LUKE 19

Jesu le Zacchaeus

1Jericho khuo ah Jesu lutin a peisuoh hi. 2Tua sungah Zacchaeus kici siehdong uhpa khat om a, ama a hau mama hi. 3Tuapa in Jesu mu nuom mama a, ahi vangin ama mi tuntom khat ahina zieh le mihon a tam seng ziehin a mu zo sih hi. 4Tuaci’n ama na matai a, Jesu a mu thei nadingin lampi gei-a theitheh kung tungah na ka hi, azieh pen ama tua lampi zui ding ahi hi. 5Khumi munah Jesu a tun ciengin khuodah to-in ama kungah, “Zacchaeus aw, mallangin hing kumsuh in; azieh pen tuni-in na inn ah kang tung ding hi,” a ci hi. 6Tuaci’n Zacchaeus zong kumsuh pai bingbiengin kipahtahin a tungsah hi. 7Amate zosie in tam thu a mu ciengun, “Mawnei khat’ inn ah zin tung dingin a pei hi,” ci-in ama a phunsan uhi. 8Khum munah Zacchaeus dingto a, Topa kungah, “Topa, en in, ka neisa alang mizawngte ka pie ding hi; solna tawh mi khatpo’ neisa ka lahpieh a op leh a za li-in ka lokia ding hi,” a ci hi. 9Tua ciengin Jesu in ama kungah, “Ama zong Abraham suonlehlahte khat ahi ziehin, tuni-in tami inn ah hutdamna a tung zo hi. 10Azieh pen a mangthai mite sui ding le a hundam dinga Mihing Tapa ang pei ahi hi,” a ci hi.#Mat 18:11

Sum Pound Sawm Thugentena

(Mat 25:14-30)

11Jerusalem ah Jesu a tung dihtah a, amate in Pasien’ manggam ang tung pai dingin ngaisun uh ahi ziehin, a thugente a na ngai laitahun ama in a ban zomin thugentena khat a gen hi. 12Tuaci’n mi thupi khat in kumpi thuneina a nga nadingin a gamlapi-a om gam khatah a pei zaw ciengin a kilekia hi. 13Ama in a silate mi sawm hlanin sumtang pound#19:13 Tam sunga pound ci-a kizang pen mina ahi a, nasem khat’ hla thum thaman za ahi hi. sawm pie-in amate kungah, “Kang tunkia masangsie tam teng tawh summet na bawl un,” a ci hi. 14Ahi vangin a gammite in ama a muda ziehun ama’ nua-ah kamtai khat a sawl vua, ‘Kote ei uh dingin tam mipa ka dei sih uhi,’ a cisah uhi. 15Kumpi thuneina ngasa-in a kilekia ciengin, amate tungah a sum apsa silate in summet bangza nga uh ahei, ci a thei nadingin ama kungah a hlansah hi. 16A masa pen pa a mai-ah pei-in, ‘Topa aw, nei sum pieh pound khat in pound sawm metsah hi,’ a ci hi. 17Ama in, ‘Hoi sep cie, Sila hoi aw! Thu neuno khatah muonhuoi na hi ziehin khuopi sawm uh in,’ a ci hi. 18Tua ciengin a nina pa pei-in, ‘Topa aw, nei sum pieh pound khat in pound nga metsah hi,’ a ci ciengin, 19Ama in tuapa kungah, ‘Tuale nang in khuopi nga uh in,’ a ci hi. 20Tua ciengin adang khat pei-in ama kungah, ‘Topa aw, tam sungah na pound a om hi. Puonthem khat tawh tua sum ka tun hi, 21azieh pen nang mi genhapi khat na hi ziehin na khol lopi na la a, na tu lopi zong na at hi, tua ahi ziehin nang kang giing hi,’ a ci hi. 22Ama in tuapa kungah, ‘Nang a gilo silapa aw, na kamham ma tawh thu kang khen ding hi! Kei pen mi genha khat ka hi a, ka khol lona munah la-in ka tu lona-ah ka at lam nei thei amah? 23Tua banga ei thei na hi leh bang dingin sumkholna-ah tua sumte na koi lo na hei? Tua hileh kei kang peikia ciengin ka sumpi a met tawh ka nga ding hi,’ a ci hi. 24Ama in a gei-a dingte kungah, ‘Ama kung panin pound khat la unlen, pound sawm a neipa pie un,’ a ci hi. 25(Tuale amate in tuapa kungah, ‘Topa aw, ama in pound sawm nei zo ta!’ a ci uhi.) 26‘Ke’n kang ci-in, a neite kipiehbe ding a, ahi vangin bangma nei lote tung panin a neisun nangawn uh kilahpieh ding hi.#Mat 13:12; Mrk 4:25; Luk 8:18 27Ahi vangin amate tungah kumpi sem dinga ei dei lo ka galte tawh kisai-in amate tam sungah hing peipi unlen, keima muna-ah amate that un,’ ci hi,” a ci hi.#Mat 25:14-30

Jerusalem ah Jesu Guolzawna tawh a Lutna

(Mat 21:1-11; Mrk 11:1-11; Jhn 12:12-19)

28Ama in tam thu teng a gen zaw ciengin na mapei-in Jerusalem zuonin a peito hi.

29Olive a kici mun a om Bethphage le Bethany khuo a tun kuon ciengin ama in a nuazuite ni sawl a, 30“Na mai vua khuo ah pei unlen, khuo sung na lut ciengun koima’ tuon ngai nai lona laano khau-a kikhi khat na mu ding uhi. Hing sut unlen tanah hing kai ta un. 31Mi khatpo in, ‘Bang dinga na sut uh ahei?,’ ci-a ang dawh uleh, ‘Topa in tulmaw hi,’ ci-in dawng un,” a ci hi. 32Tuaci’n a mi sawlte pei-in a gen bangin a mu uhi. 33Amate in laano khau a sut laitahun a neite in, “Bang dinga laano khau na sut uh ahei,” ci-in a dong uhi. 34Amate in zong, “Topa in tulmaw hi,” a ci uhi. 35Tua ciengin Jesu kungah laano a peipi uhi; tua laano tungah a puon uh a pha zaw ciengun Jesu a tuongsah uhi. 36Laano tung tuongin lampi-ah Jesu a pei laitah in mite in lampi tungah a puonte a pha uhi. 37Olive Muol panin kumsuhna mun a tun kuon ciengun, nuazui mihonpite in a mu ngaisa uh vanglietna nasep zosiete ziehin kipahtahin awging tawh Pasien phat ding a kipan vua, 38amate in,

“Topa’ min tawh ang pei

kumpipa in thupha nga taheh!

Vantungah kilemna om hinlen,

a sang pen munah minthanna om taheh!” a ci uhi.#Late 118:26

39Mihonpite lahah Pharisee-te pawlkhat in Jesu kungah, “Siepa, na nuazuite khawlsah in,” a ci uhi. 40Ama in, “Ke’n kang ci-in, tam mite ham lo-a a sip uleh suongte kiko ding uhi,” ci-in a dawng hi.

Jerusalem ading Jesu Kap

41Jerusalem a tun kuon, khuopi a mu ciengin ama in tua khuopi kaa a, 42“Nang nangawnin tuni-in kilemna a piengsah theite thei lacin izaw! Ahi vangin tu-in na mu lo nadingun tuate kiselin a om hi. 43Na kimkotah na galte in kul bawlin hing imtawmin, mun zosie panin ang bume ding hun ang tung ding hi. 44Amate in nang le na kulpi sunga na tate tuoldenna-in ang nei ding vua, na sunga suong khat beh zong a kiciengsa-in a nuasie sih ding uhi; azieh pen note in Pasien kung pan#19:44 Gk ah “Pasien kung pan” ci om lo hi. ang kivilna hun na phawkhah lo zieh uh ahi hi,” a ci hi.

Jesu in Biehinnpi Siensuo

(Mat 21:12-17; Mrk 11:15-19; Jhn 2:13-22)

45Tua ciengin biehinnpi sungah Jesu lutin khum sunga om vanzuate a notmang hi. 46Tuale ama in,

“Ka inn in thungetna inn kici ding hi,” ci-in kigiel hi.

Ahi vangin note in misuomte kibuhna phuolpi na suohsah ta uhi,” a ci hi.#Isa 56:7; Jer 7:11

47Ama in nisielin biehinnpi sungah thu hil a, siempu liente, laihil siete le mipi makaite in tha dingin a sui den uhi.#Luk 21:37 48Ahi vangin amate in a thugente lunglut tahin a ngai ziehun bangma a law thei sih uhi.

Currently Selected:

LUKE 19: ZBOTF01

Highlight

Copy