ᓗᒃ 6
6
ᒋᓴᔅ ᑲ ᐊᔨᒧᑕᐧᒃ ᐊ ᒍᐤ ᐊᔭᒥᐊᐅᒋᓯᑲᔨᒡ
ᒪᑎᔪᐤ 12.1-8; ᒪᕐᒃ 2.23-28
1ᐸᐃᒂᐤ ᒪᒃ ᐊ ᒍᐤ ᐊᔭᒥᐊᐅᒋᓯᑲᔨᒡ, ᒋᓴᔅ ᒋ ᐎᒐᐛᐤ ᐅᒋᔅᒋᓄᐊᒧᐛᑭᓇ, ᐊ ᐱᒧᑕᒡ ᐊᓐᑕ ᑲᒋ ᓂᑕᐅᒋᓂᔨᒋ ᐸᒂᓯᑭᓂᒥᓇᑎᒂ᙮ ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒋ ᑭᒐᒥᐱᑎᒧᒡ ᐊᓂᔭ ᐸᒂᓯᑭᓂᒥᓇᑎᒂ, ᐊ ᐱᒋᔅᒋᐱᔨᒋ ᐅᑎᒋᐛᐛᒡ ᐊ ᒥᒋᒡ᙮ 2ᒋ ᐸᒋ ᓇᑎᑯᐅᒡ ᒪᒃ ᐸᕆᓯᐊ ᐊ ᐃᑎᑯᒡ, “ᒋᑦ ᐊᔭᔅᑯᐎᐧᑲᓇᐛᐤ ᐊ ᒋᒥᒋᒧᐛᐤ ᐊ ᐊᔭᒥᐊᐅᒋᓯᑲᒡ᙮ ᒐᒂᓐ ᐛᒋ ᐃᑐᑎᒪᒄ ᐊᓐ ᒐᒂᓐ ᐊᑐᒡ ᒋᐸ ᐅᒋ ᐃᑐᑕᑭᓄᐤ ᐊ ᐊᔭᒥᐊᐅᒋᓯᑲᒡ ?”
3ᒋᓴᔅ ᒪᒃ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᔅᒋ ᐃᔨᒥᑕᓇᐛᒐ ᒥᓯᓇᐃᑭᓂᒡ ᑲ ᑎᐸᒋᒪᑭᓄᐅᑦ ᐊᓂᔭ ᒋᓴᐅᒋᒪᐤ ᑎᐱᑦ, ᒥᓯᐛ ᑭᔭ ᐊᓂᔭ ᑲ ᐎᒐᐅᑯᑦ ᐃᔅᐱ ᑲ ᐎ ᒥᒋᓱᒡ᙮ 4ᒋ ᐱᒐᐅᒡ ᒋᓴᒪᓂᑐᐛ ᐎᒋᔨᒡ ᐊᑯ ᑎᐱᑦ ᒂ ᒧᐛᑦ ᐊᓂᔭ ᑲ ᐸᔭᒋᓯᔨᒋ ᐸᒂᓯᑭᓇ, ᐊᑯ ᑲ ᐊᓯᒪᑦ ᐅᐎᒐᐛᑭᓇ᙮ ᒥᒄ ᒪᒃ ᐊᔭᒥᐊᐅᒋᒪᐅᒡ ᒋ ᐃᑕᔨᑕᑯᓱᐅᒡ ᒐᒋ ᒧᐛᒡ ᐅᔭ ᐸᒂᓯᑭᓇ, ᐛᔅ ᐊᐅᑯᓐ ᑲ ᐃᑎᔅᑕᔨᒡ ᐊᔭᒥᐊᐅ ᐎᓱᐛᐅᒥᓯᓇᐃᑭᓂᒡ᙮ ᑎᐱᑦ ᒪᒃ ᓇᒪ ᐅᒋ ᐛᐛᓯᐊᑭᓄᐤ᙮” 5ᒋ ᐃᔅᒋᔄᐤ ᑭᔭ ᒋᓴᔅ, “ᐃᔪᐤ ᐅᑯᓯᓴᓐ ᒪᒃ ᐛᐛᒡ ᐊ ᐊᔭᒥᐊᐅᒋᓯᑲᔨᒡ ᑎᐸᔨᑎᒻ᙮”
ᒋᓴᔅ ᑲ ᒥᓏᒋᐊᑦ ᓇᐸᐛ ᐊ ᐊᔭᒥᐊᐅᒋᓯᑲᔨᒡ
ᒪᑎᔪᐤ 12.9-14; ᒪᕐᒃ 3.1-6
6ᐸᐃᒂᐤ ᒪᒂᒡ ᐊ ᒍᐤ ᐊᔭᒥᐊᐅᒋᓯᑲᔨᒡ, ᒋᓴᔅ ᒋ ᐱᒐᐤ ᐊᔭᒥᐊᐅᒋᐛᐱᒡ ᒐᒋ ᒋᔅᑯᑎᒪᒐᑦ᙮ ᒋ ᑕᐤ ᒪᒃ ᐊᓐᑕ ᓇᐸᐤ ᐅᒥᔪᐅᓐ ᐊ ᒪᔅᑲᔨᒡ᙮ 7ᐊᓐᒡ ᒪᒃ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᑭᔭ ᐸᕆᓯᔨᒡ ᐃᔭᒂ ᒋ ᓂᓇᑭᑐᐛᔨᒪᐅᒡ ᒋᓴᓴ ᒐᒋ ᒥᓏᒋᐃᐛᔨᒂᓂ ᐃᔪᐛ ᒪᒂᒡ ᐊ ᒍᐤ ᐊᔭᒥᐊᐅᒋᓯᑲᔨᒡ᙮ ᒋ ᐎ ᓇᓂᑐᒥᔅᑭᒧᒡ ᑕᓐᑕ ᒐᒋ ᐅᒋ ᒪᒥᓯᒪᒡ ᒋᓴᓴ᙮ 8ᒋᓴᔅ ᒪᒃ ᒋ ᒋᔅᒐᔨᒪᐤ ᑕᓐ ᐊ ᐃᓯ ᒪᒥᑐᓇᔨᑎᒥᔨᒋ᙮ ᒋ ᐃᑕᐤ ᒪᒃ ᐊᓂᔭ ᓇᐸᐛ ᐅᑎᒋᔪᐤ ᑲ ᒪᔅᑲᔨᒡ, “ᐱᓯᑯ, ᐅᑕ ᑕᑕᐅᒡ ᐸᒋ ᓂᐳᐎ᙮” ᒋ ᐱᓯᑯᐤ ᐊᓐ ᓇᐸᐤ, ᒂ ᐃᑐᑕᑦ ᐊᓐᑕ ᑕᑕᐅᒡ᙮
9ᐊᑯ ᒋᓴᔅ ᒂ ᐃᑕᑦ ᐊᓂᔭ ᑲ ᐎ ᒪᒥᓯᒥᑯᑦ, “ᒋᑭ ᑯᒂᒋᒥᑎᓇᐛᐤ, ᑕᓐ ᐊ ᐃᓯ ᐱᑯᓴᔨᒥᑯᔭᐧᒄ ᐎᓱᐛᐅᓐ ᒐᒋ ᐃᑐᑎᒧᐛᒂ ᐊ ᒍᐤ ᐊᔭᒥᐊᐅᒋᓯᑲᒡ᙮ ᑕᓐ ᒪᐅᒡ ᒪᔽᓯᒡ ᒐᒋ ᐃᑐᑎᒥᓐ ᒐᒂᓐ᙮ ᐊ ᒥᔪᑐᑎᒥᓐ ᑭᔭ ᒪᒃ ᐊ ᒥᒋᑐᑎᒥᓐ, ᐊ ᐱᒪᒋᑕᔨᓐ ᑭᔭ ᒪᒃ ᐊ ᓂᓱᐅᓇᒋᑕᔨᓐ ?”
10ᐊᑯ ᒪᒃ ᒋᓴᔅ ᑲ ᑭᓄᐛᐱᒪᑦ ᒥᓯᐛ ᐊᑯ ᒂ ᐃᑕᑦ ᐊᓂᔭ ᓇᐸᐛ ᑲ ᒪᔅᑲᔨᒡ ᐅᑎᒋᔪᐤ, “ᓴᑐᐱᔨᑕ ᔅᑎᒋᔾ᙮” ᒋ ᓴᑐᐱᔨᑕᐤ ᒪᒃ ᐊᓐ ᓇᐸᐤ ᐊᓂᔭ ᐅᑎᒋᔾ ᑭᔭ ᒂ ᒥᓏᒋᑕᑭᓄᐎᒡ, ᒧᔭᒻ ᐊᓂᔭ ᑯᑎᒋᔪᐤ ᐅᑎᒋᔾ ᑲ ᐃᓯ ᒥᔽᔨᒡ ᐊᐅᑯᓐ ᑲ ᐃᓯᓇᑯᓂᔨᒡ ᐊᓂᔭ ᐅᑎᒋᔾ ᑲ ᒪᔅᑲᔨᒡ᙮ 11ᐊᑯ ᒪᒃ ᑲ ᒥᔅᑎ ᒋᔄᓯᒡ ᐊᓐᒡ ᑲ ᐎ ᒪᒥᓯᒪᒡ ᒋᓴᓴ, ᐊᑯ ᒂ ᐃᔭᔨᒺᐛᐃᑯᒡ ᑕᓐ ᒐᒋ ᐃᑐᑐᐛᒡ᙮
ᒋᓴᔅ ᑲ ᐅᑎᓇᑦ ᓂᓱᓴᑉ ᐊᑈᔅᑕᓇ
ᒪᑎᔪᐤ 10.1-4; ᒪᕐᒃ 3.13-19
12ᐸᐃᒂᐤ ᐊ ᒋᓯᑲᔨᒡ ᒋᓴᔅ ᒋ ᐃᑐᑕᐤ ᐱᔅᑯᑎᓇᒡ, ᒐᒋ ᐊᔭᒥᐊᑦ᙮ ᐊᑯᑕ ᑲ ᑕᑦ ᐃᔅᑭᓐ ᑎᐱᔅᑲᐛ ᐊ ᐊᔭᒥᐊᔅᑐᐛᑦ ᒋᓴᒪᓂᑐᐛ᙮ 13ᐃᔅᐱ ᒪᒃ ᐎᔭᐱᓂᔨᒡ ᒋ ᓂᔅᑐᓇᐤ ᐊᓂᔭ ᐊᐛᔪᐛ ᑲ ᓇᓴᐅᑯᑦ, ᐊᑯ ᐛᑎᓇᑦ ᐊᓂᔭ ᓂᓱᓴᑉ ᐅᒋᔅᒋᓄᐊᒧᐛᑭᓇ ᐊᑈᔅᑕᓇ ᒐᒋ ᐃᑎᐱᔨᒋ᙮ ᐊᐅᑯᓐᒡ ᐅᒡ ᑲ ᐱᐸᒥᑎᓯᐛᑭᓄᐎᒡ ᒥᔽᒋᒧᐅᓂᔪᐤ ᒐᒋ ᐛᐎᑕᒡ᙮ 14ᐊᐅᑯᓐᒡ ᒪᒃ ᐅᒡ, ᓴᐃᒥᓐ ᐊᓂᔭ ᒋᓴᔅ ᐱᑕᕐ ᑲ ᐃᓯᓂᐧᑲᑕᑦ, ᑭᔭ ᐱᑕᕐ ᐅᓯᒪ ᐊᓐᑎᕈᐊ, ᑭᔭ ᒋᒥᔅ ᑭᔭ ᒠᓐ, ᐱᓕᑉ ᑭᔭ ᐸᕐᑕᓚᒥᔪᐤ᙮ 15ᒪᑎᔪᐤ ᒪᒃ, ᐊᑯ ᒥᓐ ᑥᒥᔅ, ᒋᒥᔅ, ᐊᓪᐱᔭᔅ ᐅᑯᓴ᙮ ᑭᔭ ᓴᐃᒥᓐ ᑲ ᐊᔭᒥᐊᐛᑎᓯᑦ ᑲ ᐃᓯᓂᐧᑲᑕᑭᓄᐅᑦ᙮ 16ᒍᑎᔅ ᒪᒃ ᑭᔭ ᒋ ᐅᑎᓇᑭᓄᐤ, ᒋᒥᔅ ᐅᑯᓴ᙮ ᑭᔭ ᒍᑎᔅ ᐃᔅᑲᕆᔭᑦ, ᐊᐅᑯᓐ ᐅ ᒐ ᐎᔭᓯᐱᔅᑎᓇᑦ ᒋᓴᓴ᙮
ᒋᓴᔅ ᑲ ᒋᔅᑯᑎᒪᒐᑦ ᑭᔭ ᑲ ᒥᓏᒋᐃᐛᑦ
ᒪᑎᔪᐤ 4.23-25
Luke 6.17-26 (Epiphany-6 Year C)
17ᐃᔅᐱ ᒪᒃ ᒋᓴᔅ ᑲ ᓂᑎᒋᐛᒡ ᐱᔅᑯᑎᓇᒡ, ᐊ ᑕᐱᑐᐛᔨᒡ ᐊᓐᑕ ᒋ ᐃᑐᑕᐅᒡ᙮ ᒥᒐᑦ ᒂ ᓇᓴᑯᑦ ᐃᔪᐛ ᒋ ᑕᔪᐛ ᐊᓐᑕ ᑭᔭ ᒋ ᒥᒐᑎᔪᐛ ᑯᑎᑲ ᐊᐛᔪᐛ, ᓂᓇᐧᑯᐤ ᐊᒋ ᐅᑐᑕᔨᒋ ᐊᓂᔭ ᒍᑎᔭ ᐊᔅᒋᔪᐤ ᐊ ᐃᔅᐱᓴᔨᒡ᙮ ᒋᕈᓯᓕᒥᒡ ᑭᔭ ᑯᑎᑭᒡ ᒋ ᐅᑐᑕᐅᒡ, ᐊᑯ ᑯᑎᑭᒡ ᓯᓱᒡ ᐎᓂᐸᑯᒡ ᑲ ᑎᑯᓂᔨᒋ ᐅᑕᓇᐛ ᑕᐃᕋ ᑭᔭ ᓴᐃᑐᓐ ᑲ ᐃᓯᓂᐧᑲᑕᔨᒋ ᐊᑯᑕ ᑲ ᐅᑐᑕᒡ᙮ 18ᒋ ᑎᑯᓯᓄᐅᒡ ᒐᒋ ᐸᒋ ᓂᑐᑐᐛᒡ ᒋᓴᓴ, ᑭᔭ ᒐᒋ ᒥᓏᒋᐃᑯᒡ ᒥᓯᐛ ᓂᓇᐧᑯᐤ ᐅᑦ ᐃᑕᔅᐱᓇᐅᓄᐛᐛ᙮ ᒋ ᑎᑯᓯᓄᐅᒡ ᑭᔭ ᐊᓐᒡ ᐊᐛᓐᒋ ᑲ ᒥᑯᔅᑲᒋᐃᑯᒡ ᒥᒋ ᐊᒐᒂ, ᒋ ᒥᓏᒋᐊᑭᓄᐅᒡ ᒪᒃ᙮ 19ᒥᓯᐛ ᒪᒃ ᐊᐛᓐ ᒋ ᐎ ᑕᒋᓇᐤ ᒋᓴᓴ, ᐛᔅ ᒥᓏᒋᐃᐛᐤ ᓱᐧᑲᑎᓯᐅᓂᔪᐤ ᒋ ᐅᒋᐱᔪᐤ ᐊ ᑕᔨᒋ᙮ ᑕᑐᐤ ᒪᒃ ᐊᐛᓐ ᑲ ᑕᒋᓇᑦ ᒋ ᒥᓏᒋᐊᑭᓄᐤ᙮
ᒋᓴᔅ ᑲ ᐊᔨᒧᑕᐧᒃ ᒥᔽᔨᑎᒧᐅᓂᔪᐤ ᑭᔭ ᒥᓯᒪᔨᑎᒧᐅᓂᔪᐤ
ᒪᑎᔪᐤ 5.1-12
20ᒋᓴᔅ ᒋ ᑭᓄᐛᐱᒪᐤ ᐊᓂᔭ ᑲ ᓇᓴᐅᑯᑦ, ᐊᑯ ᐊᑕᑦ,
“ᒋ ᓱᐛᔨᑕᑯᓯᓇᐛᐤ ᒋᔨᐛᐤ ᑲ ᒋᔅᑎᒪᑎᓯᔭᒄ ᐊᓄᒡ, ᐛᔅ ᐊᓐᑕ ᒋᓴᒪᓂᑐᐤ ᐅᒋᓴᐅᒋᒪᐅᓂᒡ ᒋ ᒥᓯᓇᓱᓇᐛᐤ᙮
21ᒋ ᓱᐛᔨᑕᑯᓯᓇᐛᐤ ᒋᔨᐛᐤ ᑲ ᓄᑕᐧᑭᑕᔭᒄ ᐊᓄᒡ, ᐛᔅ ᒋᑭ ᒋᔅᐳᐃᑯᓇᐛᐤ᙮
ᒋ ᓱᐛᔨᑕᑯᓯᓇᐛᐤ ᒋᔨᐛᐤ ᑲ ᒪᔭᒄ ᐊᓄᒡ, ᐛᔅ ᒋᑭ ᐸᐱᓇᐛᐤ᙮
22ᒋ ᓱᐛᔨᑕᑯᓯᓇᐛᐤ ᒋᔨᐛᐤ ᑲ ᐛᐧᑲᑎᑯᐅᔭᒄ, ᐊᑲ ᐱᔅᑲᑎᑯᐅᔭᒄ, ᐊ ᒪᔭᔨᒥᑯᐅᔭᒄ ᑭᔭ ᐊ ᒥᒋ ᐊᔨᒧᒥᑯᐅᔭᒄ ᓂᔾ ᐅᒋ ᐊ ᓇᓴᐅᔭᒄ, ᐃᔪᐤ ᐅᑯᓯᓴᓐ᙮”
23“ᒥᔽᔨᑎᒧᒄ ᒪᒃ ᐅ ᐃᑐᑕᑯᐅᔭᒂ, ᑭᔭ ᒂᔅᑯᑎᒄ ᐊ ᐃᔅᐱᔅ ᒥᔽᔨᑎᒪᒄ᙮ ᐛᔅ ᑭᓄᐛᔨᑕᑯᓐ ᐊ ᒥᓴᒡ ᒋᑎᐸᐊᒪᑯᓯᐅᓄᐛᐤ ᒋᒋᒋᓯᑯᒡ᙮ ᐛᔅ ᐊᓐᒡ ᑲ ᐃᑐᑕᑕᑯᒡ ᐊᓂᔭᐧᑲ ᒪᒃ ᐅᑕᐎᐛᐛ ᐊᐅᑯᓐ ᒧᔭᒻ ᑲ ᐃᑐᑐᐛᔨᒋ ᐊᓂᔭᐧᑲ ᐅᒋᔅᒋᐛᐃᒐᓱᐛ᙮
24ᐃᔭᒂ ᒋᔨᐛᐤ ᑲ ᐛᔪᑎᓯᔭᒄ ᐊᓄᒡ, ᐛᔅ ᓇᔅᒡ ᓴᔅ ᒋ ᑭᓄᐛᔨᑕᓇᐛᐤ ᐊ ᐎᔭᔨᑕᒂᒡ ᐱᒪᑎᓯᐅᓐ᙮
25ᐃᔭᒂ ᒋᔨᐛᐤ ᑲ ᑕᐱᒥᒋᓱᔭᒄ ᐊᓄᒡ, ᐛᔅ ᒋᑭ ᓄᑕᐧᑭᑕᓇᐛᐤ᙮
ᐃᔭᒂ ᒋᔨᐛᐤ ᑲ ᐸᐱᔭᒄ ᐊᓄᒡ, ᐛᔅ ᒋᑭ ᒪᓇᐛᐤ᙮
26ᐃᔭᒂ ᒋᔨᐛᐤ ᑲ ᒥᔽᒋᒥᑯᐅᔭᒄ, ᐛᔅ ᐊᓐᒡ ᑲ ᒥᔽᒋᒥᑕᑯᒡ, ᐊᓂᔭᐧᑲ ᒪᒃ ᐅᑕᐎᐛᐛ, ᐊᐅᑯᓐ ᒧᔭᒻ ᑲ ᐃᓯ ᒥᔽᒋᒪᔨᒋ ᒥᒋ ᐅᒋᔅᒋᐛᐃᒐᓱᐛ᙮”
ᒋᓴᔅ ᑲ ᐃᔅᒋᔄᑦ ᒐᒋ ᓴᒋᐊᐧᑯᒡ ᐊᓐᒡ ᑲ ᒥᒐᔨᒥᑕᑯᒡ
ᒪᑎᔪᐤ 5.38-48; 7.12
27“ᐅ ᒪ ᒋᑦ ᐃᑎᓇᐛᐤ ᒋᔨᐛᐤ ᑲ ᓂᑐᑎᒪᒄ᙮ ᓴᒋᐊᐧᑯᒡ ᐊᓐᒡ ᑲ ᒥᒐᔨᒥᑕᑯᒡ, ᒥᔪᑐᑐᐛᐧᑯᒡ ᐊᓐᒡ ᑲ ᐛᐧᑲᑎᑕᑯᒡ᙮ 28ᐊᔭᒥᐊᔅᑎᒧᐛᐧᑯᒡ ᒐᒋ ᓱᐛᔨᒥᑯᒡ ᒋᓴᒪᓂᑐᐛ ᑕᓐ ᐊᓐᒡ ᑲ ᒥᒐᒋᒥᑕᑯᒡ ᑭᔭ ᐊᔭᒥᐊᔅᑎᒧᐛᐧᑯᒡ ᐊᓐᒡ ᐊᑲ ᒧᔭᒻ ᐃᑐᑕᑕᑯᒡ᙮ 29ᒪᒃ ᐊᐛᓐ ᐅᑕᒪᐅᔅᒐ ᓂᐱᑕ ᒋᑕᒥᐧᑭᓂᒡ, ᐊᑯᔅ ᒥᔾ ᒐᒋ ᐅᑕᒪᐅᔅᒃ ᒂᔅᑕᒥᐧᑭᓐ, ᒪᒃ ᐊᐛᓐ ᐅᑎᓇᒐ ᒋᑦ ᐊᑯᐱᔪᐤ ᐊᑯᔅ ᒥᔾ ᒐᒋ ᐊᔭᑦ ᑭᔭ ᐊᓂᔭ ᒋᐱᒍᐎᔭᓂᔪᐤ ᐛ ᐅᑎᓂᒧᒂ᙮ 30ᒥᔾ ᑕᑐᐤ ᐊᐛᓐ ᑕᓐ ᐊ ᐃᓯ ᓂᑐᐛᔨᑎᒪᔅᒃ ᒐᒂᔪᐤ᙮ ᐊᑯ ᒪᒃ ᐊᐛᓐ ᐅᑎᓇᒐ ᒐᒂᔪᐤ ᐊ ᑎᐱᔨᐛᐅᓯᐅᑦ, ᐊᑲᐎᔾ ᒥᓐ ᑲᐤ ᓂᑐᐛᔨᑎᒧᐤ᙮ 31ᐃᑐᑐᐅᒡ ᐊᐛᓐᒋ ᒧᔭᒻ ᑕᓐ ᐊ ᐃᓯ ᐱᑯᓴᔨᒥᑥᐤ ᒐᒋ ᐃᑐᑕᔅᒡ ᑭᔭ ᒋᔾ᙮”
32“ᒐᒂᓐ ᒪᒃ ᓇᔅᒡ ᒋᐸ ᐃᓯᓇᑯᓐ ᒥᒄ ᐊᓐᒡ ᐊᐛᓐᒋ ᑲ ᓴᒋᐃᔅᒡ ᓴᒋᐃᑥᐤ, ᐛᔅ ᐊᐅᑯᓐ ᐊ ᐃᑎᒡ ᑭᔭ ᐎᔨᐛᐤ ᐅᒥᒋᑥᐅᒡ ᒥᒄ ᐊᓂᔭ ᐊᐛᔪᐛ ᑲ ᓴᒋᐃᑯᒡ ᓴᒋᐊᐅᒡ ! 33ᒐᒂᓐ ᒪᒃ ᓇᔅᒡ ᒋᐸ ᐃᓯᓇᑯᓐ ᒥᒄ ᒥᔪᑐᑐᐅᑥᐤ ᐊᓐᒡ ᑲ ᒥᔪᑐᑕᔅᒡ ? ᐛᔅ ᐃᔭᐱᒡ ᐊᐅᑯᓐ ᐊ ᐃᑎᒡ ᐅᒥᒋᑥᐅᒡ, ᒥᔪᑐᑎᐛᐅᒡ ᐊᓂᔪᐛ ᑲ ᒥᔪᑐᑕᑯᒡ᙮ 34ᒐᒂᓐ ᒪᒃ ᓇᔅᒡ ᒋᐸ ᐃᓯᓇᑯᓐ ᒥᒄ ᐊᓐᒡ ᐅᐛᐊᓱᑥᐤ ᒐᒂᔪᐤ, ᐊᓐᒡ ᐊ ᐱᑯᓴᔨᒥᑥᐤ ᒥᓐ ᒐᒋ ᒋᐛᒥᔨᔅᒡ ? ᐛᔅ ᐊᐅᑯᓐ ᐊ ᐃᑎᒡ ᐅᒥᒋᑥᐅᒡ ᐊᐱᒋᑕᐅᒡ ᑭᔭ ᐎᔨᐛᐤ ᒐᒂᔪᐛ᙮ ᑭᔭ ᐃᑕᔨᑎᒧᒡ ᒥᓐ ᑲᐤ ᒐᒋ ᒋᐛᒋᓯᐧᑯᐛᒋᓄᐅᒡ ᑕᓐ ᑲ ᐃᓯ ᐅᐛᐊᑥᐤ ᐊᐛᔪᐛ᙮ 35ᒪᐅᑕ ᒋᐸ ᐃᑎᓐ, ᒋᐸ ᓴᒋᐊᐅᒡ ᐊᓐᒡ ᑲ ᒥᒐᔨᒥᔅᒡ, ᑭᔭ ᒋᐸ ᒥᔪᑐᑐᐛᐅᒡ, ᒋᐸ ᒥᔭᐅᒡ ᑭᔭ ᒐᒂᔪᐤ ᐊ ᐃᓯ ᓂᑐᐛᔨᑎᒪᔅᒡ᙮ ᓇᒪ ᒋᐸ ᐅᒋ ᐱᑯᓴᔨᑕᓐ ᒥᓐ ᒐᒋ ᒋᐛᒥᔨᑯᔨᓐ, ᒐ ᒥᓴᒡ ᒪᒃ ᒋᑎᐸᐊᒪᑯᓯᐅᓐ᙮ ᑭᔭ ᐅ ᐃᑐᑎᒥᓇ ᒋᑭ ᓄᑯᓐ ᐊ ᐅᑦ ᐊᐛᓯᒥᑐᑕᔅᒃ ᒋᓴᒪᓂᑐᐤ, ᒪᐅᒡ ᑲ ᐃᔅᐸᔨᑕᑯᓯᑦ᙮ ᐛᔅ ᒥᔪᑐᑐᐛᐤ ᒥᓯᐛ ᐊᐛᔪᐛ ᐊᑎ ᐊᓂᔭ ᐊᑲ ᓂᓇᔅᑯᒧᔨᒋ ᑭᔭ ᐊᓂᔭ ᑲ ᒥᒋᑥᔨᒋ᙮ 36ᒋᔅᑎᒪᒐᔨᒧᐛ ᑭᔭ ᒋᔾ ᒧᔭᒻ ᒍᑕᐎᔾ ᒋᒋᒋᓯᑯᒡ ᐊ ᑕᑦ ᑲ ᐃᔅᐱᔅ ᒋᔅᑎᒪᒐᔨᒧᐛᑦ᙮”
ᒋᓴᔅ ᑲ ᐃᔅᒋᔄᑦ ᒐ ᐊᑲ ᒋ ᐊᑐᐛᔨᒥᑦ ᑯᑎᒃ ᐊᐛᓐ
ᒪᑎᔪᐤ 7.1-5
37“ᐊᑲᐎᔾ ᑎᐸᔅᑯᓂᒐᒄ, ᑭᔭ ᓇᒪ ᒋᑭ ᐅᒋ ᑎᐸᔅᑯᓂᑯᐛᐤ ᒋᓴᒪᓂᑐᐤ᙮ ᐊᑲᐎᔾ ᓂᓱᐅᓇᒋᒧᐛᒄ ᑭᔭ ᓇᒪ ᒋᑭ ᐅᒋ ᓂᓱᐅᓇᒋᒥᑯᐛᐤ ᒋᓴᒪᓂᑐᐤ᙮ ᐛᐸᔨᑎᒪᒐᒄ ᐊᑯ ᑭᔭ ᒋᔨᐛᐤ ᒐ ᐛᐸᔨᑎᒪᑕᒄ ᒋᓴᒪᓂᑐᐤ᙮ 38ᒥᔨᐛᒄ, ᑭᔭ ᒐ ᒋᐛᒥᔨᑯᐅᔭᒄ᙮ ᒥᔅᑎ ᒋᑭ ᒥᔨᑯᓇᐛᐤ᙮ ᑕᓐ ᐊᔅᐱᔅ ᒥᔨᐛᑦ ᐊᐛᓐ ᒐᒂᔪᐤ ᐊᐅᑯᓐ ᒧᔭᒻ ᒐ ᐃᔅᐱᔅ ᒥᔭᑭᓄᐅᑦ᙮”
39ᒋᓴᔅ ᒪᒃ ᒋ ᐎᑎᒧᐛᐤ ᐅᔭ ᒋᔅᑯᑎᒪᒐᐤ ᑎᐸᒋᒧᐅᓂᔪᐤ ᐊ ᐃᑕᑦ, “ᐊ ᐊᑲ ᐛᐸᑕᐧᒃ ᐊᐛᓐ ᒋᑭ ᒋ ᐊ ᒋᔅᒋᓄᑕᐊᐤ ᑯᑎᑲ ᐊᐛᔪᐛ ᐊ ᐊᑲ ᐛᐸᑎᒥᔨᒋ ? ᓇᒪ ᑭᑈ᙮ ᐛᔅ ᑕᐱᔅᑯᓐ ᒋᑭ ᐳᒋᐱᔪᐅᒡ ᐊ ᒂᐃᑕᐛᐧᑲᔨᒡ᙮ 40ᐊᓐ ᑲ ᒋᔅᑯᑎᒧᐛᑭᓄᐅᑦ ᐊᐛᓐ ᓇᒪᐎᔾ ᐅᔅᑕ ᐃᑕᔨᑕᑯᓱᐤ ᐊ ᐃᑕᔨᑕᑯᓯᔨᒋ ᐊᓂᔭ ᑲ ᒋᔅᑯᑎᒪᑯᑦ᙮ ᐛᔅ ᐃᔅᐱ ᒋ ᐃᓯ ᒋᔅᑯᑎᒧᐛᑭᓄᒐ ᐊᐅᑯᓐ ᒐ ᐃᑕᔨᑕᑯᓯᑦ ᒧᔭᒻ ᐊᓂᔭ ᑲ ᒋᔅᑯᑎᒪᑯᑦ᙮”
41“ᒐᒂᓐ ᐛᒋ ᓇᔅᒡ ᓂᓇᑭᑐᐛᔨᑎᒧᑦ ᒋᐧᑲᓂᔅ ᐊ ᐊᐱᓴᓯᔨᒡ ᐅᐱᓯᓄᐅᓐ ᐊᑲ ᒪᒃ ᓂᓇᑭᑐᐛᔨᑎᒥᐃᑯᔨᓐ ᒋᔾ ᐊ ᐱᓯᓂᔨᓐ ᐊ ᒥᒐᔎᒡ ᒥᔅᑎᒄ ? 42ᑕᓐᑕ ᒐᒋ ᐅᒋ ᐃᑎᑦ ᒋᐧᑲᓂᔅ, ‘ᓂᑭ ᐎᐧᑯᒋᑕᓐ ᒋᐱᓯᓄᐅᓐ, ᐊᑲ ᒪᒃ ᐛᐛᒡ ᒋ ᐛᐸᑎᒥᓐ ᐊᓐ ᒥᔅᑎᒄ ᐊᓐᑕ ᒋᔾ ᒋᔅᒋᓯᑯᒡ ᑲ ᑎᒂᒡ’ ? ᒋᑦ ᐃᑕᔨᒪᐅᒡ ᐊᐛᓐᒋ ᒐᒋ ᐃᑕᔨᒥᔅᒡ ᐊ ᑯᐃᔅᑯᑕᑎᓯᔨᓐ ᐊᑲ ᒪᒃ ᑯᐃᔅᑯᑕᑎᓯᔨᓐ᙮ ᒋᔾ ᑲ ᐊᔭᒥᐊᐧᑲᓱᔨᓐ, ᓂᔅᑎᒻ ᐎᐧᑯᒋᑕ ᐊᓐ ᒥᔅᑎᒄ ᒋᔅᒋᓯᑯᒡ ᑲ ᑎᒂᒡ, ᑭᔭ ᒐᒋ ᓇᐃᐱᔨᓐ᙮ ᐊᑯ ᒪᒃ ᒐ ᐎᐧᑯᒋᑕᐅᑦ ᒋᐧᑲᓂᔅ ᐅᐱᓯᓄᐅᓐ᙮”
ᒥᔅᑎᒄ ᑕᓐ ᐊ ᐃᓯ ᒥᓂᓱᐅᑦ
ᒪᑎᔪᐤ 7.16-20; 12.33-35
43“ᐛᔅ ᒥᔪᒥᓇᑎᑯᒡ ᓇᒪ ᓂᑕᐅᒋᓇ ᐊᓐᑕ ᒥᒋᒥᓇ, ᒪᒃ ᒥᔅᑎᒄ ᐊᑲ ᒥᔪ ᓂᑕᐅᒋᑦ ᓇᒪ ᒋᑭ ᒋ ᓂᑕᐅᒋᓂᔪᐛ ᐊᓐᑕ ᐊ ᒥᔽᓯᔨᒋ ᒥᓂᓴ᙮ 44ᐊᓂᔭ ᑕᓐ ᐊ ᐃᓯ ᓂᑕᐅᒋᑕᑦ ᒥᔅᑎᒄ ᒥᓂᓴ ᐊᑯᑕ ᐛᒋ ᓂᔅᑐᓄᐛᑭᓄᐅᑦ ᒐᒄ ᒥᔅᑎᒄ ᐊᓐ᙮ ᒧᔭᒻ ᐃᔨᒥᓇ ᓇᒪ ᓂᑕᐅᒋᓇ ᐊ ᑲᓱᑕᐛᒡ ᒥᔅᑯᓱᐅᒡ ᒪᒃ ᔪᔎᐛᓂᒡ ᓇᒪ ᓂᑕᐅᒍᐅᒡ ᐅᑐᔅᐱᔭᑎᑯᒡ᙮ 45ᐛᔅ ᐊᐛᓐ ᑲ ᑯᐃᔅᑯᑕᑎᓯᑦ, ᑕᓐ ᐊ ᐃᓯ ᒥᔪ ᐊᔭᑦ ᐅᑕᐃᒡ ᒋᑭ ᒋᔅᒐᔨᑕᑯᓂᔪᐤ ᐅᐱᒪᑎᓯᐅᓂᒡ, ᑭᔭ ᐊᐛᓐ ᐊ ᒥᒐᑎᓯᑦ, ᑕᓐ ᐊ ᐃᓯ ᒪᔭᒡ ᐊᔭᑦ ᐅᑕᐃᒡ ᒋᑭ ᒋᔅᒐᔨᑕᑯᓂᔪᐤ ᐅᐱᒪᑎᓯᐅᓂᒡ᙮ ᐛᔅ ᐊ ᐃᓯ ᐃᔨᒥᑦ ᐊᐛᓐ ᐊᑯᑕ ᐛᒋ ᒋᔅᒐᔨᑕᑯᓯᑦ ᑕᓐ ᐊ ᐃᓯ ᑕᐊᑦ᙮”
ᒋᓴᔅ ᑲ ᐎᑕᐧᒃ ᑎᐸᒋᒧᐅᓂᔪᐤ ᑲ ᓂᓯᔨᒋ ᓇᐸᐛ ᑲ ᒥᒋᐛᐱᒐᔨᒋ
ᒪᑎᔪᐤ 7.24-27
46“ᒐᒂᓐ ᒪᒃ ᐛᒋ ᐃᓯᓂᐧᑲᓯᔭᒄ ᐅᑎᐸᔨᒋᒐᐤ, ᐊᑲ ᒪᒃ ᐃᑐᑎᒪᒄ ᑕᓐ ᐊ ᐃᓯ ᐎᑎᒪᑎᑯᒡ ᒐᒋ ᐃᑐᑎᒪᒄ ? 47ᐊᑯ ᒪᒃ ᒐ ᐎᑎᒪᑎᑯᒡ ᑕᓐ ᐊ ᐃᓯᓇᑯᓯᑦ ᐊᐛᓐ ᑲ ᐸᒋ ᓇᓯᑦ ᑭᔭ ᑲ ᐸᑕᐧᒃ ᑕᓐ ᐊ ᐃᔅᒋᔄᐅᒡ, ᐊ ᐃᑐᑕᐧᒃ ᒪᒃ ᐊᓂᔭ ᒐᒂᔪᐤ ᐊ ᐃᑎᒃ᙮ ᒋᑭ ᐎᑎᒪᑎᓇᐛᐤ ᐊᐛᔪᐛ ᓇᔅᐱᑐᐛᑦ᙮ 48ᒧᔭᒻ ᐊᐛᓐ ᐊ ᐎ ᐎᔨᑲᐳᐅᑕᑦ ᒥᒋᐛᐱᔪᐤ, ᓂᔅᑎᒻ ᑕᒥᒡ ᐃᓯ ᒧᓇᐃᒐᐤ, ᐸᑎᒪ ᐛᑎᑕᐛᑦ ᐊᓯᓂᔭ᙮ ᐊᑯᑕ ᒪᒃ ᐊᓐᑕ ᐊ ᐸᐸᒋᐱᔅᑲᔨᒡ ᐛᔨᑲᐳᐅᑕᑦ ᐊᓂᔭ ᒥᒋᐛᐱᔪᐤ᙮ ᐃᔅᐱ ᐃᔅᒋᐳᑕᔨᒐ ᐊᓐᑕ ᐛᔅᑲ ᐊᓂᔭ ᐎᒡ, ᓇᒪ ᐛᐛᒡ ᒋᑭ ᐅᒋ ᐊᒋᑲᐳᐅᔪᐤ, ᐛᔅ ᓇᔅᒡ ᑕᑈ ᒋ ᒥᔪ ᐊᔨᒋᑲᐳᐅᑕᐤ᙮ ᐊᐅᑯᓐ ᐊ ᐃᓯᓇᑯᓯᑦ ᐊᐛᓐ ᑲ ᑎᓯᐧᑲᒺᑦ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ 49ᐊᐛᓐ ᒪᒃ ᑲ ᐸᑕᐧᒃ ᐊ ᐃᔅᒋᔄᐅᒡ ᐊᑲ ᒪᒃ ᐃᑐᑕᐧᒃ ᐊᐅᑯᓐ ᐊ ᐃᓯᓇᑯᓯᑦ ᒧᔭᒻ ᐊᐛᓐ ᐊᓐᑕ ᐊᔅᒋᒡ ᑲ ᐎᔨᑲᐳᐅᑕᑦ ᒥᒋᐛᐱᔪᐤ ᐊᑲ ᐸᑎᒪ ᐅᓯᑕᑦ ᐊ ᔭᐃᑎᓂᔨᒡ ᐊᓐᑕ ᒐ ᒋᒥᑕᔨᒡ᙮ ᐃᔅᐱ ᒪᒃ ᐃᔅᒋᐳᑕᔨᒐ ᐊᓂᔭ ᐎᒡ, ᑎᐛᒡ ᑲ ᐅᐱᔪᐤ ᑭᔭ ᓇᔅᒡ ᑭᑈ ᓇᓱᓇᑎᓂᔨᒡ ᐊᓂᔭ ᐎᒡ᙮ ᐊᐅᑯᓐ ᐊ ᐃᓯᓇᑯᓯᑦ ᐊᐛᓐ ᐊᑲ ᓂᓇᐃᑎᒺᑦ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮”
Currently Selected:
ᓗᒃ 6: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
