PIANPATNAK 19
19
Sodom Mitei Sualdan
1Taklam nitum susul ten vancungmi pa nih Sodom khua ah a hen haw ten, Lot cu mi tawhdun khawmnak khuapi kongka ah na khung hi. Lot in vancungmi pa nih amuh ten muak tukin hawh hi. A mai lei tawngkha tiang kunin, 2“Ka bawipa uhte, na hehpihnak uhin, ka innah tung zal un. Ka innah ngiak unna, na ke uhte som un. Zingten zingtungno in hawhleh tuk poh uh ci,” ti hi.
Mahnaven vancungmi ten, “Hi thei tukma; tuzan cu hi khuapi kongka ah ngiak tuk ung,” tin ti haw hi.
3Lot in, a innah ngiak tukin kun lo hi. Mahtak nungdawlbel ten vancungmite vangin ngiak tukin lungkimleh haw hi. Lot in, naman hel ngawl cangho bawlin, takeih ukzet do in ei haw hi.
4A mikhual tei hihbuh haw laih ngawlin, Sodom khuasungmi ten Lot i inn cu kil haw hi. Upa naupang ti ngawlin a venghawng haw in tel khawng haw hi. 5Lot cu sam haw in, “Na lak a, tuni tak a ngiakmi na mikhualte ilai ah haw kaw? Suah hemin, sualpih tuk ung,” tin au haw hi.
6Lot cu kongka ah tulin a khahleh nungten, 7“Ngualcamte aw, mahtibang thilpha ngawl cu bawl tum zal pahsuh un, tin kun ing. 8Zo hem un. Canu himno pa nih nei ing. Tulpih nang inna, na deih uh bangin bawl un. Mahnaven hi tei humah bawl zal pahsuh un; itahim titale ka mikhual a hih haw taktohin, ka hup kul hi,” ti hi.#Thuk 19:22-24;
9Mahnaven khuasungmi ten, “Nang ngamdangmi thawthong poh ci; hu kian saw in, hihi bawl un, hi khi bawl un tin, nangin itin kaw na tih theih? Thawn saw in; mah mata nangmah bawlsia saw tuk ung,” tin, Lot cu nawm vawk haw in, a kongkhah cu phelet tum haw hi. 10a mikhual pa nih ten Lot cu a kongkata doktumin, inn sungah a dawhtum nung haw ten kong cu khak haw hi. 11kongka pualeu a ummi mipi cu nautabel pen upabel tian mitcawtik khawngin, kongka cu muleh thei haw ma toh hi.#2Kum 6:18;
Lot In Sodom Khua Tulsan
12A mikhual pa nih ten Lot lakah, “Unaupih dang nei laih cim? Na capate, na canute le na canu tei pasal hempoh sam khawng inna, manlang zetin hi khua pen tul un; 13itahim titale hi khua hi siatsuah khawng tuk ung hi. Topa in, hi khuasung mi sualnak le phatngawlnak thei ciang zo hi, Sodom khua hi a siatsuahtu tukin keimuh hi hah hi,” tin hilh haw hi.
14Lot cu manlang zetin hawhin, a canu tei pasal tukmi tangval tei lakah, “Hi khua pen manlang zetin tul un; itahim titale Topa in, siatsuah tuk hi,” tin hilh hi. Mahnaven cekpan thongin ngai haw hi.
15Zinglam vaktungin,#19:15 Zinglam vaktungin tihmi hi thingketau tih hei in sammi hi. vancungmi ten Lot lakah, “Manlangin; na zi le na canu pa nih pui inna, tul nawnawm un; hi khua hi sia khawngin, a pailal ten tel kha bok kawn uh ci,” tin ti haw hi. 16Lot cu cuamduang deuh hi. Topa in, hehpih lelengin, Lot le a zi le a canu pa nih cu vancungmi ten a khut haw pen pui in, khuahial lamah hawhpih haw hi.#2Pet 2:7; 17Khuahial a hen haw ten vancungmi pa khatin, “Na nuncak theihnak tuk uhin tai un; na nunglam uh hek kik pahsuh unna, munlawnah cawl pahsuh un. Na thih ngawlnak tuk uhin mualhumah tai un,” ti hi.
18Mahnaven Lot in, “Topa mahtih bangin bawlzal pahsun, 19na hehpih hangin ka nunnak cu khawih zo ci. Mualhumah heng thei hihim tuk mang; khawlazet laih a hih ten mah laih mun ka hen laih ngawlin siatnakin pha leleng tuk hi. 20Hi khua neuno mu a cim? Mah khua neuno cu nai saw deuh a hih ten heng man tuk poh ing. Ka luatnak tukin hi khua ah khin hawh nang,” tin ngen hi.
21Vancungmi in, “Na nget bangin lungkimpih ing. Hi khua khi cu siatsuah tuk mang. 22Manlangin tai nawnawm un. Hi khua na hen laklawh uh cu bawl tuk mang,” ti hi.
Mah khua cu, “Khua neuno,” tin Lot in, a tih hangin Zoar#19:22 Zoar tih cu Hebru awnin, neuno tihnak hi. tin sam haw hi.
Sodom le Gomorrah Siatsuahnak
23Nisuakin, Lot cu Zoar khua a hen ten, 24Topa in, Sodom le Gomorrah khua humah van pen kaat mei alh zusuktik hi.#Mt 10:15; 11:23-24; Lk 10:12; 17:29; 2Pet 2:6; Jud 7; 25Mah khuapi le phillawn, khuasung a ummi mihing hempoh le leihum a po mi hempoh tuah Topa in siatsuah khawng hi. 26Mahnaven Lot i zi cu nunglam a hekkik hangin ci khuamin suak hi.#Lk 17:32;
27A zingten Abraham cu Pathian tuah a tawhdunnak munah manlang zetin hawh hi. 28Sodom le Gomorrah khua le phillawn tuan cu a zoh ten, meipual halmi meipi khu bangin meikhu zam bembum pi cu mu hi. 29Mahnaven Pathian in, phillawn a khuapi cu a siatsuah ten, Abraham cu phawkngil ngawlin Lot cu himdamno in luattik hi.
Moab le Ammon Mitei Suahkehnak
30Lot in, Zoar khua ah um tuk cu a lau hangin a canu pa nih tuah mualhumah thawn haw a, suangbukah um haw hi. 31A upa saw nu in, a nau nu i lakah, “Ka pa hi tek dedeuh zo hi. Ca a neih theihnak tukin, a daan bangin eimuh huaitu tuk pano hi ngamah um sih haw ma hi. 32Mah hangin hung inna, ka pa tuah zaukawmin, ca a neih theihnak tuk uhin, sabittui khamin, lumpektik nung,” ti hi. 33Mah zanin, a pa haw cu sabittui pia haw a, a upa saw nu le a pa cu zaukawm haw hi; mahnaven sabittui a kham leita hangin a pa in, a zaukawm haw cu thei ma hi.
34A zingten a nau nu i lakah, “Zan takin, ka pa tuah phialdun ung. Tuni tak vang sabittui pia leleu nung inna, nangmah tuah zaukawm un hi. A pa nih uhin, a pa uh i ca cawi tuk ung,” ti hi. 35Mah hangin mah zanin, a pa haw cu sabittui pia leleu haw a, khampek leleu in, a canu nauta saw tuah zaukawm haw hi. Amasa bangin a pa cu sabit a kham leita hangin a canu nauta saw tuah a zaukawm haw lam thei ma hi. 36Mahtih bangin Lot i canu pa nih ten a pa haw i ca pai veve haw hi. 37A canu upa saw in capa hingin, a min Moab#19:37 Moab tih cu ka pa i lak pen tihnak hi. tin sa hi. Mah a capa cu atu khanah Moab mitei cikhaihtu hi. 38A canu nauta saw vangin capa hing bokin, Benammi tin, a minsa hi. Benammi#19:38 Benammi tihmi cu Ka sangngam i capa tihnak hi a, Hebru awnin Ammon mi tihnak hi. cu Ammon mitei cikhaihtu hi.
Currently Selected:
PIANPATNAK 19: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
