PIANPATNAK 37
37
Josef le A Unaute
1Jakob cu a pa i umnak Kanaan ngamah umta hi. 2Jakob i innkua tangthu cu hi bangin hi.
Josef cu tangvalno, kum sawm le kum salih hi in, a pa i zi neu Bilhah le Zilpah tei capa, a u tei lakah, tuu le keel khal mek bok hi. A u tei bawl sualmi cu a pa i lakah hilh mek hi.
3A pa Jakob in, Josef cu a tek sawng ten hin mi a hih hangin, a capa dangte sangin it cuang hangin angki baancual khui sak hi. 4Josef cu a muhte sangin a pa haw in, it saw tih amuh haw ten, hua in, otpih nuam ngawl mumazet haw hi.
5Tak khat cu Josef in, a mangmatmi cu a u tei lakah a hilh hangin, a u ten ngaimawh cuang haw hi. 6A u tei lakah, “Ka mang hi ngai teh hem un. 7Lo sungah a venghawng uhin sangvut tel tawtok hung a, ka sangvut tel cu tho to in, cam zetin ding hi. Na sangvut tel uhten ka sangvut tel cu kimin kuun haw,” ti hi. 8A mang a hilh ten, “Ka hum uhah kumpi hi tukin le thunei tukin ngaisungdun cim?” tin dongin, a u ten hua sesem hawta hi.
9Josef in mangman leleu in, a u tei lakah, “Mangman leleu ing a, ni, hade le aksi sawm le pa khat cu ka maiah kuun haw hi,” ti hi.
10A pa le a u tei lakah a mang cu a hilh ten a pa in, “Iti bang mang ngelcel heng na mat? Na nu le pa, na u le nau tian, na maiah hungin kuun tuk ung maw?” tin liatnek hi. 11A u ten iksikzet haw naven, a pa in mah thu cu a lungmu sungnoah koih hi.#Nung 7:9;
Izipt Ah Josef Zuak Haw
12Ni khat cu Josef i u, a pa i ngan khal tukin Shekhem ah hawh haw hi. 13Jakob in Josef lakah, “Na u tei ngan khalhnak Shekhem ah hawh tuk ci,” ti hi.
Josef in, “A mansa leng ing,” ti hi.
14A pa in, “Hawh inna, na ute le ngante himdamno in um haw maw tih zota inna, a thu haw hilh kiklehin,” ti hi. A pa in, Josef cu Hebron munlawn pen hawhtik hi.
Josef cu Shekhem a hen ten, 15hampa lakah a vak li pano pa khatin, “Ikaw na zei lih?” tin dong hi.
16Josef in, “Ka ute zei li ing hi; ngante ilai ah kaw a khalh haw tih hilh thei ni cim?” tin ti hi.
17Mahpa in, “Hilaiah umleh haw ma toh. Dothan ah hawh tuk ung, a tih haw cu thei ing.” Mah hangin Josef cu a ute tawk tukin Dothan ah hawh hi.
18A u ten khawla thim pen mu haw in, a that tukin ngaisungham zo haw hi. 19“Mang mantu pa hung hi, tin ti haw hi. 20Hung hem un, that nung inna, a luang cu hi khuk pa kha khat sungah vawk nung. Sahangin man hi tituk hung a, a mang itin piang tuk him tih zoteh pah nung,” tin pa khat le pa khat tidun haw hi.
21Mah thu cu Reuben in, a zak ten Josef pan tumin, “A thah ngai cu that ma nung,” ti hi. 22Hi ngamkhing sung a, khuk pa kha khat sungah khia unna, amah ngai cu siatsuah pahsuh un, tin ti hi. Reuben in, that ngawlin a pan thei tale, a pa i lakah kuat kikleh tukin a tummi hi. 23Josef cu a u tei lakah a hen ngangai ten, a angki baancual cu duhsak haw hi. 24manin, khuk sungah khia haw hi.
25An a eih haw laih takin, muanmawh khak ngawlin, khualzin mihon khat Ishmael Gilead pen Izipt ngam zuanin, a hawh lite mu haw hi. A kalauk haw ten thingnai le masala pua haw hi. 26Judah in, a unau tei lakah, “A naupa uh hi thatin, laithat a hih tuk uh cu a sel li uh hei in, ohtei ca in nemcuam maw? 27Ishmael tei lakah that ngawlin zuak saw nung; thungai in titale a nau uh hi a, a thi le sa uh vang na hi,” tin ti hi. Mah a tihmi cu a unau dang vangin lungkim pih haw hi. 28Midian#37:28 Median mi le Ishmael mi tihin min nih nei haw naven, sumbawltu cu bu khat leng haw hi. mi sumbawlte a hen haw ten tuikhuk sung pen Josef cu suah haw a, Ishmael tei lakah tangka sawm nihin zuak haw. Mah hangin Ishmael ten Josef cu Izipt ngamah hawhpih haw hi. #Nung 7:9;
29Reuben hengkikin, tuikhuk sung a zoh ten, Josef amuh ngawl hangin khawngai in, a puan botkek khawng hi. 30A unau tei lakah kikin, “A naupa uh khuk sungah umma toh. Itin kaw a tih tuk uh?” tin ti hi.
31Mahten a unau ten keel ngo haw in, Josef i angki cualpi cu keel thi sungah nim haw hi. 32Mah angki cualpi cu a pa i lakah hawhpih haw in, “A hihi mu ung, na capata hi a maw zo hemin?” tin ti haw hi.
33A pa haw in, Josef i angki cualpi hi tih cu thei paihin, “Hi zuh hi, amata hi. Sahang pa kha khatin that hi tuk hi. Ka capa Josef cu bawhkek khawng hi zo hei!” tin ti hi. 34Jakob cu a puan botkekin, a thasiat langtik tukin, thangkhau puan silhin, ngeipi tian mithi ngai in um hi. 35A capa le canute hungin, hehnem li haw naven hehnem thei haw ma hi. “Mithi khua, a lakah ka hen laklawh, ka capa ngai in um tung,” ti in, a capa Josef ngai in kap leleng hi.
36Josef cu Midian ten Izipt ngamah hawhpih haw a, Izipt kumpi inncingtu bawi upa Potifar lakah zuak haw hi.
Currently Selected:
PIANPATNAK 37: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
