MARK 15

Pilat Mai-ah Jesu

(Mat 27:1-2, 11-14; Luk 23:1-5, 13-16; Jhn 18:28-38)

1Zingmawng tungin siempu liente in upate, thukham hil siete le vaihawm teng zosie tawh kikupna khat a nei uhi. Amate in Jesu henin a peipi vua, Pilat kungah a ap uhi. 2Pilat in ama kungah, “Judah mite’ Kumpipa na hi amah” ci-in a dong hi. Ama in, “Na ci bang ahi hi,” ci-in a dawng hi. 3Tua ciengin siempu liente in thu tampitah tawh ama a mawsah uhi. 4Pilat in ama dongkia a, “Na dawn nading a om sih amah? Thu tampitah tawh ang mawmatna uh en in,” a ci hi. 5Ahi vangin Jesu in a dawnbe tuon lo ciengin Pilat in lamdang a sa mama hi.

Pilat in Khailia dingin Jesu Ap

(Mat 27:15-26; Luk 23:18-25; Jhn 18:38–19:16)

6Khum hunlai pawi hun ciengin amate in a nget uh thongkie khatpopo Pilat in a hla thei zel ngaina ahi hi. 7Khum laitahin kumpi langpan hun sunga mi that, kumpi a ledo mite tawh thong a kieton Barabbas a kici mi khat a om hi. 8Tuaci’n mihonpite pei-in Pilat kungah a bawl ngai ma banga a bawl nadingin a ngen uhi. 9Tua ciengin ama in amate kungah, “Judah Kumpipa hing hla leng na nuom vuoi?” ci-in a dong hi. 10Azieh pen amate in hazatna tawh ama tungah a ap uh ahi lamtah a thei hi. 11Ahi vangin Barabbas a hlapieh zawh nadinga a gen dingin siempu liente in mihonpite a hantawh uhi. 12Pilat in amate kungah, “Tua ahile Judah Kumpipa na ci pa uh bang law leng na nuom vuoi?” ci-in a genkia hi. 13Amate in, “Singlamte tungah khailia ta’n,” ci-in a awhsan uhi. 14Pilat in amate kungah, “Bang dingin lah, ama in bang sietna bawl ahei?” ci-in a dong hi. 15Tuaci’n mihonpi a lungkimsah nop ziehin Pilat in Barabbas hla a, ama in Jesu a sat zaw ciengin singlamte tunga khailia dingin a pie ta hi.

Galkapte in Jesu Simmawbawl

(Mat 27:27-31; Jhn 19:2-3)

16Tua ciengin galkapte in kumpi inntuol ah (gam-uh pa’ phuolpi#15:16 Gk “praetorium” a kicina) ama a peipi uhi; tuale amate in galkap honpite a kikhawmsah uhi. 17Tuale amate in puontuol dupsan khat a silsah uhi; tua zaw ciengin ling tawh kumpi lukhu khat a phan vua, a lu tungah a khusah uhi. 18Tuale amate in, “Judah Kumpipa aw, na khan sawt taheh!” ci-in salam a piesol uhi. 19Amate in a lu pumpeng tawh satin a cilphit vua, khupdinin zatahna a pie uhi. 20Ama a zako zaw ciengun a puontuol a hawkhietpieh vua, ama’ puonte ma a silsahkia uhi. Tua ciengin singlamte tunga khailia dingin ama a zawpi uhi.

Singlamte Tunga Jesu a Kikhaina

(Mat 27:32-44; Luk 23:26-43; Jhn 19:16-27)

21Amate in a singlamte puo dingin khuota pana ang zin a kituopi khah uh mi khat a pausawl uhi; ama pen Alexander le Rufus’ pa, Cyrene khuomi Simon ahi hi.#Rom 16:13 22Tua ciengin amate in Golgotha a kici munah (lugu mun a cinopna) Jesu a peipi uhi. 23Tuale amate in myrrh panamtui kha tawh kihal lenggazu a pie uhi; ahi vangin ama in a ne nuom sih hi. 24Amate in singlamte tungah ama khailia-in a puonsilte a hawm vua, a tan ciet ding uh a thei nadingun ai a san uhi.#Late 22:18

25Singlamte tungah ama a khai laitahun zinglam nai kuo a sat hi. 26A mawmatna uh lai-ah, “Judah Kumpipa,” ci-in kigiel hi. 27Ama tawh misuom guta ni, khat a zietlam, khat a veilamah kikhaiton hi. 28Lai Siengtho sungah, “Thukham palsatte tawh a kisimtha hi,’ a ci thu a tung hi.#15:28 Adang tang laibute ah tami tang 28 om hi.#Isa 53:12 29Ama a nawhkha mite in lupei-in a zako gawp vua, “Huoi lah! Biehinnpi susie-in ni thum sunga a lamkia ding pa,#Late 22:7; 109:25; Mrk 14:58; Jhn 2:19 30singlamte tung panin hing kumsuh inlen nang le nang kihunkhie ven!” a ci uhi. 31Tua ma bangin amate lahah siempu liente in zong thukham hil siete tawh ama a zako vua, “Mi dangte hunkhie thei napi ama le ama a kihun zo sih hi#15:31 Ahi sihle, “ama le ama a kihun zo sih amah?. 32Kote in mu a, ka up thei nadingun Israel Kumpipa Messiah aw,#15:32 Ahi sihle “Khris” tu mama-in singlamte tung panin hing kumsah in,” a ci uhi. Singlamte tunga a kikhaipi tegel in zong ama a engho uhi.

Jesu’ Sina

(Mat 27:45-56; Luk 23:44-49; Jhn 19:28-30)

33Sunkim a kipan nitah nai thum dongin gam sung mun zosie-ah mutzin a tung hi. 34Nai thum hunin Jesu in, “Eloi, Eloi, lema sabachthani,” ci-in nahpi tahin a kiko hi, tua pen ka Pasien, ka Pasien, bang zieha nei nuasie ahei?”#15:34 Adang tang laibute ah “zakona ei thuohsah” ci-in kigiel hi. a cinopna ahi hi.#Late 22:1 35A gei-a a ding mi pawlkhat in a zah ciengun amate in, “Ngai vawi un, Elijah hlan hi ve aw,” a ci uhi. 36Tuale mi khat tai-in lenggazu thua sungah tui hupna die-in cieng dawnah koi-in a dawn dingin pie a, “Ngah phot un, ama hunkhie dingin Elijah ang pei ei mah en vai,” a ci uhi.#Late 69:21 37Tua ciengin Jesu nahpi tahin kiko-in a naahu tawpin a si hi. 38Tuale biehinnpi kidatna puonkhai a tung pana nei dongin phalni kisuo hi.#Pei 26:31-33 39Ama mai-a a ding galkapmangpa in ama#15:39 Adang tang laibute ah “kiko a” ci-in kibelap hi. a naahu tawpin a si dante a mu ciengin, “Tampa, Pasien’ Tapa tahtah hi mawh ei!” a ci hi.

40A gal-et numei pawlkhat zong a om hi; tuate lahah Mary Magdalene, a nauzaw James le Joses’ nu Mary, le Salome-te a kihal hi. 41Galilee gam sungah Jesu a op lai-in tam teng in ama zui-in a kisapnate a na sih ngitnget uhi; ama tawh Jerusalem dong a zawhton numei dang tampitah zong a om hi.#Luk 8:2-3

Jesu a Kivuina

(Mat 27:57-61; Luk 23:50-56; Jhn 19:38-42)

42Tua ni pen sabbath ni masang, Kigin ni ahi ziehin nitah lam ciengin, 43ulien vaihawmte lahah mi’ zatah mama, Pasien’ manggam zong lametna tawh a ngah lenlon, Arimathea khuomi Joseph, Pilat kungah hangtahin pei-in Jesu’ luong a ngen hi. 44Tua ciengin Pilat in a si zo lam a thei ciengin lamdang a sa hi; tuale ama in galkapmangpa khat hlansahin a si zaw a sawt tai mah, ci-in a dong hi. 45A si zo lam galkapmangpa tung panin a thei bepin a luong Joseph a pie hi. 46Tua ciengin Joseph in diel puon khat tawi-in a luong a la dawh a, tua diel puon tawh tunin a kilemsa suong hankhuh sung khatah a siel hi. Tua ciengin ama in hankot-ah suongtum khat lia-in a koi hi. 47Mary Magdalene le Joses’ nu Mary in a luong kisielna mun a mu uhi.

Currently Selected:

MARK 15: ZBOTF01

Highlight

Copy