PIENCILNA 44
44
Joseph in Benjamin Hen
1Tua ciengin ama in a inncing pa thu pie a, “Tua mite’ ip sungah a puoh khop zaza uh an guon inlen, a ip gong ciet vuah a sum uh koi in. 2Ka hai, ngun hai pen a an lei nading sum tawh nautum pen pa’ ip gong ah guonpieh in,” a ci hi. Tuale ama in Joseph’ gen bangin a bawl hi. 3Zingmawng khuova behin a laate utawh mite kipeisah hi. 4Khuopi panin amate tomkal no khat a pei zaw uh ciengin Joseph in a inncingpa kungah, “Pei inlen tua mite va del ta’n; amate na phah ciengin a kung vuah, ‘Bang dinga a hoi pen a sie tawh ei thuh na hi uh ahei? Bang dinga ka pu’ ngun#44:4 Vg tawh a kitekah Gk: Heb ah “Bang dinga ka ngun hai na guh uh ahei?” ci om lo hi. hai na guh uh ahei? 5Ka pu in tami hai tawh zu a dawn hi lo amah? Ama in aisanna-a tami hai a zah tahtah hi lo amah? Tam bang na bawl ziehun na khiel uhi,’ va ci ta’n,” a ci hi.
6Amate a phah ciengin ama in a kung vuah tam thu teng a genkia hi. 7Amate in, “Bang dinga ka pu in tam bang kammalte nang gen mawh ahei? Na nasemte tua banga gamta ding ahi vawt sih uhi! 8En in, Canaan gam panin ka ip gong vua ka mu uh sumte na kungah kang puokia uhi; tua ahile na pu’ inn panin ngun ahi a, kham ahi zongin bang dinga ka guh tah lawm ding uh ahei? 9Na nasemte lahah tua hai a kimuna pen pa kithat taheh; tham loin ko adang teng zong ka pu’ sila kang hi ding uhi,” a ci uhi. 10Ama in, “Na ci bang uh hi taheh: A kimuna pa ka sila hi ding a, hizongle no adang teng a suohta-in na pei ding uhi,” a ci hi. 11Tua ciengin a milipin a ip uh lei ah ngasuhin a ip ciet uh a nawhon pai uhi. 12Ama in long pai a, a tapen panin kipanin a tumpen tawh a tawp hi; tuale Benjamin’ ip sungah tua hai kimu hi. 13Tam thu ziehin amate in a puon uh a ehmal vua, a laate uh van suonin khuopi lamah a kilekia uhi.
14Joseph’ inn ah Judah le a sanggamte a tun ciengun khum munah Joseph na om lai hi; tuale ama’ mai lei lahah amate a kun uhi. 15Joseph in amate kungah, “Na gamtat uh bangci gamtat ahiei? Kei aisan thei mi khat ka hi lam nei thei sih uh amah?” a ci hi. 16Tuale Judah in, “Ka pu kungah bang thu ka gen thei ding uh ahei? Bang gen thei ding ka hi uh e? Ko le ko bangci kiphel thei ding ka hi uh ahei? Pasien in na nasemte’ khielna mu zo hi; tua ahile tam sunga om kote le a khut sunga hai kimuna pa zong, ka pu’ sila ka hi ta uhi,” a ci hi. 17Hizongle ama in, “Tua bangin sem vawt sih vang! Hai a kimuna a nei pa beh ka sila hi ding hi; ahi vangin no na hi uleh na pa kung vuah lungnuomin peito ta un,” a ci hi.
Benjamin Suotah nading Judah in Ngen
18Tua ciengin ama kungah Judah peito a, “Ka pu aw, hepina tawh na nasempa in ka pu’ bil kawmah kam khat ei gensah inlen, na nasempa tungah lungthah sin; bang ding ahei cile nang pen Pharaoh ma tawh kibang na hi hi. 19Ka pu in a nasemte nei dong a, ‘Pa ahi a, sanggam ahi zongin na nei vuoi mah?’ nei ci hi. 20Tuale kote in ka pu kungah, ‘Pa vuoi khat ka nei vua, a khangham zaw cienga a nei sanggam pasal khat ka nei uhi. A sanggampa si zo hi. A nu’ tate sung panin ama beh omlai a, a pa in ama it mama hi,’ kang ci uhi. 21Tua ciengin nangma in na nasemte kungah, ‘Ka mit tawh ama ka mu thei nadingin ka kungah hing zawpisuh ta un,’ nei ci hi. 22Kote in zong ka pu uh kungah, ‘Tua tangvalpa in a pa nuasie thei mawh sih va. Azieh pen a pa nuasie leh a pa si thei mawh ding hi,’ kang ci uhi. 23Tua ciengin nang in na nasemte kungah, ‘Na nautum pen uh nang zawpi sih uleh ka mai na mu nawn sih ding uhi,’ nei ci hi. 24Na nasempa ka pa uh kung ka tun ciengun ka pu thugen teng ama kungah ka gensawn uhi. 25Ka pa un, ‘Peikia unlen an themkhat va leikia ta un,’ ei ci ciengin 26kote in, ‘Ka peisuh thei sih ding uhi. Ka nautum pen utawh ka zawton uleh beh ka peisuh ding uhi; azieh pen ka nautum utawh ka zaw sih ngeingei uleh tua mipa mai ka mu thei sih ding uhi,’ ka ci uhi. 27Tua ciengin na nasempa ka pa un ka kung vuah, ‘Ka zi in tapa ni a nei na thei uhi; 28khat in lah ei nuasie ta a, keima in ama pen a ki-ehmal zo hi ta, ka ci hi. Khum huna kipanin ama ka mu ta sih hi. 29Ka kung panin tami a khat zong na lah kia vua, ama tungah sietna khat ang tun leh, Misikhuo ah ka samkangte dana tawh na peipisuh ding uh ahi ta hi,’ ei ci hi. 30Tua ahi ziehin tu-in na nasempa ka pa kungah ka tun ciengun tami tangvalpa zawpi sih uleng, tangvalpa’ hinna khu ama’ hinna tawh a kikhiton ziehin, 31kote tawh tua tangvalpa ka zawton lo uh ama in ei mu ciengin ama si mawh ding hi; ko na nasemte in dana tawh na nasempa ka pa uh’ samkangte Misikhuo-a a puohsuh ka hi ta ding uhi. 32Azieh pen na nasempa keima khu tua tangvalpa tangin ka pa kunga kikham ka hi a, ‘Na kunga ama kang nuatut sih tah leh na muna-ah tua mawna ka khan tawntungin ka puo ding hi,’ ka ci hi. 33Tua ahi ziehin tu-in hepina tawh tangvalpa tangin ka pu kungah keima na nasempa sila-in ei omsah zing inlen; a sanggamte tawh tua tangvalpa peisahkia in. 34Azieh pen tua tangvalpa zawpi loin ka pa kung bangci zot thei ding ka hei? Ka pa tunga ang tung ding gimna ka en ngam sih hi,” a ci hi.
Currently Selected:
PIENCILNA 44: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
