PIANPATNAK 49
49
Jakob Thucah Dawltabel
1Jakob in, a capate samin, “Munkhatah umlangkhat unna, mailam ten na hum uhah a piang tuk mite hilh hawl tung,” ti hi.
2“Jakob i capate hung unna,
ngai un.
Na pa uh Israel thuhilhmi ngai un.
3“Reuben, ka catawntil,
nang cu ka zaangtha hi ci.
Ka piting sawng ten
ka neih masabel ca hi ci.
Ka capa tei lak pen
a ngilbel le
a uangthuang theibel;
4Nang cu tuilun bang hi ci a,
mi thupibel hi awng tukma ci.
Itahim titale, na pa i zineu loli
sualpih ci.
Na pa i zaunak humah kai in,
nawngkaitik ci.
5Simeon le Levi cu
unau hi haw in,
a hiamnam haw cu mitei thisan,
luannakin mang haw;
6Thukuh a son hawnakah
tel kha tuk mang.
A thu vaihawmnakah
sialcih hi kha tuk mang.
Itahim titale a nuam haw poh ten
mi that thawthong haw hi.
Nopnak thong tukin
khui zakon satcat
thong thei haw hi.
7A thinuknak haw humah
siatcamnak um hen.
Itahim titale a thinuknak haw
luai leita hi.
A thin pulhangnak haw humah
hei in siatcamnak um hen,
Itahim titale sesuak leita haw hi.
Jakob ngam sungah
lengkektik khawng tung.
Israel tei lakah
lengkektik khawng tung.
8“Judah, nang cu na unau ten
thangphat haw tuk hi.
Na ngalte cu a ngawng haw pen
len tuk ci a,
na maiah na unaute
kun haw tuk hi.
9Judah cu pawpino bangkek hi in,
Sa a mat ceng ten
a ngelhnakah kiklehin,
Judah cu kiosa bang hi;
dokdun zuazuahin bok kikleh hi.
A kuamah in
phong ngam haw ma.#Mipum 24:9; Mang 5:5;
10A kumpi ngolh cawi in,
a casuante cu
uktu hi leleng haw tuk hi.
Miphun tampi ten
siah pia haw tuk a,
upatnakin, a maiah
kun haw tuk hi.
11A laakno haw cu sabit ngui
phabelah khih haw hi.
A van haw cu thi bangin
a sanmi sabittui tuah
sawp haw hi.
12Sabittui a in hangin
a mit cu thi bangin
san nge ngu hi.
Khuinawi a in hangin
a ha cu vuk bangin ngo hi.
13“Zebulun cu tuipi mawkah
um tuk hi,
A tuimawk cu tinbaw
colhnak hi tuk hi;
A ngam cu Sidon tian
zal tuk hi.
14“Issakhar cu a ngilzetmi laak hi,
A puakmi vanngit tom nih
laklawhah bok hi;
15A colhnak mun a pha daan le,
a ngam a nop daan
amuh hangin vanngit pua tukin
a ngum cu dawhin,
nadeh khung dektu salin suak hi.
16“Dan cu a minamte uktu
hi tuk hi,
Israel hinnam bang leleng
hi tuk hi.
17Dan cu lampi mawk a,
ngul bang hi tuk hi,
Lam mawk a, ngu nei
ngul bang hi.
Cipuh kecawk cikin,
cipuh khungtu cu
nunglamah vawk hi.
18“Topa, nangma
patnak ngak ing.
19“Gad cu nguca ten
sim haw tuk hi;
Mahnaven do in
hawlvawk tuk hi.
20“Asher i lo pen
an pha suak tuk hi,
Kumpi i ei takmi an hi tuk hi.
21“Naftali cu ata limi sazukpi,
cano mawizet neitu bang hi.
22“Josef cu hampa lak le
ciktui el ata mi laak bang,
Mualhum a laakno bang hi.
23Hehpihnak nei ngawlin
a ngal ten hual haw,
a thalcang haw le
a thal haw tuah hil haw hi.
24Mahnaven Jakob i Pathian,
Ihempoh tithei i ngilnak le,
Israel i Suangpi,
Israel Humhimtu thawmin,
A thal cu ek thei ma hi.
A baantha cu ngilzet hi.
25Na pa i Pathian, nangmah
a bawmtu le, muicu a piatu
Ihempoh tithei Pathian in,
Van pen muicu cu nguah bangin,
Leinuai pen vangin tui bangin,
Tu le ca, ngulh le khawihnak
pen ngan vang
na humah muicu pia hi.
26Cangngui cual le
an seu kimno in,
anci cin le lobun muicu
Ka pu le pa tei muicu le,
Kumkhua a kho mi mualhum a,
a deih awh na cu,
A unau lak pen mi
cuangcung tukin bawlmi,
Josef i lu humah
heng khawng zal hen.
27“Benjamin cu
a hangsan zetmi
cingne bang hi;
A matsa cu zinglamin ei hi,
taklamin, a ngahmi sa cu
khen khawng,” ti hi.
28Hite hi Israel hinnam sawm le pa nih hi haw in, a lak hawah a pa i thucah mite hi. Pa khat nung pa khat amuh tuah a khawthu mi muicu pia tek hi.
Jakob Thihnak le Vuinak
29Jakob in, a capa tei lakah, “Ka pu le ka pa i lakah hawh tuk toh ing. Kanaan ngam Mamre pen nisuahnak lam Makpelah ah, 30Hit mipa Efron lak pen ngam le suangkua cu khan tukin Abraham i lei mi um hi. Mahlaiah na vui un hi.#Pian 23:3-20; 31Mahlaiah Abraham le a zi Sarah vui haw hi. Isaak le a zi Rebekah vang mahlai lelengah vui haw. Kei vangin ka zi Leah mahlai munah vui zo toh ing.#Pian 25:9-10; 35:29; 32Mah ngam le a sung a, ummi suangkua cu Hit mi pa i lak pen lei mi hi,” tin ti hi. 33A capa tei lak a, thucah a celh bek ten Jakob cu a zaunak humah a ke tomin, a haihawh bo in, a pu le pa tei lakah hawhta hi.#Nung 7:15;
Currently Selected:
PIANPATNAK 49: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
