JOHN 15

Jesu Lengga Gui Tahtah

1“Kei lengga gui tahtah ka hi a, ka Pa pen lengga lonei pa ahi hi. 2Ama in keima sunga a ga lo baa zosie a paimang ding hi. Ga nei a baate a ga semsem nadingin ama in heu-in a hasieng hi. 3Keima in note kunga kang gen thute ziehin note ang siengthosah zo ta uhi. 4Note sunga ka op bangin note zong keima sungah om un. Lengga baa pen lenggui tawh a kizop sih leh a matanga a ga thei lo bangin, no zong kei tawh na kizop sih uleh ga na ga thei sih ding uhi. 5Keima lengga gui ka hi a, note a baa na hi uhi. Keima sungah tengin amate sunga kei ka ten leh amate in ga tampi a ga ding uhi, azieh pen kei loin note in bangma na bawl thei sih uhi. 6Kei sunga a om lo poma a kipaimang a baate bangin a vulgawp hi; tua bang a baate kikhawm a, meikhuh sungah kipai-in a katum hi. 7Keima sungah na op vua, note sungah ka thu a op leh na dei popo ngen locin note adingin ang kibawlpieh ding hi. 8Ga tampi ga-in ka nuazui na suona ziehun note in ka Pa’ min na thangsah ding uhi. 9Pa in kei ei it bangin ke’n zong note kang it hi; keima’ ang itna sungah om un. 10Ka Pa thupiehte zui-a ama’ itna sunga ka op bangin, note in ka thupiehte na zui uleh keima’ itna sungah na om ding uhi. 11Note sungah ka kipahna a op thei nading le note’ kipahna a bukim thei nadingin na kung vuah tam thute kang gen zo hi.

12“Tami pen ka thupieh ahi hi, keima in note kang it bangin note zong khatlekhat khat na ki-it un.#Jhn 13:34; 15:17; 1Jhn 3:23; 2Jhn 5 13A lawmte adinga a hinna a pie ngam itna sanga a lienzaw itna koima in nei lo hi. 14Note in ka thupiehte na zui uleh ka lawmte na hi uhi. 15Note pen nasemte#15:15 Gk “silate” kang ci nawn sih ding hi, azieh pen nasempa#15:15 Gk “Sila pa” in a pupa’ sep bang ahei, ci a thei sih hi; keima in lawmte kang cizaw hi, azieh pen keima in ka Pa kunga ka thuzah zosie note kang theisah zo hi. 16Note in kei nei teel sih vua, keima in note kang teelzaw hi. Tuale note pei-in a kimang zing ding gate a ga dingin kang se zo hi. Tuaci’n keima’ min suongin note in ama kunga na nget popo uh Pa in ang pie ding hi. 17Note khatlekhat na ki-it nadingun keima in tami thupieh kang pie hi.

Leitung Mite’ Mudana

18“Leitung mite in note ang muda leh, note ang muda masangin kei ei muda zo hi, ci thu thei un. 19Note pen leitung-a’ na hi uleh leitung in ama-a’ bangin ang it ding hi. Note pen leitung-a’ hi loin leitung pana kang teelsa na hi ziehun leitung in note ang muda hi. 20Note kungah, ‘Nasemte#15:20 Gk “Silate” pen a pupa sangin lienzaw lo hi,’ ci-a kang thugen phawh un. Amate in ei bawlsiet uleh no zong ang bawlsie ding uhi; amate in ka thugen a man uleh no-a’ zong a mang ding uhi.#Mat 10:24; Luk 6:40; Jhn 13:16 21Ahi vangin keima’ min ziehin amate in na tung vuah tamte zosie ang bawl ding uhi, azieh pen amate in kei ei sawlpa a thei sih uhi. 22Amate kungah pei-in thu gen lo hi leng amate a maw sih ding uhi; hinanle tu-in amate in a mawna tungtang vuah hamlap ding a nei ta sih uhi. 23Kei ei muda poma in ka Pa zong a muda ahi hi. 24Amate lahah koima dang’ bawl ngai lo nate va bawl ta sih leng amate a maw sih ding uhi. Ahi vangin tu-in amate in ka sil bawlte a mu zo vua, kei le ka Pa ei muda ton uh ahi hi. 25A thukham sung vuah, ‘Thu om lopi-in kei ei muda gumsan uhi,’ ci-a a kigiel thu a tangtun nading ahi hi.#Late 35:19; 69:4

26“Pa kung pana ang pei, thuman thutah Hlagau Siengtho ahi Pa kung panin na kung vua kang sawl ding Hupa ang pei ciengin kei tangin teci ang pang ding hi. 27A cil a kipanin kei tawh omton na hi ziehun note in zong keima tungtang teci na pang ding uhi.

Currently Selected:

JOHN 15: ZBOTF01

Highlight

Copy