SIEMPU LAIBU 13
13
Phah natna, Namtuomtuomte le A Kilahna Limte
1 Topa in Moses le Aaron kungah tam bangci hi: 2Mi khat in ama’ tahsa vun tungah a cibaw khat hitale, hima khat hitale cikang khat hitale a nei a, a tahsa vun tungah phah natna#13:2 Tami kammal pen vun natna tuomtuomte dinga kizang hi a, a khietna a cienin kithei lo hi. suoh thei ding dan a a op leh, siempu Aaron ahi sihle ama’ tapa siempute khat popo kungah kipeipi ding hi. 3Siempu pa in a ci tunga hima vel ding a, a hima munah a multe kangin a hima zong a ci tunga a vun sangin a thuh tum zaw-a a kimu leh, tua pen phah natna ahi hi; siempu pa in a vel zaw ciengin ama a sieng loin kise hi, ci-in a phuongzah ding hi. 4Ahi vangin ama’ ci tunga a vun sungah a hima kang napi a vun sangin a thuh tum lo zaw-in a kimu a, tua sunga a multe a kan sih leh siempu pa in ama ni sagi sung zia a tangsah ding hi. 5Siempu pa in a ni sagi ni-in vel ding a, a hima a ngaingai a na hi a, a ci tunga a kizel sih leh siempu pa in ni sagi sung ma zia tangsahkia lai ding hi. 6Siempu pa in a ni sagi ni-in velkia ding a, a hima khipin a kizel nawn sih leh ama sieng hi, ci-in siempu pa in a phuongzah ding hi; tua pen hima maimai ahi bo hi; tuale ama in a puonte sawp sieng ding a, tua ciengin a sieng hi ding hi. 7Ahi vangin ama in a sientho nadingin siempu pa kungah a kilaa zaw ciengin a hima pen a vun sung tenga a kizelmang tah leh siempu pa kungah ama kilahkia ding hi. 8Siempu pa in cienvel ding a, a vun sung tengah a hima a kizelmang zo tah leh siempu pa in ama sieng lo hi, ci-in phuongzah ding hi; tua khu phah natna ahi hi.
9Mi khat in phah natna#13:9 Vun natna tuomtuom dinga kizang kammal ahi hi. a vei leh siempu pa kungah kipeipi ding hi. 10Siempu pa in velcien ding a, a vun sungah a mul a kangsah cibaw a kang a op a, tua a cibaw sungah a tel sosuong a op leh, 11tua khu a cilah vun sunga a om a dam thei nawn lo phah natna ahi hi. Siempu pa in ama sieng lo hi, ci-in phuongzah ding hi; ama a sieng lo ahi ziehin zia kitang sah lo ding hi. 12Ahi vangin siempu pa muna danah tua natna in a vun a phuhkhe a, a lutang panin a kephang dongin a tuommang zo tah leh, 13siempu pa in cienvel ding a, a natna in a ci tung zosie a tuommang tah leh, tua natna tawh kisai-in ama sieng hi, ci-in a phuongzah ding hi; a ci tung zosie a kansah zo tah ziehin ama a sieng ahi hi. 14Ahi vangin a ci tungah a matha ang opkia leh ama a sieng lo hi ding hi; 15siempu pa in a ma tha pen cienvelin ama sieng lo hi, ci-in phuongzah ding hi. Tua khu phah natna ahi ziehin tua a ma tha pen a sieng lo ahi hi. 16Ahi vangin a ma tha ang kankia leh siempupa kungah ama pei ding hi; 17siempu pa in ama velin, a natna a kang a suo zo tah leh siempu pa in natna veipa pen sieng hi, ci-in phuongzah ding hi. Ama pen a sieng ahi hi.
18Mi khat’ tahsa vun tungah a damsa uilut khat a op a, 19tua uilut munah cibaw a kang khat ahi sihle a san kang khat a op leh tua pen siempu pa kungah kilah ding hi. 20Siempu pa in velcienna nei ding a, a vun sangin a thuh zaw-in a multe a kang a suo leh siempu pa in ama sieng lo hi, ci-in a phuongzah ding hi; tua khu phah natna ahi a, uilut pana ang phuhkhe ahi hi. 21Hizongle siempu pa in cienvelin tua tunga a multe a kan sih a, a vun sangin thuh tumzaw loin a dup leh siempu pa in ni sagi sung ama zia tangsah ding hi. 22A vun sunga a kizel tah leh siempu pa in ama sieng lo hi, ci-in a phuongzah ding hi; tua khu phah natna ahi hi. 23Ahi vangin tua a cikang pen mun khatah om denin a kizel sih leh tua khu uilut hima pawn ahi bo hi; siempu pa in ama sieng hi, ci-in a phuongzah ding hi.
24Ahi sihle tahsa in a vun tungah meikahma khat a nei a, tua meikahma a tha mun pen a san kang ahi sihle a kang ang suo leh, 25tua pen siempu pa in a cienvel ding hi. Tua cikang tunga a om a multe kangin a vun sangin a thuhzawh leh tua khu phah natna ahi hi; tua pen meikahna pana ang phuhkhe ahi a, siempu pa in ama sieng lo hi, ci-in phuongzah ding hi. Tua khu phah natna ahi hi. 26Ahi vangin siempu pa in velin cikang tunga om a mul a kan sih a, a vun sangin thuh tumzaw loin a dup leh, siempu pa in ama ni sagi sung zia tangsah ding hi. 27A ni sagi ni-in siempu pa in ama velcien ding hi; a vun sunga a kizel leh siempu pa in ama sieng lo hi, ci-in phuongzah ding hi. Tami khu phah natna ahi hi. 28Ahi vangin mun khatah tua cikang om denin a vun sungah kizel loin a dup leh, tua khu meikahna pana cibaw ahi bo a, siempu pa in ama sieng hi, ci-in phuongzah ding hi. Azieh pen tua khu meikahna pana hima pawn ahi hi.
29Pasal ahi sihle numei in a lutang tung ahi sihle a kha-ah natna khatpo a nei ciengin, 30siempu pa in tua natna cienvel ding hi. Tua natna pen a vun sanga a thuhzaw-in a kimu a, tua sunga om a multe engdangin a ngat zitzet leh siempu pa in ama sieng lo hi, ci-in a phuongzah ding hi; tua khu cithah ahi a, luphah ahi sihle khaphah natna ahi hi. 31Siempu pa in tua cithah natna velin a vun sangin a thuhzaw lo bangin kimu-in tua sungah mulvom a op sih leh siempu pa in ni sagi sung cithah natna tawh tua pa khumcipin zia tangsah ding hi. 32A ni sagi ni-in siempu pa in cithah natna vel ding hi; tua cithah a kilaw sih a, a sungah a mul engdang loin, a vun sangin a cithah a thuh lo zaw banga a kimu leh, 33ama in a sam heukieu ding a, hizongle a cithah mun teng heu lo ding hi. Siempu pa in a cithah natna tawh ama ni sagi khumbe lai-in zia tangsah ding hi. 34A ni sagi ni-in siempu pa in tua cithah vel ding hi; a cithah in a vun sung law loin a vun sangin a thuh lozaw-a a kimu leh, siempu pa in ama sieng hi, ci-in a phuongzah ding hi. 35Ahi vangin ama sieng hi, ci-in a kiphuongzah zaw ciengin a cithah in a vun sung a zel leh, 36siempu pa in ama vel ding hi. A vun sungah a cithah a kizel zo tah leh siempu pa in mul eng sui kul nawn lo hi; ama a sieng lo ahi hi. 37Ahi vangin a mittang sungah cithah a noptuom zo tah a, a sungah a mulvom po-in a cithah a dam zo tah leh ama a sieng ahi hi; siempu pa in ama sieng hi, ci-in a phuongzah ding hi.
38Pasal ahi sihle numei in a tahsa vun tungah cikangte a nei leh 39siempu pa in velin a kandang leh tua khu a vun a phukeh hima ahi hi; ama a sieng ahi hi.
40Mi khatpo a lu tunga a sam pulin a lu a tol vangin ama a sieng ahi hi. 41A talpang le a ankhawibaw’ sam a pul a, a pang a tawl vangin ama a sieng ahi bo hi. 42Ahi vangin a lutol tungah ahi sihle a pangtawl tungah a san kang hima a op leh, tua khu a lutol tung ahi sihle a pangtawl tunga a pusuoh phah natna ahi hi. 43Siempu pa in ama velcien ding hi; tua ahima baw pen a lutol tungah hitale a pangtawl tungah hitale, tahsa vun tunga phah natna op dan banga a kangsan ahile, 44ama phah natna vei ahi a, ama a sieng lo ahi hi. Siempu pa in ama sieng lo hi, ci-in a phuongzah ding hi; a lutang tungah a natna a om hi.
45Phah natna vei pa in puonsiete sil ding a, a lu tunga a samte bawhkaisah lo ding hi; ama in a nephu humin, ‘Sienglo, Sienglo,” ci-in kiko ding hi. 46Natna a nei laisie ama a sienglo hi ding hi; ama a sienglo ahi hi. Ama guoh teng ding hi; ama’ tenna pen giephuol pulam hi ding hi.
47Puonsil tawh kisai tam bang ahi hi: Tua puon tungah phah natna a op ciengin samul puon hitale saihadiel puon hitale, 48adung le avai-a kigan saihadiel puon, samul puon, savun, le savun tawh kibawl na khat popo tungah a tuh ciengin, 49puon tungah tua hima a engin hitale a sanin hitale adung le avai-a kigan puon, savun, le savun tawh kibawl na khat popo tungah a tuh leh, tua khu phah natna ahi a, siempu pa kungah kilah ding hi. 50Siempu pa in tua natna vel ding a, natna baang vante ni sagi sung tuomkoi ding hi. 51Ama in a ni sagi ni-in a natna vel ding hi. Tua natna pen adung le avai-a kigan puon, savun, le bang khat popo-a kizang savun tunga a kizel zo tah leh, tami khu mi a law thei phah natna ahi hi; tua khu a sieng lo ahi hi. 52Tua natna pen adung le avai-a kigan puon, samul, saihadiel, savun khat popo tunga a tuh leh ama in tua puonte mei tawh hal ding hi, azieh pen tua khu mi a law thei phah natna ahi hi; tua khu mei sungah kihal ding hi.
53Siempu pa in velin, tua natna pen adung le avai-a kigan puon tung le savun khat popo tunga a kizel sih leh, 54siempu pa in natna a banna tuami van sawp dingin amate thupie ding a, ama in adang ni sagi sung ma tua van a tuomkoi ding hi. 55Natna a banna van a kisawp zaw ciengin siempu pa in vel ding hi. Tua natna a kilaw sih nanle a natna mun a mel a kikhel sih leh, tua khu a sieng lo ahi hi; a sung lamah ahi sihle a pu lamah tua phah natna cikang a op leh, tua khu mei-ah na hal ding hi.
56Siempu pa in a natna a kisawp zaw ciengin velin tua natna a dup leh, ama in adung le avai-a kigan puon tung pan hitale savun khat popo tung pan hitale tua cikang opna mun teng ehbal ding hi. 57Tua natna adung le avai-a kigan puon tung hitale savun tawh kibawl van khatpo tungah hitale ang opkia leh, tua khu a kilaw thei ahi hi; tua natna banna teng mei tawh na hal ding hi. 58Hizongle adung le avai-a kigan puon, le savun khatpo a kisawp sieng zaw ciengin natna a ven leh a ni veina kisawp ding a, tua puon a sieng hi ding hi. 59Tam khu samul puon ahi a, saihadiel puon le adung le avai-a kigan puon, le savun van khat popo tungah ahi zongin a baang phah natna tawh kisai a sieng le a sieng lo khinkhai thei nading ngaina ahi hi.
Currently Selected:
SIEMPU LAIBU 13: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.