ᓗᒃ 7
7
ᒋᓴᔅ ᑲ ᒥᓏᒋᐃᒪᑦ ᓂᑐᐱᔪᐅ-ᐅᒋᒪᐛ ᐅᑦ ᐊᐱᒋᐊᑭᓂᔪᐛ
ᒪᑎᔪᐤ 8.5-13
1ᐃᔅᐱᔅ ᒋᓴᔅ ᑲᒋ ᐃᓯ ᐊᔨᒧᑕᐧᒃ ᐅᔭ ᒐᒂᔪᐛ ᐊ ᐸᑕᑯᑦ ᐃᔪᐛ ᐊᑯ ᒂ ᐃᑐᑕᑦ ᐊᓐᑕ ᑲᐳᕐᓇᐊᒻ ᑲ ᐃᓯᓂᐧᑲᑕᔨᒡ ᐅᑕᓇᔪᐤ᙮ 2ᒋ ᑕᐤ ᒪᒃ ᐊᓐᑕ ᐸᐃᒄ ᓂᑐᐱᔪᐅ-ᐅᒋᒪᐤ ᓇᔅᒡ ᐊᒋ ᓴᒋᐊᑦ ᐅᑦ ᐊᐱᒋᐊᑭᓇ᙮ ᒪᒂᒡ ᒪᒃ ᓇᔅᒡ ᒋ ᐊᐧᑯᓯᔪᐛ ᐊᓂᔭ ᐅᑦ ᐊᐱᒋᐊᑭᓇ ᒐᑲᑦ ᐊ ᐳᓂᐱᒪᑎᓯᔨᒋ᙮ 3ᐊᑯ ᒪᒃ ᐅ ᓂᑐᐱᔪᐅ-ᐅᒋᒪᐤ ᐃᔅᐱ ᑲ ᐸᑕᐧᒃ ᑕᓐ ᐊ ᐃᑕᒋᒪᑭᓄᔨᒋ ᒋᓴᓴ ᒋ ᐃᑎᓴᐛᐤ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ ᐊᓐᑕ ᒋᓴᓴ ᐊ ᑕᔨᒋ ᒐᒋ ᓂᑐᑎᒧᐛᔨᒋ ᒐᒋ ᐸᒋ ᒥᓏᒋᐊᔨᒋ ᐊᓂᔭ ᐅᑦ ᐊᐱᒋᐊᑭᓇ᙮ 4ᐃᔅᐱ ᒪᒃ ᐅᒡ ᓇᐸᐅᒡ ᐛᑎᑕᒡ ᒋᓴᓴ ᓇᔅᒡ ᑕᑈ ᓱᒃ ᒋ ᐊᔨᐧᑭᒥᐊᐅᒡ ᒐᒋ ᐃᑐᑎᒥᔨᒋ ᐅᔭᔪᐤ ᐊ ᐃᑕᒡ, “ᓇᔅᒡ ᑕᑈ ᓱᒃ ᐱᑯᓴᔨᑎᒥᐃᑯᐤ ᒐᒋ ᒥᓏᒋᐊᑭᓄᔨᒋ ᐅᑦ ᐊᐱᒋᐊᑭᓇ ᐅ ᓂᑐᐱᔪᐅ-ᐅᒋᒪᐤ᙮ ᐃᑕᔨᑕᑯᓱᐤ ᒪᒃ ᒐᒋ ᐃᑐᑎᒧᐛᑭᓄᐅᑦ ᐅᔭᔪᐤ, 5ᐛᔅ ᓴᒋᐊᐤ ᓂᑦ ᐃᔨᒥᓇᓇ ᑭᔭ ᓂᒋ ᐅᓯᑥᑯᓇᓐ ᐊᔭᒥᐊᐅᒋᐛᐱᔪᐤ᙮” 6ᐊᑯ ᒋᓴᔅ ᒂ ᐎᒐᐛᑦ᙮
ᐃᔅᐱ ᒪᒃ ᐱᔭᓱᐛᐸᑎᒧᐛᒡ ᐊᓂᔭ ᐎᒋᔪᐤ ᐊᑯ ᐊᓐ ᓂᑐᐱᔪᐅ-ᐅᒋᒪᐤ ᒂ ᐃᑎᓴᐛᑦ ᐅᐎᒐᐛᑭᓇ ᒋᓴᓴ ᐊ ᑕᔨᒋ ᒐᒋ ᑕᔨᒋ, “ᐅᑎᐸᔨᒋᒐᐤ, ᐊᑲᐎᔾ ᐊᔨᒥᐃᓱᐤ, ᐛᔅ ᓇᒪ ᓂ ᒋᔅᑕᔨᑕᑯᓯᓐ ᒐᒋ ᐸᒋ ᐱᒐᔨᓐ ᓂᒋᒡ, 7ᑭᔭ ᓇᒪ ᓂ ᒋᔅᑕᔨᑕᑯᓯᓐ ᒐᒋ ᓂᒋᔅᑲᑕᓐ᙮ ᒥᒄ ᒪᒃ ᐃᔭᐱᒡ ᒪᒃ ᒧᔅ ᐃᔅᒋᔄᔨᓇ ᒐᒋ ᒥᓏᑎᓯᑦ ᓂᑦ ᐊᐱᒋᐊᑭᓐ ᒋᑭ ᒥᓏᑎᓯᐤ᙮ 8ᐛᔅ ᑭᔭ ᓂᔾ ᐃᑕᐅᒡ ᓄᒋᒪᒥᒡ ᐊ ᐱᓯᒋᐃᒂᐤ ᑭᔭ ᐃᑕᐅᒡ ᐊᓯᒪᑭᓂᓯᒡ ᐊ ᐎᓱᒥᒂᐤ᙮ ᐊ ᐃᑎᒃ ᐸᐃᒄ ᐊᓯᒪᑭᓂᔅ ‘ᐊᓐᑕ ᐃᑐᑕ,’ ᑎᐛᒡ ᐊᑯᑕ ᐊᓐᑕ ᐊ ᐃᑐᑕᑦ᙮ ᐊᑯ ᑯᑎᒃ ᐊ ᐃᑎᒃ, ‘ᐊᔅᑎᒻ,’ ᑎᐛᒡ ᑎᑯᓯᓄᐤ᙮ ᐊᑯ ᑭᔭ ᑯᑎᒃ ᐊ ᐃᑎᒃ ᓂᑦ ᐊᐱᒋᐊᑭᓐ, ‘ᐅ ᒪ ᐃᑐᑕ,’ ᐊᔪᐅᒄ ᐊᓂᔭ ᐊ ᐃᑐᑕᐧᒃ᙮”
9ᐃᔅᐱᔅ ᒋᓴᔅ ᐱᔭᑕᐧᒃ ᐅᔭ ᓇᔅᒡ ᑕᑈ ᒋ ᒪᒥᒋᐃᑯᐤ ᐅᑕᑈᑎᒧᐅᓂᔪᐤ᙮ ᐊᑯ ᒂ ᒂᔅᒋᑲᐳᔅᑐᐛᑦ ᐊᓂᔭ ᑲ ᓇᓴᐅᑯᑦ ᒂ ᐃᑕᑦ, “ᒋᑦ ᐃᑎᓇᐛᐤ, ᓇᒪ ᐛᐛᒡ ᐅᑕ ᐃᔅᕋᐃᓕᒡ ᐊᔅᒄ ᓂ ᐅᒋ ᐛᐱᒪᐤ ᐊᐛᓐ ᐊ ᐃᔅᐱᔅ ᓱᒋᑕᑈᑕᐧᒃ᙮”
10ᐃᔅᐱ ᒪᒃ ᒥᓐ ᑲᐤ ᒂ ᒋᐛᒡ ᐊᓐᒡ ᑲ ᐃᑎᓴᐛᑭᓄᐎᒡ ᒋᓴᓴ ᐊ ᑕᔨᒡ, ᒋ ᐛᐱᒪᐅᒡ ᐊᓂᔭ ᐊᐱᒋᐊᑭᓇ ᑲ ᐊᐧᑯᓯᔨᒋ ᐊ ᒥᔪ ᐊᔭᔨᒋ᙮
ᐅᔅᒋᓂᒋᓱᐤ ᑲ ᐅᓂᔅᑲᓇᑭᓄᐅᑦ ᓂᐳᐅᓂᒡ ᐅᒡ
11ᐸᑎᒪ ᒪᒃ ᒋᓴᔅ ᒋ ᐃᑐᑕᐤ ᐅᑕᓇᒡ ᓇᐃᓐ ᐊ ᐃᓯᓂᐧᑲᑕᔨᒡ᙮ ᒥᒐᑦ ᐊᐛᔪᐛ ᑭᔭ ᐅᒋᔅᒋᓄᐊᒧᐛᑭᓇ ᒋ ᐎᒐᐅᑯᐤ᙮ 12ᐃᔅᐱ ᑲ ᐅᑎᑕᒡ ᐊᓐᑕ ᐊ ᐅᒋ ᐱᒐᓄᐎᒡ ᐊᓂᔭ ᐅᑕᓇᔪᐤ ᒋ ᓂᒋᔅᑯᐛᐅᒡ ᐃᔪᐛ ᐊ ᐅᒋ ᐱᒧᑕᐊᔨᒋ ᐊᒋ ᐳᓂᐱᒪᑎᓯᔨᒋ ᓇᐸᐛ, ᒐ ᓇᐅᔅᑕᒡ᙮ ᐅᑲᐎᔭ ᒪᒃ ᐊᓂᔭ ᓇᐸᐤ ᒋ ᐸᐃᑯᓯᔪᐛ᙮ ᐊᐅᒄ ᒪᒃ ᐊᓂᔭ ᒥᒄ ᑲ ᐸᐃᑯᓯᑯᐱᓇᓂ ᐅᑯᓴ ᐊᓐ ᐃᔎᐤ᙮ ᒋ ᒥᒐᑎᔪᐛ ᒪᒃ ᐊᐛᔪᐛ ᐊᒋ ᐎᒐᐅᑯᑦ ᐊ ᐱᒥᓯᒪᑭᓄᔨᒋ ᐊᓂᔭ ᐅᑯᓴ᙮ 13ᐃᔅᐱ ᒪᒃ ᐅᑎᐸᔨᒋᒐᐤ ᐎᔭᐱᒪᑦ ᐊᓂᔭ ᐃᔎᐛ, ᓇᔅᒡ ᒋ ᒋᔅᑎᒪᒐᔨᒪᐤ ᐊᑯ ᒂ ᐃᑕᑦ, “ᐊᑲᐎᔾ ᒪᒄ᙮”
14ᒋ ᓇᑎᒻ ᐊᓂᔭ ᑕᑎᓂᑭᓂᔪᐤ ᒂ ᑕᒋᓇᐧᒃ ᑭᔭ ᐊᓐᒡ ᑲ ᑕᐧᑯᓇᒡ ᐊᓂᔭ ᒋ ᒋᐱᒋᑲᐳᐅᒡ᙮ ᐊᑯ ᒋᓴᔅ ᒂ ᐃᔅᒋᔄᑦ, “ᐅᓂᔾ ᐅᔅᒋᓂᒋᓱᐤ᙮” 15ᐊᑯ ᐊᓐ ᑲ ᓂᐱᑦ ᓇᐸᐤ ᒂ ᐅᒋ ᐊᓯᒥᑎᐱᑦ, ᒂ ᐅᒋ ᐃᔨᒥᑦ ᐊᑯ ᒋᓴᔅ ᑲᐤ ᒂ ᒥᔭᑦ ᐊᓂᔭ ᐃᔎᐛ ᐊᓂᔭ ᐅᑯᓯᔪᐛ᙮
16ᒥᓯᐛ ᒪᒃ ᐊᓐᑕ ᑲ ᑎᓯᒡ ᐊᐛᓐᒋ ᒋ ᓴᒋᓱᐅᒡ ᐊᑯ ᒂ ᒋᔅᑕᒋᒪᒡ ᒋᓴᒪᓂᑐᐛ ᐊ ᐃᔅᒋᔄᒡ, “ᔅᒋ ᐅᑎᑎᑯᓄᐤ ᐊ ᒋᔅᑕᔨᑕᑯᓯᑦ ᐅᒋᔅᒋᐛᐃᒐᓱᐤ᙮ ᑭᔭ ᒋ ᐃᔅᒋᔄᐅᒡ, ᒋᓴᒪᓂᑐᐤ ᐸᒋ ᐎᒋᐊᐤ ᐅᑦ ᐃᔨᒪ᙮” 17ᒥᓯᐛ ᒪᒃ ᐊ ᐃᔅᐱᑎᔅᑭᒥᑲᔨᒡ ᒍᑎᔭ ᐊᔅᒋᔪᐤ ᐊᓐᑕ ᒪᒃ ᐛᔅᑲ ᒋ ᐸᑕᑯᓂᔪᐤ ᒋᓴᔅ ᑕᓐ ᑲ ᐃᑎᑦ᙮
ᒋᓴᔅ ᑲ ᐊᔨᒧᒪᑦ ᒠᓐ ᐅᓯᑲᐃᑕᒐᐛ
ᒪᑎᔪᐤ 11.2-19
18ᒠᓐ ᐅᓯᑲᐃᑕᒐᐤ ᐅᒋᔅᒋᓄᐊᒧᐛᑭᓇ ᒋ ᐎᑎᒪᑯᐤ ᒥᓯᐛ ᒐᒂᔪᐤ ᑕᓐ ᑲ ᐃᓯ ᐃᑐᑎᒥᔨᒋ ᒋᓴᓴ᙮ ᐊᑯ ᒠᓐ ᒂ ᐎᓴᒪᑦ ᓂᓱ ᐅᒋᔅᒋᓄᐊᒧᐛᑭᓇ᙮ 19ᒂ ᐃᑎᓴᐛᑦ ᐅᔭ ᒐᒋ ᐃᓯ ᑯᒂᒋᒪᔨᒋ ᐅᑎᐸᔨᒋᒐᐛ, “ᐊᐅᒄ ᐊ ᒋᔾ ᙭ ᐊᓐ ᒋᐸ ᑎᑯᓯᓂᑯᐱᓇ ᑭᔭ ᒪᒃ ᐊᔅᒄ ᒐ ᐊᓱᐛᐱᒪᒋᑦ ᑯᑎᒃ ᒐᒋ ᑎᑯᓯᐧᒃ ?”
20ᐊᑯ ᒪᒃ ᐃᔅᐱ ᐛᑎᑕᒡ ᒋᓴᓴ ᒋ ᐃᑕᐅᒡ, “ᒠᓐ ᐅᓯᑲᐃᑕᒐᐤ ᓂ ᐸᒋ ᐃᑎᓴᐅᑯᓇᓐ ᒐᒋ ᑯᒂᒋᒥᑕᒡ, ᐊᐅᒄ ᐊ ᒋᔾ ᙭ ᐊᓐ ᒋᐸ ᐸᒋ ᐃᑎᓴᐛᑭᓄᐤ ᑭᔭ ᒪᒃ ᐊᔅᒄ ᒐ ᐊᓱᐛᐱᒪᒋᑦ ᑯᑎᒃ ᒐᒋ ᑎᑯᓯᐧᒃ ?”
21ᒪᒂᒡ ᒪᒃ ᐊᓂᔭᔪᐤ ᒋᓴᔅ ᒋ ᒥᓏᒋᐊᐤ ᒥᒐᑦ ᐊᐛᔪᐛ, ᓂᓇᐧᑯᐤ ᐊ ᐃᑕᔅᐱᓇᔨᒋ, ᑭᔭ ᒥᒋ ᐊᒐᒂ ᐊᒋ ᐎᐎᑎᓴᐛᑦ ᑭᔭ ᐊᒋ ᐃᑐᑐᐛᑦ ᐊᓂᔭᔪᐛ ᐊᑲ ᐛᐸᑎᒥᔨᒋ ᒐᒋ ᐛᐸᑎᒥᔨᒋ᙮ 22ᐊᑯ ᒋᓴᔅ ᐊ ᐎᑎᒧᐛᑦ ᒋ ᐃᑕᐤ, “ᒋᐛᒄ, ᒐ ᐎᑎᒧᐛᐧᒄ ᒠᓐ ᑕᓐ ᑲ ᐃᓯ ᐛᐸᑎᒪᒄ ᑭᔭ ᑕᓐ ᑲ ᐃᓯ ᐸᑎᒪᒄ᙮ ᐎᑎᒧᐛᐧᒄ ᐊ ᐛᐸᑎᒥᔨᒋ ᐊᓂᔭ ᐊᑲ ᐅᒋ ᐛᐸᑎᒥᔨᒋ, ᐊ ᐱᒧᑕᔨᒋ ᐊᓂᔭ ᐊᑲ ᐅᒋ ᐱᒧᑕᔨᒋ, ᑭᔭ ᐊ ᐸᔭᒋᓯᔨᒋ ᐊᓂᔭ ᑲ ᐊᔭᔨᒋ ᐊ ᒪᔭᑎᓂᔨᒡ ᐊ ᐅᒥᒋᓇᓄᐎᒡ᙮ ᑭᔭ ᐊ ᐸᑎᒥᔨᒋ ᐊᓂᔭ ᐊᑲ ᐅᒋ ᐸᑎᒥᔨᒋ᙮ ᑭᔭ ᒥᓐ ᑲᐤ ᐊ ᐅᓂᔅᑲᔨᒋ ᐊᓂᔭ ᑲ ᓂᐱᔨᒋ᙮ ᑭᔭ ᒥᔽᒋᒧᐅᓂᔪᐤ ᐊ ᐛᐎᑎᒧᐛᑭᓄᔨᒋ ᐊᓂᔭ ᑲ ᒋᔅᑎᒪᑎᓯᔨᒋ᙮ 23ᓱᐛᔨᑕᑯᓱᐤ ᐊᓐ ᐊᐛᓐ ᒐ ᐊᑲ ᐊᑐᐛᔨᒥᒂ᙮”
24ᐃᔅᐱ ᒪᒃ ᑲ ᔅᑐᑕᔨᒋ ᐊᓂᔭ ᒠᓐ ᑲ ᐃᑎᓴᐛᑦ ᒋᓴᓴ ᐊ ᑕᔨᒋ ᐊᑯ ᒋᓴᔅ ᒂ ᐊᔨᒧᒪᑦ ᒠᓇ ᐊᓐᑕ ᐊ ᒥᒐᑎᓇᓄᐎᒡ ᐊ ᐃᔅᒋᔄᑦ, “ᐊᐛᓐ ᑲ ᐃᑕᔨᒪᒄ ᒐ ᐛᐱᒪᒄ ᐃᔅᐱ ᑲ ᓂᑐᐛᐱᒪᒄ ᒠᓐ ᓇᑕ ᐸᐧᑯᑎᔅᑭᒥᑲᒡ ? ᒧᔭᒻ ᒥᔅᑯᓯ ᑕᓐ ᐊ ᐃᑕᔅᑎᒡ ᒥᒄ ᐊᓐᑕ ᐊ ᐃᓯ ᔪᑎᒡ ᐊ ᐃᓯ ᓄᐛᔭᔅᑎᒡ ᐊᐅᑯᓐ ᐊ ᐃᑕᔨᑕᑯᓯᑦ ᐊᐛᓐ ᓇᔅᒡ ᐊ ᓂᓱᐅᓇᒋᒪᑭᓄᐅᑦ ? ᐊᐅᑯᓐ ᐊ ᑲ ᐃᑕᔨᒪᒄ ᒠᓐ ᐊ ᐃᑕᔨᑕᑯᓯᑦ ? 25ᐊᐛᓐ ᒪᒃ ᑲ ᐃᑕᔨᒪᒄ ᒐ ᐛᐱᒪᒄ ? ᓇᒪ ᒂᔄᓐ ᐎᔾ ᐊᐛᓐ ᐊ ᒥᔽᔅᐱᓱᑦ᙮ ᐛᔅ ᐊᓐᒡ ᑲ ᒥᔽᔅᐱᓱᒡ ᓇᔅᒡ ᑕᑈ ᐛᔪᑎᓯᐅᒡ, ᐊᓐᑕ ᒪᒃ ᒋᓴᐅᒋᒪᐛ ᐎᒋᔨᒡ ᐊᑯᑕ ᐊ ᑕᒡ᙮ 26ᐊᐛᓐ ᒪᒃ ᐅ ᐊᓐᑕ ᑲ ᓂᑐᐛᐱᒪᒄ ? ᐊᐛᓐ ᐊ ᐊ ᐅᒋᔅᒋᐛᐃᒐᓱᐅᑦ ? ᓂᐦᐃ, ᒋ ᐎᑎᒪᑎᓇᐛᐤ ᐊᐅᒄ ᐅᒋᔅᒋᐛᐃᒐᓱᐤ ᒠᓐ, ᐎᔾ ᐃᐛᒃ ᐃᑕᔨᑕᑯᓱᐤ ᐃᔅᐱᔅ ᑯᑎᒃ ᐊᐛᓐ ᑲ ᐅᒋᔅᒋᐛᐃᒐᓯᐅᑦ᙮ 27ᐊᐅᒄ ᐅ ᒠᓐ ᑲ ᐊᔨᒧᒪᑭᓄᐅᑦ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᑲ ᐃᑎᔅᑕᒡ,
ᓂᑭ ᓂᑲᓂᑎᓯᐛᐤ ᐊᐛᓐ ᒐᒋ ᐊᔭᔅᑯᐎᐧᑲᐧᒃ ᐊᓂᔭ ᒪᔅᑭᓇᔪᐤ ᐊᓐᑕ ᒐ ᐱᒧᑕᐅᑦ᙮”
28ᒋᓴᔅ ᒪᒃ ᒋ ᐃᑕᐤ, “ᒋ ᐎᑎᒪᑎᓇᐛᐤ, ᑕᑐᐤ ᐅᒋᔅᒋᐛᐃᒐᓱᒡ ᑲ ᐱᒪᑎᓯᒡ ᓇᒪ ᐃᐛᒃ ᐃᑕᔨᑕᑯᓱᐅᒡ ᑕᓐ ᐊ ᐃᑕᔨᑕᑯᓯᔨᒋ ᒠᓐ ᐅᓯᑲᐃᑕᒐᐛ᙮ ᐃᔭᐱᒡ ᒪᒃ ᐊᓐ ᐊᐛᓐ ᒪᐅᒡ ᔭᓯᒄ ᑲ ᐃᑕᔨᑕᑯᓯᑦ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ ᐃᐛᒃ ᐎᔾ ᒋᔅᑕᔨᑕᑯᓱᐤ ᐃᔅᐱᔅ ᒠᓇ᙮”
29ᒥᓯᐛ ᒪᒃ ᐊᐛᔪᐛ ᒋ ᓂᑐᑕᑯᐤ ᒋᓴᔅ ᐛᐛᒡ ᐊᓂᔭ ᒪᐅᒡ ᑲ ᒥᒐᑎᓯᔨᒋ ᑲ ᐃᑕᔨᒪᑭᓄᔨᒋ, ᐊᓂᔭ ᑭᑈ ᑲ ᒪᒧᓴᒋᓂᒥᔨᒋ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᔨᒋ᙮ ᐊᐅᑯᓐᒡ ᐅᒡ ᑲ ᓂᓇᐃᑎᒧᐛᒂ ᐊᓂᔭᔪᐤ ᑕᓐ ᑲ ᐃᓯ ᓂᑐᐛᔨᑎᒥᔨᒋ ᒋᓴᒪᓂᑐᐛ, ᒋ ᓯᑲᐃᑕᑯᐛᑯᓯᐱᓐᒡ ᒠᓇ᙮ 30ᐊᑯ ᐊᓐᒡ ᐸᕆᓯᔨᒡ ᑭᔭ ᐊᓐᒡ ᑲ ᒋᔅᑯᑎᒪᒐᒡ ᐊᔭᒥᐊᐅ ᐎᓱᐛᐅᓂᔪᐤ ᒋ ᐊᑐᐛᔨᑎᒧᐛᐅᒡ ᐊᓂᔭ ᑕᓐ ᑲ ᐃᑎᓱᒧᐛᔨᒋ ᒋᓴᒪᓂᑐᐛ᙮ ᓇᒪ ᐅᒋ ᓂᑐᐛᔨᑎᒧᒡ ᒐᒋ ᓯᑲᐃᑕᑯᒡ ᒠᓇ᙮
31ᐊᑯ ᒪᒃ ᒋᓴᔅ ᒂ ᐃᔅᒋᔄᑦ, “ᑕᓐ ᐊ ᐃᑕᔨᑕᑯᓯᒡ ᐊᓄᒡ ᐊᐛᓐᒋ ᐊᓄᒡ ᑲ ᐱᒪᑎᓯᒡ ? 32ᒪᐅ ᐊ ᐃᑕᔨᑕᑯᓯᒡ᙮ ᒧᔭᒻ ᐊᐛᓯᒡ ᐊᓐᑕ ᐊ ᒪᑐᐛᒡ ᐎᐎᑎᒥᒡ ᐊᑲ ᒪᒃ ᒋ ᓂᓇᐊᔨᑎᒥᐃᑐᒡ ᑕᓐ ᐛ ᐃᓯ ᒪᑐᐛᒡ᙮ ᐊ ᑕᑈᑎᑐᒡ, ᐊ ᐃᔅᒋᔄᒡ,
‘ᐊ ᓂᐳᐅᓇᓄᐅᒡ ᓂᒋ ᐎ ᐃᓯ ᒪᑐᐛᓇᓐ, ᐊ ᒋᔍᐛᐱᒐᔭᒡ ᐊ ᑎᔭᒡ, ᓇᒪ ᒪᒃ ᒋ ᐅᒋ ᓂᒥᓇᐤ,
ᑭᔭ ᓂᒋ ᓂᑭᒧᓇᓐ ᐊ ᒋᔅᑎᒪᒋᑕᒂᒋ ᓂᑭᒧᐅᓇ ᓇᒪ ᒪᒃ ᒋ ᐅᒋ ᒪᓇᐛᐤ᙮’
33ᐃᔅᐱ ᒪᒃ ᒠᓐ ᐅᓯᑲᐃᑕᒐᐤ ᑲ ᑎᑯᓯᐧᒃ ᓇᒪ ᐊᓯᑯᒻ ᐅᒋ ᒥᒋᓱᐤ, ᓇᒪ ᑭᔭ ᐅᒋ ᒥᓄᐤ ᓱᒥᓇᐳᔪᐤ, ᔅᒋ ᐃᑕᐛᐤ ᒪᒃ ᒥᒋ ᐊᒐᒂ ᐊ ᐱᒋᔅᑲᑯᑦ᙮ 34ᒋ ᐸᒋ ᑎᑯᓯᓄᐤ ᐃᔪᐤ ᐅᑯᓯᓴᓐ ᐊ ᒥᒋᓱᑦ ᑭᔭ ᐊ ᒥᓐᑦ᙮ ᔅᒋ ᐃᔅᒋᔄᓇᐛᐤ ᒪᒃ, ‘ᑭᓄᐛᐱᒪᐧᒄ ᒪ ᐅ ᓇᐸᐤ, ᐊᔪᐛᒃ ᑲ ᐅᑲᓯᒋᒥᑦ ᑭᔭ ᒋᒋᐛ ᐎᒋᐸᐤ, ᐊ ᐎᒐᐛᑭᓂᑦ ᐅᒥᒐᑎᓯᐛ, ᑭᔭ ᐊᓂᔭᔪᐛ ᑲ ᒪᒧᓴᒋᓂᒥᔨᒋ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᔨᒋ᙮’ 35ᐊᓐᒡ ᑲ ᑕᑈᑎᒺᒡ ᒋᓴᒪᓂᑐᐛ ᐅᑭᒐᑕᐛᔨᑎᒧᐅᓂᔪᐤ ᒋᑭ ᓄᑯᑕᐅᒡ ᐅᐱᒪᑎᓯᐅᓄᐛᒡ ᑕᑈ ᐊ ᒐᔅᑎᓇᑕᔨᑕᑯᓂᔨᒡ ᒋᓴᒪᓂᑐᐛ ᐅᑭᒐᑕᐛᔨᑎᒧᐅᓂᔪᐤ᙮”
ᒋᓴᔅ ᑲ ᑐᒥᓂᒥᔨᒋ ᐅᓯᑕ ᑲ ᒥᒐᑎᓯᔨᒋ ᐃᔎᐛ
Luke 7.36-8.3 (Proper-6 Year C)
36ᒋᓴᔅ ᐸᐃᒂᐤ ᒋ ᐎᓴᒥᑯᐤ ᐸᕆᓯᐊ ᓴᐃᒥᓐ ᐊ ᐃᓯᓂᐧᑲᓱᔨᒋ ᒐᒋ ᐎᒋᒥᒋᓱᒪᑦ, ᑭᔭ ᒂ ᐃᑐᑕᑦ ᐊᓐᑕ ᐎᒋᔨᒡ ᐊᑯ ᒂ ᐛᐛᔨᐱᑦ᙮ 37ᐊᓐᑕ ᒪᒃ ᐊᓂᔭ ᐅᑕᓇᔪᐤ ᒋ ᑕᐤ ᐃᔎᐤ ᓇᔅᒡ ᐊ ᒥᒐᑎᓯᑦ᙮ ᐃᔅᐱ ᒪᒃ ᐊᓐ ᐃᔎᐤ ᐱᔭᑕᐧᒃ ᒋᓴᓴ ᐊᒋ ᐎᓴᒪᑭᓄᔨᒋ ᐊᓐᑕ ᐊᓂᔭᔪᐛ ᐸᕆᓯᐊ ᐎᒋᔨᒡ ᒐᒋ ᒥᒋᓱᔨᒋ, ᒋ ᐃᑐᑕᐤ ᐊᓐᑕ, ᐊ ᐃᑐᑕᑦ ᐊ ᒥᔽᓯᔨᒡ ᐳᑕᔪᐤ ᐊ ᐊᓯᓂᐅᔨᒡ, ᐊ ᐎᒋᒪᑯᓯᔨᒡ ᑐᒥᓂᑭᓂᔪᐤ ᐊᓐᑕ ᐊ ᐱᒋᔅᑎᓂᔨᒡ᙮ 38ᒪᒂᒡ ᒪᒃ ᒋᓴᔅ ᐊ ᐅᐱᒪᓯᐧᒃ ᐊᓐᑕ ᐊ ᒥᒋᓱᒡ, ᐊᓐ ᐃᔎᐤ ᒋ ᓂᐳᐤ ᐊᓐᑕ ᐃᑕᒐ ᒋᓴᓴ ᐅᓯᑎᔨᒡ, ᐊ ᒪᑦ᙮ ᐊᓂᔭ ᒪᒃ ᐊ ᐅᒋᐧᑯᐛᐱᑦ ᒋ ᓂᐱᐎᑕᐛᐤ ᒋᓴᓴ ᐅᓯᑎᔪᐛ᙮ ᐊᑯ ᒂ ᐅᒋᒋᐧᑯᓂᐱᑦ ᐅᐱᔎᐅᓐ ᐊ ᐊᐱᒋᑕᑦ ᐊ ᐸᒂᓯᑕᓇᑦ᙮ ᑭᔭ ᐊ ᓱᐛᔨᑎᒺᑦ ᑭᔭ ᐊ ᑐᒥᓂᒺᑦ ᐊᓂᔭ ᐊ ᐎᒋᒪᑯᓯᔨᒡ ᑐᒥᓂᑭᓂᔪᐤ᙮
39ᐊᓐ ᒪᒃ ᐸᕆᓯ ᑲ ᐎᓴᒪᑦ ᒋᓴᓴ, ᐃᔅᐱ ᐎᔭᐱᒪᑦ ᐊᓂᔭ ᐃᔎᐛ ᐊᓂᔭ ᐊ ᐃᑎᔨᒋ ᒋ ᐃᑕᔨᒪᐤ, “ᒋᐸ ᒋᔅᒐᔨᒪᐤ ᐅᔭ ᐃᔎᐛ ᐊᔅᐱᔅ ᒥᒐᑎᓯᔨᒋ ᑲ ᑕᒋᓂᑯᑦ ᑕᑈ ᐊ ᐅᒋᔅᒋᐛᐃᒐᓱᐅᒂ᙮”
40ᒋᓴᓴ ᒂ ᐃᔨᒥᐃᑯᑦ ᐊ ᐃᑎᑯᑦ, “ᓴᐃᒥᓐ, ᒋ ᐎ ᐃᑎᑎᓐ ᒐᒂᓐ᙮” ᓴᐃᒥᓐ ᒂ ᐃᔅᒋᔄᑦ, “ᒋᔅᑯᑎᒪᒐᓱᐤ, ᐸᒋ ᐎᑎᒧᐎ ᒐᒂᓐ ᐊᓐ᙮”
41ᐊᑯ ᒋᓴᔅ ᒂ ᑎᐸᒋᒧᔅᑐᐛᑦ ᐊ ᐃᑕᑦ, “ᒋ ᓂᓱᒡ ᓇᐸᐅᒡ ᐊᒋ ᒥᓯᓇᐊᒧᐛᒡ ᓇᐸᐛ ᓱᓇᔭᔪᐤ᙮ ᐸᐃᒄ ᐊᓐ ᐱᑕᑕᒡ ᑕᑐᐤ ᒥᑕᓯᒥᑎᓄᐤ ᒋ ᒥᓯᓇᐊᒧᐛᐤ ᐊᑯ ᐊᓐ ᑯᑎᒃ ᐱᑕᑕᒡ ᑕᑐᔪᐤ᙮ 42ᓇᒪ ᒪᒃ ᐅᒋ ᒋᓯᐧᑲᑯᐤ ᑕᐱᔅᑯᓐ ᐊᓂᔭ ᓇᐸᐛ ᐊᑯ ᒂ ᑲᓯᓯᓇᐊᒧᐛᑦ ᐊᓂᔭ ᑕᓐ ᒋᐸ ᐃᔅᐱᔅ ᒋᓯᐧᑲᑯᐤ᙮ ᑕᓐ ᒪᒃ ᐊᓂᔭᔪᐛ ᐊ ᓂᓯᔨᒋ ᓇᐸᐛ ᐃᐛᒃ ᒐ ᓴᒋᐃᑯᑦ ?”
43ᓴᐃᒥᓐ ᒪᒃ ᒋ ᐃᑕᐤ, “ᑭᑈ ᐊᓂᔭ ᒪᐅᒡ ᒥᔅᑎ ᑲ ᒥᓯᓇᐊᒪᑯᑦ ᐊᐅᑯᓂ ᐊᓂᔭ ᒪᐅᒡ ᒐ ᓴᒋᐃᑯᑦ᙮” ᒋᓴᔅ ᒂ ᐃᑕᑦ, “ᓂᐦᐃ, ᒋ ᑕᑈᓐ᙮”
44ᐊᑯ ᐊᓂᔭ ᐃᔎᐛ ᒂ ᑭᓄᐛᐱᒪᑦ ᒋᓴᔅ ᐊᑯ ᒂ ᐃᑕᑦ ᐊᓂᔭ ᓴᐃᒥᓇ, “ᒋ ᐛᐱᒪᐤ ᐊ ᐅ ᐃᔎᐤ ᑕᓐ ᐊ ᐃᑎᑦ ? ᑲ ᐸᒋ ᐱᒐᔭᓐ ᐅᑕ ᒋᒋᒡ ᓇᒪ ᐛᐛᒡ ᒋ ᐅᒋ ᐸᒋ ᒥᔨᓐ ᓂᐱᔾ ᒐᒋ ᒋᔅᑕᐸᐅᑕᔭᓐ ᓂᓯᑕ᙮ ᐎᔾ ᒪᒃ ᒋ ᒋᔅᑕᐸᐅᑕᐤ ᓂᓯᑕ ᐅᒋᑯᐛᐳᐅᓂᒡ ᐅᒋ, ᑭᔭ ᒋ ᑲᓯᐊᒻ ᓂᓯᑕ ᐅᐱᔎᐅᓐ ᐊ ᐊᐱᒋᑕᑦ᙮ 45ᑲ ᐸᒋ ᐱᒐᔭᓐ ᐅᑕ ᓇᒪ ᒋ ᐅᒋ ᐸᒋ ᓱᐛᔨᒥᓐ, ᐎᔾ ᒪᒃ ᓇᒪ ᐊᔅᒄ ᐅᒋ ᐳᓂᐤ ᐊ ᓱᐛᔨᑕᐧᒃ ᓂᓯᑕ ᑲ ᐃᔅᐱᔅ ᐸᒋ ᐱᒐᐅᒡ᙮ 46ᓇᒪ ᑭᔭ ᒋ ᐅᒋ ᑐᒥᔅᑯᓇᓐ ᓂᔅᑎᒂᓐ, ᐎᔾ ᒪᒃ ᒋ ᐸᒋ ᑐᒥᓂᒻ ᓂᓯᑕ ᐊ ᐎᒋᒪᑯᓯᔨᒡ ᑐᒥᓂᑭᓂᔪᐤ᙮ 47ᒋ ᐎᑎᒪᑎᓐ, ᐊᓂᔭ ᓇᔅᒡ ᐊ ᓴᒋᐃᐛᑦ ᐊᑯᑕ ᐛᒋ ᓄᑯᓂᔨᒡ ᒥᒐᑦ ᐅᒥᒋᑥᐅᓇ ᐊᒋ ᐛᐸᔨᑎᒧᐛᑭᓄᐅᑦ᙮ ᐊᐛᓐ ᐊᐱᓯᔅ ᑲ ᐛᐸᔨᑎᒧᐛᑭᓄᐅᑦ ᐊᐱᓯᔅ ᓴᒋᐃᐛᐤ᙮”
48ᐊᑯ ᒋᓴᔅ ᒂ ᐃᑕᑦ ᐊᓂᔭ ᐃᔎᐛ, “ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ᙮”
49ᐊᓐᒡ ᒪᒃ ᑯᑎᑭᒡ ᐊᐛᓐᒋ ᐊᓐᑕ ᑲ ᐊᐱᒡ, ᒋ ᒪᒥᑐᓇᔨᑎᒧᒡ ᐅᔭᔪᐤ ᐊ ᐃᔅᒋᔄᒡ, “ᒐᒄ ᓇᐸᐤ ᐅ ᐛᐛᒡ ᒐᒋ ᐛᐸᔨᑎᒪᒐᑦ ᒥᒋᑥᐅᓇ ?”
50ᒋᓴᔅ ᒪᒃ ᒋ ᐃᑕᐤ ᐊᓂᔭ ᐃᔎᐛ, “ᒋᑕᑈᑎᒧᐅᓇ ᒋ ᐱᒪᒋᐃᑯᓐ᙮ ᒪᒋ ᒪᒃ ᒋᔭᒪᔨᑎᒧᐅᓐ ᒐ ᐊᔭᔨᓐ᙮”
Currently Selected:
ᓗᒃ 7: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
