesah ding hi. 19Tua ahi ziehin mi sawl inlen lozau-a na ganhingte le na nei na lam zosie munbih khatah tuosah in; tuate tungah gielpi ang kieh ciengin kibuhna munah a kipeipi lo, lozau-a a om mihing ahi a, ganhing ahi zongin a si ding hi,’ ci-in gen in,” a ci hi. 20Pharaoh’ uliente lahah Topa’ kammal a zatah pawlkhat in munbih khatah a salte ule a ganhingte a nawtaisah uhi. 21Topa’ kammal a thusim lo mite in lozau-ah a salte ule a ganhingte a nuasie uhi.
22 Topa in Moses kungah, “Egypt gam sung zosie-a om mihing, ganhing le Egypt gamsung lote lahah a po singkung zosiete tungah gielpi a kieh thei nadingin vantung lamah na khut zah in,” a ci hi. 23Tua ciengin vantung lamah Moses in a ciengkhut zah a, Topa in van tosahin giel kiesah a, leitungah meikuong a kumsuh hi. Topa in Egypt gamah gielpi kiesah hi. 24Tuami laikimah gielpi le meikuong khawl loin phe lahlah a, gam khat ahi zaw a kipanin Egypt gamsung buppi-ah tam banga gielpi siehuoi a kie ngai nai sih hi.#Kln 8:7; 16:21 25Tumi gielpi in Egypt gambup sung lozau lahah a om na vannuoi, mihing le ganhing a ni-in a satpaai hi; gielpi in lozau-a kung zosie zong satpai a, lozau-a singkung zosie zong vattan hi. 26Israel-te tenna Goshen gam behah gielpi kie lo hi.
27Tua ciengin Pharaoh in mi sawlin Moses le Aaron a hlansah a, ama gel kungah, “Tun-in ahile kei ka khiel zo ta hi; keima le ka mipite ka khiel vua, Topa a dih hi. 28Topa kungah thum un! Pasien’ vanto le giel kicing zo ta! Kang peisah ta ding vua, na thaam uh a ngai nawn sih hi,” a ci hi. 29Moses in ama kungah, “Tam khuopi panin ka pusuo behin Topa lamah ka khut ka zah ding hi. Leitung in Topa-a’ ahi hi, ci-in na thei nadingin vanto khawlin gielpi veng ding hi. 30Ahi vangin nang le na uliente in Topa Pasien na giin nai vaset lo lam uh ka thei hi,” a ci hi. 31(Tu-in anthul kungte le mangbuham kisie hi. Bang ding ahei cile mangbuhamte a vui laitah ahi a, anthul kungte a paa laitah ahi hi. 32Ahi vangin mangbu le mangbumante kisie lo hi. Azieh pen tuate khangham nai lo hi.) 33Tuaci’n Pharaoh kung panin khuopi pulamah Moses peikhie a, Topa lamah a khut a zah ciengin vanto le gielpi khawl pai a, leitungah guo zu nawn lo hi. 34Ahi vangin Pharaoh in guopi, gielpi le vanto a theu zo lam a mu ciengin ama khatvei khiel lai a, ama le a uliente in a lungtang uh a khausah uhi. 35Tuaci’n Topa in Moses tungtawnin a gensa bangin Pharaoh’ lungtang khausah a, Israel-te peisah lo hi.
Currently Selected:
PEIKHIETNA 9: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
