PIANPATNAK 47
47
1Mah hangin Josef cu kumpipa lakah hawhin, “Ka pa le ka unau Kanaan pen a tuu haw, a khuihon haw le a neihmi hempoh tuah heng zo haw hi. Amuhte cu atu-in Goshen ngamah um haw hi,” tin hilh hi. 2A unau tei lak pen mi pa nga pui in kumpipa lakah hawh haw hi. 3Kumpipa in, a unau tei lakah, “I nate dek uh kam?” tin dong hi. “Kohte cu tuucing ung, bawipa, ka pu le ka pa uhte bangin, ka naupang uh laih pepanin tuucing ung,” tin ti haw hi. 4“Hilai ngamah um tukin heng ung hi. Itahim titale Kanaan ngamah paampi tungin, ka ngan uhten eih tuk hei mu haw ma toh hi. Hehpihnakin Goshen ngamah um theihnak thupia zalin,” tin kun haw hi. 5Kumpipa in Josef lakah, “Atu-in, na Pa le na unaupihte heng khawng zo haw hi. 6Izipt ngam hempoh cu amuta hi. Ngam phatnakbel Goshen ah umtikin hi. Amu lak pen mi muantakin, a um haw tale ka ngan cingkhawi tukin koih sakin,” ti hi.
7Josef in, a pa Jakob cu hawhpihin kumpipa tawktik hi. Jakob in kumpipa cu muicu pia hi. 8Kumpipa in, “Kum i zong kam?” tin dong hi.
9Jakob in, “Vakvai in, kum za le sawm thum nung zo toh ing. Ka nuncak sungah haksatnak tawk pepel ing a, ka pu le pa tei a vahvaih haw kum cu bangma laih ing,” ti hi. 10Jakob in, kumpipa cu khehnak muicu piata in hawh hi. 11Jakob in, a pa le a unau cu kumpipa i thupiak bangin Izipt ngamsung a, ngam phabel Rameses khuapi elah um tukin thupia hi. 12A pa, a unaupihte le a pa i innkuapih hempoh nautabel tian Josef in, a eih haw tuk an pia khawng hi.
Josef In Ngam A Uk Dan
13Paam cu nase sesemin leihum ilai banglai heiah an umma hi. Izipt le Kanaan ngam mite cu ngilkialin tamsawl khawng haw hi. 14Izipt le Kanaan mitei an leinakin, a man haw sumpai hempoh cu Josef in cawm khawngin kumpipa i innah koih hi. 15Ngamsung mitei neihmi sumpai a bo khawng ten Izipt mite cu Josef lakah hung haw in, “An pia in hi. Ka sumpai uh le bo khawng zo. Pa kha khatno bek na ngaihsut sak ma tale thi tuk ung hi,” tin ti haw hi.
16Josef in, “Na sumpai uh a bo khawng zo tale na ngan uhte hunpih unna, an tuah hek nang,” ti hi. 17Mah hangin Josef lakah a ngan haw, cipuh, tuu le keel, khui le laak cu hunpih haw a, Josef in an tuah hek hi. Mah kum cu a ngan haw hempoh tei manin an pia hi.
18A mai kum cu Josef lakah hung lehleu haw a, “Bawipa na lakah im tukma ung; ka sumpai uh bo khawng zo, ka ngan uh hempoh vang nangmata zo hi. Bawipa ka leingam uh le ka taksa pumpi sialngawl adang piak tuk neileh matoh hung. 19Kohtei thih tuk cu phal zal pahsun, i poh bek ngaihsut sak zalin hi. Ka mihing uh le ka ngam uh hi an tuah heksakin hi. Kumpipa i sal suak khawng saw ni ung, ka ngam uh hempoh vang amata hi khawng tahen. An ngawlin ka thih khawng tuk uh sangin le ka ngam uhte ngamkhingin, a suah khawng tuk sangin an le anci hu pia zalin,” tin ngen haw hi.
20Josef in, Izipt ngamsung a, leingam hempoh cu kumpipa ca tukin lei khawng hi. Paam cu a nasezet hangin Izipt mi hempoh ten a lo ngam haw zuak khawng haw hi. Izipt ngam hempoh cu kumpipa tain suak khawng hi. 21Izipt ngam langlam mawk pen a langkhat mawk tian a ummi mihing hempoh cu nadektu salin mang khawng hi. 22Josef i lei ngawlmi lei ngam cu thiampi tei leingam bek toh hi. Thiampi cu a leingam haw zuak kulma hi, itahim titale kumpipa in, a pumcawmnak haw tukin pia hi. 23Josef in Izipt mitei lakah, “Atu-in nangmuh le na leingam uhte cu kumpipa ca tukin lei khawng zo ing, tih cu mu uh ci. Hi laiah hin nangmuta tuk anci um hi, na lo uhah cing un. 24An cop hun ten na neih uhmi an i khen nga khenkhat cu kumpipa na pia un hi. A tangmi hempoh cu nangmuta tuk hi, na lo uh a, na cintuk uhmi anci le nangmuh le na innkua uhte le na ca tei pumcawmnak tuk hi,” tin ti hi.
25Amuh ten, “Ka nunnak uh pan ngah zo ci, bawipa, ka hum uhah pha lawlawm cei, kohte cu kumpipa i sal hi tuk poh ung,” tin ti haw hi. 26Mah hangin an a neih haw mi khen nga khenkhat cu kumpipa pia tukin Izipt ngam sungah Josef in daan bawl hi. Mah daan cu tutian umleng laih hi.
Jakob i Thucah Nungdawlbel
27Israel mite cu Izipt ngam Goshen ah um haw in, mahlaiah khangto pepel haw a, canau tampi nei haw hi. 28Jakob cu Izipt ngamah kum sawm le kum salih umin, ama kum cu za le sawm li le kum salih hi. 29Jakob cu a thih hun nai toh hangin a capa Josef samin, “Na lung a kim tale ka lakah thutepnak bawl zalin hi. Na khut cu ka kal laklawhah koih inna, ka humah thungai zetin, muantak na hihnak tukin le Izipt ngam sungah na vui ngawlnak tukin Topa i minin thu tiamin hi.#Pian 49:29-32; 50:6; 30Ka thih ten Izipt ngam pen hawhpih inna, ka pu le ka pa bangin a khan hawah vui in,” tin ti hi.
Josef in, “Na hilh bangin bawl tung,” ti hi.
31Jakob in, “Bawl tatak tung hi tin thu tiamin hi,” tin ti in, Josef in tiam hi. Jakob in, a zaunak lulamah lu kunin lungdam thu hilh hi.
Currently Selected:
PIANPATNAK 47: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
