ᓗᒃ 11
11
ᒋᓴᔅ ᑲ ᒋᔅᑯᑎᒪᒐᑦ ᑕᓐ ᒐ ᐃᓯ ᐊᔭᒥᐊᓄᐎᒡ
ᒪᑎᔪᐤ 6.9-13; 7.7-11
Luke 11.1-13 (Proper-12 Year C)
1ᐸᐃᒂᐤ ᐃᔅᐱ ᒋᓴᔅ ᑲᒋ ᐃᓯ ᐊᔭᒥᐊᑦ, ᐸᐃᒄ ᐊᓂᔭ ᐅᒋᔅᒋᓄᐊᒧᐛᑭᓇ ᒋ ᐃᑎᑯᐤ, “ᐅᑎᐸᔨᒋᒐᐤ, ᐸᒋ ᒋᔅᑯᑎᒧᐅᓇᓐ ᒪ ᑭᔭ ᓂᔭᓐ ᑕᓐ ᒐ ᐃᓯ ᐊᔭᒥᐊᔭᒡ ᒧᔭᒻ ᒠᓐ ᑲ ᐃᑐᑐᐛᑦ ᐅᒋᔅᒋᓄᐊᒧᐛᑭᓇ᙮”
2ᒋᓴᔅ ᒋ ᐃᑕᐤ, “ᒪᐅ ᒐ ᐃᓯ ᐊᔭᒥᐊᔭᒄ,
‘ᓄᑕᐎᓇᓐ, ᒋᒋᒋᓯᑯᒡ ᐊ ᑕᔨᓐ, ᓂᑦ ᐊᔭᒥᐊᓇᓐ ᒋᑦ ᐃᓯᓂᐧᑲᓱᐅᓐ ᐊ ᐸᔭᒋᓯᒥᑲᒡ ᒐᒋ ᒋᔅᑕᔨᑕᑯᑕᑭᓄᐅᒡ᙮
ᒋᒋᓴᐅᒋᒪᐅᓐ ᒋᑭ ᐎ ᐅᑎᒋᐱᔪᐤ᙮ ᒋᑦ ᐃᑕᔨᑎᒧᐅᓐ ᒋᑭ ᐎ ᐃᑐᑕᑭᓄᐤ ᐅᑕ ᐊᔅᒋᒡ, ᒧᔭᒻ ᒋᒋᒋᓯᑯᒡ᙮
3ᒥᔨᓇᓐ ᑕᑥᐤ ᐊ ᒋᓯᑲᒡ ᐸᒂᓯᑭᓐ ᒐ ᐅᒋ ᐱᒪᑎᓯᔭᒡ᙮
4ᐛᐸᔨᑎᒧᐅᓇᓐ ᓂᒥᒋᑥᐅᓇᓇ, ᐛᔅ ᑭᔭ ᓂᔭᓐ ᓂ ᐛᐸᔨᑎᒧᐅᓇᓐ ᒥᓯᐛ ᐊᐛᓐ ᑲ ᒥᒋᑐᑐᔨᒥᑦ᙮
ᐊᑲᐎᔾ ᒪᒃ ᐃᑐᑕᐃᓇᓐ ᐊᓐᑕ ᒐᒋ ᐃᓯ ᑯᒂᒋᐃᑯᐅᔭᒡ, ᒥᒄ ᐸᒋ ᒥᑕᒂᓇᒧᐅᓇᓐ ᐊᓐ ᑲ ᒪᔭᑎᒡ᙮’ ”
5ᐊᑯ ᒋᓴᔅ ᒂ ᐃᑕᑦ ᐊᓂᔭ ᐅᒋᔅᒋᓄᐊᒧᐛᑭᓐ, “ᐊᒋ ᓂᑐᐛᐱᒥᑦ ᐊᓐ ᒋᐎᒐᐛᑭᓐ ᐊ ᐊᐱᑕᑎᐱᔅᑲᔨᒡ ᐊᒋ ᓂᑐ ᐅᐛᐊᓱᐅᑦ ᒐᒂᔪᐤ, ᑭᔭ ᒂ ᐃᑕᑦ ᐊᓐ ᒋᐎᒐᐛᑭᓐ, ‘ᐸᒋ ᐅᐎ ᒪ ᓂᔅᑐ ᐸᒂᓯᑭᓐᒡ ᐛᔅ ᓂᐎᒐᐛᑭᓐ ᓂ ᐸᒋ ᐅᑎᑎᒄ 6ᐊᑯᑕ ᐊ ᑕᐅᒡ ᒐ ᓂᐸᑦ᙮ ᓇᒪ ᓂ ᑭᓄᐛᔨᑎᒺᓐ ᒐᒂᔪᐤ ᒐ ᐊᓯᒥᒃ᙮’ ”
7“ᐊᑯ ᒪᒃ ᐃᑎᔅᒃ ᒋᔾ ᐊᓐ ᒋᐎᒐᐛᑭᓐ ᑲ ᓂᑐᐛᐱᒥᔅᒃ, ‘ᐊᑲᐎᔾ ᐸᒋ ᒥᑯᔅᑲᒋᐃ ᐛᔅ ᓴᔅ ᓂᒋ ᒋᐸᐛᐤ ᔅᑐᐧᑭᓐ ᑭᔭ ᓂᑦ ᐊᐛᓯᒥᒡ ᓂᐎᐸᒥᑯᒡ, ᓇᒪ ᓂᑭ ᒋ ᐅᓂᓐ ᒐᒋ ᒥᔨᑕᓐ᙮’ 8ᒋ ᐎᑎᒪᑎᓇᐛᐤ, ᐊᑲ ᐎ ᐅᓂᒐ ᒐᒋ ᒥᔨᔅᒃ ᐊᓂᔭ ᐸᒂᓯᑭᓇ ᐊᑎ ᐊᒋ ᒥᔪ ᐎᒐᐛᑭᓂᑕᔅᒃ ᐃᔭᐱᒡ ᒪᒃ ᒐᒃ ᒋᑭ ᐅᓂᐤ ᒐᒋ ᒥᔨᔅᒃ ᑕᓐ ᐊ ᐃᓯ ᓂᑐᐛᔨᑎᒧᑦ, ᐊᑲ ᐳᓂᐃᑕ ᐊ ᓂᑐᐛᔨᑎᒧᑦ᙮”
9“ᐛᔅ ᒋᑦ ᐃᑎᓇᐛᐤ, ᓂᑐᑎᒪᒄ ᑕᓐ ᐊ ᐃᓯ ᓂᑐᐛᔨᑎᒪᒄ, ᒋᑭ ᒥᔨᑯᓇᐛᐤ ᒪᒃ, ᓇᓂᑐᐛᔨᒻ ᒋᓴᒪᓂᑐᐤ ᑭᔭ ᒐ ᒥᔅᑭᐎᑦ᙮ ᑎᑥᐛᐃᒐ ᔅᑐᐧᑭᓐ ᑭᔭ ᒐ ᔪᑕᓂᒪᑯᔨᓐ᙮ 10ᐛᔅ ᑕᑐᐤ ᐊᐛᓐ ᑲ ᓂᑐᑎᒪᑦ ᒋᑭ ᒥᔭᑭᓄᐤ᙮ ᑭᔭ ᑕᑐᐤ ᐊᐛᓐ ᑲ ᓇᓂᑐᐛᔨᒪᑦ ᒋᓴᒪᓂᑐᐛ ᒋᑭ ᒥᔅᑯᐛᐤ, ᑭᔭ ᑕᑐᐤ ᐊᐛᓐ ᑲ ᑎᑥᐛᐃᒐᑦ ᒋᑭ ᔪᑕᓂᒧᐛᑭᓄᐤ᙮”
11“ᒋᔨᐛᐤ ᐅᑕᐎᒪᐅᒡ, ᓂᑐᐛᔨᑎᒪᔅᒃ ᐊᓐ ᒋᑯᔅ ᓂᒪᓴ ᒋᐸ ᒋ ᐃᑎᓐ ᐊ ᒐᒋ ᒥᔨᑦ ᒋᓇᐱᒂ ? 12ᒪᒃ ᓂᑐᐛᔨᑎᒪᔅᒃ ᐛᐎᔪᐤ, ᒋᐸ ᒋ ᐃᑎᓐ ᐊ ᒐᒋ ᒥᔨᑦ ᒥᓐᑐᓴ ᐊ ᐱᒋᔅᑲᐛᔨᒋ ? 13ᐊᑎ ᐊ ᒥᒐᑎᓯᔭᒄ ᐃᔭᐱᒡ ᒋ ᒋᔅᒐᔨᑕᓇᐛᐤ ᒐᒋ ᒥᔪ ᒥᔭᑯᒡ ᒋᑦ ᐊᐛᓯᒧᐛᐅᒡ᙮ ᐊᑐᐎᔅ ᒪᒃ ᒍᑕᐎᐛᐤ ᒋᒋᒋᓯᑯᒡ ᐊ ᑕᑦ ᒋᔅᒐᔨᑎᒻ ᒐᒋ ᒥᔪ ᒥᔨᐛᑦ᙮ ᒥᔽᔨᑎᒻ ᐊ ᒥᔭᑦ ᐊᐛᔪᐛ ᑲ ᐸᔭᒋᓯᔨᒋ ᐊᒐᒂ ᐊᓂᔭ ᑲ ᓂᑐᑎᒪᑯᑦ᙮”
ᑕᓐᑕ ᑲ ᐅᑎᓇᐧᒃ ᒋᓴᔅ ᐅᒥᔅᑯᓯᐅᓐ
ᒪᑎᔪᐤ 12.22-30; ᒪᕐᒃ 3.20-27
14ᒋ ᑕᐤ ᓇᐸᐤ ᓇᔅᒡ ᐊᒋ ᐃᑐᑕᑯᑦ ᒥᒋ ᐊᒐᐧᒄ ᒐ ᐊᑲ ᒋ ᑭᔅᒋᐅᑦ ᐊ ᐃᔨᒥᑦ᙮ ᐃᔅᐱ ᒪᒃ ᒋᓴᔅ ᑲ ᐎᐎᑎᓴᐛᑦ ᐊᓂᔭ ᒥᒋ ᐊᒐᒂ, ᐊᑯ ᒂ ᐅᒋ ᓂᑕᐛᑦ ᐊᓐ ᓇᐸᐤ᙮ ᐊᑯ ᐊᓐᒡ ᐃᔪᒡ ᓇᔅᒡ ᑕᑈ ᒋ ᒪᒥᔅᑲᑕᔨᑎᒥᐃᑯᐅᒡ ᐅᔭᔪᐤ᙮ 15ᐊᑯ ᐱᔅᒐ ᒋ ᐃᑕᐅᒡ, “ᐊᓂᔭ ᒥᒋ ᐊᒐᐧᒄ ᐅᒋᒪᐛ ᐸᐃᓪᓯᐳᓪ ᐊᐅᑯᓐ ᐊᓂᔭ ᑲ ᒥᔨᑯᑦ ᒥᑕᐅᓂᔪᐤ ᒐᒋ ᐎᐎᑎᓴᐛᑦ ᒥᒋ ᐊᒐᒂ᙮”
16ᑯᑎᑭᒡ ᒪᒃ ᒋ ᐎ ᑯᒂᒋᐊᐅᒡ ᒋᓴᓴ ᐊ ᐎ ᓇᓂᑐ ᒋᔅᒐᔨᑎᒺᒡ ᑕᓐᑕ ᐛᒋᐱᔨᒡ ᐊᓂᔭ ᐅᒥᔅᑯᓯᐅᓂᔪᐤ᙮ ᐊᑯ ᒂ ᐃᑕᒡ ᒐᒋ ᐛᐸᑎᔨᑯᒡ ᒪᒥᔅᑲᒡ ᐛᐸᑎᔨᐛᐅᓂᔪᐤ ᒋᓴᒪᓂᑐᐛ ᐊ ᑕᔨᒋ ᐊ ᐅᒋᐱᔨᒡ᙮
17ᒋᓴᔅ ᒪᒃ ᒋ ᒋᔅᒐᔨᒪᐤ ᑕᓐ ᐊ ᐃᓯ ᒪᒥᑐᓇᔨᑎᒥᔨᒋ, ᐊᑯ ᒂ ᐃᑕᑦ, “ᒪᓯᐃᑐᑥᐛ ᐊᐛᓐᒋ ᐊᓐᑕ ᐊ ᒥᓴᒡ ᐊᔅᒋᒡ ᑲ ᑕᒡ ᒋᑭ ᓂᓱᐅᓇᒋᐃᑐᐅᒡ᙮ ᒧᔭᒻ ᑕᓐ ᐊ ᐃᓯᓇᒂᒡ ᐸᐃᒄ ᐅᑕᓇᐤ ᐊᐛᓐᒋ ᐊ ᒥᒋᐱᔨᒡ ᓇᒪ ᒋᑭ ᐅᒋ ᒋᐧᑲᐛᒋᐱᔪᒡ ᑭᔭ ᒋᑭ ᒋ ᓂᓱᐅᓇᒋᐃᑐᐅᒡ᙮ 18ᐊᓐᒡ ᒪᒃ ᑲ ᓇᓴᐛᒡ ᒥᒋᒥᓂᑐᐛ, ᒪᓯᐧᑲᑐᑥᐛ ᒪᒃ, ᒥᒋᒥᓂᑐᐤ ᐅᒋᓴᐅᒋᒪᐅᓐ ᒋᑭ ᓂᓱᐅᓇᒋᑕᑭᓄᐅᔪᐤ᙮ ᐊᐅᒄ ᒪᒃ ᒋᐸ ᐃᔅᐱᔪᐤ ᑕᑈ ᐸᐃᓪᓯᐳᓪ ᐸᒋ ᒥᔨᑦ ᒥᑕᐅᓂᔪᐤ ᒐᒋ ᐊᐱᒋᑕᐅᒡ ᒐᒋ ᐎᐎᑎᓴᐅᒂᐤ ᒥᒋ ᐊᒐᐧᑯᒡ᙮ 19ᑕᑈ ᐸᐃᓪᓯᐳᓪ ᐅᒥᑕᐅᓐ ᐊᐱᒋᑕᐛᐅᒐ ᐊ ᐎᐎᑎᓴᐅᒂᐤ ᒥᒋ ᐊᒐᐧᑯᒡ, ᑭᔭ ᒋᑦ ᐃᔨᒧᐛᐅᒡ ᐊ ᐎᐎᑎᓴᐛᒡ ᒥᒋ ᐊᒐᒂ, ᐊᐛᔪᐛ ᒪᒃ ᑲ ᐎᒋᐃᑯᒡ ᐎᔨᐛᐤ ᐅᔭ ᒐᒋ ᐃᑎᒡ᙮ ᒋᑭ ᒋ ᐎᑎᒪᑯᐛᐅᒡ ᑕᑈ ᐊ ᑭᑭᒋᔭᔭᒄ ᐊᓐ ᐊ ᐃᔅᒋᔄᔭᒄ ᒥᒋᒥᓂᑐᐤ ᐊ ᐎᒋᐊᑦ ᐊᐛᔪᐛ ᒐᒋ ᐎᐎᑎᓴᐛᔨᒋ ᒥᒋ ᐊᒐᒂ᙮ 20ᐛᔅ ᓇᒪᔭᐤ ᐊᓐ ᑲ ᓂᑲᓂᔅᑯᐛᑦ ᒥᒋ ᐊᒐᒂ ᒪᔨᑦ ᒐᒋ ᐎᐎᑎᓴᐅᒂᐤ ᒥᒋ ᐊᒐᐧᑯᒡ᙮ ᒋᓴᒪᓂᑐᐤ ᐊᐅᒄ ᑲ ᐸᒋ ᒥᔨᑦ ᑭᔅᒋᐅᓂᔪᐤ ᒐᒋ ᐎᐎᑎᓴᐅᒥᒋ ᒥᒋ ᐊᒐᒂ᙮ ᐊᑯᑕ ᒪᒃ ᐛᒋ ᐛᐸᑎᔨᑯᔭᒄ ᑕᑈ ᒋᓴᒪᓂᑐᐤ ᐅᒋᓴᐅᒋᒪᐅᓐ ᓴᔅ ᓇᔅᒡ ᐊ ᐅᑎᑕᐅᑯᐛᒄ᙮”
21“ᐊ ᓱᒋᓯᑦ ᓇᐸᐤ ᒥᓯᐛ ᐃᓯ ᐊᔭᔅᑯᔅᑕᔪᐛ ᐅᓂᑐᐱᔪᐅ-ᐊᐱᒋᑕᐅᓇ ᐊ ᓂᓇᑭᑐᐛᔨᑕᐧᒃ ᐎᒡ ᑭᔭ ᒥᓯᐛ ᐊ ᐃᓯ ᑎᐱᔨᐛᐅᓯᑦ, ᓇᒪ ᐊᐛᔪᐛ ᒋᑭ ᒋ ᐱᔅᒐᔨᑎᒥᔪᐛ ᐊᓂᔭᔪᐛ ᐅᑦ ᐊᐱᒋᑕᐅᓇ᙮ 22ᐅᑎᑎᑯᑦ ᒪᒃ ᐊᐛᔪᐛ ᐅᔅᑕ ᐊ ᓱᒋᓯᔨᒋ ᐃᔅᐱᔅ ᐎᔾ ᒋᑭ ᒋ ᓴᐧᑯᒋᐃᑯᐤ᙮ ᐊᑯ ᒪᒃ ᒥᓯᐛ ᒐ ᐅᑎᓂᒥᔨᒋ ᐊᓂᔭᔪᐛ ᐅᓂᑐᐱᔪᐅ-ᐊᐱᒋᑕᐅᓇ ᐊᓂᔭ ᑲ ᐎ ᐃᓯ ᒪᒥᓯᑐᑕᐧᒃ ᒐᒋ ᐅᒋ ᑭᓄᐛᔨᒥᑎᓱᑦ᙮ ᐊᑯ ᒪᒃ ᒥᓯᐛ ᐊᓂᔭ ᑕᓐ ᑲ ᐃᓯ ᐊᔭᑦ, ᒥᓯᐛ ᒋᑭ ᐃᓯ ᒪᑎᓄᐛᐱᔨᑕᔪᐛ᙮”
23ᒋᓴᔅ ᒥᓐ ᒋ ᐃᔅᒋᔄᐤ, “ᐊᓐ ᐊᐛᓐ ᐊᑲ ᐸᒋ ᐎᒋᐃᑦ, ᓂ ᓂᔅᑯᔅᑕᒄ᙮ ᐊᐛᓐ ᐊᑲ ᐎᒋᐃᑦ ᐊ ᒪᒧᓴᒋᓂᒐᐅᒡ ᐃᒐᑎᓴᐃᒐᐤ ᐃᓯᓇᑯᓱᐤ᙮”
ᑲ ᐸᒋ ᒋᐛᑦ ᒥᒋ ᐊᒐᐧᒄ
ᒪᑎᔪᐤ 12.43-45
24ᐊᑯ ᒋᓴᔅ ᒥᓐ ᒂ ᐃᔅᒋᔄᑦ, “ᐃᔅᐱ ᐊᒋ ᐎᐎᑦ ᒥᒋ ᐊᒐᐧᒄ ᐱᒡ ᐊᐛᔪᐛ ᐊ ᑕᔨᒋ ᐅᒋ ᐊᓐᑕ ᐊ ᐸᒂᔨᒡ ᐱᐸᑕᐤ ᐊ ᓇᓂᑐᐛᐸᑕᐧᒃ ᑕᓐᑕ ᒐᒋ ᐊᔅᑕᔭᔅᑯᓯᑦ᙮ ᐊᑲ ᒪᒃ ᒪᔅᑲᐧᒃ ᐊᑯ ᐊ ᐃᑎᓱᑦ, ‘ᓂᑭ ᒋᐛ ᓇᓂᑐᐛᐱᒪᐤ ᐊᓐ ᓇᐸᐤ ᑲ ᓂᑭᑎᒃ᙮ ᐊᓂᔭ ᒪᒃ ᓇᐸᐛ ᒧᔭᒻ ᒥᒋᐛᑉ ᐊᐅᒄ ᐊ ᐃᓯᓇᑯᓯᔨᒋ᙮’ 25ᑭᑈ ᑲᐤ ᐊ ᐃᓯ ᒋᐛᑦ ᐊᓐ ᒥᒋ ᐊᒐᐧᒄ ᐊ ᓇᓂᑐᐛᔨᑕᐧᒃ ᐊᓐᑕ ᑲ ᐅᒋ ᐎᐎᑦ ᒥᒋᐛᐱᔪᐤ᙮ ᐃᔅᐱ ᒪᒃ ᐸᒐᑦ ᐊᑯ ᒪᔅᑲᐧᒃ ᓇᔅᒡ ᐊ ᐸᔭᒋᓇᑯᓂᔨᒡ ᑭᔭ ᓇᔅᒡ ᐊ ᒥᔪᓇᑯᓂᔨᒡ᙮ 26ᐅᔭ ᒪᒃ ᐎᔭᐸᑕᐧᒃ ᐊ ᐃᓯᓇᑯᓂᔨᒡ ᐊᑯ ᒐ ᔅᑐᑕᑦ, ᓂᔭᓂᑐᐛᔨᒪᑦ ᓂᔄᐅᑕᒡ ᒥᒋ ᐊᒐᒂ ᐅᔅᑕ ᐊ ᐃᑕᔨᑕᑯᓯᔨᒋ ᐊ ᐃᑕᔨᑕᑯᓯᑦ ᐎᔾ ᒐᒋ ᐎᒋᒥᑯᑦ ᐊᓐᑕ ᐊᓂᔭ ᓇᐸᐛ ᐱᒡ ᐊ ᑕᔨᒋ᙮ ᐊᑯ ᒪᒃ ᐊᓐ ᓇᐸᐤ ᐊᑐᐎᔅ ᒋᑭ ᐃᑕᔨᑕᑯᐃᑯᐤ ᐊᓂᔭ ᓂᔄᐅᑕᒡ ᒥᒋ ᐊᒐᒂ ᑕᓐ ᑲ ᐃᑕᔨᑕᑯᐃᑯᑦ ᓂᔅᑎᒻ, ᒥᒄ ᐊᒋ ᐸᐃᑯᓯᔨᒋ᙮”
ᐃᔎᐤ ᑲ ᐊᔨᒧᒪᑦ ᒋᓴᓴ ᐅᑲᐎᔪᐛ
27ᒪᒂᒡ ᐅᔭ ᐊ ᐃᔨᒥᑦ ᒋᓴᔅ, ᐃᔎᐤ ᐊᓐᑕ ᐊ ᑕᑦ ᐊᓂᔭ ᐊ ᒥᒐᑎᓇᓄᐎᒡ ᒋ ᐅᒋ ᑕᑈᐤ ᐊ ᐃᔅᒋᔄᑦ, “ᑕᑈ ᓱᐛᔨᑕᑯᓱᐤ ᐊᓐ ᐃᔎᐤ ᐊᓐᑕ ᐊ ᑕᑦ ᑲ ᐅᒋ ᓂᑕᐅᒋᔨᓐ ᑭᔭ ᑲ ᓄᓴᓂᐃᔅᒃ᙮”
28ᐊᑯ ᒋᓴᔅ ᒂ ᐃᑕᑦ, “ᓂᐦᐃ, ᑕᑈ, ᒥᒄ ᒪᒃ ᐅᔅᑕ ᓱᐛᔨᑕᑯᓱᐅᒡ ᐊᓐᒡ ᑲ ᐸᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᔪᐤ ᑭᔭ ᑲ ᓂᓇᐃᑎᒧᐛᒡ᙮”
ᐃᔪᒡ ᑲ ᓂᑐᐛᔨᑕᒡ ᒧᔅ ᒐᒋ ᐛᐸᑎᔭᑭᓄᐎᒡ ᒪᒥᔅᑲᒡ ᒐᒂᔪᐛ
ᒪᑎᔪᐤ 12.38-42
29ᐊᑯ ᒪᒃ ᐊᑐᐎᔅ ᒥᒐᑦ ᐊᐛᔪᐛ ᑲ ᐸᒋ ᓂᑐᑕᑯᑦ ᒋᓴᔅ᙮ ᒂ ᐃᑕᑦ, “ᐊᓄᒡ ᐃᔪᒡ ᑲ ᐱᒪᑎᓯᒡ ᓇᔅᒡ ᑕᑈ ᒥᒐᑎᓯᐅᒡ᙮ ᑯᒂᒋᒐᒧᐅᒡ ᒐᒋ ᐛᐸᑎᔭᑭᓄᐎᒡ ᒪᒥᔅᑲᒡ ᐛᐸᑎᔨᐛᐅᓂᔪᐤ᙮ ᓇᒪ ᒪᒃ ᒋᑭ ᐅᒋ ᐛᐸᑎᔭᑭᓄᐎᒡ᙮ ᒥᒄ ᐊᓂᔭᔪᐛ ᑕᓐ ᑲ ᐃᓯ ᒪᒥᔅᑲᒡ ᐃᔅᐱᔨᒋ ᐊᓂᔭ ᐅᒋᔅᒋᐛᐃᒐᓱᐛ ᒍᓇᔨᒋ ᐊᐅᒄ ᒥᒄ ᐊᓂᔭ ᒐ ᐛᐸᑎᔭᑭᓄᐎᒡ᙮ 30ᒍᓇ ᒋ ᐃᑎᓴᐅᑯᐤ ᒋᓴᒪᓂᑐᐛ ᐊᓐᑕ ᓂᓇᐸ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᒐᒋ ᐃᔭᒂᒥᒪᑦ ᐊᓂᔭᔪᐛ ᐃᔪᐛ ᐊᓐᑕ ᑲ ᑕᔨᒋ ᒐᒋ ᒂᔅᑲᑎᓯᔨᒋ᙮ ᐊᐅᑯᓐ ᒪᒃ ᒧᔭᒻ ᑭᔭ ᐃᔪᐤ ᐅᑯᓯᓴᓐ ᐛᒋ ᐃᑎᓴᐛᑭᓄᐅᑦ ᐊᓐᑕ ᐊᓄᒡ ᑲ ᐱᒪᑎᓯᔨᒋ ᐃᔪᐛ ᐊ ᑕᔨᒋ᙮ 31ᐃᔅᐱ ᒪᒃ ᑎᐸᔅᑯᓂᒐᐅ ᒋᓯᒄ ᐅᑎᒋᐱᔨᒐ, ᐊᓂᔭ ᒋᓴᐅᒋᒪᔎᐤ ᓴᐅᓄᑕᒡ ᑲ ᑎᐸᔨᒋᒐᑦ ᒋᑭ ᐅᒋ ᐱᓯᑯᐤ ᒐ ᓂᓱᐅᓇᒋᒪᑦ ᐊᓂᔭ ᐃᔪᐛ ᐊᓄᒡ ᑲ ᐱᒪᑎᓯᔨᒋ᙮ ᐛᔅ ᐎᔾ ᓇᔅᒡ ᑕᑈ ᐛᔪᐤ ᒋ ᐅᑐᑕᐤ ᒥᒄ ᒐᒋ ᓂᑐᑎᒺᑦ ᐊᓂᔭ ᒋᓴᐅᒋᒪᐛ ᓴᓚᒥᓇ ᐅᑭᒐᑕᐛᔨᑎᒧᐅᓂᔪᐤ᙮ ᑕᐤ ᒪᒃ ᐅᑕ ᐊᐛᓐ ᐅᔅᑕ ᐊ ᐃᑕᔨᑕᑯᓯᑦ ᐃᔅᐱᔅ ᓴᓚᒥᓇ, ᓇᒪ ᒪᒃ ᐊᐱᓯᑐᐛᑭᓄᐤ᙮
32ᐃᔅᐱ ᒪᒃ ᑎᐸᔅᑯᓂᒐᐅ ᒋᓯᑲᒐ, ᐊᓂᔭᐧᑲ ᐃᔪᒡ ᐊᓐᑕ ᓂᓇᐸᒡ ᑲᒋ ᑕᒡ ᒋᑭ ᐅᐱᑲᐳᐅᒡ ᒐ ᐃᔅᒋᔄᒡ ᒐᒋ ᐛᐛᓯᐃᑯᐛᒄ ᒋᔨᐛᐤ ᐊᓄᒡ ᑲ ᐱᒪᑎᓯᔭᒄ᙮ ᐛᔅ ᐊᑯᑕ ᑲ ᐅᒋ ᒂᔅᑲᑎᓯᒡ ᐃᔅᐱᔅ ᑲ ᐸᑐᐛᒡ ᒍᓇᔨᒋ ᐊ ᑭᒐᔅᒋᒧᔨᒋ᙮ ᑕᐤ ᒪᒃ ᐊᐛᓐ ᐅᑕ ᐅᔅᑕ ᐊ ᐃᑕᔨᑕᑯᓯᑦ ᐃᔅᐱᔅ ᒍᓇᔨᒋ᙮”
ᐛᔅᑕᓂᐱᒪᑭᓐ
ᒪᑎᔪᐤ 5.15; 6.22,23
33“ᓇᒪ ᐊᐛᓐ ᓯᔅᑲᐊᒻ ᐛᔅᑕᓂᐱᒪᑭᓂᔪᐤ ᑭᔭ ᒐᒋ ᑲᑕᑦ, ᒪᒃ ᓂᑎᒥᒄ ᒐᒋ ᐊᑯᓇᐊᐧᒃ᙮ ᐊᔅᑕᐤ ᐊᓐᑕ ᒥᓯᐛ ᐊᐛᓐ ᐊ ᐸᒋ ᐱᒐᑦ ᒐᒋ ᐛᐸᑕᐧᒃ ᐊ ᐛᔅᑕᔨᒡ᙮ 34ᒋᔅᒋᓯᒂ ᐊᔪᐅᒄ ᐅᔭ ᐅᐛᔅᑕᓂᐱᒪᑭᓇ ᒋᔪᐤ᙮ ᐊ ᒥᔽᒡ ᒋᔅᒋᓯᒄ ᓇᔅᒡ ᐛᔅᑕᐤ ᒋᔭᒡ ᒥᒄ ᒪᒃ ᐊᑲ ᒥᔽᒐ ᒋᔅᒋᓯᒄ ᓇᔅᒡ ᑕᑈ ᐅᑲᔅᑕᔭᐤ ᒋᔭᒡ᙮ 35ᐃᔭᒂᒥ ᒐ ᐊᑲ ᒋ ᑎᒂᒡ ᒋᐱᒪᑎᓯᐅᓂᒡ ᐅᓂᑎᐱᔅᒋᓯᐅᓐ, ᐊᓐᑕ ᒋᐸ ᑎᒂᓐ ᐛᔅᑕᐅᓐ᙮ 36ᐊᐛᓐ ᒪᒃ ᓇᔅᒡ ᐎᔭᔅᑐᐛᒂ ᐊᑲ ᓇᔅᒡ ᐃᔭᒂ ᐅᓂᑎᐱᔅᒋᓯᐅᓂᔪᐤ ᐅᐱᒪᑎᓯᐅᓂᒡ, ᑕᑈ ᓇᔅᒡ ᒋᑭ ᐛᔅᑐᐛᐤ, ᒧᔭᒻ ᑲᒋ ᐃᓯᓇᑯᓯᑦ ᐊᐛᓐ ᐛᔅᑕᓂᐱᒪᑭᓂᔪᐤ ᐊ ᒋᐧᑲᓱᑯᑦ᙮”
ᒋᓴᔅ ᑲ ᐃᓯ ᐊᓏᔨᒪᑦ ᐸᕆᓯᐊ ᑭᔭ ᐊᓂᔭᔪᐛ ᐎᓱᐛᐅᓂᔪᐤ ᑲ ᒋᔅᑯᑎᒪᒐᔨᒋ
ᒪᑎᔪᐤ 23.1-36; ᒪᕐᒃ 12.38-40
37ᐃᔅᐱ ᑲᒋ ᐃᓯ ᐃᔨᒥᑦ ᒋᓴᔅ, ᐸᐃᒄ ᐸᕆᓯᐊ ᒋ ᐎᓴᒥᑯᐤ ᒐᒋ ᐎᒋᒥᒋᓱᒪᑦ᙮ ᐊᑯ ᒋᓴᔅ ᒂ ᐃᑐᑕᑦ ᐊᓐᑕ, ᑲ ᐎᒋᒥᒋᓱᒪᑦ ᐊᓂᔭ ᐸᕆᓯᐊ᙮ 38ᒋ ᒥᔅᑲᑕᔨᑎᒻ ᐊᓐ ᐸᕆᓯ ᐊᑲ ᐅᒋ ᑲᓯᑎᒐᔨᒋ ᒋᓴᓴ ᐊᔅᒄ ᐊᑲ ᒥᒋᓱᔨᒋ᙮ ᐛᔅ ᐊᐅᑯᓐ ᑲᒋ ᐃᑎᓇᓄᐎᒡ ᒪᓐ᙮
39ᐊᑯ ᒋᓴᔅ ᒂ ᐃᑕᑦ, “ᒋᔨᐛᐤ ᐸᕆᓯᔨᒡ, ᓇᔅᒡ ᐃᔭᒂ ᐊ ᐃᑕᔨᑎᒥᐃᑯᔭᒄ ᒋᐎᔭᑭᓄᐛᐛ ᑭᔭ ᒋᒥᓂᒂᑭᓄᐛᐛ ᒐᒋ ᐸᔭᐧᑲᒋ᙮ ᒥᒄ ᒪᒃ ᐊᐅᑯᓐ ᒋᒋᐛ ᐊ ᐃᑕᔨᑕᑯᓯᔭᒄ ᓇᔅᒡ ᐊ ᒥᒐᑎᓯᔭᒄ ᑭᔭ ᓇᔅᒡ ᐊ ᒥᒋᑐᑎᒪᒄ᙮ 40ᓇᒪᐎᔾ ᐊ ᒋ ᓂᔅᑐᑕᓇᐛᐤ, ᒋᓴᒪᓂᑐᐤ ᑲ ᐅᓯᑕᑦ ᒥᔭᔪᐤ ᒋ ᐅᓯᑕᐤ ᑭᔭ ᐊᓂᔭ ᐱᒡ ᑕᓐ ᐊ ᐃᓯᓇᑯᓂᔨᒡ᙮ 41ᒂᔅᑲᑎᓯᒄ, ᐳᓂᒄ ᐊᓐ ᐊ ᐃᑎᔭᒄ ᒥᒄ ᒋᔨᐛᐤ ᐊ ᐎ ᐊᔭᔭᒄ ᒐᒂᓐ᙮ ᒥᔭᐧᑯᒡ ᐊᓐᒡ ᑲ ᒋᔅᑎᒪᑎᓯᒡ ᑕᓐ ᐊ ᐃᓯ ᓂᑐᐛᔨᑕᒡ᙮ ᐊᑯ ᒪᒃ ᒐ ᐸᔭᒋᓇᒂᒋ ᒋᐱᒪᑎᓯᐅᓄᐛᐤ᙮”
42“ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐸᕆᓯᔨᒡ, ᓇᔅᒡ ᐃᔭᒂ ᒋ ᓂᓇᑭᑐᐛᔨᑕᓇᐛᐤ ᐊ ᐃᓯ ᐸᒂᓂᒺᒄ ᒋᓴᒪᓂᑐᐤ ᑕᓐ ᐊ ᐃᓯ ᓂᑕᐅᒋᑕᔭᒄ ᓂᑕᐅᒋᑕᑭᓂᓴ᙮ ᒥᔽᐤ ᑭᑈ ᐊᓐ ᐊ ᐃᑐᑎᒪᒄ᙮ ᒥᒄ ᒪᒃ ᓇᒪ ᒥᔽᐤ ᐊᑲ ᑯᐃᔅᒄ ᐃᑐᑐᐛᑯᒡ ᑯᑎᑭᒡ ᐊᐛᓐᒋ ᑭᔭ ᐊᑲ ᓴᒋᐊᒄ ᒋᓴᒪᓂᑐᐤ᙮ 43ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐸᕆᓯᔨᒡ᙮ ᐛᔅ ᓇᔅᒡ ᐊᓐᑕ ᐊ ᒋᔅᑕᔨᑕᒂᒡ ᒍᐤ ᐊᔭᒥᐊᐅᒋᐛᐱᒡ ᐊᑯᑕ ᐛ ᐊᐃᓱᔭᒄ ᑭᔭ ᓇᔅᒡ ᐊ ᓂᑐᐛᔨᑎᒪᒄ ᒐᒋ ᒋᔅᑕᔨᒥᑯᔭᒄ ᐊ ᐛᒋᔭᒥᑯᔭᒄ ᐸᐸᒧᑕᔭᑯ ᐊᓐᑕ ᑲᒋ ᒥᒐᑎᓇᓄᐅᒡ ᐊ ᐊᑕᐛᓄᐅᒡ᙮”
44“ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐎᓱᐛᐅᓐ ᑲ ᒋᔅᑯᑎᒪᒐᔭᒄ ᑭᔭ ᒋᔨᐛᐤ ᐸᕆᓯᔨᒡ, ᒋᔨᐛᐤ ᑲ ᐊᔭᒥᐊᐧᑲᓱᔭᒄ, ᐛᔅ ᐊᐅᑯᓐ ᐊ ᐃᓯᓇᑯᓯᔭᒄ ᒧᔭᒻ ᓂᒂᔅᑲᓐ ᐊᑲ ᐅᒋ ᒋᔅᒋᓄᐛᒋᑕᑭᓄᐅᒡ᙮ ᐃᔪᒡ ᑕᐧᑯᔅᑲᑕᒧᒡ ᐊᑲ ᒋᔅᒐᔨᑕᒡ ᒐᒂᔪᐤ ᐊᓐᑕ ᑕᒥᒡ ᐊ ᑎᑯᓂᔨᒡ᙮”
45ᐸᐃᒄ ᑲ ᒋᔅᑯᑎᒪᒐᑦ ᐊᔭᒥᐊᐅ ᐎᓱᐛᐅᓂᔪᐤ ᒋ ᐃᑕᐤ, “ᒋᔅᑯᑎᒪᒐᓱᐤ, ᐅ ᐊ ᐃᔅᒋᔄᔨᓐ, ᒋ ᒪᔭᔨᒥᓇᓐ ᑭᔭ ᓂᔭᓐ᙮”
46ᒋᓴᔅ ᒋ ᐃᑕᐤ, “ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐎᓱᐛᐅᓐ ᑲ ᒋᔅᑯᑎᒪᒐᔭᒄ, ᒋ ᐱᑯᓴᔨᒪᐛᐅᒡ ᐃᔪᒡ ᒐᒋ ᓂᓇᐃᑕᒡ ᐊᓂᔭ ᐊᔭᒥᐊᐅ ᐎᓱᐛᐅᓇ ᒋᔨᐛᐤ ᑲ ᐅᓯᑕᔭᒄ, ᓇᔅᒡ ᑲ ᐊᔨᒥᐃᑯᒡ ᒐᒋ ᓂᓇᐃᑕᒡ᙮ ᒥᓯᒥᔅᑲᑯᐅᒡ ᐊᑲ ᒪᒃ ᐛᐛᒡ ᐎ ᐎᒋᐊᑯᒡ᙮”
47“ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ᙮ ᓇᔅᒡ ᔅᒋ ᒥᔪᑕᓇᐛᐤ ᐊᓐᑕ ᑲ ᓂᒂᔅᑲᑕᑭᓄᐅᒡ ᐊᓂᔭᐧᑲ ᐅᒋᔅᒋᐛᐃᒐᓱᒡ᙮ ᐊᓂᔭᐧᑲ ᒪᒃ ᒍᑕᐎᐛᐅᒡ ᐊᒋ ᓂᐸᐊᒡ ᐅᔭ᙮ 48ᒋ ᐛᐸᑎᔨᐛᓇᐛᐤ ᒪᒃ ᐊ ᓇᐊᔨᑎᒺᒄ ᐅᔭ ᐊᒋ ᐃᑎᒡ ᒍᑕᐎᐛᐅᒡ᙮ ᐎᔨᐛᐤ ᒋ ᓂᐸᐊᐅᒡ ᐅᔭ ᐅᒋᔅᒋᐛᐃᒐᓱᐛ ᒋᔨᐛᐤ ᒪᒃ ᔅᒋ ᒥᔪᓇᑯᑕᓇᐛᐤ ᐊᓐᑕ ᑲ ᓂᒂᔅᑲᑕᑭᓄᐅᒡ᙮ 49ᐊᐅᒄ ᒪᒃ ᐛᒋ ᐃᔅᒋᔄᑦ ᑲ ᑭᒐᑕᐛᔨᑕᐧᒃ ᒋᓴᒪᓂᑐᐤ, ‘ᓂᑭ ᐃᑎᓴᐊᒧᐛᐅᒡ ᐊᓐᒡ ᐃᔪᒡ ᐅᒋᔅᒋᐛᐃᒐᓱᐛ, ᑭᔭ ᐊᑈᔅᑕᓇ᙮ ᒥᒄ ᒪᒃ ᐱᔅᒐ ᒋᑭ ᓂᐸᐊᐅᒡ, ᑭᔭ ᑯᑎᑲ ᒋᑭ ᓂᓇᐧᑲᒋᐊᐅᒡ᙮’ ᐊᐅᒄ ᒪᒃ ᑲ ᐃᔅᐱᔨᒡ ᐅᔭ ᑲ ᐃᔅᒋᔄᑦ ᒋᓴᒪᓂᑐᐤ᙮ 50ᐊᑯ ᒪᒃ ᐊᓐᒡ ᐃᔪᒡ ᐊᓄᒡ ᑲ ᐱᒪᑎᓯᒡ, ᐎᔨᐛᐤ ᒋᑭ ᑎᐸᔅᑯᓇᑭᓄᐎᒡ ᑕᓐ ᑲ ᐃᔅᐱᔅ ᐸᒋ ᓂᐸᐊᑭᓄᔨᒋ ᐊᓂᔭᐧᑲ ᐅᒋᔅᒋᐛᐃᒐᓱᐛ ᑲ ᐃᔅᐱᔅ ᑎᒂᒡ ᐅ ᐊᔅᒋᔾ, 51ᐊᓐᑕ ᐊᓂᔭ ᐅᒋᔅᒋᐛᐃᒐᓱᐤ ᐊᐳᓪ ᑲ ᐃᓯᓂᐧᑲᓱᑦ ᐊ ᐅᒋ ᒋᒋᐱᔨᒡ ᐊᓐᑕ ᒪᒃ ᐃᔅ ᐊᓂᔭ ᓴᑲᕋᔭ ᑕᓐ ᑲ ᐃᓯ ᓂᐸᐊᑭᓄᐅᑦ᙮ ᐱᑎᑭᒥᒡ ᒋᓴᐊᔭᒥᐊᐅᒋᐛᐱᒡ ᒋ ᓂᐸᐊᑭᓄᐤ ᓴᑲᕋᔭ ᑎᔅᑐᐎᒡ ᐊᓂᔭ ᐱᔅᑎᓂᒐᐅᓇᐱᔅᑯᔪᐤ ᐊᓐᑕ ᒪᒃ ᒪᐅᒡ ᐊ ᐸᔭᒐᔨᑕᒂᒡ ᒋᓴᐊᔭᒥᐊᐅᒋᐛᑉ᙮ ᓂᐦᐃ, ᑕᑈ ᒋᑦ ᐃᑎᓇᐛᐤ, ᐊᓐᒡ ᐃᔪᒡ ᑲ ᐱᒪᑎᓯᒡ ᐊᓄᒡ ᐎᔨᐛᐤ ᒋᑭ ᐊᓂᔅᒐ ᒪᑎᑯᔅᑲᑯᒡ ᒥᓯᐛ ᐊᓂᔭ ᑕᓐ ᑲ ᐃᓯ ᐅᓂᑐᑐᐛᑭᓄᐎᒡ᙮”
52“ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᑲ ᒋᔅᑯᑎᒪᒐᔭᒄ ᐎᓱᐛᐅᓐ᙮ ᒋ ᓂᑲᐛᐛᐅᒡ ᐊᐛᓐᒋ ᒐᒋ ᒋᔅᒐᔨᒪᒡ ᑭᔭ ᒐᒋ ᑕᑈᔭᔨᒪᒡ ᒋᓴᒪᓂᑐᐛ᙮ ᒋᔨᐛᐤ ᓇᒪ ᒋ ᐎ ᐱᒐᓇᐛᐤ ᒋᓴᒪᓂᑐᐤ ᐅᒋᓴᐅᒋᒪᐅᓂᒡ ᑭᔭ ᒋ ᓂᑲᐛᐛᐅᒡ ᐊᓐᒡ ᐊᐛᓐᒋ ᑲ ᐎ ᐱᒐᒡ᙮ ᒧᔭᒻ ᐊᐛᓐ ᐊ ᐅᑎᓇᐧᒃ ᐊᓂᔭ ᐊᐸᐃᑭᓂᔪᐤ ᒐ ᐊᑲ ᒋ ᐱᒐᔨᒋ ᐊᐛᔪᐛ ᐊᓐᑕ ᒋᓴᒪᓂᑐᐛ ᐊ ᐅᒋᒪᐎᔨᒋ ᐊᐅᒄ ᐊ ᐃᓯᓇᑯᓯᔭᒄ᙮”
53ᐃᔅᐱ ᒪᒃ ᐊ ᐊᑎ ᔅᑐᑕᑦ ᒋᓴᔅ ᐊᓐᑕ, ᐊᑯ ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᑭᔭ ᐊᓐᒡ ᐸᕆᓯᔨᒡ ᒋ ᒋᔄᐃᑯᐅᒡ᙮ ᓇᔅᒡ ᒪᒃ ᓱᒃ ᐃᔭᐱᒡ ᒋ ᑯᒂᒋᒪᐅᒡ ᑯᑎᑲ ᒐᒂᔪᐛ 54ᐊ ᐎ ᓇᓂᑐᐤ ᑯᒋᐊᒡ ᒐᒂᔪᐤ ᒐᒋ ᐅᓂᐃᔅᒋᔄᔨᒋ ᒐᒋ ᐅᒋ ᒪᒥᓯᒪᒡ᙮
Currently Selected:
ᓗᒃ 11: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
