PIANPATNAK 30
30
1Rachel in, a pasal Jakob ca tukin ca pa khatno hei a hin ngawl thu a ngaihsut ten a u Leah a iksikzet hangin, Jakob lakah “Ca pia in hi; mahma tale thi tung,” ti hi.
2Jakob a thinukin, Rachel lakah, “Pathian dinmun cu itin kaw ka dawn theih tuk? Ca a neitik ngawltu cu Pathian amah si,” tin liat hi.
3Rachel in, “Mah ahimata ka sila nu Bilhah tuah zaukawm unna, kei vang nauno nu ka hih theihnak tukin ka cawi tuk ca hinsak hen hi,” tin, Jakob cu ti hi. 4Mah hangin Rachel in, a sila nu Bilhah cu a pasal lakah a piak hangin zaupih hi. 5Bilhah cu Jakob ca pai in, capa hing hi. 6Rachel in, “Pathian cu keima lam tangin thuson hi. Ka thungetnak zain capa pia hi,” tin ti in, a min cu Dan#30:6 Dan tih cu Hebru awn hi a, Ka lamah tang hi tihnak hi sa hi. 7Bilhah cu naupai lehleu in Jakob i capa pa nihnak hing hi. 8Rachel in, “Ka u neh tukin nase zetin zuam ing a, neh suak ing,” ti in, a min cu Naftali#30:8 Naftali tih cu Hebru awn hi a, Zuam ing tihnak hi sa hi.
9Leah vangin ca a neih palleh ngawl cu a theih ten, a sila nu Zilpah cu Jakob i zaupih tukin pia hi. 10Zilpah in capa hing hi. 11Leah in, “Bawngpha ing hi,” ti in, a min cu Gad#30:11 Gad tih cu Hebru awn hi a, Bawngpha tihnak hi. sa hi. 12Zilpah in Jakob capa dang hing leleu in, 13Leah in, “Iti zahin kaw ka lung a dam. Atu-in numei hempohin, mi lungdam tin sam haw tuk hi” ti in, a min cu Asher#30:13 Asher tih cu Hebru awn hi a, Lungdam tihnak hi. sa hi.
14Sangvutah hun ten Reuben cu hampa lakah hawhin, cacawi theihnak zaawl-ai ngah mu in, a nu Leah lakah pia hi. Rachel in Leah cu, “Na capa i cawimi cacawi theihnak zaawl-ai ngah demno khen bok vele,” tin ngen hi.
15Leah in, “Ka pasal na lonsak hi tawk ti ma laih cim? Ka capa i cacawi theihnak zaawl-ai ngah vangin maw lak tuk na tum hih laih,” ngah ol khai cei, tin awn lizet tuah ti hi.
Rachel in, “Na capa i cacawi theihnak zaawl-ai ngah na pia ahi tale tuni tak Jakob lakah zau tuk ci,” ti hi.
16Taklamin Jakob cu hampa lak pen a pin ten Leah in, na muakin, a lakah, “Tuni tak cu ka lakah na zau kul hi, itahim titale ka capa i cacawi theihnak zaawl-ai ngah tuah Rachel lak pen nangmah cu sap ing,” ti hi. Mah ni tak cu Leah tuah zaukawm haw hi.
17Pathian in Leah i thungetnak cu a theih hangin, naupailehin, Jakob cu capa pa nga hinsak hi. 18Leah in, “Pathian in, ka sila nu cu ka pasal lakah ka piak hangin laksawng pia zo,” ti hi. Mah hangin a capa cu Issakhar#30:18 Issakhar tih cu Hebru awn hi a, Sap man laksawng um hi tihnak hi. tin, a min cu sa hi. 19Leah cu cacawi leleu in capa a pa luknak hing hi. 20Leah in, “Pathian in laksawng sunglawi pia hi. Capa pa luk ka hinsak zo hangin atu-in ka pasalin deih tuk toh,” hi ti in, a capa i min cu Zebulun#30:19-20 Zebulun tih cu Hebru awn hi a, Laksawng co ngah ing hi tihnak hi. sa hi. 21Mah nungten canu pa khat nei in, a min cu Dinah sa hi.
22Pathian in, Rachel cu phawk leleng hi. A thungetnak cu zain, ca nei thei tukin bawl hi. 23Rachel cu naupai in capa hing hi. “Ca nei thei ngawlin ka zahcaknak cu Pathian in laksak zo hi. 24Pathian in capa dang pia hih zal hen,” ti in, a min cu Josef#30:24 Josef tih cu Hebru awn hi a, Adang pia hih zal hen tihnak hi. sa hi.
Jakob le Laban Thu Eldun
25Josef suah nungten Jakob in Laban lakah, “Hah tohin hi, ka khua le ngamah kikleh nuam toh ing. 26Ka zi le ca cu pia inna, pin tung; amuh co nuamin iti zahin, nangma na komzetno in dek ing tih cu thei ci,” ti hi.
27Laban in, “Na hilh nang ngei! Ngai hih hemin hi. Nangmah ka lak a, na um hangin Topa in muicu pia in khangto ing, tih cu thei ing. 28Na thaman tuk hilh inna, pia tung,” ti hi.
29Jakob in, “Izah takin, na nadek ing a, na ngan hi keima cin sungin izah takin pungzai haw him tih cu thei khawng ci. 30Na lak a, ka hen tungin demno bek na neihmi cu atu-in sialcelh ngawl nei zo ci; keima hangin Topa in muicu pia tatak hi. Atu-in keima ca ka ngaihsut hun zo,” ti hi.
31Laban in, “Mahtin ahi tale ikaw ka piak tuk?” tin dong hi.
Jakob in, “Thaman imah deih mang. Ka ngetmi na pia tuk ahi tale, na ngan hi cingkhawi hih tung hi. 32Tuni in, na ngan tei lakah vak tung a, tuuno a haangmi hempoh le a canmi keelno hempoh, canzing a, canmi hihen, cankang a, canmi hihen la tung hi. Mah zong cu ka thamanin ka deihmi hi. 33Mailam ten iti zahin, na thu ngai ing kaw tih na theihnak tukin, ka thaman cu thei ciang nuamin, na dotkan ten tuu a hang ngawlmi le a can ngawlmi, ka neih na mu tale ka nguk cawmmi hi tih cu thei tuk ci,” ti hi.
34Laban in, “Lungkim ing, na hilh bangin bawl tung,” ti hi. 35Mahnaven mah ni loli in, Laban in keelcang canzing le cankang a, can mi le keelpi canzing le cankang a, canmi pawpoh, ahimata a ngo a canmi hempoh le tuu a haangmi hempoh cu la khawngin, a capa tei cin tukin koih hi. 36Jakob i umnak pen ni thum hawh khawlanak munah hawhpih hi. Jakob in Laban i tuu le keel a tang calam cu cing hi.
37Jakob in khil thing, thuang kung le hiang kung tei kangkak la in, a hawng a khenkhat hawk a, ngolhkang can tuah bawl hi. 38Mah ngolhkang cante cu ngan tei tui innak tuikuang sungah a tung zawngin, ngan tei lam hekin koih hi. Ita hi bangin koih him titale tui in tukin ngan a hun haw ten a phialdun mek haw hang hi. 39Mah ngolhkang can mai pen keelte cu a phialdun taktohin, a ca hin haw cu a canmi, cankang le canzing bebekin hing haw hi.
40Jakob in Laban i tuu a nu cu danin, tuucang a canmi le a hang tuah bek phialduntik hi. Jakob in Laban i tuuhon sung pen ama tuuhon cu pungtik hi.
41A ngan lak pen a dammi le a ngilte a phialdun haw ten ano a canin, a suah theihnak tukin a ngolhcan cu tuikuang sungah, a mailam haw hekin koih hi. 42Mahnaven ngan nawmtam a phialdun haw ten ngolhcan cu koih ma hi. Mahtak tohin, ngan nawmtam cu Laban ta suakin, a ngil deuh hempoh cu Jakob ta in suak hi. 43Mahti bangin Jakob cu a ngeican um ngawlin mi hau zetin suak hi. Ngan tampi, sila numei le pano le kalauk le laak tampi nei hi.
Currently Selected:
PIANPATNAK 30: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
