PIENCILNA 33
33
Jacob le Esau Kimu
1Jacob khuodahin a en leh mi zali tawh ang zawhton Esau a mu hi. Tuaci’n ama in Leah, Rachel, le a nasem numei nite kungah a tate a khen hi. 2Ama in a masangah numei nasemte le a tate koi a, tua ciengin Rachel le Joseph a nukhia penin koi hi. 3A masang vuah ama pei-in a sanggampa kung a tun masangin sagi vei tuolah a kun hi.
4Ahi vangin ama dawn dingin Esau tai a, ama pomin ngawngkawi-in a nam vatuh a, tuaci’n a kap uhi. 5Esau a khuodahin numeite le naupangte a mu ciengin ama in, “Nang zawpi tamte khu koi ahi vuoi?” a ci hi. Jacob in, “Pasien in lungsietna tawh na nasempa a pieh tate ahi hi,” a ci hi. 6Tua ciengin nasem numeite le a tate in nehin a kun uhi; 7tua ma bangin Leah le a tate zong a kung nehin a kun uhi. A nukhia penin Joseph le Rachel in nehin a kun uhi. 8Esau in, “Ka kituopi tami a honte zosie bang na cinopna ahiei?” a ci hi. Jacob in, “Ka pu’ maipha sui na ding ahi hi,” a ci hi. 9Ahi vangin Esau in, “Ken zong a kicing tahin nei ing, ka sanggampa aw, nang’ neite nangma adingin kikep kon in,” a ci hi. 10Jacob in, “Hi lo hi; na maipha ka mu leh nei hepina tawh ka khut panin ka letsongte ei sanpieh in; bangzieh ahei cile na maitang ka mu khu Pasien’ maitang mu ka bang tahtah vawt hi. Azieh pen nang in tam bang angvanna tawh kei nei sangzo hi 11Nei hepina tawh na kunga kang tawi ka letsong ei sanpieh in. Bangzieh ahei cile Pasien in ei lungsiet mama a, ka tulmaw zosie ka nei hi,” a ci hi. Tuaci’n ama in a kut tentun ziehin tuate a sanpieh hi.
12Tua ciengin Esau in, “I lampi zuonin khuolzin vai. Nangma tawh hing zawhton vang,” a ci hi. 13Hizongle Jacob in ama kungah, “Naupangte a hat lo lam ka pu in na thei a, tuuhonte, ganhonte, bawnghon le keel hon nawitep laite keima’ kep ding ahi hi; ni khat kinaw hawl seng leh ganhon zosie a si sieng ta ding hi. 14Na nasempa mai-ah ka pu na pei inlen, ka mai-a ganhonte kalsuon le naupangte kal tawh dan kituohin Seir-a ka pu kung kang tun dongin damdamin kang peipi ding hi,” a ci hi.
15Tuaci’n Esau in, “Kang zawpi mi pawlkhat kang nuasiepieh ding hi,” a ci hi. Ahi vangin Jacob in, “Kei tungah ka pu bang dinga hici migit sengseng na hei?” a ci hi. 16Tuaci’n khum ni-in Seir lamah Esau a kilekia hi. 17Hizongle Succoth#33:17 “Hlamphengte” a cina ahi hi. lamah Jacob khuolzinin ama adingin inn khat lam a, a ganhonte adingin hlamphengte a bawl hi; tua ahi ziehin khum mun pen a min Succoth, kici hi.
Shechem-ah Jacob Tung
18Paddanaram pana peina lampi, Canaan gam sunga om Shechem khuopi-ah damle bitin Jacob a tung hi; tuale ama in tua khuopi mai-ah phuol a sat hi. 19Shechem’ pa Hamor’ tapate kung panin a puonbuh lamnasa leitang pen dangka#33:19 Heb “qesitah zakhat” zakhat tawh a lei hi.#Josh 24:32; Jhn 4:5 20Ama in khum munah maitam khat tung a, a min El-Elohe-Israel#33:20 Pasien, Israel’ Pasien” a cina ahi hi. a phuoh hi.
Currently Selected:
PIENCILNA 33: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
