PIENCILNA 12
12
Abram a Kihlatna
(Sawl 7:2-5)
1 Topa in Abram kungah, “Na gam, na be na phung le na pa’ inn nuasie inlen, kang lah ding gamah pei in.#Sawl 7:2-3; Heb 11:8 2Minam lien khatin kang bawl ding a, thupha hing pie-in, na min ka liensah ding a, tuaci’n midangte adingin thupha na hi ding hi. 3Nang thupha ang piete thupha pie-in, nang ang samsiete ka samsie ding hi; nang tungtawnin leitung minam zosie in thupha a ngalaw ding uhi,” a ci hi. #12:3 Ahi sihle “nang tungtawnin leitung minam zosie amau le amau thupha kipie ding uhi”#Gal 3:8
4Tuaci’n Topa gensa bangin Abram pei a, Lot in zong a zui hi. Haran pan a peikhietin Abram kum sawm sagi le nga a pha hi. 5Abram in a zi Sarai, le a sangampa’ tapa Lot, a kholsa a nei a lam teng, le Haran-a a sila nei teng zawpi-in, Canaan gam lam a zotpi hi. Canaan gam a tun ciengun, 6Abram in tua gam nawhin Shechem mun, Moreh gangpi sing#12:6 Ahi sihle “tawsaw kung” lahah a tung hi. 7Tua ciengin Abram tungah Topa kilang a, tuale ama kungah, “Na suonlehlahte#12:7 Heb “cihlah” tungah tam gam ka pie ding hi,” a ci hi. Tua ahi ziehin ama in a kunga a kilang Topa adingin maitam khat a lam hi.#Sawl 7:5; Gal 3:16 8Tua mun panin Bethel nisuona lam muol tungah kituon a, nitumna lam Bethel, nisuona lam Ai khuo kikalah a puonbuh a sung hi. Khum munah Topa adingin maitam khat a lam a, ama in Topa’ min loin thu a ngen hi. 9Negeb gam lam zuonin khuolzin kia dingin Abram kipan a, tua mun a tun dongin a banbanin a pei hi.
Egypt-ah Abram
10Khum hun lai-in Canaan gamah kielpi a tung hi. Tuaci’n kielpi a siet huoi ziehin Egypt gamah a pem dingin Abraham a peisuh hi. 11Egypt gam a lut kuonin a zi Sarai kungah, “Nang pen numei melhoi khat na hi hi; 12Egypt-te in ang mu cieng ule amate in, ‘Tam nu ama’ zi ahi hi,’ ang ci ding uhi; tua bepin kei ei thatin nang ang hinkhawi ding uhi. 13Nang vang tawh kei ei kihinkhawi-in ei na kihoi bawl nadingin ka sangamnu-in hing kigen in,” a ci hi.#Pien 20:2; 26:7 14Egypt gamah Abram a tun bepin Egypt-te in a zi a et ule melhoi a sa mama uhi. 15Tuale Pharaoh’ vaisaite in ama nu a mu ciengun, Pharaoh mai-ah a phat uhi. Amate in Pharaoh’ inn sungah tua numei a peipi uhi. 16Tua nu ziehin kumpipa in Abram a limbawl hi; tuaci’n ama in tuute, bawngtangte, laatangte, numei le pasal silate, laanute, le kalaoh-te a pie hi.
17Ahi vangin Topa in Abram’ zi Sarai ziehin Pharaoh le a innkuonpite tungah gimna lienpi a tungsah hi. 18Tuaci’n Pharaoh in Abram hlanin ama kungah, “Kei bang nei law ahiei? Ama na zi ahi lam bang dinga nei gen lo ahiei? 19Bang dinga ama, ‘Ka sanggam nu hi,’ na ci-a ka zi dinga nei lahsah ahiei? Tu-in na zi tanah om hi. Ama zawpi inlen pei in,” a ci hi. 20Ama tawh kisai-in Pharaoh in a mite thupie a, amate in a zi le a neisa teng tawh lampi-ah a hla uhi.
Currently Selected:
PIENCILNA 12: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
