ᒪᕐᒃ 6
6
ᒋᓴᔅ ᑲ ᐊᑐᐛᔨᒪᑭᓄᐅᑦ ᑎᐱᔨᐛ ᐅᑕᓇᒥᒡ
ᒪᑎᔪᐤ 13.53-58; ᓗᒃ 4.16-30
Mark 6.1-13 (Proper-9 Year B)
1ᒋ ᓂᑭᑎᒻ ᒋᓴᔅ ᐊᓂᔭ ᐊᓐᑕ ᑲ ᑕᑦ ᐊᑯ ᒂ ᐃᑐᑕᑦ ᐊᓐᑕ ᐊᓂᔭ ᐅᑕᓇᔪᐤ ᑲ ᓂᑕᐅᒋᓇᑭᓄᐅᑦ, ᓇᓴᕆᑦ ᑲ ᐃᓯᓂᐧᑲᑕᔨᒡ᙮ ᒋ ᐎᒐᐅᑯᐤ ᒪᒃ ᐅᒋᔅᒋᓄᐊᒧᐛᑭᓇ᙮ 2ᐊᓂᔭ ᒪᒃ ᐊ ᒍᐤ ᐊᔭᒥᐊᐅᒋᓯᑲᔨᒡ ᒋ ᒋᔅᑯᑎᒪᒐᐤ ᐊᓐᑕ ᐊᔭᒥᐊᐅᒋᐛᐱᒡ᙮ ᒋ ᒥᒐᑎᔪᐛ ᐊᐛᔪᐛ ᐊᓐᑕ ᑲ ᑕᔨᒋ ᐊ ᓂᑐᑕᑯᑦ᙮ ᒥᓯᐛ ᒪᒃ ᐊᓐᒡ ᐃᔪᒡ ᒋ ᒥᔅᑲᓯᑐᐛᐅᒡ ᑕᓐ ᑲ ᐃᔅᒋᔄᔨᒋ᙮
“ᑕᓐᑕ ᐛᑎᓇᐧᒃ ᐅᔭ ᑲ ᐃᔅᒋᔄᑦ ?” ᒋ ᐃᑎᑐᐅᒡ᙮ ᑭᔭ ᒋ ᐃᔅᒋᔄᐅᒡ, “ᑕᑈ ᑭᒐᑕᐛᔨᑎᒧᑕᑯᓱᐤ᙮” ᒋ ᐃᔅᒋᔄᐅᒡ ᑭᔭ, “ᑕᓐᑕ ᐛᒋ ᐃᑐᑕᐧᒃ ᐅᔭ ᒪᒥᔅᑲᒡ ᒐᒂᔪᐛ ? 3ᓇᒪᐎᔾ ᐊ ᐅᔭ ᑲ ᒥᔅᑎᑯᓇᐸᐎᔨᒋ ᒪᕆ ᐅᑯᓴ ? ᓇᒪᐎᔾ ᐊ ᐅᔭ ᐎᐧᑲᓂᓱᐛᐛ ᒋᒥᔅ, ᒍᓯᔅ, ᒍᑎᔅ ᑭᔭ ᓴᐃᒥᓐ ? ᓇᒪᐎᔾ ᐊ ᐅᑕ ᐎᒡ ᐃᔪᐛ ᑭᔭ ᐅᓯᒪ ?” ᐊᔪᐅᒄ ᐅᔭ ᑲ ᐃᓯ ᑯᒂᒋᒥᑐᒡ ᐛᔅ ᑕᐸ ᐅᒋ ᓇᐃᔅᑲᑯᐅᒡ ᑕᓐ ᑲ ᐃᑎᔨᒋ ᒋᓴᓴ᙮
4ᐊᑯ ᒋᓴᔅ ᒂ ᐃᑕᑦ, “ᐊᓐ ᐊᐛᓐ ᑲ ᐅᒋᔅᒋᐛᐃᒐᓱᐅᑦ ᒋᔅᑕᔨᒪᑭᓄᐤ ᐊᐃᒡ ᐅᑕᓇᒡ ᐊᑯ ᐊᓐᑕ ᑎᐱᔨᐛ ᐅᑦ ᐊᔅᒋᒡ ᐊ ᑕᑦ ᓇᒪ ᐊᐱᑕᔨᒪᑭᓄᐤ᙮ ᓇᒪ ᐛᐛᒡ ᒋᔅᑕᔨᒥᑯᐤ ᐎᐧᑲᓂᓴ ᑭᔭ ᐊᓂᔭᔪᐛ ᐊᓐᑕ ᐊ ᐸᐃᑯᔅᑲᓇᓯᑦ ᑲ ᑕᔨᒋ᙮” 5ᐊᓂᔭ ᒪᒃ ᐊᑲ ᐅᒋ ᑕᑈᑎᒥᔨᒋ ᓇᒪ ᐅᒋ ᐃᑐᑎᒻ ᒪᒥᔅᑲᒡ ᒐᒂᔪᐛ ᐊᓐᑕ, ᒥᒄ ᐱᔅᒐ ᐊᓂᔭᔪᐛ ᑲ ᐊᐧᑯᓯᔨᒋ ᒋ ᓴᒥᓇᐤ, ᒋ ᒥᓏᒋᐊᐤ ᒪᒃ᙮ 6ᒋ ᒪᒥᔅᑲᑕᔨᒪᐤ ᒪᒃ ᐊᓂᔭ ᐊ ᐃᔅᐱᔅ ᐊᑲ ᑕᑈᔭᔨᒥᑯᑦ᙮
ᒋᓴᔅ ᑲ ᒋᑎᓴᐛᑦ ᐅᒋᔅᒋᓄᐊᒧᐛᑭᓇ
ᒪᑎᔪᐤ 10.5-15; ᓗᒃ 9.1-6
ᒋ ᐊᒋᓇᔅᑭᒻ ᒪᒃ ᐊᓂᔭᔪᐛ ᐃᑕᐅᓂᓴ ᐊ ᐱᐸ ᒋᔅᑯᑎᒪᒐᑦ᙮ 7ᒋ ᐎᓴᒪᐤ ᐊᓂᔭ ᓂᓱᓴᑉ ᐅᒋᔅᒋᓄᐊᒧᐛᑭᓇ ᐊᑯ ᑲ ᒋᑎᓴᐛᑦ ᐊ ᓇᓂᓱᑕᔨᒋ᙮ ᒋ ᒥᔭᐤ ᑎᐸᔨᒋᒐᐅᓂᔪᐤ ᑭᔭ ᓱᐧᑲᑎᓯᐅᓂᔪᐤ ᒐᒋ ᑎᐸᔨᒪᔨᒋ ᒥᒋ ᐊᒐᒂ᙮
8ᒋ ᐃᑎᓱᒪᐤ ᒪᒃ ᐊᑲ ᓇᔅᒡ ᒐᒂᔪᐤ ᒐᒋ ᑕᐧᑯᓂᒥᔨᒋ, ᒥᒄ ᓯᔅᑲᐅᓂᔪᐤ ᒐᒋ ᑕᐧᑯᓂᒥᔨᒋ᙮ ᒋ ᐃᑎᓱᒪᐤ ᐊᑲ ᐛᐛᒡ ᒥᒋᒥᔪᐤ ᒐᒋ ᑕᐧᑯᓂᒥᔨᒋ, ᒪᒃ ᓂᒪᐅᑕᓂᔪᐤ ᒐᒋ ᑕᐧᑯᓂᒥᔨᒋ ᑭᔭ ᐊᑲ ᐛᐛᒡ ᒐᒋ ᓂᒥᓱᓇᔭᐛᔨᒋ᙮ 9ᒋ ᐃᑕᐤ ᒥᒄ ᐊᓂᔭ ᒥᔅᒋᓇ ᑲ ᒋᔅᑭᒥᔨᒋ ᒐ ᑕᐧᑯᓂᒥᔨᒋ᙮ ᑭᔭ ᐊᑲ ᑯᑎᒋᔪᐤ ᐱᒍᐎᔭᓂᔪᐤ ᒐᒋ ᑕᐧᑯᓂᒥᔨᒋ᙮ 10ᒋ ᐃᑕᐤ ᑭᔭ, “ᐊᓐᑕ ᒐ ᐱᑎᑲᐃᑯᐛᒂ ᒥᒋᐛᑉ ᐊᑯᑕ ᐊᓐᑕ ᑕᒄ ᐸᑐᔅ ᓂᑭᑎᒪᒂ ᐊᓐ ᐅᑕᓇᐤ᙮ 11ᐊᑲ ᒪᒃ ᐎ ᐱᑎᑲᐃᑯᔭᒂ ᒪᒃ ᐊᑲ ᐎ ᓂᑐᑕᑯᐅᔭᒂ, ᓂᑭᑎᒪᒂ ᐊᓐ ᐅᑕᓇᐤ ᒐ ᐸᐳᓯᑕᓯᒧᔭᒄ᙮ ᐊᐅᒄ ᒐ ᐃᑎᔭᒄ ᐊ ᓄᑯᑕᔭᒄ ᐊ ᐃᔭᒂᒥᒪᑯᒡ ᐊᓐᒡ ᐃᔪᒡ ᐊᓐᑕ ᑲ ᑕᒡ᙮”
12ᐊᑯ ᒪᒃ ᒂ ᔅᑐᑕᒡ ᐊᓐᒡ ᒋᔅᒋᓄᐊᒧᐛᑭᓐᒡ ᑲ ᑭᒐᔅᒋᒪᒡ ᐊᐛᔪᐛ ᒐᒋ ᒂᔅᑲᑎᓯᔨᒋ᙮ 13ᒋ ᐎᐎᑎᓴᐛᐅᒡ ᒥᒋ ᐊᒐᒂ ᑲ ᐱᒋᔅᑯᐛᔨᒋ ᐊᐛᔪᐛ ᑭᔭ ᒋ ᑐᒥᓇᐅᒡ ᒥᒐᑦ ᐊᐛᔪᐛ ᑲ ᐊᐧᑯᓯᔨᒋ, ᒋ ᒥᓏᑎᓯᔪᐛ ᒪᒃ᙮
ᒠᓐ ᐅᓯᑲᐃᑕᒐᐤ ᑲ ᓂᐸᐊᑭᓄᐅᑦ
ᒪᑎᔪᐤ 14.1-12; ᓗᒃ 9.7-9
Mark 6.14-29 (Proper-10 Year B)
14ᒋᓴᐅᒋᒪᐤ ᐊᕈᑦ ᒪᒃ ᒋ ᐸᑎᒻ ᑕᓐ ᑲ ᐃᔅᐱᔨᒡ, ᐛᔅ ᒋ ᒥᓯᑕᐱᔪᐤ ᑕᓐ ᐊ ᐃᑕᒋᒪᑭᓄᐅᑦ ᒋᓴᔅ᙮ ᐱᔅᒐ ᐊᐛᓐᒋ ᒋ ᐃᔅᒋᔄᐅᒡ, “ᐊᐎᒐ ᐅ ᒠᓐ ᐅᓯᑲᐃᑕᒐᐤ, ᒋ ᐅᓂᔅᑲᒐ ᓂᐳᐅᓂᒡ ᐅᒡ᙮ ᐊᔪᐅᒄ ᐅᔭ ᐛᒋ ᐃᑎᑦ ᐅᔭ ᒪᒥᔅᑲᒡ ᒐᒂᔪᐛ ᒐᒋ ᐃᑐᑕᐧᒃ᙮” 15ᐊᑯ ᑯᑎᑭᒡ ᐊᐛᓐᒋ ᒂ ᐃᔅᒋᔄᒡ, “ᐃᓚᐃᒐ ᐅ᙮” ᐊᑯ ᒥᓐ ᑯᑎᑭᒡ ᒂ ᐃᔅᒋᔄᒡ, “ᐊᐅᒄ ᐸᐃᒄ ᐅᒋᔅᒋᐛᐃᒐᓱᐤ ᐊᓐᑕ ᐛᔅᑭᒡ ᑲᒋ ᒋᔅᒋᐛᐃᒐᑦ᙮”
16ᐊᕈᑦ ᒪᒃ ᐱᔭᑕᐧᒃ ᐅᔭ ᐊ ᐃᓇᓄᐎᒡ ᒋ ᐃᔅᒋᔄᐤ, “ᒠᓐ ᐅᓯᑲᐃᑕᒐᐤ ᐅ᙮ ᐊᐅᒄ ᑲ ᒋᒥᔅᑎᒂᓇᐅᒃ, ᒥᓐ ᑲᐤ ᐱᒪᑎᓯᐤ᙮” 17ᐎᔾ ᐊᕈᑦ ᒋ ᐃᑎᓱᐛᒐ ᒐᒋ ᒪᑯᓇᑭᓄᔨᒋ ᒠᓇ ᑭᔭ ᒐᒋ ᒪᑯᐱᑕᑭᓄᔨᒋ ᑭᔭ ᑲᒪᑯᓄᐛᓯᐅᒋᐛᐱᒡ ᒐᒋ ᒋᐸᐛᑭᓄᔨᒋ᙮ ᐎᐛ ᐊᕈᑎᔭᓴ ᒋ ᐃᑐᑎᒧᐛᐤ ᐅᔭ ᐛᒋ ᐃᑐᑐᐛᑦ ᒠᓇ᙮ ᐅᔭ ᐃᔎᐛ ᑲ ᐎᒋᒪᑦ ᐊᕈᑦ ᐎᐧᑲᓂᓴ ᐱᓕᐸ ᐊᓂᔭ ᒋ ᐎᐎᔪᐛ᙮ 18ᒠᓐ ᒋ ᐃᑕᒐ ᐊᓂᔭ ᐊᕈᑕ, “ᒋ ᐱᑯᓇᓐ ᐎᓱᐛᐅᓐ ᐊ ᐎᐎᔨᓐ ᒋᐧᑲᓂᔅ ᐎᐛ᙮”
19ᐊᑯ ᐊᓐ ᐊᕈᑎᔭᔅ ᓇᒪ ᐅᒋ ᓇᐃᔅᑲᑯᒐ ᐊᓂᔭ ᑕᓐ ᑲ ᐃᔅᒋᔄᔨᒋ ᒠᓇ ᐊᑯ ᒂ ᓂᑐᐛᔨᒪᑦ ᒐᒋ ᓂᐸᐊᑭᓄᔨᒋ᙮ ᒥᒄ ᒪᒃ ᓇᒪ ᐅᒋ ᐃᑐᑎᒻ ᐅᔭ, 20ᐛᔅ ᐊᕈᑦ ᒋ ᑯᔅᑕᐤ ᐊᓂᔭ ᒠᓇ, ᐊᒋ ᒋᔅᒐᔨᒪᑦ ᐊ ᑯᐃᔅᑯᑕᑎᓯᔨᒋ ᑭᔭ ᐊ ᐸᔭᒋᓯᔨᒋ᙮ ᐊᐅᒄ ᒪᒃ ᐅᔭ ᐛᒡ ᐊᑲ ᐅᒋ ᐎ ᐱᒪᔨᒪᑦ᙮ ᒋ ᒥᔽᔨᒪᐤ ᐊ ᓂᑐᑐᐛᑦ ᐊᑎ ᒧᔅ ᐊᒋ ᒥᑯᔅᑲᑕᔨᑎᒥᐃᑯᐛᑦ ᑕᓐ ᑲ ᐃᔅᒋᔄᔨᒋ ᑕᑥᐤ ᐊ ᓂᑐᑐᐛᑦ᙮
21ᒐᒃ ᒪᒃ ᒋ ᓇᐃᐱᔪᐤ ᐊᕈᑎᔭᔅ ᒐᒋ ᐃᑎᑦ ᑕᓐ ᑲ ᐎ ᐃᑎᑦ᙮ ᐊᕈᑦ ᒋ ᐅᒋᓯᑯᒧᐤ᙮ ᒋ ᐎᓴᒪᐤ ᒥᓯᐛ ᐊᐛᔪᐛ ᒪᐅᒡ ᓂᑲᓐ ᑲ ᐃᑕᔨᑕᑯᓯᔨᒋ ᐊ ᒋᓴᐅᒋᒪᐤ ᐊᑐᔅᒐᔨᒋ᙮ ᒋ ᐎᓴᒪᐤ ᑭᔭ ᓂᑐᐱᔪᐅ-ᐅᒋᒪᐛ, ᑭᔭ ᓇᐸᐛ ᑲ ᐅᒋᒪᐛᔨᑕᑯᓯᔨᒋ ᐊᓐᑕ ᑲᓕᓕ ᐊᔅᒋᒡ ᑲ ᑕᔨᒋ᙮ 22ᐊᓂᔭ ᒪᒃ ᐊᕈᑎᔭᔅ ᐅᑕᓂᓴ ᒋ ᐸᒋ ᓂᒥᔪᐛ ᐊᑯ ᓇᔅᒡ ᑲ ᒥᔽᔨᑎᒥᔨᒋ ᐊᕈᑕ ᑭᔭ ᒥᓯᐛ ᐊᓂᔭ ᐊᐛᔪᐛ ᑲ ᐎᓴᒪᑭᓄᔨᒋ᙮ ᐊᑯ ᒋᓴᐅᒋᒪᐤ ᐊᕈᑦ ᒂ ᐃᑕᑦ ᐊᓂᔭ ᐃᔎᓴ, “ᐸᒋ ᐎᑎᒧᐎ ᒐᒂᓐ ᒋᐸ ᒥᔽᔨᑕᓐ ᒥᔨᑕᓐ᙮ ᒥᒄ ᒐ ᐃᓯ ᓂᑐᐛᔨᑎᒧᐎᓇ ᐊᐅᑯᓐ ᐊᓐ ᒐ ᒥᔨᑕᓐ᙮” 23ᒋ ᐃᔅᒋᔄᐤ ᑭᔭ ᒐᔅᑎᓇᔅ ᒐ ᐃᑐᑎᒧᐛᑦ ᒐ ᐃᓯ ᓂᑐᐛᔨᑎᒥᒂᓂ᙮ ᒋ ᐃᑕᐤ, “ᒥᒄ ᒐᒂᓐ ᒐ ᓂᑐᐛᔨᑎᒧᐎᓇ ᒋᑭ ᒥᔨᑎᓐ, ᐊᑎ ᐊᐱᑐᐤ ᐊᓐ ᐊᔅᒋᔾ ᐊᓐᑕ ᐛᒋᒪᐎᔭᓐ ᓂᑐᐛᔨᑎᒥᓇ ᐃᔭᐱᒡ ᒋᑭ ᒥᔨᑎᓐ᙮”
24ᐊᑯ ᒂ ᐎᐎᑦ ᐊᓐ ᐃᔎᔅ ᒂ ᑯᒂᒋᒪᑦ ᐅᑲᐎᔭ ᐊ ᐃᑕᑦ, “ᒐᒂᓐ ᒐ ᓂᑐᐛᔨᑎᒪᓐ ?” ᐊᑯ ᒂ ᐃᑎᑯᑦ, “ᒠᓐ ᐅᓯᑲᐃᑕᒐᐤ ᐅᔅᑎᒂᓐ᙮” 25ᐊᑯ ᐊᓐ ᐃᔎᔅ ᑎᐛᒡ ᑲ ᐃᔅᐸᑕᑦ ᐊᓐᑕ ᐊᓂᔭ ᒋᓴᐅᒋᒪᐛ ᐊᕈᑕ ᐊ ᑕᔨᒋ ᒂ ᐃᑕᑦ, “ᐊᓄᒡ ᓂᑐᐛᔨᑎᒺᓐ ᒠᓐ ᐅᓯᑲᐃᑕᒐᐤ ᐅᔅᑎᒂᓐ ᒐᒋ ᐸᑕᑭᓄᔨᒡ ᐎᔭᑭᓂᒡ ᐊ ᐊᔅᑕᔨᒡ᙮”
26ᒋᒋᐛ ᒋ ᒥᒐᔨᑎᒻ ᐊᓐ ᒋᓴᐅᒋᒪᐤ ᐅᔭ ᑲ ᐃᓯ ᑯᒂᒋᒐᔨᒧᔨᒋ, ᐛᐛᒡ ᐎᔾ ᓴᔅ ᐊᒋ ᐃᑕᑦ ᒐᔅᑎᓇᔅ ᒐ ᐃᑐᑎᒧᐛᑦ ᒥᒄ ᑕᓐ ᒐ ᐃᓯ ᓂᑐᐛᔨᑎᒥᒂᓂ ᑭᔭ ᐊᓂᔭ ᐊᒋ ᒥᒐᑎᓇᓄᐎᒡ ᐊᓐᑕ ᒪᒂᒡ ᐅᔭ ᑲ ᐃᑕᑦ ᑭᑈ ᓇᒪ ᐅᒋ ᐎ ᐱᑯᓂᒻ ᐊᓂᔭ ᑕᓐ ᑲ ᐃᑕᑦ᙮ 27ᑎᐛᒡ ᒂ ᒋᑎᓴᐛᑦ ᐊᓯᒪᑭᓂᓴ ᐊᒋ ᐃᑎᓱᒪᑦ ᒐᒋ ᐸᑕᔨᒋ ᒠᓇ ᐅᔅᑎᒂᓂᔪᐤ᙮ ᐊᑯ ᐊᓐ ᐊᓯᒪᑭᓂᔅ ᒂ ᐃᑐᑕᑦ ᐊᓐᑕ ᑲᒪᑯᓄᐛᓯᐅᒋᐛᐱᒡ ᐊᓐᑕ ᒠᓇ ᑲ ᑕᔨᒋ ᒂ ᒋᒥᔅᑎᒂᓇᔄᑦ᙮ 28ᐎᔭᑭᓂᒡ ᒂ ᐊᔅᑕᐛᑦ ᐊᓂᔭ ᐅᔅᑎᒂᓂᔪᐤ ᐊᑯ ᒂ ᒥᔭᑦ ᐊᓂᔭ ᐃᔎᓴ ᐊᑯ ᐊᓐ ᐃᔎᔅ ᐅᑲᐎᔭ ᒂ ᒥᔭᑦ᙮ 29ᒠᓐ ᒪᒃ ᐅᒋᔅᒋᓄᐊᒧᐛᑭᓇ ᐃᔅᐱ ᐱᔭᑎᒥᔨᒋ ᐅᔭ ᒋ ᓂᑐᐛᐸᑎᒺᐅᒡ ᐎᔭᔪᐤ ᐊᑯ ᒂ ᓇᐃᐧᑭᒺᒡ᙮
ᒋᓴᔅ ᑲ ᐊᓯᒪᑦ ᐱᑕᑕᒡ ᒐᓯᐱᔪᐤ ᐊᐛᔪᐛ
ᒪᑎᔪᐤ 14.13-21; ᓗᒃ 9.10-17; ᒠᓐ 6.1-14
Mark 6.30-34,53-56 (Proper-11 Year B)
30ᒋᓴᔅ ᐅᑦ ᐊᑈᔅᑕᓂᒪ ᒥᓐ ᐎᔭᐱᒥᑯᑦ ᒋ ᐎᑎᒪᑯᐤ ᒥᓯᐛ ᑕᓐ ᑲ ᐊᐃᑎᔨᒋ ᑭᔭ ᑕᓐ ᑲ ᐃᓯ ᒋᔅᑯᑎᒪᒐᔨᒋ᙮ 31ᓇᔅᒡ ᒪᒃ ᒋ ᒥᒐᑎᔪᐛ ᐊᐛᔪᐛ ᐊ ᑎᑯᓯᓂᔨᒋ ᐊ ᐸᒋ ᓂᑐᐛᐱᒥᑯᒡ ᐊᑯ ᓇᒪ ᐛᐛᒡ ᐅᒋ ᐃᔅᐱᓯᔪᐅᒡ ᒐᒋ ᒥᒋᓱᒡ᙮ ᐊᑯ ᒋᓴᔅ ᒂ ᐃᑕᑦ ᐊᓂᔭ ᐅᒋᔅᒋᓄᐊᒧᐛᑭᓇ, “ᐊᔅᑎᒧᒄ ᒥᒄ ᒋᔨᐛᐤ ᐊᓐᑕ ᐊᑲ ᑕᓄᐅᒡ, ᒐ ᐊᔅᑕᔭᔅᑯᓯᔭᒄ᙮” 32ᐊᑯ ᒂ ᐊᓱᐊᒡ, ᐊᓐᑕ ᒂ ᐊᑎ ᐃᔅᒋᒪᒡ ᐊᑲ ᐃᑕᓄᐎᒡ᙮
33ᒥᒐᑦ ᒪᒃ ᐊᐛᔪᐛ ᒋ ᐛᐱᒥᑯᐅᒡ ᑭᔭ ᑎᐛᒡ ᒋ ᓂᔅᑐᓇᑯᐅᒡ ᑲ ᐛᐱᒥᑯᒡ᙮ ᓂᓇᐧᑯᐤ ᒪᒃ ᐅᑕᓇᒡ ᒋ ᐅᒋᐸᔨᑐᐅᒡ ᐊ ᐎ ᐅᑎᑕᒡ ᐊᓐᑕ ᑲ ᐎ ᐃᔅᒋᒪᔨᒋ ᒋᓴᓴ ᑭᔭ ᐊᓂᔭᔪᐛ ᐅᒋᔅᒋᓄᐊᒧᐛᑭᓂᔪᐛ᙮ ᐊᓐᒡ ᒪᒃ ᐃᔪᒡ ᒋ ᐎ ᐊᑎᔅᑯᐛᐅᒡ ᓇᑕ ᒐ ᓇᑎᑭᒪᒥᔨᒋ᙮ 34ᐃᔅᐱ ᒋᓴᔅ ᑲᐸᑦ ᐊᓂᔭ ᐅᐤᑎᔪᐤ ᒋ ᐛᐱᒪᐤ ᐊᓂᔭ ᐃᔪᐛ ᐊ ᒥᒐᑎᔨᒋ᙮ ᓇᔅᒡ ᒪᒃ ᒋ ᒧᓯᑕᐤ ᐊ ᒋᔅᑎᒪᒐᔨᒪᑦ ᒧᔭᒻ ᒪᔭᑕᓂᓯᒡ ᐊᑲ ᐊᔭᐛᒡ ᒪᔭᑕᓂᓯᐅ-ᐃᔪᐛ ᒐ ᓂᓇᑭᑐᐛᔨᒥᑯᒡ ᐊ ᐃᓯᓇᑯᓯᒡ᙮ ᐊᑯ ᒂ ᒋᔅᑯᑎᒧᐛᑦ ᒥᒐᑦ ᒐᒂᔪᐛ᙮ 35ᐊᓂᔭ ᒪᒃ ᐊ ᐊᑎ ᐅᑕᑯᓯᔨᒡ ᐊᓐᒡ ᒋᔅᒋᓄᐊᒧᐛᑭᓐᒡ ᒋ ᓇᑕᐅᒡ ᒋᓴᓴ ᐊᑯ ᒂ ᐃᑕᒡ, “ᓴᔅ ᒋᒋᐛ ᐅᑕᑯᓯᐤ ᑭᔭ ᓇᒪ ᑎᑯᓐ ᐅᑕᓇᐤ ᐅᑕ ᐅ ᑲ ᐃᑕᔭᐧᒄ᙮ 36ᐃᒐᑎᓴᐅᒡ ᐅᒡ ᐃᔪᒡ ᒐᒋ ᐅᑎᓂᒐᒡ ᒐᒂᔪᐤ ᒐ ᒥᒋᒡ ᐊᓐᑕ ᐊᓂᔭᔪᐛ ᐅᑕᓇᐛ ᒥᒋᒪ ᐅᑕ ᐛᔅᑲ ᑲ ᑎᑯᓂᔨᒋ᙮”
37ᒋᓴᔅ ᒪᒃ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᒋᔨᐛᐤ ᒥᔭᐧᑯᒡ ᒐᒂᔪᐤ ᒐ ᒥᒋᒡ᙮” ᒂ ᑯᒂᒋᒪᒡ ᐊ ᐃᑕᒡ, “ᓂᔭᓐ ᐊ ᒋ ᓂᑐᐛᔨᒥᓇᓐ ᓂᓱ ᒥᑕᓯᒥᑎᓄᐤ ᓱᓇᔭᐱᔅᑯᓯᒡ ᒐᒋ ᐃᔅᐱᔅ ᐊᐱᒋᐃᒋᒡ ᐊ ᐅᑎᓂᒋᑦ ᐸᒂᓯᑭᓐ ᒐᒋ ᒥᒋᓱᒡ ᐅᒡ ᐃᔪᒡ ?” 38ᐊᑯ ᒋᓴᔅ ᒂ ᐃᑕᑦ, “ᑕᓐ ᒪᒃ ᐊ ᐃᔅᐱᔅ ᐊᔭᐛᒄ ᐸᒂᓯᑭᓐ ? ᒪᒋᒄ ᓂᑐ ᒋᔅᒐᔨᑎᒧᒄ᙮” ᐃᔅᐱ ᒪᒃ ᑲ ᓂᑐ ᒋᔅᒐᔨᑕᒡ ᐊᑯ ᒂ ᐎᑎᒧᐛᒡ ᒋᓴᓴ, “ᐱᑕᑕᒡ ᐸᒂᓯᑭᓐᒡ ᑭᔭ ᓂᓱ ᓂᒪᓯᒡ ᑕᐅᒡ᙮”
39ᐊᑯ ᒪᒃ ᒋᓴᔅ ᒂ ᐃᑕᑦ ᐅᒋᔅᒋᓄᐊᒧᐛᑭᓇ ᒐᒋ ᐃᑕᔨᒋ ᐊᓂᔭᔪᐛ ᐃᔪᐛ ᒐᒋ ᒪᒥᓇᐱᔨᒋ ᐊᓐᑕ ᒥᔅᑯᓯᒡ᙮ 40ᒂ ᐊᑎ ᐛᐛᔨᐱᐃᓱᒡ ᐊᓐᒡ ᐃᔪᒡ, ᐊ ᐸᐸᐃᑯᒥᑕᓯᒥᑎᓄᐛᐱᒡ ᑭᔭ ᐊ ᐸᐱᑕᑕᑐᔪᐛᐱᒡ᙮ 41ᐊᑯ ᒋᓴᔅ ᐛᑎᓇᑦ ᐊᓂᔭ ᐱᑕᑕᒡ ᐸᒂᓯᑭᓇ ᑭᔭ ᐊᓂᔭ ᓂᓱ ᓂᒪᓴ, ᐃᔅᐱᒥᒡ ᒂ ᐃᓯ ᑎᔅᑎᓴᐱᑦ ᐊ ᓂᓇᔅᑯᒪᑦ ᒋᓴᒪᓂᑐᐛ᙮ ᒋ ᐸᐱᑯᐱᑕᐤ ᒥᓯᐛ ᐊᓂᔭᔪᐛ ᐸᒂᓯᑭᓇ, ᐊᑯ ᒂ ᒥᔭᑦ ᐅᒋᔅᒋᓄᐊᒧᐛᑭᓇ ᒐᒋ ᒪᑎᓄᐛᔨᒋ᙮ ᑭᔭ ᐊᓂᔭᔪᐛ ᓂᓱ ᓂᒪᓴ ᒋ ᒪᑎᓂᒧᐛᐤ ᒐᒋ ᒪᑎᓂᒧᐛᔨᒋ ᒥᓯᐛ ᐊᐛᔪᐛ ᐊᓐᑕ ᑲ ᑕᔨᒋ ᒐᒋ ᒥᒋᓱᔨᒋ᙮ 42ᒥᓯᐛ ᒪᒃ ᐊᐛᓐ ᒋ ᒥᒋᓱᐤ ᑭᔭ ᒋ ᑕᐱᔅᑯᔪᐤ᙮ 43ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒂ ᒪᒧᓴᒋᓇᒡ ᐃᔅᑯᔅᑐᐛᓂᔪᐤ᙮ ᓂᓱᓴᑉ ᒪᒃ ᐅᑎᐱᐅᑕ ᒋ ᓴᑭᔅᒋᓂᑕᐅᒡ ᐊᓂᔭ ᑲ ᐃᔅᐱᔅ ᐃᔅᑯᐳᐛᑭᓄᔨᒋ ᐸᒂᓯᑭᓇ ᑭᔭ ᓂᒪᓴ᙮ 44ᐱᑕᑕᒡ ᒐᓯᐱᔪᐤ ᒪᒃ ᒋ ᐃᑕᑎᓯᒐᓂᒋ ᓇᐸᐅᒡ ᑲ ᐊᓯᒪᑭᓄᐎᒡ᙮
ᒋᓴᔅ ᓂᐱᒡ ᑲ ᐱᒧᑕᑦ
ᒪᑎᔪᐤ 14.22-33; ᒠᓐ 6.15-21
45ᒋᓴᔅ ᒪᒃ ᑎᐛᒡ ᒋ ᐃᑎᓱᒪᐤ ᐅᒋᔅᒋᓄᐊᒧᐛᑭᓇ ᒐᒋ ᐳᓯᔨᒋ, ᓂᑲᓐ ᒐᒋ ᐃᔅᒋᒪᔨᒋ ᓇᑕ ᐊᓂᔭ ᐅᑕᓇᔪᐤ ᐊᑲᒥᒡ ᑲ ᑎᑯᓂᔨᒡ, ᐸᑦᓴᐃᑕ ᑲ ᐃᓯᓂᐧᑲᑕᔨᒡ᙮ ᐊᑯᑕ ᐎᔾ ᑲ ᑕᑦ, ᒂ ᐃᑕᑦ ᐊᓂᔭᔪᐛ ᐃᔪᐛ ᐊᓐᑕ ᑲ ᑕᔨᒋ ᒐᒋ ᒋᐛᔨᒋ᙮ 46ᐃᔅᐱ ᒪᒃ ᑲ ᐛᒋᔭᒪᑦ ᐊᓂᔭᔪᐛ ᐃᔪᐛ ᐊᑯ ᐱᔅᑯᑎᓇᔪᐤ ᒂ ᓴᑭᒋᐛᑦ ᒋᓴᔅ, ᒂ ᐊᔭᒥᐊᑦ ᐊᓐᑕ᙮
47ᐊ ᐊᑎ ᐅᑕᑯᓯᔨᒡ ᒪᒃ ᑕᑕᐅᑲᒻ ᒋ ᑕᐅᒡ ᐊᓐᒡ ᒋᔅᒋᓄᐊᒧᐛᑭᓐᒡ᙮ ᒪᒂᒡ ᐃᔭᒡ ᒋ ᑕᐤ ᐎᔾ ᒋᓴᔅ᙮ 48ᒋ ᐛᐱᒪᐤ ᐅᒋᔅᒋᓄᐊᒧᐛᑭᓇ ᓇᔅᒡ ᐊ ᒥᔅᑎ ᐱᒥᔅᑲᔨᒋ, ᐛᔅ ᒋ ᓇᑲᔭᓯᔪᐛ᙮ ᐊᑯ ᒪᒃ ᐊᔅᒄ ᐊ ᑎᐱᔅᑲᓯᔨᒡ ᓴᓯᑲᓐ ᓂᔅᑐ ᑭᔭ ᐊᓱᑕᒡ ᐊ ᐃᔅᐱᔨᒡ, ᒋᓴᔅ ᒋ ᓇᑕᐤ ᐅᒋᔅᒋᓄᐊᒧᐛᑭᓇ ᓂᐱᒡ ᐊ ᐱᒧᑕᑦ᙮ ᒋᐸ ᐊᑎ ᐎᒪᔅᑲᐛᐤ ᑭᑈ, 49ᒥᒄ ᒪᒃ ᒋ ᐛᐱᒥᑯᐤ ᐊᓐᑕ ᓂᐱᒡ ᐊ ᐱᒧᑕᑦ᙮ ᒋᐱᔾ ᒋ ᐃᑕᔨᒥᑯᐤ, ᐊᑯ ᒂ ᐊᓯᒂᔨᒋ᙮ 50ᒥᓯᐛ ᒋ ᓴᒋᓱᐅᒡ ᐊᓐᒡ ᒋᔅᒋᓄᐊᒧᐛᑭᓐᒡ ᐃᔅᐱ ᐎᔭᐱᒪᒡ ᒋᓴᓴ᙮
ᒋᓴᔅ ᒪᒃ ᑎᐛᒡ ᒋ ᐃᔨᒪᐊᐤ ᐊ ᐃᑕᑦ, “ᒋᔭᒪᔨᑎᒧᒄ, ᐊᐅᒄ ᐛᔅ ᐊᓐ ᓂᔾ᙮ ᐊᑲᐎᔾ ᑯᔅᑕᒋᒄ᙮” 51ᒂ ᐳᓯᑐᐛᑦ᙮ ᐊᓂᔭ ᒪᒃ ᐊ ᐊᑎ ᐳᓯᑐᐛᑦ ᐊᑯ ᑎᐛᒡ ᒂ ᐊᑎ ᒋᒥᔅᑎᓂᔨᒡ᙮ ᐊᔪᐛᒡ ᒪᒃ ᒋ ᒥᔅᑲᑕᔨᑎᒧᒡ ᐊᓐᒡ ᒋᔅᒋᓄᐊᒧᐛᑭᓐᒡ ᐅᔭ ᐊ ᐃᔅᐱᔨᒡ᙮ 52ᐛᔅ ᑕᐸ ᐅᒋ ᓂᔅᑐᑎᒧᒡ ᑕᓐ ᐊ ᐃᓯ ᐎᑎᒪᒐᒥᑭᓂᔨᒡ ᐊᓂᔭ ᐸᒂᓯᑭᓇ ᑲ ᐊᓯᒪᑭᓄᔨᒋ ᐱᑕᑕᒡ ᒐᓯᐱᔪᐤ ᐃᔪᐛ᙮ ᓇᒪ ᐅᒋ ᓂᔅᑐᑎᒧᒡ ᐛᓴ ᐊᒋ ᒥᔅᑯᑕᐊᒡ᙮
ᒋᓴᔅ ᑲ ᒥᓏᒋᐃᐛᑦ ᐊᓐᑕ ᑲᓇᓴᕆᑎᒡ
ᒪᑎᔪᐤ 14.34-36
Mark 6.30-34,53-56 (Proper-11 Year B)
53ᒋ ᐊᓱᐊᒧᒡ ᐊᓂᔭ ᓴᑲᐃᑭᓂᔪᐤ ᒐᒃ ᑲ ᒥᓯᑲᒡ ᓇᑕ ᑲᓇᓴᕋᑦ ᑲ ᐃᓯᓂᐧᑲᑕᔨᒡ᙮ ᒂ ᒪᑯᐱᑕᒡ ᐊᓂᔭ ᐅᑦ ᐅᐤᑐᐛᐤ᙮ 54ᐊ ᐊᑎ ᓂᑭᑕᒡ ᒪᒃ ᐊᓂᔭ ᐅᑦ ᐅᐤᑐᐛᐤ ᑎᐛᒡ ᒋ ᓂᔅᑐᓇᑯᐤ ᒋᓴᔅ ᐊᐛᔪᐛ᙮ 55ᐊᑯ ᐊᓐᒡ ᐃᔪᒡ ᒥᓯᐛ ᑲ ᐃᔅᐸᔨᑐᒡ ᐊᓂᔭ ᐅᑕᓇᔪᐤ ᐊ ᐃᔅᐱᓴᔨᒡ ᑭᔭ ᐊᓐᑕ ᐎᐎᑎᒥᒡ ᐊ ᐛᐎᑎᒧᐛᒡ ᐊᐛᔪᐛ ᑕᓐᑕ ᐊ ᑕᔨᒋ ᒋᓴᓴ᙮ ᑕᓐᑕ ᒪᒃ ᑲ ᐊᑎ ᑕᔨᒋ ᒋᓴᓴ ᐊᑯᑕ ᑲ ᐸᓱᐛᒡ ᐅᑦ ᐊᐧᑯᓯᐎᒧᐛᐛ ᑕᑕᒋᓂᑭᓂᒡ ᐊ ᐱᒥᓯᓂᔨᒋ᙮ 56ᒥᓯᐛ ᒪᒃ ᐊᓐᑕ ᑲ ᐊᑎ ᐃᑐᑕᑦ ᒋᓴᔅ ᐅᑕᓇᒡ ᑭᔭ ᐊ ᐅᑕᓇᐎᔨᒡ, ᒪᒃ ᓂᑕᐅᒋᑕᑭᓐ ᐊᔅᒋᒡ, ᐊᓐᒡ ᐃᔪᒡ ᐊᓐᑕ ᑲ ᑕᒡ ᒋ ᐃᑐᑕᐊᐅᒡ ᐅᑦ ᐊᐧᑯᓯᐎᒧᐛᐛ ᐊᓐᑕ ᒧᔅ ᑲᒋ ᒪᒧᐎᓇᓄᐎᒡ ᐊ ᐊᑕᐛᓄᐎᔨᒋ ᒐᒂᔪᐛ᙮ ᐊᑯ ᐊᓐᒡ ᑲ ᐊᐧᑯᓯᒡ ᒂ ᓂᑐᑎᒧᐛᒡ ᒋᓴᓴ ᒐᒋ ᓇᐊᔨᒥᑯᒡ ᒥᒄ ᒐᒋ ᑕᒋᓂᒺᒡ ᐊ ᐅᓂᔎᑭᓂᔨᒡ ᐅᑦ ᐊᑯᐱᔪᐤ᙮ ᒥᓯᐛ ᒪᒃ ᐊᐛᔪᐛ ᑲ ᑕᒋᓂᒥᔨᒋ ᐅᑦ ᐊᑯᑉ ᒋ ᒥᓏᑎᓯᔪᐛ᙮
Currently Selected:
ᒪᕐᒃ 6: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
