SIEMPU LAIBU 11
11
An Sieng le An Sienglo
1 Topa in Moses le Aaron hopi-in tam bangin gen hi: 2Israel mite hopi-in tam bangin gen un:
Tam teng pen leitunga om ganhingte lahah na neh thei ding uh ganhingte ahi hi. 3A kecin a kaa, ehnel a hlai ganhing poma- tua bangte na ne thei ding uhi. 4Ahi vangin ehnel-hlaite lah pan hitale kecin-kaate lah pan hitale tamte na ne sih ding uhi: Kalaoh in ehnel a hlai vangin a kecin kaa lo hi; tua khu note dingin sieng lo hi. 5Sakih ganhing in ehnel a hlai vangin a kecin kaa lo hi; tua khu note dingin sieng lo hi. 6Bilpi in annel a hlai vangin, a kecin kaa lo hi; tua khu note dingin sieng lo hi. 7Voh a kecin a kaa vangin, ehnel hlai lo hi; tua khu note dingin sieng lo hi. 8Tam bang sate ne loin a sisate zong na tham sih ding uhi; tuate pen note dingin sieng lo hi.
9Tui sunga om zosiete lah panin tam teng na ne thei ding uhi. Tuipi sung hitale lui sung hitale, hla le lip a neite zosie na ne thei ding uhi. 10Ahi vangin tuipi ahi sihle lui sunga om hla le lip a nei lo, tui sunga a hontat ganhingte le tui sunga om adang hinna a nei ganhing zosiete lahah khat popo pen 11note dingin a kidahhuoi hi den ding hi. Tuate’ sa na ne sih ding vua, a sisate zong a kidahhuoi-in na ngaisun ding uhi. 12Tui sunga om hla le lip nei lo zosie note dingin a kidahhuoi ahi hi.
13Vate lah panin tam teng pen a kidahhuoi-in na ngaisun ding uhi. Tuate kine lo ding hi; tua a kidahhuoite: muvanlai, langta, luimu, 14mumeikaa, mukhau namcin; 15va-ah namcin; 16ostrich vapi, pengpeleuh, vatawt, musi namcin; 17keising, tuimu, simbu, 18gam vatawt, tui vatawt#11:18 Ahi sihle “pelican “, musane, 19gun vapi, tuiva kengsau namcin, le huitun le bahte ahi hi.#11:19 Tang 13-19 sunga om va nam tuomtuomte’ a kibahpi pen kicien lo hi.
20Kengli tawh lam a pei, hla a nei ganhing zosie note dingin a kidahhuoi ahi hi. 21Ahi vangin hla a nei, kengli tawh a pei ganhingte lahah a kitom nadinga a kepheng tungah a kizom keng tampi a neite na ne thei ding uhi. 22Tuate lah panin na neh thei dingte uh: kauphe kitom nam zosie, kauphe zol nam zosie, khuomkhit nam zosie, le khuombai nam zosie ahi hi. 23Ahi vangin keng li nei-in hla a nei ganhing dangte zosie note dingin a kidahhuoi ahi hi.
Ganhing Sienglote
24Tam teng ziehin a sieng lo na hi ding uhi; a sisa ganhing a tham poma nitah masang a sieng lo na hi ding vua, 25tua gan sisa khat popo lahah a sa themkhat a puo poma in a puonte sawp sieng ding a, nitah masang a sieng lo hi ding hi. 26A kecin kaa nanle ehnel a hlai lo ganhing zosie note dingin a sieng lo ahi hi; tuate khatpo a tham khate a sieng lo hi ding hi. 27Kengli tawh lam a pei ganhingte lah panin a kephang tawh lam a pei zosie note dingin a sieng lo ahi hi; tuate lahah a si khatpo a thamkhate nitah masang a sieng lo hi ding a, 28gan sisa a puo pa in a puonte sawp siengin nitah masang a sieng lo hi ding hi; tua teng pen note dingin a sieng lo ahi hi.
29Leitunga a bawhva ganhingte lahah tam teng pen note dingin a sieng lo ahi hi: bui, zusa, tangpi namcin, 30taldep, tang, thangkhit, senel thangkhit, talmam te ahi hi. 31A hontat ganhing zosie lah panin note dingin tam teng pen a sieng lo hi ding hi; tuate khatpo a si ciengin a tham poma nitah masang a sieng lo hi ding hi. 32Tuate a si ciengin a tuhna nate, sing vanzah, puon, savun, la-ip le na khatpo-a kizang vanzah khatpo hitale a sieng lo hi ding hi; tua teng pen tui sungah kidie ding a, nitah masang a sieng lo hi dinghi; tua zaw ciengin a sieng hi ding hi. 33Leibeel sungah tuate khatpo a kieh leh, tua sunga om zosie a sieng lo hi ding a, tua leibeel na tawkeh ding uhi. 34Tua beel sunga a om a kine thei an khatpo tungah tua bang tui khatpo a tuh leh a sieng lo hi ding hi; tua bang beel sunga om a kidawn thei tui poma a sieng lo hi ding hi. 35Tua ganhing sisa themkhat a tuhna poma a sieng lo hi ding hi; meibung lungthu hitale, tap tung hitale kitawkeh ding hi; tua teng pen a sieng lo hi a, note dingin a sieng loin a om suoh ding hi. 36Ahi vangin tuinah ahi sihle tuibem sunga omte a sieng hi ding a, tua ganhing tawh a kithukha na khatpo pen a sieng lo hi ding hi. 37Tua dinga a kituomkoi khaici tungah tua gan sisa themkhat a tuh leh, tua khaici pen a sieng ahi hi; 38ahi vangin tui sungah khaici kidie-in tua a sisate themkhat tua tunga a tuh leh, tua pen note dingin a sieng lo ahi hi.
39Na neh thei ding uh ganhing khat a si leh tua gan sisa a tham poma pen nitah masang a sieng lo hi ding hi. 40Tua ganhing sa a ne poma in a puonte sawp ding a, nitah masang a sieng lo hi ding hi; tuale ganhing sisa a luonghawm a puote in a puon a sawp ding vua, nitah masang a sieng lo hi ding uhi.
41Leitunga a hontat ganhing poma a kidahhuoi ahi hi; tuate kine lo ding hi. 42A awm-a kithol poma, le kengli-a vah poma, ahi sihle keng hau, leitunga hontat ganhing zosie na ne sih ding uhi; azieh pen tuate a kidahhuoi ahi hi. 43A hontat ganhing khatpo tawh noma le noma a kidahhuoi-in na om sih ding uhi; tuate tawh noma le noma na kiniehsah sih ding vua, na kiniehsah uleh a sieng lo na suoh ding uhi. 44Azieh pen keima Topa na Pasien uh ka hi hi; tua ahi ziehin kei a siengtho ka hi ziehin noma le noma kisiengsah un. Leitunga a bawhva ganhing khatpo tawh noma le noma kiniehsah sih un.#Siem 19:2; 1Pet 1:16 45Bangzieh ahei cile note’ Pasien ahi dingin Egypt gam pana nohaw ang peitopi Topa ka hi hi; kei a siengtho ka hi ma bangin no zong na siengtho ding uhi.
46Tam teng pen vasate, tui sunga gamta hinna a nei ganhing zosie le leitunga a bawhva hinna a nei ganhing zosie tawh kisai ngainate ahi a, 47tuaci’n hinna a nei ganhingte, a sieng le a sieng lo, a sa neh thei ding le a sa neh thei lo dingte na khen ding uhi.
Currently Selected:
SIEMPU LAIBU 11: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.