PIENCILNA 47
47
1Tuaci’n Joseph pei-in Pharaoh kungah, “Ka pa le ka sanggamte, a tuuhonte, a bawnghonte ule a neisa zosie utawh Canaan gam panin ang pei uhi; tu-in Goshen gamah a om uhi,” a ci hi. 2Ama in a sanggamte lahah mihing nga zawpi-in Pharaoh kungah a peipi hi. 3Pharaoh in a sanggamte kungah, “Na nasep uh bang ahiei?” a ci hi. Amate in Pharaoh kungah, “Ka pu ka pate uh ma bangin na nasem kote tuucing ka hi uhi,” a ci uhi. 4Amate in Pharaoh kungah, “Tam gamah pemta dinga ang pei ka hi uhi; azieh pen Canaan gamah kielpi a natsiet ziehin khum munah na nasemte’ gantate neh ding hampa lohing a om nawn sih hi. Tu-in Goshen gamah na nasemte ei tengsah in, kang thum uhi,” a ci uhi. 5Tua ciengin Pharaoh in Joseph kungah, “Na kungah na pa le na sanggamte ang tung zo ta uhi. 6Nangma mai-ah Egypt leitang a om hi. Gam hoipen munah na pa le na sanggamte tengsah in; Goshen leitangah amate tengsah in; amate lahah mi pilvang a om lam na thei leh ka ganhingte kem dingin koi in,” a ci hi.
7Tua ciengin Joseph in a pa Jacob zawpi-in Pharaoh’ mai-ah laa a, tuale Jacob in zong Pharaoh thupha a pie hi. 8Pharaoh in Jacob kungah, “Kum bang za na pha tai?” a ci hi. 9Jacob in Pharaoh kungah, “Leisiet ka pemta hinkhuo khu kum za le kum sawmthum ahi hi; ka nuntah hun pen tomin hamsa hi. Kum sawtveipi pemta a na hi sung uh ka pate’ kumte tawh tekah thei ding ahi sih hi,” a ci hi. 10Tua ciengin Jacob in Pharaoh thupha a pie a, Pharaoh’ opna panin a pei hi. 11Pharaoh’ thupieh bangin Joseph in amau’ nei dingin Egypt gama leitang hoipen ahi Rameses leitang pie a, tua sungah a pa le a sanggamte a tengsah hi. 12Joseph in a pa, a sanggamte, le a pa’ innkuonpi zosie a ne ding za tawh kituohin an a va hi.
Egypt Kielpi
13Tu-in ahile kielpi a natsiet seng ziehin gam zosie-ah an om nawn lo hi. Kielpi ziehin Egypt gam le Canaan gam a vulnaang gawp uhi. 14Egypt gam le Canaan gam sunga antang lei nadinga a khel uh sum kinga zosie Joseph in a kaikhawm hi; tuale Joseph in Pharaoh’ inn ah tua sum teng a puoh hi. 15Egypt gam le Canaan gam sunga sum zosie a tawp sieng zaw ciengin Joseph kungah Egypt mi zosie a pei vua, “An ei pie in! Bang dingin na muna-ah si ding ka hi uh ahei? Azieh pen ka sum teng uh tawp sieng zo hi,” a ci uhi. 16Joseph in dawng a, “Na sum uh a tawp sieng tah leh na ganhonte ei pie un. Keima in an kang pie ding a, na gante utawh i kikhel ding hi,” a ci hi. 17Tuaci’n amate in Joseph kungah a ganhonte a peipi uhi; tuale Joseph in sakolte, tuuhonte, bawnghonte, le laate khelna-in amate an a pie hi. Tua kumin amate an pie a, a ganhon zosie utawh a khelpieh hi. 18Tua kum a tawp zaw, a kumkia ciengin a peikia vua, “Ka sum uh a tawp lam ka pu kungah kang pha thei sih uhi. Ka ganta zosie ulah ka pu-a’ ahi ta hi. Ka pumpite ule ka mun ka gamte uh ci simlo ka pu’ muna-ah bangma om nawn lo hi. 19Nangma’ muna-ah kote le ka gam uh a siton ding ka ta uh amah? Koma le ka leitang uh an tawh ei khel in. Koma, ka leitang utawh Pharaoh’ sila ka hi ding uhi; kielsi loin ka hin nading ule ka gam uh a hawmsuo lo nadingin khaici ei pie in,” a ci uhi.
20Tuaci’n Joseph in Pharaoh adingin Egypt gam zosie a lei hi. Amate tungah kielpi a natsiet ziehin Egypt mi zosie in a logamte uh a zuamang uhi; tuale leitang teng Pharaoh-a’ a suoh hi. 21Mihingte ahile, ama in Egypt mongkhat panin mong khat dongin amau’#47:21 Vg tawh a kitekah Sam Gk: MT ah “Ama in khuopite-ah amate hemkhie hi” ci-in kigiel hi. sila-in bawl hi. 22Ama in siempute’ leitang beh lei lo hi; bangzieh ahei cile siempute in Pharaoh kung panin a kiciengtan za an a nga vua, Pharaoh in a pieh an tawh amate a luhing thei uhi; tua ahi ziehin amate in a leitangte uh a zua sih uhi. 23Tua ciengin Joseph in mite kungah, “Tu-in noma le na leitang uh Pharaoh adingin ka lei zo hi. Tam sungah note dingin khaici a om hi; leitang tungah vaw un. 24Anlah hun ciengin Pharaoh tungah nga-a-khat na pie ding vua, nga-a-li pen khaici ding, noma le na innkuonpite le na tate an neh dingin na tang ding uhi,” a ci hi. 25Amate in, “Ka hinna uh nei hun zo hi; ka pu uh lungdam heh, Pharaoh’ sila ka hi ta ding uhi,” a ci uhi. 26Tuaci’n Pharaoh in nga-ah-khat nei ding hi, a ci pen, tuni donga a om, Egypt leitang tawh kisai-in Joseph in ngaina kip khatin a bawl hi. Siempute’ leitang beh Pharaoh-a’ suoh lo hi.
Jacob’ Hinkhuo Nukhia Hunte
27Tua ahi ciengin Egypt gam sung Goshen leitangah Israel teng hi; tua sungah neisa tampi nei-in suonlehlah tampi a pha uhi. 28Egypt gamah Jacob kum sawm le kum sagi sung teng hi; tuaci’n Jacob’ khan kum za le sawmli le sagi ahi hi.
29Israel a si ding hun a nai ciengin ama in a tapa Joseph hlanin a kungah, “Na mitmu-in maipha ka nga leh ka phei nei-ah na khut hing koi inlen, thuman thutah tawh nei bawl nadingin hing kiciem in. Egypt gamah ei vui poma sin. 30Ka pu ka pate tawh ka lupton ciengin Egypt gam panin ka luong ei puo inlen, amau’ kivuina hanah ei vui in,” a ci hi. Ama in dawng a, “Na gen bangin ka bawl ding hi,” a ci hi.#Pien 49:29-32; 50:6 31Ama in, “Ka kungah hing kiciem in,” a ci hi; tuale a pa kungah ama kiciem hi. Tua ciengin ama’ lupna khawhlung ah Israel a kunsuh hi.
Currently Selected:
PIENCILNA 47: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
