ᓗᒃ 5
5
ᑲ ᒥᔅᑎᐱᑕᐅᔭᒡ ᐊᓐᒡ ᓂᔅᑎᒻ ᑲ ᐅᑎᓇᑭᓄᐎᒡ ᒋᔅᒋᓄᐊᒧᐛᑭᓐᒡ
ᒪᑎᔪᐤ 4.18-22; ᒪᕐᒃ 1.16-20
Luke 5.1-11 (Epiphany-5 Year C)
1ᐸᐃᒂᐤ ᒋᓴᔅ ᒪᒂᒡ ᐊ ᓂᐳᐅᑦ ᓯᓱᒡ ᓴᑲᐃᑭᓂᒡ ᑲᓇᓴᕆᑦ ᐊ ᐃᓯᓂᐧᑲᑕᔨᒡ, ᒥᒐᑦ ᒪᒃ ᐃᔪᐛ ᐊ ᐛᔅᑲᑲᐳᔅᑕᑯᑦ ᐊ ᓂᑐᑎᒥᔨᒋ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ, 2ᒋ ᐅᒋ ᐛᐸᑎᒻ ᓂᓱ ᐊ ᒥᓴᔨᒋ ᐅᐤᑕ ᐊᓐᑕ ᓯᓱᒡ, ᐊᒋ ᓂᑭᑎᒥᒂᓂ ᑲ ᓄᑎᒪᓴᔨᒋ ᒐᒋ ᒋᔅᑕᐸᐅᔭᔨᒋ ᐅᑦ ᐊᐃᐱᔨᐛ᙮ 3ᒋ ᐳᓱᐤ ᒪᒃ ᒋᓴᔅ ᐸᐃᒄ ᐅᐤᑎᔪᐤ, ᐊᓂᔭ ᓴᐃᒥᓐ ᐱᑕᕋ ᑲ ᑎᐱᔨᐛᐅᓯᔨᒋ᙮ ᒂ ᑯᒂᒋᒪᑦ ᓴᐃᒥᓐ ᐱᑕᕋ ᒐᒋ ᐊᐱᓯᔅ ᒧᓴᐅᐊᒥᔨᒋ᙮ ᐊᑯ ᒪᒃ ᒂ ᐛᐛᔨᐱᑦ ᒋᓴᔅ ᑲ ᒋᔅᑯᑎᒪᒐᑦ ᐊᓐᑕ ᐊ ᒥᓴᔨᒡ ᐅᐤᑎᒡ ᐅᒡ᙮
4ᐃᔅᐱ ᒪᒃ ᑲᒋ ᐃᓯ ᐃᔨᒥᑦ ᒋᓴᔅ ᒋ ᐃᑕᐤ ᐊᓂᔭ ᓴᐃᒥᓇ, “ᒧᓴᐅᐊᒧᒄ ᐊᓐᑕ ᐊ ᒋᔅᑲᔪᐛᒡ ᒐ ᐱᑭᔅᑐᐛᐊᑯᒡ ᒋᑦ ᐊᐃᐱᐛᐅᒡ᙮”
5ᓴᐃᒥᓐ ᒪᒃ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᒋᔅᑯᑎᒪᒐᓱᐤ, ᐃᔅᑭᓐ ᑎᐱᔅᑲᐛ ᓂᒋ ᓄᑎᒪᓴᓇᓐ, ᓇᒪ ᒪᒃ ᓂ ᐅᒋ ᐱᑕᐅᔭᓇᓐ᙮ ᐊᔪᐛᒡ ᒪᒃ ᓂᑭ ᐱᑭᔅᑐᐛᐛᓇᓂᒡ ᓂᑦ ᐊᐃᐱᓇᓐᒡ ᐛᔅ ᐊᐅᑯᓐ ᐊ ᐃᓯᔭᒡ ᒐᒋ ᑎᔭᒡ᙮”
6ᐃᔅᐱ ᒪᒃ ᑲ ᐱᑭᔅᑐᐛᐛᒡ ᐅᑦ ᐊᐃᐱᐛᐛ ᒋ ᐊᑎ ᐱᑯᐱᔪᐛ ᐅᑦ ᐊᐃᐱᐛᐛ ᑲ ᐃᔅᐱᔅ ᒋ ᒥᔅᑎᐱᑕᐅᔭᒡ᙮ 7ᐊᑯ ᒂ ᐛᔅᑕᒧᐛᒡ ᐎᒋᓄᑎᒪᓴᐛ, ᑯᑎᒋᔪᐤ ᐅᐤᑎᔪᐤ ᑲ ᑕᔨᒋ ᒐᒋ ᐸᒋ ᐎᒋᐃᑯᒡ, ᐊᑯ ᒂ ᐸᒋ ᐃᔅᒋᒪᔨᒋ᙮ ᑕᐱᔅᑯᓐ ᒪᒃ ᐊᓂᔭᔪᐛ ᐊ ᒥᓴᔨᒋ ᐅᐤᑕ ᒋ ᐎ ᑯᓴᐸᐛ ᑲ ᐃᔅᐱᔅ ᓴᑭᔅᒋᓇᒡ ᓂᒪᓯᒡ᙮ 8ᐃᔅᐱ ᒪᒃ ᓴᐃᒥᓐ ᐱᑕᕐ ᐎᔭᐸᑕᐧᒃ ᐊ ᐃᔅᐱᔨᒡ ᒋ ᐅᒋᒋᐧᑯᓂᐱᔪᐤ ᐅᑎᔅᑯᐤ ᒋᓴᓴ ᐊ ᑕᔨᒋ, ᐊ ᐃᔅᒋᔄᑦ, “ᓇᑭᓯ, ᐅᑎᐸᔨᒋᒐᐤ, ᐛᔅ ᓂ ᒥᒐᑎᓯᓐ᙮”
9ᒋ ᒥᔅᑲᑕᔨᑎᒧᒡ ᓴᐃᒥᓐ ᑭᔭ ᐊᓂᔭ ᐎᒋᓄᑎᒪᓴᐛ ᐊᓂᔭ ᑲ ᐃᔅᐱᔅ ᒋ ᒥᔅᑎ ᐱᑕᐅᔭᒡ᙮ 10ᑭᔭ ᐊᓂᔭ ᐎᒋᓄᑎᒪᓴᐛ ᒋᒥᓴ ᑭᔭ ᒠᓇ, ᓴᐱᑎ ᐅᑯᓴ ᒋ ᒥᔅᑲᑕᔨᑎᒧᒡ ᑭᔭ ᐎᔨᐛᐤ᙮ ᒋᓴᔅ ᒪᒃ ᒋ ᐃᑕᐤ ᐊᓂᔭ ᓴᐃᒥᓇ, “ᐊᑲᐎᔾ ᓴᒋᓯ᙮ ᐛᔅ ᒧᔭᒻ ᐃᔪᒡ ᐊ ᐱᑕᐅᔭᔭᒄ ᐊᐅᑯᓐ ᒐ ᐃᑎᔭᒄ ᐊᑯ ᒐ ᐊᑎ ᑭᒐᔅᒋᒪᑯᒡ᙮”
11ᒋ ᓴᔅᒋᐱᑎᒧᒡ ᒪᒃ ᐅᑦ ᐅᐤᑐᐛᐛ ᒂ ᓂᑭᑕᒡ ᐊᓐᑕ ᒥᓯᐛ ᒐᒂᔪᐤ, ᐊᑯ ᒂ ᐎᒐᐛᒡ ᒋᓴᓴ᙮
ᑲ ᒥᓏᒋᐊᑭᓄᐅᑦ ᓇᐸᐤ ᑲ ᐊᐧᑯᓯᑦ ᐅᓯᑲᒡ
ᒪᑎᔪᐤ 8.1-4; ᒪᕐᒃ 1.40-45
12ᒪᒂᒡ ᒪᒃ ᒋᓴᔅ ᐊ ᑕᑦ ᐊᓐᑕ ᐸᐃᒄ ᐊᓂᔭ ᐅᑕᓇᔪᐤ ᒋ ᑕᐤ ᓇᐸᐤ ᐊᓐᑕ ᐅᒥᒋᐛᔅᐱᓇᐅᓂᔪᐤ ᐊ ᒪᔭᑎᓂᔨᒡ ᐊ ᐊᔭᑦ ᒥᓯᐛ ᐊ ᐃᔅᐱᑎᑦ᙮ ᐃᔅᐱ ᒪᒃ ᐎᔭᐱᒪᑦ ᒋᓴᓴ ᒋ ᐅᑎᑎᐱᔪᐤ ᐊᓐᑕ ᐊ ᑕᔨᒡ, ᐊᑯ ᓇᔅᒡ ᒂ ᓂᑐᐛᔨᒪᑦ ᒐᒋ ᐎᒋᐃᑯᑦ, ᐊ ᐃᑕᑦ, “ᐅᑎᐸᔨᒋᒐᐤ, ᐎ ᐸᒋ ᐎᒋᐃᓇ ᒋᑭ ᒋ ᐃᑐᑕᓐ ᒐᒋ ᐸᔭᒋᓯᔭᓐ᙮”
13ᒋᓴᔅ ᒪᒃ ᒋ ᓱᐅᓂᔅᒐᔪᐤ ᒂ ᑕᒋᓇᑦ ᐊ ᐃᑕᑦ, “ᒋ ᐎ ᐎᒋᐃᑎᓐ᙮ ᐸᔭᒋᓯ ᒪᒃ᙮” ᑎᐛᒡ ᒪᒃ ᒋ ᒥᓏᑎᓯᐤ ᐊᓂᔭ ᑲ ᐃᑕᔅᐱᓇᑦ ᐊᓐ ᓇᐸᐤ᙮
14ᒋᓴᔅ ᒪᒃ ᒋ ᐃᑎᓱᒪᐤ ᐊ ᐃᑕᑦ, “ᐊᑲᐎᔾ ᐎᑎᒧᐤ ᐊᐛᓐ ᑕᓐ ᑲ ᐃᔅᐱᔨᓐ᙮ ᒪᒋ, ᓄᑯᐃᓱᐤ ᐊᓄᒡ ᒍᐤ ᐊᔭᒥᐊᐅᒋᒪᐤ ᐊ ᑕᑦ ᒐ ᐛᐱᒥᔅᒃ ᐊᒋ ᒥᓏᒋᐃᑯᔨᓐ᙮ ᑭᔭ ᒐ ᐱᔅᑎᓂᒐᔨᓐ ᐊᓐ ᒐᒂᓐ ᐊᓂᔭ ᒧᓱᔅ ᑲ ᐃᑎᓱᐛᑦ ᒐ ᐱᔅᑎᓂᑲᓄᐎᒡ᙮ ᐅ ᒪᒃ ᐃᑎᔨᓇ ᒥᓯᐛ ᐊᐛᓐ ᒋᑭ ᒋᔅᒐᔨᑎᒻ ᑕᑈ ᓇᔅᒡ ᐊᒋ ᐸᔭᒋᐃᑯᔨᓐ᙮”
15ᒋ ᒥᓯᑕᐱᔪᐤ ᒪᒃ ᒋᓴᔅ ᐊ ᐃᑕᒋᒪᑭᓄᐅᑦ᙮ ᒥᒐᑦ ᒪᒃ ᐊᐛᔪᐛ ᒋ ᐸᒋ ᓂᑐᐛᐱᒥᑯᐤ ᐊ ᐎ ᓂᑐᑕᑯᑦ ᑭᔭ ᐊ ᐎ ᒥᓏᒋᐃᑯᓯᔨᒋ᙮ 16ᒋ ᐃᑐᑕᐤ ᒪᒃ ᒪᓐ ᒋᓴᔅ ᐊᓐᑕ ᐸᐧᑯᑎᔅᑭᒥᑲᒡ ᐊᑯ ᑲᒋ ᐊᔭᒥᐊᑦ᙮
ᑲ ᒥᓏᒋᐊᑭᓄᐅᑦ ᓇᐸᐤ ᐊᑲ ᐅᒋ ᐊᑎᓂᓱᑦ
ᒪᑎᔪᐤ 9.1-8; ᒪᕐᒃ 2.1-12
17ᐸᐃᒂᐤ ᒋᓴᔅ ᐊ ᒋᔅᑯᑎᒪᒐᑦ ᒋ ᑕᔪᐛ ᐊᓐᑕ ᐸᕆᓯᐊ ᑭᔭ ᐊᓂᔭ ᑲ ᒋᔅᑯᑎᒪᒐᔨᒋ ᐊᔭᒥᐊᐅ ᐎᓱᐛᐅᓂᔪᐤ᙮ ᐅᒡ ᒪᒃ ᓇᐸᐅᒡ ᒥᓯᐛ ᐅᑕᓇᒡ ᒋ ᐅᑐᑕᐅᒡ, ᐊᓐᑕ ᑲᓕᓕᒡ ᑭᔭ ᒍᑎᔭ ᐊᔅᒋᒡ ᑲ ᑎᑯᓂᔨᒋ ᑭᔭ ᐊᓐᑕ ᐅᑕᓇᒡ ᒋᕈᓯᓕᒥᒡ ᒋ ᐅᑐᑕᐅᒡ᙮ ᒋᓴᔅ ᒪᒃ ᒋ ᐊᔭᐛᐤ ᒋᓴᒪᓂᑐᐛ ᐅᑭᔅᒋᐅᓂᔪᐤ ᒐᒋ ᒥᓏᒋᐃᐛᑦ᙮ 18ᒪᒂᒡ ᒪᒃ ᐊ ᒋᔅᑯᑎᒪᒐᑦ ᒋᓴᔅ ᒋ ᐅᒋ ᐸᓱᐛᐅᒡ ᓇᐸᐅᒡ ᐎᑕᐸᐛᐛ ᐊᑲ ᓂᔅᑐᓯᔨᒋ ᐊᔅᐱᓯᒧᓂᒡ ᐊ ᐱᒥᓯᓂᔨᒋ᙮ ᒋ ᐎ ᐱᑎᑲᐊᐅᒡ ᐊᓐᑕ ᒥᒋᐛᐱᒡ ᐊᒋ ᐎ ᐱᒥᓯᒪᒡ ᑎᐱᔅᑯᒡ ᒋᓴᓴ ᐊ ᑕᔨᒋ᙮ 19ᓇᒪ ᒪᒃ ᐅᒋ ᐱᑎᑲᐊᐅᒡ ᐛᓴ ᐊᒋ ᒥᒐᑎᓇᓄᐎᒡ ᐱᑎᑭᒥᒡ᙮ ᐊᑯ ᒪᒃ ᑲ ᐊᑯᓯᑕᐊᒡ ᐊᓂᔭ ᒥᒋᐛᐱᔪᐤ, ᒂ ᐱᑯᓇᐱᑕᒡ ᐸᐧᑯᔪᐤ ᐊᓐᑕ ᑕᐧᑯᒡ ᐊᓐᑕ ᑲ ᐅᒋ ᐱᔅᑕᐱᒐᓇᒡ ᐊᓂᔭ ᓇᐸᐛ, ᐊᓐᑕ ᑕᑕᐅᒡ ᓇᑕ ᐊ ᑕᓄᐎᒡ, ᑎᐱᔅᑯᒡ ᒋᓴᓴ ᐊ ᑕᔨᒋ ᒂ ᐱᔅᑎᓇᒡ᙮
20ᐃᔅᐱ ᒪᒃ ᒋᓴᔅ ᐎᔭᐸᑎᒺᑦ ᐅᑕᑈᑎᒧᐅᓂᔪᐤ ᐊᓂᔭᔪᐛ ᓇᐸᐛ ᐊᑯ ᒂ ᐃᑕᑦ ᐊᓂᔭ ᓇᐸᐛ ᑲ ᐱᒥᓯᓂᔨᒋ, “ᓂᐎᒐᐛᑭᓐ, ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ᙮”
21ᐊᑯ ᐊᓐᒡ ᐸᕆᓯᔨᒡ ᑭᔭ ᐊᓐᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᒂ ᐊᑎ ᐊᔨᒧᑎᒺᒡ ᐅᔭ ᑲ ᐃᔅᒋᔄᔨᒋ ᐊ ᐃᔅᒋᔄᒡ᙮ “ᐸᔅᑕᒧᐤ ᐅ ᓇᐸᐤ ᐊ ᐃᔅᒋᔄᑦ, ‘ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ᙮’ ᓇᒪ ᐊᐛᓐ ᒋᑭ ᒋ ᐛᐸᔨᑎᒧᐛᐤ ᐊᐛᔪᐛ ᐅᒥᒋᑥᐅᓂᔪᐛ, ᒥᒄ ᒋᓴᒪᓂᑐᐤ᙮”
22ᐃᔅᐱ ᒋᓴᔅ ᒐᔅᒐᔨᒪᑦ ᐊ ᐃᓯ ᐃᔨᒥᐃᑐᔨᒋ ᒋ ᐃᑕᐤ, “ᒐᒂᓐ ᐛᒋ ᒪᒥᑐᓇᔨᑎᒥᐃᑯᔭᒄ ᐊᓐ ᑲ ᐃᔅᒋᔄᔭᓐ ? 23ᑕᓐ ᒪᒃ ᐃᐛᒃ ᐎᔭᑎᓂᔨᒡ ᒐᒋ ᐃᑕᑭᓄᐅᑦ, ‘ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ,’ ᑭᔭ ᒪᒃ ᒐᒋ ᐃᑕᑭᓄᐅᑦ, ‘ᐅᓂᔾ, ᑭᔭ ᐱᒧᑕ’ ? 24ᒋᑭ ᐛᐸᑎᔨᑎᓇᐛᐤ ᐃᔪᐤ ᐅᑯᓯᓴᓐ ᑕᑈ ᐎᔾ ᐊ ᐊᔭᑦ ᑎᐸᔨᒋᒐᐅᓂᔪᐤ ᐅᑕ ᐊᔅᒋᒡ ᒐᒋ ᐛᐸᔨᑎᒪᒐᑦ ᒥᒋᑥᐅᓇ᙮” ᐊᑯ ᒋᓴᔅ ᒂ ᐃᑕᑦ ᐊᓂᔭ ᓇᐸᐛ ᐊᑲ ᐅᒋ ᓂᔅᑐᓯᔨᒋ, “ᐱᓯᑯ, ᐅᑎᓇ ᒋᑦ ᐊᔅᐱᓯᒧᓐ, ᒐ ᒋᐛᔨᓐ᙮”
25ᑎᐛᒡ ᒪᒃ ᒋ ᐱᓯᑯᐤ ᐊᓐ ᓇᐸᐤ ᒪᒂᒡ ᐊᓐᑕ ᐊ ᒥᒐᑎᓇᓄᐎᒡ, ᒂ ᐊᑎ ᐅᑎᓇᐧᒃ ᐊᓂᔭᔪᐤ ᐅᑦ ᐊᔅᐱᓯᒧᓐ ᐊᑯ ᒂ ᐊᑎ ᒋᐛᑦ ᐊ ᒪᒥᒋᒪᑦ ᒋᓴᒪᓂᑐᐛ᙮ 26ᒥᓯᐛ ᒪᒃ ᐊᓐᒡ ᑲ ᐛᐸᑕᒡ ᑕᓐ ᑲ ᐃᔅᐱᔨᒡ ᒋ ᒥᔅᑲᑕᔨᑎᒥᐃᑯᐅᒡ ᑭᔭ ᒋ ᓴᒋᓱᐅᒡ᙮ ᒋ ᒋᔅᑕᒋᒪᐅᒡ ᒋᓴᒪᓂᑐᐛ ᐊ ᐃᔅᒋᔄᒡ, “ᑕᑈ ᒪᒥᔅᑲᒡ ᒋ ᐊᑎ ᐃᓯ ᐛᐸᑕᓇᓄᐤ ᒐᒂᓐ ᐊᓄᒡ ᐊ ᐃᔅᐱᔨᒡ᙮”
ᓕᐸᐃ ᑲ ᑎᐸᒋᒪᑭᓄᐅᑦ
ᒪᑎᔪᐤ 9.9-13; ᒪᕐᒃ 2.13-17
27ᐃᔅᐱ ᒪᒃ ᑲ ᒋᔅᐱᔨᒡ ᐅ ᒋ ᐎᐎᐤ ᒋᓴᔅ ᐊᓂᔭ ᒥᒋᐛᐱᔪᐤ ᐊᑯ ᒂ ᔅᑐᑕᑦ᙮ ᒋ ᐛᐱᒪᐤ ᒪᒃ ᓇᐸᐛ ᐊ ᐊᐱᔨᒋ ᐅᒥᓯᓇᐃᒐᐅᒋᐛᐱᒡ, ᓕᐸᐃ ᐊ ᐃᓯᓂᐧᑲᓱᔨᒋ, ᑲ ᒪᒧᓴᒋᓇᐧᒃ ᒋᓴᐅᒋᒪᐤ ᓱᓇᔭᔪᐤ ᐊ ᐃᑕᐱᑎᓯᔨᒋ᙮ ᐊᑯ ᒋᓴᔅ ᒂ ᐃᑕᑦ, “ᐸᒋ ᐛᐎᒐᐎ᙮” 28ᒂ ᐱᓯᑯᑦ ᓕᐸᐃ ᒂ ᓂᑭᑕᐧᒃ ᒥᓯᐛ ᒐᒂᔪᐤ ᑲ ᐃᓯ ᐊᔭᑦ ᐊᑯ ᒂ ᐛᐎᒐᐛᑦ ᒋᓴᓴ᙮
29ᐸᑎᒪ ᒪᒃ ᒋ ᒥᑯᓴᐊᐤ ᒋᓴᓴ ᐊᓐᑕ ᐎᒋᒡ᙮ ᒋ ᒥᒐᑎᔪᐛ ᒪᒃ ᑯᑎᑲ ᑲ ᒪᒧᓴᒋᓂᒥᔨᒋ ᒋᓴᐅᒋᒪᐤ ᓱᓇᔭᔪᐤ ᐊ ᐃᑕᐱᑎᓯᔨᒋ ᑭᔭ ᑯᑎᑲ ᐊᐛᔪᐛ ᒋ ᑕᔪᐛ ᐊᒋ ᐎᒋᒥᒋᓱᒥᑯᒡ᙮ 30ᐊᑯ ᒪᒃ ᐸᕆᓯᔨᒡ ᑭᔭ ᐊᓐᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᒂ ᐃᔨᒪᐊᒡ ᒋᓴᓴ ᐅᒋᔅᒋᓄᐊᒧᐛᑭᓂᔪᐛ ᐊ ᐃᑕᒡ, “ᒐᒂᓐ ᐛᒋ ᐎᒋᒥᒋᓱᒪᑯᒡ ᐊᓐᒡ ᑲ ᒪᒧᓴᒋᓇᒡ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᒡ ᑭᔭ ᐊᓐᒡ ᑯᑎᑭᒡ ᐅᒥᒋᑥᐅᒡ ?”
31ᒋᓴᔅ ᒪᒃ ᒋ ᐎᑎᒪᐛᐤ ᐊ ᐃᔅᒋᔄᑦ, “ᓇᒪ ᓂᑐᐛᔨᒪᐅᒡ ᓂᑐᐧᑯᐃᔨᓴ ᐊᓐᒡ ᐊᐛᓐᒋ ᐊᑲ ᐊᐧᑯᓯᒡ, ᒥᒄ ᐊᓐᒡ ᑲ ᐊᐧᑯᓯᒡ ᐊᐅᑯᓐᒡ ᓇᑐᐛᔨᒪᒡ ᓂᑐᐧᑯᐃᔨᓴ᙮ 32ᓇᒪᔭᐤ ᐊᓐᒡ ᑲ ᑯᐃᔅᑯᑕᑎᓯᒡ ᐛᒋ ᑎᑯᓯᓂᔭᓐ᙮ ᓂᒋ ᑎᑯᓯᓐ ᒐᒋ ᓂᑐᒥᒂᐤ ᐅᒥᒋᑥᐅᒡ ᒐᒋ ᒂᔅᑲᑎᓯᒡ᙮”
ᐊᑲ ᐊᓯᑯᒻ ᒥᒋᓱᓇᓄᐅᒡ ᐊ ᐊᔨᒧᑕᒡ
ᒪᑎᔪᐤ 9.14-17; ᒪᕐᒃ 2.18-22
33ᐸᕆᓯᔨᒡ ᒪᒃ ᒋ ᐃᑕᐅᒡ ᒋᓴᓴ, “ᒐᒂᔪᐤ ᐛᒋ ᒥᒐᑥᐤ ᐃᑐᑎᒥᔨᒋ ᒠᓐ ᐅᒋᔅᒋᓄᐊᒧᐛᑭᓇ ᐊᑲ ᐊᓯᑯᒻ ᒥᒋᓱᔨᒋ ᒥᒄ ᒐᒋ ᐊᔭᒥᐊᔨᒋ᙮ ᑭᔭ ᓂᔭᓐ ᓂᒋᔅᒋᓄᐊᒧᐛᑭᓇᓐᒡ ᐊᐅᒄ ᐊ ᐃᑎᒡ᙮ ᒋᔾ ᒪᒃ ᒋᒋᔅᒋᓄᐊᒧᐛᑭᓐᒡ ᓇᒪ ᐃᑐᐅᒡ᙮”
34ᒋᓴᔅ ᒪᒃ ᒋ ᐃᔅᒋᔄᐤ, “ᒧᔭᒻ ᐊ ᓂᐳᐅᓇᓄᐅᒡ, ᒋᑭ ᒋ ᐃᑐᐅᒡ ᐊ ᒐ ᐊᑲ ᒋ ᒥᒋᓱᒡ ᐊᓐᒡ ᑲ ᐎᓴᒪᑭᓄᐎᒡ ᐊ ᒥᑯᓴᓄᐎᒡ ? ᓇᒪ ᒂᔄᓐ᙮ ᐛᔅ ᒧᔭᒻ ᐊ ᑕᔨᒋ ᐊᓐᑕ ᐊ ᑕᒡ ᐊᓂᔭ ᐅᔅᒋᓂᒋᓱᐛ ᓇᒪ ᐛᐛᒡ ᒋᑭ ᐅᒋ ᐃᑕᔨᑎᒧᒡ ᒐ ᐊᑲ ᒋ ᒥᒋᓱᒡ᙮ 35ᐃᔅᐱ ᒪᒃ ᐅᑎᒋᐱᔨᒐ ᒐ ᐸᒋ ᒥᔅᑭᒪᑭᓄᐎᒡ ᐅᔅᒋᓂᒋᓱᐛ ᑭᔭ ᐃᔭᒄ ᓇᒪ ᒋᑭ ᐅᒋ ᒥᒋᓱᐅᒡ᙮”
36ᐊᑯ ᒋᓴᔅ ᒂ ᐎᑎᒧᐛᑦ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊ ᐃᑕᑦ, “ᓇᒪ ᐊᐛᓐ ᒋᐸ ᒋ ᐅᒋ ᐱᑯᐱᑎᒻ ᐊ ᐅᔅᑲᔨᒡ ᐅᑦ ᐊᑯᑉ ᒐᒋ ᒥᓴᐊᒃ ᐛᔅᑭᒡ ᐊᑯᐱᔅᒋᓯᔪᐤ᙮ ᐛᔅ ᐅᔭᔪᐤ ᐃᑐᑕᒐ, ᒋᑭ ᓂᓱᐅᓇᒋᑕᐤ ᐊᓂᔭ ᑲ ᐅᔅᑲᔨᒡ ᐅᑦ ᐊᑯᑉ᙮ ᐊᓐ ᒪᒃ ᑲ ᐅᔅᑲᒡ ᒥᓴᐃᑭᓐ, ᓇᒪ ᒋᑭ ᐅᒋ ᓂᐃᔅᑲᒐᒥᑭᓐ ᐊᓐᑕ ᐛᔅᑭᒡ ᐊᑯᐱᔅᒋᓯᒡ᙮ 37ᓇᒪ ᑭᔭ ᐊᐛᓐ ᐱᑕᐸᐅᑕᐤ ᐊ ᐅᔅᑲᑭᒥᔨᒡ ᓱᒥᓇᐳᔪᐤ ᐊᓐᑕ ᐃᓯ ᐊ ᐛᔅᑭᒍᓂᔨᒡ ᐅᓯᑭᔾ ᐳᑕᒡ᙮ ᐛᔅ ᐊᓐᑕ ᐃᔅ ᐱᑕᐸᐅᑕᒐ ᐃᔅᐱ ᒪᒃ ᐅᓯᐅᒥᑭᓂᔨᒐ, ᓇᔅᒡ ᒋᑭ ᑕᑐᐱᔪᐤ ᐊᓂᔭ ᐅᓯᑭᔾ ᐳᑕᔪᐤ᙮ ᐊᑯ ᒪᒃ ᓇᒪ ᒋᑭ ᐅᒋ ᐊᔭᐤ ᓱᒥᓇᐳᔪᐤ ᑭᔭ ᐊᓂᔭ ᐅᓯᑭᔾ ᐳᑕᔪᐤ ᓇᒪ ᓴᔅ ᒋᑭ ᐅᒋ ᐃᓯᓇᑯᓂᔪᐤ ᒥᓐ ᒐᒋ ᐊᐱᑎᓂᔨᒡ᙮ 38ᐊ ᐅᔅᑲᑭᒥᔨᒡ ᓱᒥᓇᐳᔪᐤ ᐊᓐᑕ ᐊ ᐅᔅᑲᔨᒡ ᐅᓯᑭᔾ ᐳᑕᒡ ᒋᐸ ᐃᓯ ᐱᑕᐸᐅᑕᐤ᙮ 39ᐊᐛᓐ ᓴᔅ ᐊᒋ ᑯᒋᔅᑕᐧᒃ ᐛᔅᑭᒡ ᓱᒥᓇᐳᔪᐤ ᓇᒪ ᒋᑭ ᐅᒋ ᐎ ᒥᓄᐤ ᐊ ᐅᔅᑲᑭᒥᔨᒡ ᓱᒥᓇᐳᔪᐤ᙮ ᐛᔅ ᐊᓂᔭ ᐛᔅᑭᒡ ᓱᒥᓇᐳᔪᐤ ᐃᐛᒃ ᒋᑭ ᐎᔅᑎᒻ᙮”
Currently Selected:
ᓗᒃ 5: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
