PIENCILNA 26
26
Isaac le Abimelech
1Abraham hun lai-a kielpi masa banah tu-in gam sungah kielpi khat a tung hi. Gerar ah Philistia Kumpipa Abimelech kungah Isaac a haw hi. 2Isaac#26:2 Heb “ama” kungah Topa kilahin, “Egypt gamah peisuh sin; nang kang lah ding gamah teng in. 3Tam gamah pemta bangin teng inlen, nang hing ompi-in thupha kang pie ding hi; bangzieh ahei cile nang le na suonlehlahte tungah tam gam kang pie ding a, na pa Abraham tunga ka ciemsa kiciemna ka tungsah ding hi. 4Na suonlehlahte vana aasi bangin tampi ka phasah ding a, na suonlehlahte tungah tam gam teng zosie ka pie ding hi; na suonlehlahte ziehin leitung minam zosie in thupha a ngalaw ding uhi.#Pien 22:16-18 5Azieh pen Abraham in ka thumangin ka sawlna, ka thupiehnate, ka thukipte le ka thukhamte a zui hi,” a ci hi.
6Tuaci’n Gerar ah Isaac a teng hi. 7Khum muna mite in a zi vai a dawh uh ciengin ama in, “Ama ka sanggamnu ahi hi,” a ci hi. Azieh pen, “Rebekah pen ngaibaangin tua gam mite in ama ziehin ei that kha va uh,” ci-in ngaisun ahi ziehin, “Ka zi ahi hi,” a ci ngam sih hi.#Pien 12:13; 20:2 8Khum munah Isaac sawtveipi a op zaw ciengin Philistia Kumpi Abimelech in a tawlet pan a khuodah leh Isaac in a zi Rebekah a no laitah a mu hi. 9Tuaci’n Abimelech in Isaac hlanin, “Na zi tahtah hi mawh lo amah! Tuale bang dinga, ‘Ka sanggamnu hi,’ na ci ahei?” a ci hi. Isaac in ama kungah, “Ama ziehin silaw kha vang ci-a ka ngaisut zieh ahi hi,” a ci hi. 10Abimelech in, “Ko tunga nang bawl tami khu bang ahiei? Mite khatpo na zi tawh na lumton thei mai ding a, tua hile ko tunga khielna ei tun na hi ta ding hi,” a ci hi. 11Tuaci’n Abimelech in mi zosie galgih a, “Tampa ahi a, a zinu ahi zongin a khoi kha poma kithat ding hi,” a ci hi.
12Isaac in tua leitangah khai tu a, tua kum ma-in a za zakhat a la hi. Topa in thupha pie a 13tua pa mihau khat a suoh hi; mihau mama khat a suo dongin a nei a lam a kibelap semsem hi. 14Ama in tuuhon, bawnghon, le innkuon tampi nei a, Philistia-te in ama a eng uhi. 15(A pa Abraham hun lai-a a pa’ nasemte in a na taw uh tuikhuh zosie tu-in Philistia-te in lei vua-in a khacip sieng uhi.) 16Abimelech in Isaac kungah, “Ko kung panin pei ta un; nang pen ko adingin vang lien ta luo teh,” a ci hi.
17Tuaci’n khum mun panin Isaac pei-in Gerar kuom sungah phuol satin khum sungah a teng hi. 18Isaac in a pa Abraham’ hun lai-a kitosa tuikhuhte a topha kia hi; azieh pen Abraham a si zaw ciengin Philistia-te in tuate a khacip sieng uhi; tuale ama in a pa na phuosa minte ma a phuokia hi. 19Ahi vangin Isaac’ nasemte in tua kuom sungah tuikhuh to-in tuisam luonna khat a mu vua, 20Gerar gancingte le Isaac’ gancingte kihau-in “Tuikhuh ko-a’ hi bo,” a kici uhi. Tuaci’n ama in tua tuikhuh Esek#26:20 “Kiselna” cina ahi hi. ci-in min phuo hi. Azieh pen amate le Isaac kisel hi. 21Tua ciengin tuikhuh adang khat a tokia vua, tua vai-ah zong a kihaukia leuleu uhi; tuaci’n ama in tua tuikhuh’ min Sitnah#26:21 “Kigalbawlna” cina ahi hi. ahisah hi. 22Khum mun panin ama kituonin tuikhuh adang khat to a, tua vai-ah a kihau nawn sih uhi. Tuaci’n ama in tua tuikhuh’ min Rehoboth#26:22 “A tanzau munte” ahi sihle “Innkhan” cina ahi hi. hisah a, “Tu-in Topa in eite adingin mun ei bawlpieh zo a, tam gamah i pung ding uhi” a ci hi.
23Khum mun panin Beer-sheba ah ama peito hi. 24Tuale khum ni zan ma-in ama kungah Topa kilah a, “Keima na pa Abraham’ Pasien ka hi hi; zau sin, azieh pen ka nasempa Abraham ziehin nang kang ompi a, nang thupha hing pie-in na suonlehlahte tampitah kang phasah ding hi,” a ci hi. 25Tuaci’n ama in khum munah maitam khat lamin Topa bie a, khum mun ma-ah a puonbuh a sung hi. Khum munah Isaac’ nasemte in tuikhuh khat a to uhi.
26Tua ciengin Gerar panin a thudawhpi pa Ahuzzath le a galkapmangpa Phicol tawh ama kungah Abimelech haw hi.#Pien 21:22 27Isaac in a kung vuah, “Note in kei ei muda-in na kung pan vua nei nawmang uh hi napi-in bang dingin kei kunga hing haw na hi uh ahei? “ a ci hi. 28Amate in, “Topa in nang ang ompi lam cien tahin ka mu zo ta uhi. Tuaci’n nang le ko kikalah kiciemna khat om leh ka ci vua, tuale nang tawh thuciemna khat bawl vai-in, 29tuaci’n kote in nang hing sukha vawt loin na tungah sil hoi bawl ding ci simlo note bangma hing law lo a, lungnuom taha kang peisah tehteh bangin, nang in zong kote tungah sietna nang bawl sih ding hi. Tu-in nang pen Topa’ thupha pieh na hi hi,” a ci uhi. 30Tuaci’n amate adingin pawi khat bawlpiehin an ne tui dawnin a om uhi. 31Zingmawngin amate thobai-in khatlekhat kiciemna a bawl uhi; Isaac in a lampi vuah amate hla a, ama kung panin lungnuomin a pei uhi. 32Khum ni ma-in Isaac’ nasemte pei-in a tawsa uh tuikhuh tawh kisai-in ama kungah a gen vua, “Tui ka mu ta uhi!” a ci uhi. 33Ama in tua pen a min Shibah#26:33 “Kiciemna” a kici kammal dinga a kizang kammal tawh kibang hi. phuo hi; tua ziehin tuni dongin tua khuopi’ min Beer-sheba#26:33 “Kiciemna tuikhuh” ahi sihle “Tuikhuh sagi” a cina ahi hi. kici hi.
Esau’ Zi Hit-te
34Esau kum sawmli a phah ciengin Hit mi Beeri’ tanu Judith le Hit mi Elon’ tanu Basemath a zi-in a la hi; 35ama gel in Isaac le Rebekah’ hinkhuo gentheisah mama uhi.
Currently Selected:
PIENCILNA 26: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
