PIENCILNA 50
50
1Tua ciengin Joseph a pa tungah pua-in a pa kaa-in a nam hi. 2Joseph in a pa luong a muot lo nadinga a bawl dingin zatui siemte thu a pie hi. Tuaci’n zatui siemte in Israel zatui a nu uhi; 3amate in tami bawl nadingin ni sawmli sung hun a zang uhi, bang ding ahei cile tua khu zatui nu nadinga a kisam hun ahi hi. Tuale Egypt-te in ni sawm sagi sung ama kaa uhi.
4Ama zieha kaana nite a tawp ciengin Joseph in Pharaoh’ innkuonte kungah, “Tu-in na mai vuah maipha ka nga leh hepina tawh Pharaoh kungah tam bangin thu ei genpieh un: 5Ka pa in ei kiciemsah hi; ama in, ‘Kei a si ding ka hi ta hi. Canaan leitanga keima dinga ka lemsa hankhuh sungah nei vui ding hi,’ ei ci hi. Tua ahi ziehin ka pa ka vui thei nadingin tu-in ei peitosah in; tua ciengin kang kilekia ding hi, ci hi, ei va cipieh ta un,” a ci hi.#Pien 47:29-31 6Pharaoh in dawng a, “Peito-in ang kiciemsah bangin na pa va vui ta’n,” a ci hi.
7Tuaci’n a pa vui dingin Joseph a peito hi. Ama tawh Pharaoh’ nasemte zosie, a innsung upate, le Egypt gam sunga upate zosie, 8Joseph’ innkuonte zosie, a sanggamte, a pa’ innkuonte tawh zong a peito uhi. Gosheh gamah a tate uh, a tuuhonte uh, le a bawnghonte beh uh kinuasie hi. 9Leengte le sakol galkapte tawh ama a peito hi. Amate a pawlcing mama uhi. 10Jordan gun galkhat, Atad’ bucilna phuol a tun ciengun, khum munah nahpitahin a kap uhi; tuale ama in a pa ziehin ni sagi sung dana hun a zang hi. 11Khum gama a teng Canaan-te in Atad’ bucilna phuola kaa le mau a mu ciengun, “Tam khu Egypt-te adinga a nasie mama kaa le mau ahi hi,” a ci uhi. Tua ahi ziehin khum mun pen Abel-Mizraim#50:11 “Egypt’ kaana” (ahi sihle “hampa lohing”) a cina ahi hi. kici hi. Khum mun khu Jordan gun galkhat ahi hi. 12Tuaci’n amate tunga a vaihlah bangin a tapate in a bawl uhi. 13Amate in Canaan gamah ama a puo vua, Abraham in hankhuh dinga Hit mi Ephron’ kung pana a na leisa ahi Mamre nisuona lam Machpelah mun lolai-a suonghawm sungah a vui uhi.#Sawl 7:16 14A pa a vui zaw ciengin a sanggamte le a zawpito mi zosie tawh Egypt ah ama a kilekia hi.
Joseph in A Sanggamte’ Mawna Maisah
15A pa uh si zo ci a thei ciengun Joseph’ sanggamte in, “Joseph in eite ei lungsim puohin ama tunga i bawlsa uh khielnate a unpi-in ei thuhkia mawh leh maw?” a kici uhi. 16Tuaci’n amate in Joseph kung a nai#50:16 Gk Sr: Heb “amate in thupie” vua, “Na pa in a si masangin tam thuhilna ei nei a, 17‘Joseph kungah tam bangin gen un: Na sanggamte in na tunga sietna ang bawl ziehun a khielnate uh maisah in, kang thum hi,’ a ci hi. Tua ahi ziehin tu-in hepina tawh na pa Pasien’ nasemte khielna ei maisah in,” a ci uhi. Amate in ama a hopi ciengun Joseph kap hi. 18Tua ciengin a sanggamte zong kapin#50:18 Cn: Heb “zong pei uhi” ama’ mai-ah a pua vua, “Tami munah na silate ka hi uhi,” a ci uhi. 19Ahi vangin Joseph in a kung vuah, “Zau sih un! Kei Pasien muna om ka hi amah? 20Note in kei siet nading na gel vangun, Pasien in tuni-a a sep bangin mi tampite’ hinna a humbih thei nadingin a hoi dinga a na gel ahi bo hi. 21Tuaci’n zau sih ulen, keima in noma le na tate kang va ding hi,” a ci hi. Tam bang danin amate a lungnuomsah a, kamhlum no tawh amate a hopi hi.
Joseph’ Hun Nukhia le A Sina
(Heb 11:22)
22Tuaci’n Joseph, ama le a pa’ innkuonte tawh Egypt gamah a teng uhi; tuale Joseph kum za le kum sawm a hing hi. 23Joseph in Ephraim’ tate khang thumna dong mu hi; Manasseh’ tapa Machir’ tate zong Joseph’ khup tunga suoh ahi uhi.
24Tua ciengin Joseph in a sanggamte kungah, “Kei a si ding ka hi ta hi; ahi vangin na kung vuah Pasien ang pei valon ding a, tuale ama in tami leitang panin Abraham, Isaac, le Jacob tunga a ciemsa leitangah note ang peipito ding hi,” a ci hi. 25Tuaci’n Joseph in Israel-te kiciemsah a, “Na kung vuah Pasien ang pei ciengin tami mun panin ka gu ka tangte na puoto ding uhi,” a ci hi.#Pei 13:19; Josh 24:32; Heb 11:12 26Kum za le kum sawm a phahin Joseph a si hi; ama zatui kinu a, Egypt gam sunga misi kuong khatah kikoi hi.
Currently Selected:
PIENCILNA 50: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
